Guni Kakuti Kurani

Yekova nasoga gu boro nabirika gani badiarogatise. (Maraki 2:16) Ho boro amanga gipai ni re, si nasa gani badiarogatise ka ní nikidongo kutini ya. Na kido nga guhe rengbe ka sa nyemuse si moipai.

Dungu apai duho areme nasa arogotise ka i nyenga ni ruruyo fu gayo abadiarogatise ya. Tipa ka banda gamo rogatise, mo du wa ka mo mangi apai ue.

1 MO PERESI PA GAMO ROGATISE MBATAYO

GUPAI ZIAZIA KEKEAPAI AGUMBAHA: ‘Oni naata wa airatatamana.’ (AEfeso 5:15, 16) Si ni patatamana mo nibi gamo rogatise ni guhe du dagba agu ahe nyakipaha gbe rogo gamo raka.

Yekova nakpinyemu gupai nga arogotise niraki sa na “ngbarago.” (Batungusipai 9:9) Ko nagumba gupai agumba ziazia nga ka mo gbenga berãro kusayo ti gamo badiarogatise ya, ono mo nigbata gene ti aregbo dũ ka sa ngbarago tiní. (1 AKorindo 10:24) Mo sa ní ní nibihe nga mo naida ní aida na pani ima nyaka foro.

GUPAI RENGBE MO KA MANGAHA:

• Mo nidi regbo kaa sungo na gamo badiarogatise dedede, berãro ki du kina koyo du ní ni

• Mo niberẽ gupai ti aregbo dũ nga oni ue, angianga kaa berã kina pa tiro ya

2 MO BANDA KPOTOROYO

GUPAI ZIAZIA KEKEAPAI AGUMBAHA: “Gu ni nangana de ni nyemu ri ni ima manga bari na ri kpotoni yo.” (Matayo 5:28) Ka kumbakudee aberãpa kura dee watadu ka diakumba aberãpa kura kumba, gure nga ní ni ruru ní fu gani badiarogatise te.

Yekova nape gupai nga si naida mo “nibánda kpotoro yo ngangarã.” (Asanza 4:23; Yeremaya 17:9) Tipa ka manga gipai re, mo du wa ka mo banda bangiro. (Matayo 5:29, 30) Mo pekefuo gu kpiapai nga ga Eyobo, namangi mozunga na bangiriko ka he ngana kura dee na nyemuri. (Eyobo 31:1) Mo nyakasi kpotoroyo ka he bi gu wasiwasiapai nazingisa nyemu kodaba. Na ka mo asadingo ka zio tiro kuti kura boro nga guni angianga gamo badiarogatise ya.

GUPAI RENGBE MO KA MANGAHA:

• Mo yugu gupai fu aboro ziazia nga mo sa tipa kina gamo badiarogatise

• Mo ne agu apai rengbe ka fuda gamo badiarogatise kpotoniyo, na ki mbu gu pabakure rengbe ka sa gamo badiarogatise ka rago ngbanga tiní ya