Amoundo Abaakumba Namanga Nyanyakipa Sunge

GU MOKEDI NANGIA PAURO akepai fu gu dungurati naadu Firipoi yo nga: “APauro na Timoteo, [nga] ga Kristo Yesu amoyambu. Fu ga Mbori aboro dunduko du rogo Kristo Yesu yo Firipoi yo, na fu ababipai na adiakona [amoundo abaakumba].” (Frp. 1:1) Oni kparia gupai nga ko afura a tipa amoundo abaakumba. Wa goapai ayugoho, agi akumba re anaamanga nyanyakipa asunge ti agu aregbo re kaa undo abaakumba rogo dungurati. Kina gu bangisapai re namanga areme a. Amoundo abaakumba namanga agu asunge naundo ababiapai na si nasa gupai a nga apai nimangi ti kina genehe rogo dungurati.

² Ya mo mo ini agu amoundo abaakumba du rogo gamo dungurati? Ya mo mo ini agu asunge i amangaha tipa si undo ro gbiati dungurati naabaha? Yekova nabi gu ome agu akumba re amangaha na nyanyakipaha. Pauro ake gupai nga: “Agu yo namanga sunge adiakona wenengaĩ i kiisi payo bangiri aboro, ki duna bakere nyaka [ranirii nga ga fugo] rogo gu idapase du rogo Kristo Yesu yo.”​—1 Tim. 3:13.

GUPAI BAIBIRI AIDAHA TIPA BORO DA NI MOUNDO ABAAKUMBA

³ Si naida amoundo abaakumba du ni agu aKristano du na wenesino mangaapai, ni agu akumba rengbe aboro ka kido kutiyo, na kini ngerefuo agu asunge du beyo ngba wene gene. Gipai re gbaiga rogo gu waraga Pauro akehe fu Timoteo ka fura tipa agu apai Baibiri aidaha be amoundo abaakumba, ko aya: “Kina wo adiakona ka du a tigayo na zera, ni kparakakparaka fugoyo te, na mbira imekakue gbe te, na kpi nyemu marã te. Agi yo re i asadi yo mbata a; fuo ho i ki mangi sunge adiakona; nga gu ka i abi nga pai ti yo ya. Adiakona ka du ni kumba ku de sa, nizogo awiriyo na gayo kporo wenengaĩ.” (1 Tim. 3:8-10, 12) Pa manga gupai Baibiri aidaha be amoundo abaakumba rengbe ka banda dungurati ka aboro kitinga ngbanga ha mbiko i fu gu sunge fu wirina ní arẽnga tipaha ya te.

⁴ Singia amoundo abaakumba nga paranga aboro watadu sosono aboro, adiwi ni basasa i atungusapai kakaka. I namanga ome ka wirika Yesu rogo tungusapai zaaza. Mbiko gu kakaka tungusapai re, i nayugoho nga i na kina gu bangisa bipai du Yekova na ni tipa pa bata aboro.​—Yes. 9:7.

⁵ Agu akumba nga amoundo abaakumba a nga wene kpiapai rogo gayo vodatise, mbakadatise, fugo, bipai, na mangaapai. I na ruru berãpai, na gure nasa gupai nga kura aboro niirisi yo. Kurigure, i nabipa gayo pagume na Yekova na nyanyakipaha gbiati gu momu nga ga sunge du yo na ni rogo dungurati.​—Tito 2:2, 6-8.

⁶ Agi akumba re, i ‘naasada yo mbata’ ka bihe singia i ima rẽ. Zavura mbata fu i sia yo, i nayugoho gbaiga nga i ima fu gayo raka fu Mbori. I ima yugoho nga i naperesapa agu apai nga ga Kindo mbatayo rogo gayo raka na kini mangi ome ka rẽ tipa gu momu sunge rengbe ka kura bara yo. I nga wene kpiapai fu kura aboro rogo dungurati tipa ka wirika yo.​—1 Tim. 3:10.

AGU ASUNGE I AMANGAHA

⁷ Amoundo abaakumba namanga dungu asunge tipa awirinayo nga akumba na adee, rogo gi gene re, si nambu regbo fu ababiapai tipa i di bakere regbo ka ngerafuo agu apai nabipa yugopai na banda akandoro. Ho gu rondo nga ga abaakumba afu asunge ni fuyo, i nabipa gayo aome ni basasa gbiati gu zingo du dungurati na ni.

⁸ Ani kparianga bete agu asunge re: I rengbe ka sia moundo abaakumba sa, ní ningerefuo awaraga tipa wa ka ani rengbe ka dia gu ani ka wirikaha na gu ani ka mangasunge na ni gene tungusapai yo. Aguyo nangerafuo gu marã nga ga dungurati watadu gu dagbarago nga ga tungusapai. Aguyo nangerafuo amakorofoni, aũtumba woro fogo, mbakada ba aboro, na ka undo abaakumba rogo gu kura agene yo. Bakere sunge du nga ka ngerafuo Bambu Kindo na kini bandaha si du ni gigirihe, sidu, i naasana amoundo abaakumba dedede tipa i ni ngerekurii gu sunge re.

⁹ Rogo gu kura adungurati, i ima rengba ka sia ka fu asunge fu amoundo abaakumba nibasasa. Rogo kura aba, moundo abaakumba sa rengbe kaa ngerafuo dungu asunge. Ti gu kura aregbo, si rengbe kadu nga bangisa sunge sa, dungu amoundo abaakumba nangerafuoho. Ka si du nga ngenga amoundo abaakumba tipa ka ngerafuo agi asunge re te, gu rondo nga ga abaakumba ima rengba ka diaberã ka fu kura nyanyakipa asunge fu agu aKristano nga akumba nga wene kpiapai. Rogo gi gene re, si nika sa yo i gbia gu inohe rengbe ka undoyo kusa ho i ka rẽ ni kada ni amoundo abaakumba. Ka si du nga awirina nga akumba ho te, abaakumba ima rengba ka sana gu wirina nga dee nga wene kpiapai ri undo na gu kura apai, wa vura duhe vurũ nga i asianga ri ni moundo abaakumba te. Gu boro nga wene kpiapai, ní nga gu boro rengbe kura aboro ka wirika gani mangaapai gbiati gene irisombori. Wai ní aye tipa adunguratise, gani tungusapai, gani aborokporo, agu aũngbarago nangba tiní, gani votise na mbakadatise, gbiati gu kuraapai nga wene kpiapai fu kura aboro.

¹⁰ Rogo agu adungurati du na abaakumba gbua tooni, abaakumba ima rengba ka sana agu amoundo abaakumba du na inohe i fugu agu asanahe nga ga bapatiza nabipa ayugopai. Agi asanahe re gu du rogo gu paparaha nga Kura Apai “Bambata Paparaha: Agu Aida Nga ga AKristano.” Wa duhe nga gu “Ue Paparaha: Gu Raka Nga ga AKristano.” nafura tipa agu apai nabipa ga boro raka, si naida kina bakumba mangi gure.

¹¹ Kangia wene ndupai kinaho, gu rondo nga ga abaakumba ima rengba ti gu kura aregbo ka dia sunge be gu kura moundo abaakumba ka fuhe fu gu kurani. Ono tie, si ima ngba gbe ka mbu awirina i mangi bangisa sunge sa tipa bete regbo wa ka i inidi tiyo na ni wenengai na ki du na wene inohe tipaha.

¹² Ringbisihe kuti agu apai du tipa aboro nibasasa, gu kura asunge kinaho rengbe yo ka fuhe fu agu amoundo abaakumba du gayo sonakumbatayo “ni yuguyuguhe fu aboro dũ.” (1 Tim. 4:15) Ka abaakumba angenga ya, i ima rengba ka sia moundo abaakumba tipa ní niundo kaa ngerakurii badona tungusapai, ti gu kura aregbo ni gu moyambu nangerafuo badona tungusapai tii gu ngbembatayo nga ga abaakumba. Amoundo abaakumba ima rengba ka manga apapara gu Dunguratise Nga ga Gaani Raka na Gaani Sunge kodihe na gu Wisigo Ziazia Kekeapai Nga ga Dungurati, na kini mangi agumbapai gbaiga. I ima rengba ka fu gu kura amomu fu amoundo abaakumba ho du zingo ni ka i rẽ ka manga agu apai si aidaha tipa gu sunge re. (1 Pet. 4:10) Si naida amoundo abaakumba futiyo na nyemuhe tipa ka undo abaakumba.

¹³ Wa vura duhe nga gayo sunge kia ti ga abaakumba, si nga ziazia sunge fu Mbori na si na nyanyakipaha tipa apai nimangi wenengai rogo dungurati. Fuo bete regbo kusa, ka si du nga amoundo abaakumba namanga gayo asunge ngba wene gene na i ima rẽ kada ni ababanda akandoro na ni abayugupai, abaakumba ima rengba ka fu rimoyo i da ni abaakumba.

¹⁴ Kangia paranga wirina nga mo, watadu mo nga gu boro zi bapatiza barambeda, ya mo mo namanga ome tipa ka gbata sunge kada ni moundo abaakumba? (1 Tim. 3:1) Nibi wai aboro aye ku rogo rengo yo na agarã dunduko, si naida na agu akumba niima nyaka rogo toro yo tipa i tindi agu atindiro du rogo dungurati. Mo rengbe ka rẽ na gu sunge re ka mo asonosa gu sino nga ga undo kura aboro. Gene sa tipa ka manga gipai re ngbaha nga ka berãkurii ga Yesu wene kpiapai. (Mt. 20:28; Yo. 4:6, 7; 13:4, 5) Gamo nyemupai nika sona ti gu regbo mo nika gbia gu ngbarago du ti gamahe fu kura aboro. (Amo. 20:35) Sidu tie, mo fu tiro ka undo kura aboro, ka undo na sunge ngerafuo Bambu Kindo, watadu ka fu tiro ka manga gumbapai ti regbo gu Dunguratise Nga ga Gaani Raka na Sunge ka si du nga gu boro i afuhe funi ho te. Gbata sunge a, nakoda sonosa agu asino nga ga toro nimanga wisigopai nisase dedede. (Tam. 1:1, 2; Gara. 5:22, 23) Kurigure, gu wirina nagbata ka rẽ tipa sunge, si naida ní yuguhe nga ní nga gu boro rengbe aboro ka kido kutini na kidu niruru ní ho i afu sunge ni funi nga ga dungurati.​—1 Kor. 4:2.

¹⁵ Ga Mbori toro nasia amoundo abaakumba tipa i undo dungurati wenengai. Agu aboro du rogo dungurati rengbe ka yugo gayo tambuahe tipa gu nyanyakipa asunge amoundo abaakumba amangaha ni dega yo tuyo kuti agu apai i apehe ho i amanga gayo sunge ni. Rogo gi gene re, dungurati nika yugo gaha tambuahe tipa gu gamahe Yekova nafuhe tipa apai nimangi ti genehe rogo gako kporo.​—Gara. 6:10.