Akumba, Oni Rũ He Fu Toro Tipa Ka Gbata Amomu Rogo Dungurati!

“Gu ni narũ he fu Toro ni aké nyenye unga.”—GARA. 6:8.

1, 2. Wai Matayo 9:37, 38 aringbisatihe, na sangbanaha naye na gini zingo kurogo adungurati?

ONI nabi gupai namanga awere nga gu paha nikaa gonga bangironi ya! Sunge Yesu Kristo agumbapaha namanga awere nibakerehe. Yesu ayaa: “Zuzuhe ni bakere he ni rengo, ono abamangisunge ni kina umba yo. Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.” (Mt. 9:37, 38) Yekova Mbori nakaragapai kuti gi kpee re ngba iiriwo gene. Rogo gu garã nga ga sunge nangia 2009, bange agu adungurati nga ga aDezire Yekova rogo zegino dunduko asono na bangehe wa 2,031, bangehe ki da dunduko nga 105,298. Ka i kparaka bange agu aboro nazi bapatiza rogo gu garã re, si du nga uru sa aboro azi bapatiza nga 757!

² Ngbatunga gu sonakumbatayo re nasa adungurati si du na zingo agu awirina rẽ ka yugopai na ka ngerafuo akandoro. (Ef. 4:11) Tipa badungu agarã awere, Yekova namangasunge na agu akumba naima rẽ tipa kaa ngerafuo agu azingo nga ga toro du gako akandoro nani, na ani na gu kido nga ko nikaa mangaha amanga wo kindi. Gu sangbanebi du rogo Mika 5:5 nakido rani nga ti yangara arame, ga Yekova aboro “akusa ababanda akandoro saba kuti yo na abazogo aboro muambi.” Agi ababanda akandoro gbiati abazogo re nga agu akumba nangbembatayo rogo dungurati.

3. Rogo gupai yo nga ka ‘rũ he fu toro’ nga gine?

³ Ka si du nga oni ni agu awirina ni akumba naima zio bapatiza, gine rengbe ka undo roni oni gbata gene ka rẽ na sunge watadu amomu rogo dungurati? Gu banguapai rengbe ka undo roni nga ‘rũ he fu toro.’ (Gara. 6:8) Rũ he fu toro nakoda raka ngba gu gene nika sa ga Mbori ziazia toro si naamangasunge rogo gaoni raka yo. Ka oni ‘rũngo he fu borose ya.’ Ka oni mbunga agu apai nafu wasa gbiati ambaro si di nyemu mangasunge fu Mbori kusayo tironi ya. AKristano dunduko si aida i ‘rũ he fu toro.’ Aguyo nga akumba namangaha wo i narẽ tipa ka gbia amomu sunge rogo dungurati. Wa duhe nga ani na bakere zingo amoundo abaakumba gbiati abaakumba rogo gu riigbu nga ga Yekova, gi kekeapai re nzunzu fu agu aKristano nga akumba. Sidu tie, agu awirina nga akumba, ani nazungodi roni oni berẽkurii gipai re gbe.

Oni Gbata Pa Rẽ Tipa Wene Sunge

4, 5. (a) I nangarasa agu akumba naima zio bapatiza i gbata gene ka rẽ tipa gini asunge rogo dungurati? (b) Wai boro agbata gene ka rẽ tipa asunge rogo dungurati?

⁴ Gu wirina nga kumba arengbanga ka da ni babiapai zanga manga ní asadatise amanga te. Si naida ní gbata gene agbata tipa ka rẽ na gi “wene sunge” re. (1 Tim. 3:1) Gene sa rengbe ní ka gbata gene gi sunge re ngbaha nga kaa berãpa agu azingo nga ga akurani aidipase. (Oni gedi Yesaya 32:​1, 2.) Gu boro nagbata gene ka rẽ tipa sunge rogo dungurati na wene nduapai, anga ní niboro gbangbati te. Kuba gure, ní nagbata gene kaa undo awirinani.

⁵ Wirina rengbe ka gbata gene ka rẽ nimoundo abaakumba na ki da nibabiapai watadu bakumba nimanga ní ome ka da ti agu apai keke yó ho rogo Ziazia Kekeapai. (1 Tim. 3:1-10, 12, 13; Tito 1:5-9) Ka oni ngia gu wirina naima zio bapatiza, oni sananga tironi nga: ‘Ya mo mi natungusapai wenengai na kini undo kura aboro i nitungusipai? Ya mo mi nangarasa awirinami nidu mi na ndikidi nyemu ka ino agu apai du tipa yó? Ya mo aboro ini re niwene bawisigi Fugo Mbori? Ya mo mi nambakada gimi akaragapai wenengai? Ho abaakumba afu sunge ni fere, ya mo mi naamangaha ngba wene gene?’ (2 Tim. 4:5) Si naida oni wisigi tironi awisigo rogo gi bangiri aba re wenengai.

6. Gini banguapai si aida boro mangihe tipa ka rẽ na amomu rogo dungurati?

⁶ Gu kura gene wirina narengbe ka gbata gene ngbaha ka rẽ tipa amomu rogo dungurati nga ka ‘nyaka ni tandu be ga Mbori toro’ kpotoni yo. (Ef. 3:16) Anga si nga i nasia boro asia tipa gu sunge nga ga moundo abaakumba watadu gu sunge nga ga abaakumba rogo dungurati te. Kina gu boro nasona rogo toro yo nagbia gi momu re. Wai rengbe boro ka sona rogo toro yo? Gene sa rengbe ní ka manga gipai re ngbaha nga kaa ‘peka toro’ na kidu na zuzuhe tiní. (Gara. 5:16, 22, 23) Wa oni kaa yugo agu asino nga ga toro si aida boro du nani i kini ru ka fu kura asunge funi, na wa oni kaa mangasunge na agu arugute nga ga Ziazia Kekeapai rogo gaoni raka, gaoni ‘susa na apai nikadu niyuguyuguhe fu aboro dunduko.’—1 Tim. 4:15.

Si Naida Oni Mbupa Kura Gaoni Apai Ambu

7. Mangasunge ka undo kura aboro nakoda gini apai?

⁷ Mangasunge ka undo kura aboro nakoda mangasunge nyanyakii na mbu boro pa kura gani apai. Wa duhe nga agu aKristano nga ababiapai namangasunge wa ababanda akandoro, i nabakabangiriyo abaka tipa agu apai nafuda awirina. Oni makianga pa wai gu mokedi nangia Pauro amangi gu sunge nga ga ngerafuo akandoro. Ko aya fu agu awirina nadu Korinda yo wee: “Mi ake he fu roni rogo bakere rungo na nunga na dungu aume; a nga tipa ba rungo ti roni te, ono tipa yugo pa gu nyemuse du ti re fu roni bakere gbe.” (2 Kor. 2:4) Si tie ziazia nga, Pauro afu ngbaduko dunduko sa gu sunge nga ga ngerafuo akandoro.

8, 9. Oni funga akpiapai nga ga Ziazia Kekeapai nayugo wai akumba angerefuo aboro.

⁸ Pa mbu boro pa kura gani apai tipa ka mangasunge ka undo ga Yekova amoyambu nga gupai i aima ino ga Yekova akumba ti ni tona bakuru kusayo. Noa aayanga fu gako aborokporo wee: ‘Oni mangi sunge gi kurungba re, ka si ta nyasa oni ki gumbaha fere tipa mi ye ka rimo kurogoho’ te. Moize aayanga fu awiri aYisaraere wee: ‘Mi nika gbia roni Zamba Baime yo, oni gbatagene tipa ka da yo’ te. Yosua aayanga wee: ‘Mi napido gu regbo Yereo nika ti ti ni’ te. Yesaya aayugongo beko kuti kura boro ki yawee: ‘Ko du yore! Mo kedi ko’ te.—Yes. 6:8.

⁹ Gu boro nambu ga Mbori toro si mangi sunge rogoniyo gbe nga Yesu Kristo. Ko aumbasi pa tiko ki idi ka manga gu sunge i afuhe fuko nga kadu ni Batumorii fu ngbatunga aboro dunduko. (Yo. 3:16) Ya mo gu nyemuse nasa Yesu ko mbupa kura gako apai tipa rani re afõnga ngbaduraniyo ani mbupa kura gaani apai tipa kaa undo awirinarani tee? Wirina sa naima mangasunge nibakumba tipa dungu agarã ayawee: “Gupai Yesu apehe fu Petero ki ya, mo nibanda gimi akandoro re aima zio ngbadureyo. Rogo agu agarã susi kusayo, mi ye ka ino wai rengbe wiri wene afugo na wiri mangaapai nga ga weneringise ka zambuasi boro rogo toro yo. Ngerafuo akandoro nga gu sunge naima ngba tire gbe.”—Yo. 21:16.

10. Ginihe rengbe ka undo agu aKristano nga akumba i wiriki ga Yesu kpiapai rogo mangasunge ka undo kura aboro?

¹⁰ Nibipa gu rimbasa akandoro nga ga Mbori ra, si naida agu aKristano nga akumba du rogo dungurati duna gu sino nadu ti Yesu nga gu nasako ko yaa: ‘Mi afu ongoda furoni.’ (Mt. 11:28) Idapase kuti Mbori gbiati nyemuse tipa dungurati nafõngbadu agu aKristano yo nga akumba i gbata gene tipa ka rẽ tipa wene sunge rogo dungurati, na si a nasa yó ka i bingo gupai nga gi sunge re ima furii ome yó ya. Ginipai rengbe ka undo gu wirina adunga na nyemu gi sunge re ya? Ya mo wirina rengbe ka sonosa nyemu mangasunge rogo dungurati?

Oni Sonosi Nyemu Mangasunge

11. Wai rengbe boro ka sonosa nyemu mangasunge?

¹¹ Ka oni abi tironi nga oni arẽnga tipa asunge rogo dungurati te, si naida oni kpari tipa ziazia toro. (Ruka 11:13) Ga Yekova toro nika undo roni tipa oni dibe gu bakabangirise re. Mbori du nafu nyemu mangasunge ku kpoto boro yo, na gako toro du nafõngbadu wirina yo ní asadi tiní ka rẽ na sunge na si nafu gu ome funi si aidaha tipa ka manga ziazia sunge. (Frp. 2:13; 4:13) Sidu, si naida aida boro sana Yekova tipa ko undo ní ní sonosi nyemu mangasunge rogo dungurati.​—Oni gedi Atambuahe 25:​4, 5.

12. Wai rengbe boro ka gbia tatamana nga gu rengbe ka undo ní ní nimangi agu asunge wenengai i afuhe funi rogo dungurati?

¹² Wirina rengbe ka bi gupai nga agu azingo nga ga akandoro ima nge watadu si ima du nikpakarakpakaraha, si kini sani ka ní sonosinga nyemu mangasunge ya. Watadu ní rengbe ka bi tiní nga ní na gu tatamana si aida si du ti agu aboro duna agu atindiro nga ga dungurati te. Ka si du nga agi apai re du tipa roni, oni rengbe ka gbia tatamana be wisigo oni Ziazia Kekeapai na agu awaraga du mburuhe rii Ziazia Kekeapai. Si naida oni sana tironi na gu sanahe nga: ‘Ya mo mi naadia regbo tipa kaa wisigo Fugo Mbori na kini kpari tipa tatamana?’ Gu bawiriki nangia Yakoba akepai ki yaa: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni.” (Yak. 1:5) Ya mo oni idi kuti gipai toro adu kugiipa kehe re? Nikaragapai kuti ga Soromo kpee, Mbori afu ‘tatamana gbiati rugatinapai’ fuko nga agu ahe naundo ko ko nikpara wenepai ti gbegberẽpai ho ko asarangbanga ni. (1 Aba. 3:7-14) Kina rengo du ngaha nga, ga Soromo pai adu tigako kia. Ono wa vura duhe wo, ani na gu kido nga Mbori nika fu tatamana afu fu agu aboro duna agu asunge beyo nga ga ngerafuo dungurati tipa i nimangihe ngba wene gene.—Snz. 2:6.

13, 14. (a) Oni sakingo pa wai ga Kristo nyemuse adu na ome kurii Pauro. (b) Wai si aida ‘gu nyemuse duti Kristo tipa rani sosodi rani’?

¹³ Gu kurapai rengbe ka undo boro ní sonosi nyemu mangasunge nga pa berã ní dudunguro kurii agu apai Yekova na Wiriko nga Yesu namangihe furani. Nikpiapai, Ziazia Kekeapai nayawee “gu nyemuse duti Kristo tipa rani, si nasosoda rani.” (2 Kor. 5:​14, 15, NW ) Wai ‘gu nyemuse duti Kristo tipa rani asosoda rani’? Gu nyemuse Kristo ayuguhe nifuko ungako tipa rani ringbisihe kuti ga Mbori ringbisapai na nyanyakipaha gbe, ho ani aberã ni kuriihe gbe, si nafõngbadurani afõ. Pauro ambu ga Kristo nyemuse si nirugu ko. Si aundo ko ko fu tiko ka mangasunge fu Yekova zanga gbangbati na ka mangasunge si undo agu aboro nadu rogo dungurati gbiati aguyo naadunga rogo dungurati ya.

¹⁴ Pa berã ani kuriipa gu nyemuse nga ga Kristo rengbe ka sa rani ani yugu kina gu bangisa nyemuse re. Nisangbana gipai re, ani ima rengba ka bi gupai nga si adu nigbegberẽpai ka ani ‘arũ he fu kina borose’ ki merefuo kina agu asásá nga ga borose tipa ka mbiisa kina gaani nyemuapai. Si naida ani peresipa manga gu sunge mbatayo Mbori nafuhe furani. Si nika sa rani ani mangipa akuarani mbiko nyemuse. (Oni gedi AGaratio 5:​13.) Ka ani abi tirani ni akanga namangasunge fu ga Yekova amoyambu, si nika sa rani ani nimangi yó niʹirisa. Nirengo, ka ani apekafuo ga Kristo nyemuse, ani dunga na gu gbegberẽ asino du rogo gi ga Satana zegino re te.—Yugo. 12:10.

Aborokporo Dunduko Si Aida I Mangi Ome

15, 16. Ginipai si aida aborokporo mangihe wa ka i ruho ka sia gayó bairakporo nimoundo abaakumba watadu nibakumba?

¹⁵ Ka si du nga wirina na dee beko gbiati awiriko, pa da ko nimoundo abaakumba watadu nibakumba naruriipa gu mangaapai nga ga gako aborokporo. Nirengo, gu mangaapai nga ga ga kumba aborokporo rengbe arengba ka sa gupai nga i siako nibakumba watadu ka i sianga ko ya. Gipai re nanyakasapa gupai si aida aborokporo mangihe ka si du nga i naida bairakporo da nimoundo abaakumba watadu nibakumba.​—Oni gedi 1 Timoteo 3:​4, 5, 12.

¹⁶ Rago naangba angba ti Yekova ho aborokporo akodabee ni wa sa ka mangapai. (Ef. 3:14, 15) Si naida bairakporo mbakadi gani apai wenengai tipa kita ngera angera fuo agu asunge nga ga dungurati kini ngere angera fuo gani ‘aborokporo wenengai.’ Sidu, si ninyanyakipa pai tipa bakumba watadu moundo abaakumba naawisigo Ziazia Kekeapai na gani aborokporo tipa wa ki i agbia undo na aposo dũ. Si naida ní naatungusapai naayó sa dedede. Si naida aida a aborokporo naakoda tiyo na bairakporo rogo agu apai dunduko ko amangaha.

Oni Amangasunge Berewe?

17, 18. (a) Ka si du nga wirina arẽnga berewe nibabiapai te, ginipai si aida ní mangihe? (b) Gini ngbatunga bipai si aida gu wirina du nani namangisunge mbata nimoundo abaakumba watadu nibakumba ono adunga wo awere ya?

¹⁷ Isoke, oni adu mbata nibakumba watadu moundo abaakumba ono oni awere wo te. Oni na nyemu Yekova kindi na ko a na kina nyemu roni tiko. (1 Pet. 5:6, 7) Ya mo i aya furoni oni mangi ariapai rogo gaoni raka? Ka si du nga oni ingi, oni idi gaoni ingahe aida na ki mangi ome ka mbuhe nigu undo nga ga Mbori. Ka ngbaduroni iminga ya. Oni du na tatamana, na kidu na wene sino. Wirina kinaho namangisunge nibakumba tipa dungu agarã, fuo zanga ko gu momu re, ko ayaa: “Mi adiberã kaa ndu tipa adunguratise, sunge tungusapai, na kini gedi Ziazia Kekeapai kina wai mi anaamangaha ho mi adu ni nibakumba. Mi awiriki zerangbaduse mbiko mi aberẽ gupai nga i nika karaga re nibakumba vuru garã sa watadu ue, ono si adi re na agarã saba tipa mi da nibakumba berewe. Ti agu aregbo re, gu ngarasaro du rogo Ziazia Kekeapai nga gu nangarasa rani nga ka ani mbunga ya ono ani ndu kina kumbatayo aundo re gbe.”

¹⁸ Ka si du nga pai tipa roni wa gu fura ani tipaha kuari re, ka rago gberẽnga tironi ya. Oni berẽkuriipa wai Yekova afu maku kurii gaoni sunge tungusapai na gaoni aborokporo. Oni ngarasi gaoni aborokporo rogo toro yo, oni ndu kaa bi agu aboro nawoka, na kini nyakasi agu aboro naima zera. Gu banguapai si aida oni mangihe nga ka bi gu momu na nyanyakipaha du oni nani nga ga taasarimo Mbori na tungusa wene pangbanga ni aDezire Yekova.a—Tam. 145:1, 2; Yes. 43:10-12.

Oni Wisigingo Gaoni Apai Berewe

19, 20. (a) Ginipai i anyakasa akumba dunduko i mangihe? (b) Ginipai ani ka wisigoho rogo gu kekeapai naye fuo gere?

¹⁹ Gu zingo nga ga amoundo abaakumba watadu abaakumba nakio kina kumbatayo susi wa si adu mbata. Ani nangarasa agu awirina dunduko nga akumba tipa i wisigi gayó apai berewe ki sana tiyo nga: ‘Ka si du nga moundo abaakumba watadu bakumba nga mi te, ya mo si naida mi wisigi tire ka bi gupai adunga mi ti ni wo ya?’ Oni mbu ga Mbori toro si fu wene bipai furoni nibi gipai re.

²⁰ Aboro dunduko rogo dungurati nagbia undo be gu sunge awirinayo amangaha rogo dungurati mbiko nyemuse. Ho ani amangasunge ni ngba wene gene zanga gbangbati, ani nagbia gu ngbarago naye be mangasunge fu awirinarani na be rũ he fu toro. A wa ani ka wirikaha rogo gu kekeapai naye fuo gere, si aidanga ani rungosi ga Mbori ziazia toro te. Wai rengbe ani ka ne rungosi ga Mbori ziazia toro?

[Gu rukutu kekeapai du bandu kpewaraga yo]

[Gu kpiahe du ti kpewaraga 25]

Gini apai si aida oni mangihe tipa ka rẽ na asunge rogo dungurati?

[Gu kpiahe du ti kpewaraga 27]

Gaoni Karagapai Nga Gine?

• Gine Mika 5:5 akido rani tipaha?

• Pa mbu boro pa kura gani apai nakoda gini apai?

• Wai rengbe boro ka sonosa nyemu mangasunge?

• Wai nyakipa gu mangaapai nga ga aborokporo nibi pa sia boro nimoundo abaakumba watadu nibakumba?