Banda Zereda Gbiati gu du Gigiri Nga ga Dungurati

ROGO agarã ni basasa, akutu aboro natiria ku rogo ga Yekova bambu nga ga ziazia irisombori, nga gu nadigiso gu sangbanebi nga ga Baibiri. (Mika 4:1, 2) Nairiwo gu ngbarago ani nidu na ni tipa ka dia yo kugume ku rogo “ga Mbori kanisa [gu dungurati nga ga Mbori]”! (Amo. 20:28) I nabi gu momu du yo na ni tipa ka iriso Yekova na ani na nyanyakipaha na ka gbia ngbarago be gu paradizo nga ga toro du na zereda na ni gigirihe. Ga Mbori ziazia toro gbiati agu arugute du rogo Fugoko naundo rani ani banda zereda na kini sa dungurati si du ni gigirihe.​—Tam. 119:105; Zek. 4:6.

² Manga ani apai kuti gu bangua arengo nga ga Baibiri nasarani ani ‘ukadi vovo borose.’ (Koro. 3:10) Ani nambu azanga giatise na kini nyasiriipa akpakarapai rogo zereda yo. Padu ani na gu bipai nga ga Yekova naundo rani ani sovura kuti agu atagbagapai nga ga zegino nga gu nakparaka aboro na ani kini mangisunge ni kodikodi rani na awirinarani rogo zegino dunduko.​—Amo. 10:34, 35.

³ Wa vura duhe wo, akpakarapai nakura akura ti kura aregbo nga gu rengbe ka gbarasapa gu zereda nga ga dungurati gbiati kodatise. Ndu gupai re nga gine? Dedede, si naye mbiko zanga mangapai kuti agu arugute nga ga Baibiri. Ani nasovura kindi kuti gu kpotorani nga ga zanga rengba. Anga boro ho sa dagbarani zanga ingapai te. (1 Yo. 1:10) Boro ima rengba ka manga gu diandue rengbe ka ye na gbegberẽ mangapai watadu bibiriko mangapai rogo toro yo ku rogo dungurati. Ani ima rengba ka imisa boro rogo afugo rani yo zanga berãkuriihe watadu mangaapai, watadu ani ima rengbe ka kota be gupai boro napehe watadu namangihe. (Rom. 3:23) Ginipai rengbe ani ka mangaha ti ngbatunga agi aregbo re tipa ka rugaapai?

⁴ Yekova nabi agi apai re abi dunduko. Fugoko nayugo gupai si aida ani mangihe ho kpakaraapai akura ni. Abaakumba nga agu ababanda akandoro du na nyemuse ima rengba ka undo. Ka ani mangisunge na aguyo arugute nga ga Ziazia Kekeapai, ani nadu na wene pagume na akuarani na ki banda gaani wene pagume na Yekova. Kangia i fu arugute furani tipa manga ani gbegberẽpai watadu ka ruga rani tipa gu ingapai ani amangihe kusayo, si naida ani du na kido nga gu ngbatunga rugute re nayugopa gu nyemuse nga ga gu Barani du ngbangbaturũ yo.​—Snz. 3:11, 12; Eb. 12:6.

NYASARIIPA RUKUTU AZANGA GIATISE

⁵ Aregbo kinaho rengbe rukutu azanga giatise ka kura dagba agu aboro du rogo dungurati. Si naida ani nyasiriipa ngbatunga agu azanga giatise re rogo gu nyemuse nga ga awirina. (Ef. 4:26; Frp. 2:2-4; Koro. 3:12-14) Si nawira gupai nga, agu azanga giatise rengbe ka kura dagba rani na akuarani aidipase, ani rengbe ka nyasariipa ha ni manga ani pai kuti gu rugute gu mokedi nangia Petero afuhe nga “oni du na bakere nyemuse dagba roni; mbiko nyemuse nadada badungu ingaapai.” (1 Pet. 4:8) Baibiri naya: “Ani nakota dunduko rogo dungu apai.” (Yak. 3:2) Ka ani mangipai kuti gu Rugute Duwa Dahabu, nga ka manga gupai ani aida kura aboro mangihe furani, si rengbe ka sarani ani mbupai fuyo na bangirani kini go ti gayo aingahe.​—Mt. 6:14, 15; 7:12.

⁶ Ka mo bi gupai nga ga mangapai na afugo ro ima imisa boro, si naida mo mangipai ni ipo tipa ka karaga zereda kubaha. Mo tingidi gupai nga, si ima du a na maapai kurii gamo pagume na Yekova. Yesu arugu gako abawiriki nga: “Were ka mo agama ga gamahe bamotumo yo, mo ki tingidi he si ngia pai dagba roni na wirinamo, mo ki he ga gamahe barangba bamotumo yo, ki guari, mo ki mbakadi pai dagba roni na wirinamo mbata, mo nikaye ka gama ga gamahe.” (Mt. 5:23, 24) Si rengbe kadu nga zanga giatise niima duho. Kangia wo duhe, mo ndu fuoni oni fura riipaha. Wene fugodagbase dagba agu aboro du rogo dungurati banda rani ani ne gupai rengbe ka ye na azanga giatise na ka nyasariipa agu azanga giatise kuru mbiko gu zangarengba nga ga aboro.

FU GU RUGUTE NGA GA BAIBIRI RẼARẼ

⁷ Ti gu kura aregbo, ababiapai ima rengba ka bihe nga si naida i fu rugute tipa ka ruga ga boro berãpai. Anga gipai re nga taata pai ti aregbo dunduko te. Gu mokedi nangia Pauro akepai fu agu aKristano naadu Garatia yo nga: “Awirina, ka i vura zia boro na ingapai, oni nga ga Toro aboro, oni ki songodi ni asongoda ni zera.”​—Gara. 6:1.

⁸ Ka ababanda akandoro angerafuo ra, i rengbe ka banda dungurati ti badungu kereapai nga ga toro na ki bandaha a ti gu kerepai rengbe ka kura. Abaakumba naasada ka manga ome tipa gupai nga agu asunge i amangaha rogo dungurati ndu sa na ga Yekova kidohe du rogo Yesaya yo nga: “Aboro ni ba sa sa adú wa kina bagbuko be yuge, ni okooko ba be gugugu yuge, wa ime rogo gene ime rogo ugurago, wa nzereme bambia rogo gu ringara mbu ambu.”​—Yes. 32:2.

GBAHE TI AGU ABORO NAMANGA UTUKURU

⁹ Gu mokedi nangia Pauro afu zahe tipa agu aboro rengbe kadu na gbegberẽ maapai kurii dungurati. Ko aya: “Ani nagumba ha fu roni, . . . ya oni kparaka tironi ti agu awirina dunduko nata utukuru, ka i ata nga fuo gu yugopai i adi he be rani ya.” Ko asakirogo gupai re ho ko akepai ni nga: “Ka ngia gu boro agia nga sangbarani ti gi keke waraga re ya, oni bí nga gu boro re, ka oni kódi nga tironi na ni ya, ya zee mangi ni amanga.”​—2 Tesa. 3:6, 14, 15.

¹⁰ Ti kura aregbo, si rengbe kadu nga boro amanganga gu ingapai rengbe ka sa gupai nga i kusi ni kusayo rogo dungurati te, ono ni namanga agu apai afunga irisa kuti gu ga Mbori arugute si aida aKristano raki kutini ya. Si rengbe ka koda ngbatunga apai wa gu nyomoro nara kporo na kpio, gbegberẽ bipai, na biriko. Ni rengbe kadu a ni gu boro “[nadia] ngbiti pai.” (2 Tesa. 3:11) Watadu ni rengbe kadu ni gu boro naida kaa nze rii akurani, watadu ni naida na agu aũngbarago du ni gbegberẽhe. Gu mangapai nga ga utukuru re ni kerehe na si rengbe kadu na gbegberẽ sangbanaha kurii dungurati, na si ima rengba ka sa kura aKristano i tona ka mangaha a.

¹¹ Abaakumba rengbe ka undo gu boro re ni fuyo agu arugute mbata nga ga Baibiri funi. Ono tie, kangia ni nandu kindi kumbatayo na zanga yugo irisa kuti gu bangua arengo nga ga Baibiri i ki vura fu arugute funi bara dunguhe vurũ, abaakumba ima rengba ka diaberã nga i mangi gu gumbapai nga ga zahe fu dungurati. Abaakumba nika mangasunge na rugatinapai tipa ka ino singia gbegberẽpai mangi nga gu nafuda awirina afuda si aida i mangi gumbapai tipa ka ngarasa dungurati. Gu wirina nika manga gumbapai nafu gu rugute daada tipa gu mangaapai nga ga utukuru re, ono ni ayambanga rimo gu boro re te. Ni sangbana gipai re, agu aboro inipai tipa gupai gumbapai naafura tipaha rengbe kadu na rubangirise ka ne kodatise na gu boro re, wa vura duhe nga i nikaa kodatiyo akoda na ni rogo toro yo tipa ‘rúga ni wa du pa wirina.’

¹² Ka agu awirina du niruru yo ru nyanyaki ki zanga kodatiyo na gu boro namanga utukuru re, si rengbe ka fu pazee funi na ki undo ni nimangi ariapai. Ho duhe ni ziazia nga gu boro re ima mbu gu gbegberẽ mangapai re, ndupai ho berewe tipa i nimangi ni wa gu boro i nagbahe tiní te.

WAI KA NYASARIIPA GU KURA KERE GBEGBERẼ APAI

¹³ Padu ani na nyemu ka mbupa gu ingahe boro namangi rani na ni ayugongo gupai nga ani nabi gu gbegberẽpai re taata watadu ani naida aida na ni te. Anga aingahe dunduko naye be zangarengba te; na si aidanga ani bi kere ingapai a gbua taata te. (Pa Mot. 19:17; Tam. 141:5) Rogo gu mozunga nga ga aNdiko, anga aingapai dunduko naadu kina kubani sa te, na kina gu bangisa mbakadapai re a du tipa gu dungurati nga ga a Kristano.​—1 Yo. 5:16, 17.

¹⁴ Yesu aima yugo gu gene rengbe aboro ngbaha ka nyasariipa gu kpakarapai rengbe ka kura dagba aKristano. Ani bingo agu apai ko aya si naida boro mangihe: “Ka wirinamo ingi pai kuti ro, [1] mo ndú, mo yúgu gani ingapai kuti ro dagba roni na ni ni sa roni. Ka ni gi paro, si wa mo gbe wirinamo fuo ro. Ono ka ni agia nga paro ya, [2] mo ki di kura boro sa watadu ue, si ngia sangba adezire ue na biata anyakasa pai dunduko. Ka ni ka pa gia sangbayo, [3] mo ki gumba ha fu kanisa. Ka ni ka pa gia sangba kanisa a, ni du foro wa Gendiria na barogo marã ngbeti.”​—Mt. 18:15-17.

¹⁵ Nibi gu kpiapai Yesu afuhe du ni kekehe rogo Matayo 18:23-35, si nawira gu ingapai ko afura tipaha rogo Matayo 18:15-17 nakodapa marã watadu pa dagbangua, wa zanga tumo bape watadu ka tudo boro. Watadu gu ingahe re ima rengba kadu a nga kere gumbarimo, nga gu nagbarasapa wene rimo boro.

¹⁶ Kangia gopai kina bero nga boro kinaho rogo dungurati mangi ngbatunga ingapai wa gure kuti ro, ka mo gunga ni basa ka orafuo abaakumba ka sana yo tipa i rimisi tiyo ku rogo gupai re tipa ka undo ro ya. A wa Yesu afu rugute, mo fura mbata na gu boro ingi kutiro re. Mo asadi kina roni ue nyasariipa gupai re zanga rimiso gu kura boro koyo. Mo ini gupai nga Yesu aayanga wẽ ‘mo ndu bara sa tipa ka yugo gani ingahe te.’ Sidu, ka si du nga gu boro re aidanga na gani ingahe na ki sanahe tipa mbupai te, si adu ni wenepai mo ndu berewe fuo ni ti kura regbo. Kangia oni ima rengba ka nyasariipa gupai re wa gure, gu boro ingi kutiro adu na ngbarago nga mo aagumbanga ha fu kura aboro watadu ka gbarasa wene rimoni rogo dungurati te. Gure nga mo ima “gbe wirinamo fuo ro.”

¹⁷ Kangia gu boro namangi gbegberẽpai idi gani ingahe, ki ho mbupai, na ki mangi ome tipa ka mbakada gupai re, ndupai ho tipa ka durugo gupai re berewe te. Wa vura duhe nga gu ingapai re adu ni bakerehe, agu aboro ue re ima rengba ka nyasariipa gupai re dagbatiyo.

¹⁸ Kangia mo arengbanga ka gbe wirinamo fuoro ni yugo mo gani ingahe “dagba roni na ni ni sa roni” te, mo ima rengba ka mangaha wa gu Yesu agumbaha nga, “mo ki di kura boro sa watadu ue,” na ka fura na wirinamo berewe rii gupai re. Agu aboro mo adia yo na mo, si naida gayo sásá du nga ka undo roni gaoni pagume karagatihe kubaha. Si angba gbe ka i du ni adezire gupai namangi, ono ka adezire adunga ho ya, mo ima rengba ka sia boro sa watadu aboro ue i du ni adezire gu sakapai nika manga dagbaroni. Si rengbe kadu nga i ima ino gupai oni afura tipaha na i ima rengba ka bihe singia ingahe aima manga rogo gupai namangi re. Kangia mo sia bakumba ni ngia dezire, ni arunga kuba dungurati te, bambiko anga gu rondo nga ga abaakumba du sia ni ni rimisi tini ku rogo gupai re te.

¹⁹ Kangia mo ima manga ome bara dunguhe ka oni arengbanga ka nyasariipa gupai re ya​—mo fura na ni ni saro na mo ki ndu na kura aboro fuoni ka rurupai adunga ya​—na mo nabihe nga si aidanga mo mbu gupai re gbua wa gure te, sidu, mo ima rengba ka gumbaha fu agu abaakumba nga ga dungurati yo. Mo tingidi gupai nga gayo sunge nga ka banda zereda rogo dungurati na ka saha si du ni gigirihe. Kangia mo ima gumbaha fu abaakumba, si naida mo mbuhe fuyo na ki du na kido kuti Yekova. Si aidanga mo mbu gu mangapai nga ga kura boro si kotosi ro watadu ka dia gamo ngbarago nga ga mangasunge fu Yekova te.​—Tam. 119:165.

²⁰ Ababanda akandoro nika wisigo gupai re. Ka si du nirengo nga gu boro re ima manga kere ingapai kuti ro na ni aidanga ka ho mbupai te na ni aidanga ka mbakada gupai re a te, si adu ni wenehe abaakumba sungu na ni na ki kusi gu mangi gbegberẽpai re kusayo rogo dungurati. Rogo gi gene re i na banda akandoro na kini sa dungurati si du ni gigirihe.​—Mt. 18:17.

WAI KA MANGAPAI KA SI DU NGA KERE INGAPAI MANGI

²¹ Kura bete kere aingapai kinaho wa wasiwasi kodaba, bäri, kodaba kumba na kumba watadu dee na dee, gberãngbayo, samungu kuti ndikidi pambori, irisokpiahe, na gu kura kere aingapai, si aidanga kina ho mbupai gbua be gu boro mangihe te. (1 Kor. 6:9, 10; Gara. 5:19-21) Wa duhe nga gu ngbatunga kere ingapai re rengbe ka maa padu dungurati wenengai rogo toro yo na gaha wene mangapai ngbapai, si naida ni pepa gu ngbatunga kere ingapai re fu abaakumba tipa i mangipai kutini. (1 Kor. 5:6; Yak. 5:14, 15) Kura aboro ima rengba ka ye fuo abaakumba ka kusa gayo ingapai watadu ka pepa gu ingapai nga ga kura aboro i nainipai tipaha. (Pa Mot. 5:1; Yak. 5:16) Ka si vura du nga gini gene du abaakumba nagipa kere ingapai ngbaha ni bambataha gu wirina naima zio bapatiza namangihe, si naida abaakumba ue ndu mbata ka wisigo gupai re. Kangia i bihe nga rengo du nga gupai re na gopai kinaho nayugo na ni nga gu boro re mangi kere ingapai, gu rondo nga ga abaakumba nika sia awirina wa biata ni rondo sarangbanga i bipai tipaha.

²² Abaakumba nangerafuo akandoro tipa ka banda ra be ai gupai rengbe ka gbarasa ra rogo toro yo. I namangasunge a na Fugo Mbori ngba wene gene tipa ka za gu boro mangi ingahe re na ka undo ni nidu wenengai berewe rogo toro yo. (Yuda 21-23) Gipai re nandu sa na gu rugute gu mokedi nangia Pauro afuhe fu Timoteo nga: “Mi naruga ro ku bangiri Mbori, na Kristo Yesu a, nga gu ko nikasapa ngbanga unga aboro na kangba aboro a, . . . ki nirugu yo [watadu ka za yo], nizungadi yo, ni gbanga hipai na yugopai dunduko.” (2 Tim. 4:1, 2) Manga gipai re ima rengba ka dia bakere regbo, ono gere nga papara nyanyakipa sunge nga ga abaakumba. Dungurati nabi gu ome i amangaha na nyanyakipaha na kini biyo nga “i re na irisa susi.”​—1 Tim. 5:17.

²³ Ai gu regbo pai nakuru nga boro mangi kere ingapai, gu bambatapai si aida ababiapai mangihe nga ka husa gu boro re rogo toro yo. Kangia ni ima manga ndikidi saberã na i rengbe arengba ka undo ni, gu zahe i nika fuhe funi ni sani watadu bangiri agu adezire nainipai tipa gupai re ti regbo gu rondo nga ga sarangbanga, si nika ruga ni na ki undo agu aboro naabihe i gunde ti manga ingapai. (2 Sam. 12:13; 1 Tim. 5:20) Ka si du nga gu rondo nga ga sarangbanga fu zahe fu boro gbaiga watadu nisani, si naida i rugusi ni ti kura apai. Rogo gi gene re, si naundo gu boro mangi ingapai ni ndu ngba “ruru agene” ka zanga kota berewe. (Eb. 12:13) Ho da regbo ni, i natona ka karaga apai funi ni basasa ho du he ni gbaiga nga ni ima tona ka hu rogo toro yo.

TINGIDAPA FU ZAHE

²⁴ Kangia gu rondo nga ga sarangbanga bi gupai nga boro ima sa gani berã ono gupai ni namangihe dungurati nika inopai aino tipaha watadu agu aboro du rogo gani dagbarago watadu ka si du nga si naida dungurati du na rubangirise na gu boro mangi ingapai re, wiri taata tingidapai namanga ti regbo gu Dunguratise Nga ga Gaani Raka na Gaani Sunge. Si naida gu tingidapai re du nga: “[Rimo gu boro re] ima gbia zahe.”

GU DIABERÃ NGA GA KUSA BORO ROGO DUNGURATI

²⁵ Ti gu kura aregbo, si rengbe kadu nga gu mangi irairapai re aidanga ka mbu gani gbegberẽ mangaapai re te, na ni aidanga ka degatuni kuti gu rugute i afuhe si undo ni te. Na ka si du nga gu rondo nga ga sarangbanga abingo ni ni “nimangi agu apai rengbe na saberã” te. (Amo. 26:20) Ginipai rengbe ka manga? Ho du apai ni wa ngbatunga gure, si rẽarẽ i kusi gu boro mangi irairapai re kusayo rogo dungurati, ka ká na ni ti kodatise na ga Yekova gigiri aboro. Gu gani gbegberẽ mangapai re adunga berewe rogo dungurati te, rogo gi gene, re dungurati nadu ni bandabandaha na ni gigirihe na ka rimoho agberãnga ya. (Pa Rug. 21:20, 21; 22:23, 24) Ho gu mokedi nangia Pauro agipa gu gbegberẽ mangapai ni nga ga pazee boro amangihe rogo gu dungurati nga ga Korinda, ko afu rugute fu abaakumba nga i “fu gi ni re fu Satana tipa . . . toro [nga ga dungurati] bati.” (1 Kor. 5:5, 11-13) Pauro afura a tipa kusa agu aboro kusayo rogo dungurati naasamungu kuti rengo rogo bambata sa kama agarã.​—1 Tim. 1:20.

²⁶ Ho diaberã namangi ni nga si naida i kusi gu boro mangi irairapai kusayo rogo dungurati, si naida gu rondo nga ga sarangbanga pepa gu diaberã re ape fu gu boro re ziazia, na ki yugu gu ndupai watadu nduapai nga ga Ziazia Kekeapai du tipa pa kusa ni. Bara sa kindi i napepa gu diaberã re funi, gu rondo nga ga sarangbanga natingida ni na gupai nga ka ni bihe nga iraira sarangbanga ima manga na ni nga kango koyo du gu kura abaakumba ni, si naida ni yuguhe ni ke ni waraga na ndu gupai du ni ti ni nga kango tipa gu ngbanga re. I nafu aˈuru funi wa saba tona ti gu uru rondo nga ga sarangbanga atingidi ni na gupai re. Ka abaakumba gbia gani waraga, gu rondo nga ga abaakumba nasana babi rimbasa ko sia agu abaakumba rẽ tipa kadu rogo gu rondo du tipa ka fugö gu ngbanga re. Si naida i mangi ome tipa ka fugö gu ngbanga re vuru poso sa fuo gbia yo ga gu boro re waraga. Ka boro ngia kango kuti sarangbanga, i atingidanga pa kusa ni rogo dungurati te, i nambuhe mbata. Ti kina gu regbo re, i narugusa gu boro mangi irairapai re ti fu akaragapai ba dunguratise yo, kparakpee gbiati gu kura kparakpara amomu nga ga sunge.

²⁷ Pa ida yo ho funi nga kura abaakumba sungu na ni nga yugo weneringise funi, na ka fu momu berewe funi ni sakipa ti ni fu agu abaakumba re. Sidu, ka gu boro mangi irairapai re ayengo tipa gu sarangbanga nga ga fugöpai ya, na i ki mangi ome vurũ tipa ka gbia ni ka gene adunga ya, i tingidipa kusa ni kusayo rogo dungurati.

²⁸ Kangia gu boro mangi irairapai re bihe nga ndupai ho ni ngia kango te, gu rondo nga ga sarangbanga nasakapai funi tipa saberã na agu adiandue rengbe ni ka mangaha tipa ka karaga tiní ku rogo dungurati fuo bete regbo. Gere nga gene sa tipa ka undo ni na ka yugo weneringise funi na gu maabangirise nga ni nika aria gani gene mangaapai aˈaria berewe ki rẽ tipa ka karaga tiní ku rogo ga Yekova riigbu.​—2 Kor. 2:6, 7.

TINGIDAPA KUSA BORO ROGO DUNGURATI

²⁹ Ho daha ni ti kusa gu boro kusayo rogo dungurati aidanga ka saberã ni ya, i namanga wiri guru tingidapai fu dungurati nga: “[Rimo gu boro re] berewe nga Dezire Yekova te.” Gure nika fu zahe fu gu kura aboro du rogo dungurati i mbu kodatise na ni.​—1 Kor. 5:11

KPARA KODATISE TI DUNGURATI

³⁰ Gu fugo nga “kpara kodatise” si nga gu mangapai gu boro naima zio bapatiza amangaha rogo wia yo nga ni aidanga kadu berewe ni Kristano te na ni aidanga i yambu ni berewe nga Dezire Yekova te. Watadu ni ima rengba ka yugoho rogo gani mangapai yo nga ni berewe nga Kristano rogo dungurati te rogo gu gene yo nga ka rimiso tiní ku rogo gu riigbu namanga agu apai andunga sa na gu yugopai nga ga Baibiri ya nga gu Yekova Mbori nika fu mbusa afu tipaha.​—Yes. 2:4; Yugo. 19:17-21.

³¹ Gu mokedi nangia Yoane afura tipa agu aboro naambu gayo idapase nga ga aKristano ti rago ko nga: “I aguari aguari pati rani, ono i adu nga ni gaani yo te; bambiko ka i adu ni gaani yo, ka i anye anye na ani.”​—1 Yo. 2:19.

³² Ho boro akpara tini ni kusayo ti dungurati, anga Yekova nabi ni kina wai ko abi gu Kristano naima zera rogo toro yo nga gu ni atungusanga pai berewe ya te. Boro rengbe ka zera rogo toro yo mbiko gupai nga ni agedanga Fugo Mbori dedede te. Watadu ni gbia tiní na akpakarapai, watadu rungosiro na ka ni adunga berewe zaaza tipa ka mangasunge fu Yekova ya. Abaakumba gbiati gu kura aboro rogo dungurati nikaa ndu kindi kumbatayo kaa fu undo fu gu Kristano zere rogo toro yo.​—Rom. 15:1; 1 Tesa. 5:14; Eb. 12:12.

³³ Ono gu kparakparapai du ti gu Kristano sia ka kpara tiní kusayo ti dungurati nga, wiri guru tingidapai namanga fu dungurati nga: “[Rimo gu boro re] berewe nga Dezire Yekova te.” Si naida i mangiapai na gu boro re kina wai duhe tipa gu boro i nakusi ni kusayo rogo dungurati.

KARAGATISE KU ROGO DUNGURATI

³⁴ I rengbe ka karaga gu boro i akusi ni rogo dungurati kusayo watadu gu boro nakpara tiní ti dungurati kina ka si du nga gopai kinaho nayugoho gbaiga nga ni ima saberã ni, na fuo gu bagizo regbo daada, ni ima yugoho nga ni ima mbu gu gbegberẽ apai ni aamangaha re. Si naida ni yuguhe nga ni naida kadu berewe na wene pagume na Yekova. Si naida abaakumba du na rubangirise ka mbu gu boro re ni di gu bagizo regbo daada​—dungu adiwi, garã sa watadu susi gure, ringbisihe kuti gupai ni amangihe​—tipa gu boro re yuguhe nga ni ima manga ndikidi saberã. Ho boro nake waraga ni fu gu rondo nga ga abaakumba tipa i karaga ni, rondo karaga boro nasungo na ni tipa ka sakapai na ni tipaha. Si naida gu rondo re wisigi ni singia “nimangi agu apai rengbe na saberã” na i ki diberã singia ka karaga ni watadu ka zanga karaga ni tigu regbo re.​—Amo. 26:20.

³⁵ Kangia gu boro sanahe tipa i karaga ni re, i akusi ni rogo gu kura dungurati kia, gu dungurati du ni rogoho nika maa rondo karaga boro tipa i gbia ni na ki ngere ku rogo gupai re. Kangia agu aboro du rogo gu rondo du tipa karaga boro re idi kuti gupai nga si naida i karaga ni, i nika sana agu abaakumba du rogo gu dungurati i akusi ni rogoho tipa gayo berãpai. Agu arondo dunduko du ue re nika mangasunge sa ka bihe singia i ima ino agu apai dunduko du tipa gu boro re tipa wa ka i mangi diaberã. Ono tie, gu diaberã du tipa ka karaga boro ku rogo dungurati, gu rondo nasungu na ni ti tonatonaha tipa ka kusa ni rogo dungura namangaha.

TINGIDAPA KARAGA BORO KU ROGO DUNGURATI

³⁶ Ho gu rondo du tipa karaga boro abihe ni nga gu boro i akusi ni watadu na kpara tini re ima sa gani berã nzunzu na si naida i karaga ni ku rogo dungurati, i namanga tingidapai nga ga pa karaga ni rogo gu dungurati i akusi ni rogoho. Kangia gu boro re awere rogo gu kura dungurati kia, si naida i mangi gu tingidapai re amanga yo a. Si naida gu tingidapai re du gbua nga: “[Rimo gu boro re] awere nga Dezire Yekova.”

AGU APAI NABIPA GU RUKUTU AGUDE NIIMA ZIO BAPATIZA

³⁷ Kangia tooni gude niima zio bapatiza mangi kere ingapai, si naida i tingidihe fu abaakumba. Ho abaakumba amangapai ni kuti gu ingapai tooni gude namangihe, si adu ni wenepai ka agu avunguru niima zio bapatiza du kinaho. Si naida i du na giatise na gu rondo nga ga sarangbanga, na si aidanga i ka na wiriyo ti dia gu rugute si aida i fuhe furu tipa gau mangapai te. Gu rondo nga ga sarangbanga namanga ome tipa ka za gu gude re, na ka karaga ru ku ngba wene gene kina wai duhe tipa gu kuru boro mangi ingapai. Ono tie, ka gu tooni gude re aidanga ka saberã ru ya, i kusi ru kusayo rogo dungurati.

HO DUHE NI NGA AGU ABATUNGUSIPAI ATA ZIONGO BAPATIZA YA MANGI INGAPAI

³⁸ Ginipai rengbe ka manga ka si du nga agu abatungusipai ata ziongo bapatiza ya mangi kere ingapai? Wa duhe nga i ata ziongo bapatiza ki da ni aDezire Yekova te, i arengbanga ka kusayo rogo dungurati te. Ono tie, si rengbe kadu nga i ata ruganga tiyo wenengai na agu arugute nga ga Baibiri te, wene arugute ima rengba ka undo yo i ‘mbakadi ruru agene’ tipa nduyo.​—Eb. 12:13.

³⁹ Kangia gu batungusipai ata ziongo bapatiza re ya aidanga ka sa gani berã fuo abaakumba ue ndu fuo ni ka undo ni te, si angba gbe i tingidihe fu dungurati. Wiri guru tingidapai namanga nga: “[Rimo gu boro re] nga gu batungusipai ata ziongo bapatiza ya te.” Fuani, dungurati rengbe ka bi ni wakina boro ngbii. Wa duhe nga i akusanga ni kusayo rogo dungurati te, si naida aKristano du na rubangirise nibipa kodatise na ni. (1 Kor. 15:33) Si aidanga ni fu tingidapa sunge tungusapai te.

⁴⁰ Fuo bete regbo kusa, gu batungusipai ata ziongo bapatiza ya i adi ni kusayo ti sunge abatungusipai ima rengba ka ida kada berewe ni batungusipai. Ho du pai ni wa gure, abaakumba ue nandu fuo ni ka wisigo gani sonakumbatayo rogo toro yo. Kangia ni ima rẽ, wiri guru tingidapai namanga nga: “[Rimo gu boro re] awere nga gu batungusipai ata ziongo bapatiza ya.”

YEKOVA NAFU MAKU KURII GU IRISOMBORI DU NA ZEREDA NA NI GIGIRIHE

⁴¹ Agu aboro dunduko nairiso Yekova areme rogo gako dungurati i na ngbarago be gu kumuko nga ga toro Yekova nafuhe fu gako aboro. Gaani banambu nga ga toro na zuzuahe rogoho kpaima, na ani a na wene aime nga ga rengo kpaima rogoho. Ani a na ga Yekova bandahe vurube gako mbakadapai nga ga siokrasia tii gu ngbembatayo nga ga Kristo. (Tam. 23; Yes. 32:1, 2) Padu ani rogo gu paradizo nga ga toro rogo gi yangara arame re ima fu bandahe furani.

⁴² Ka ani banda gu zereda nga ga dungurati na padu he ni gigirihe, ani nika mbu gu imarago nga ga rengo si ni kí akí kindi. (Mt. 5:16; Yak. 3:18) Mbiko ga Mbori amaku, ani nika du na gu ngbarago nga ga bi badungu aboro i niye ka ino Yekova na ka kodatiyo na ani tipa ka manga gupai ko akpinyemuhe.