Kura Apai

Waraga fu Agu Avunguagude Nga AKristano:

Wangia mo vungugude, mo nakpinyemu ka undo awiro i kpinyemu Yekova na ki kpara gayo raka fuko. Ginipai rengbe mo ka mangaha tipa ka undo yo i mbakaditiyo tipa bapatiza? Gini regbo du si nika ida i rẽ tipa gi nyanyakipa diandue re?

Yesu arugu apefuoko nga: I “Sa arikaaboro dunduko ni abawiriki, ki nibapatizi yo.” (Mt. 28:19) Ringbisihe kuti gipai re, gu bambatapai si aidaha tipa ka zio bapatiza nga kada ni bawiriki​—nga gu boro niima rugatini na ga Yesu ayugopai na ki idi kutini na kini pekefuoho dawedawe. Gere nga gupai rengbe rukutu agude arengba ka mangaha.

Oni moi wene kpiapai fu awironi, na ki rimisi ga Yekova ayugopai ku kpotoyo yo. (Pa Rug. 6:6-9) Gipai re nakoda mangasunge na agu apai du rogo gu buku nga Mo Raki Nyeanye Kindi na Ngbarago! ka yugo gu bangua arengo nga ga Baibiri fuyo na ki undo yo i niberẽkurii gu bangua arengo nga ga Baibiri na kini raki kutini. Mo undo awiro i ni sakipai tipa gayo aida nitiyo. (1 Pet. 3:15) Gu inohe na gu ngarasaro i agbiaha bero gbiati wisigopai nisase, gu irisombori nga ga aborokporo, adunguratise, na wene kodatise nika undo yo i mangi sonakumbatayo tipa bapatiza na kini ndu kumbatayo kindi kaa iriso Yekova. Mo moi agu asásá nga ga toro fuyo.

Asanza 20:11 naya: “Gude nayugo pa tini nzunzu ni kina gani mangapai, watadu gani sunge zanga biriki ki du ni ruru he.” Gini amangapai rengbe ka yugoho nga gude ima da ni ga Yesu bawiriki na ni ima rẽ tipa bapatiza?

Gu gude namanga sonakumbatayo tipa ka zio bapatiza, si naida ni nigisangba avunguni. (Amo. 5:29; Koro. 3:20) Baibiri nafura tipa Yesu ho garãko adu ni nga 12 nga: “Ko ki gi sangbayo [avunguko].” (Rk. 2:51) Rengo ngaha nga, mo arengbanga kadu na kido nga wiro nikaa manga agu apai dũ du ni ruruhe te. Ono gu boro nakpinyemu ka zio bapatiza du wa ka ni mangi ome tipa ka pekafuo ga Yesu kpiapai na kingia gu boro nagiasangba avunguni.

Ni du wa ka ni yuguhe a nga ni na nyemu wirika gu rengo nga ga Baibiri. (Rk. 2:46) Ya mo wiro nidu na nyemu kadu pati adunguratise na kini fu akaragapai? (Tam. 122:1) Ya mo ni na nyemu kaa geda Baibiri dedede na kini wisigipai ni sa ni?​—Mt. 4:4.

Gu gude namanga sonakumbatayo tipa bapatiza naasada ka peresapa agu apai nga ga Kindo mbatayo. (Mt. 6:33) Ni nabihe nga gani sunge du nga ka pekapa gani idapase fu kura aboro. Ni namanga ngbatunga atungusapai ni bakiakia na ni agundenga tipa ka pehe fu gani abayugupai na akurani sukuru yo nga Dezire Yekova nga ni te te. Ni na bi gu sunge fuyo ho funi rogo Dunguratise Nga ga Gaani Raka na Gaani Sunge na nyanyakipaha.

Ni namanga ome tipa ka zanga rimiso tiní ku rogo gbegberẽ kpamiatise tipa kadu ni gigiri ni rogo mangaapai yo. (Snz. 13:20; 1 Kor. 15:33) Gipai re ni yuguyuguhe rogo agu amanzigo, afirimi, ambakadapai nga ga terevizioni, ambaro nga ga vidio ni abihe gbiati mangasunge na Internet.

Dungu agude namangapai wenengai kuti gu nyanyaki asadatise avunguyo amangaha tipa i sa rengo ni gayo na ki rẽ tipa bapatiza mbuyo kindi ni paranga yo. Yekova funga maku afu foro wa mo aundo awiro i mangi gu nyanyakipa diandue re nibipa gayo pagume na Yekova.

Waraga fu gu Batungusipai Ata Ziongo Bapatiza Ya:

Momu du nga ha ka mangasunge na dungurati ni gu batungusipai ata ziongo bapatiza ya. Si naida i tambua ro atambua tipa gu sonakumbatayo rogo toro yo mo namangihe re. Mo ima ye ki ini Mbori vurube wirika Fugoko na ki du na idapase kuti gako akidohe.​—Yo. 17:3; Eb. 11:6.

Si rengbe kadu nga mbata fu mo tona wirikapai na aDezire Yekova, pambori adu kinaho mo anaandu ku rogoho, watadu pambori aadunga a bero te. Watadu mo anaamanga gu kurapai nga gu andunga sa na gu bangua arengo nga ga Baibiri ya. Ono awere mo ima yugo gamo idapase rogo saberã yo, du nga bakere biratise ti gu gbegberẽ apai mo amangihe mbata kusayo, na ki satise ti ni, du rogoyo nga ka mbu gu gbegberẽ gene raka naadu mbata na ki diberã tipa ka manga gupai du ni ruruhe bangiri Mbori.​—Amo. 3:19.

Si rengbe kadu nga mo aima ino Ziazia Kekeapai mbu ro “ni gude.” Rogo gi gene re si aima banda ro ti rimiso tiro ku rogo gu mangaapai angianga ga aKristano ya na ti kere gbegberẽ apai. (2 Tim. 3:15) Mo ima ino wai ka sovura kuti gu soapai nga ga akurase gbiati gu kuraapai rengbe ka sa ro mo mangi gupai angbanga bangiri Yekova ya. Mo ima yugo ndikidi idapase ni songoda mo ndikidi irisombori na ki pekepa gamo aida fu kura aboro. Mo ima gbia rabahe tipa gu sunge tungusapai nga ga aKristano. Awere mo ima manga diaberã tipa ka iriso Yekova ni gu batungusipai ata ziongo bapatiza ya.

Singia mo aini Yekova kusa rogo ga raka yo watadu mo ainiko mo du ni gude, si wira wa mo awere naberãkurii adiandue ue rogo gamo sonakumbatayo rogo toro yo​—kparatise na zio bapatiza. Mo nakpara tiro fu Yekova ni fura mo fuko rogo kparakpee yo na ki pepa gamo diaberã nga mo naida ka fu tiro fu kina ko sa nyeanye kindi. (Mt. 16:24) Mo nazio bapatiza tipa ka yugo na ni nga mo aima kpara tiro fu Yekova. (Mt. 28:19, 20) Vurube kparatise na bapatiza, mo nada ni ga Yekova Mbori siasia bamangisunge. Nairiwo gu bawene momu ngaha re!

A wa mo abihe rogo gamo wirika Baibiri yo, mo ima rengba ka gbiatiro na akpakarapai ni bakiakia. Mo tingidi gupai nga, ngbutuko fuo bapatiza, “Ziazia Toro ki ngbe ku mbata yo fu Yesu ku ngbakungba yo bakitingbanga asadi ko.” (Mt. 4:1) Ti ngbafuo zio mo bapatiza ni ga Kristo bawiriki, mo moiberãro nga mo nika gbiatiro agbia na aˈasada. (Yo. 15:20) Si nika ye ngba arikoho. Gamo aborokporo ima rengba ka sogote ro. (Mt. 10:36) Akuaro sukuru yo, basunge yo na gamo kuru amoiniro ima rengba ka sawia ro. Dedede si naida mo tingidipa agu afugo Yesu du rogo Marako 10:29, 30 nga: “Mi nagumba ha fu roni ni rengo, ka boro he gani bambu, na awirinani, na adawirini, na nani, na bani, na awirini, na gani aati, tipa re, na tipa wene pangbanga ni ka abambu du be ni na awirina, na adawiri, na ana, na awiri, na aati, na arungo, wa du rago re, ki susi gu naadu mbata bara 100; na nyenye unga rogo gu ngbi nikadu yo.” Mo mangi ome nyanyaki ka nye mbembedi na Yekova na kini raki kuti gako wene arugute.

Ho mo nika ida ka zio bapatiza ni, mo gumbaha fu barii gu rondo nga ga abaakumba. Agu asanahe ngbefuo gipai mo agedaha re nga mburu gu sakapai abaakumba nika sakaha na mo tipa ka bihe singia mo rẽ tipa ka zio bapatiza. Mo ima rengba ka fugö agi asanahe re ni saro ni gamo papara mbakadapai nga ga wisigopai nisase dedede.

Tipa ka mbakadatiro tipa gi sakapai re, mo di regbo tipa ka gedaha na kini berẽkurii agu averesi i narogodi apai rogoho re. Mo ima rengba ka keka apai rogo gi buku re si nitingidi ro na apai. Mo ima rengba ka mangasunge na agu apai mo nakekehe re ti regbo gamo sakapai na abaakumba. Kangia si ima mbu mo gi tiro na gu kura asanahe, ka mo gundenga ka gbata undo be gu boro nawirika Baibiri na mo ya watadu be abaakumba ya.

Ti regbo gamo sakapai na abaakumba, ka mo bingo ho nga si naida mo fu gbanga karagapai watadu gu du ni kpakarakpakaraha ya. Mo fu gu karagapai du taata nga gu naye kina boro ngbaduro yo. Tipa dungu asanahe, si angba gbe ka gamo karagapai du na veresi sa watadu ue rogoho ka yugo na ni nga mburu gamo karagapai naye rogo Ziazia Kekeapai yo.

Kangia mo ata gbianga wene inohe rogo gu bangua ayugopai nga ga Baibiri te, abaakumba nika manga mbakadapai tipa mo gbia undo wa ka mo rẽ ka sakapai tipa wai mo nagi tiro na rogo Ziazia Kekeapai yo na ki rengbe ka rẽ tipa ka zio bapatiza kusa.

[Tingidapai fu agu abaakumba nga ga dungurati: Agu arugapai du tipa sakapai na gu boro naida ka zio bapatiza gu du ti kpewaraga 208-212.]