Yangara Sakapai na Agu Aboro Nika Zio Bapatiza

Dedede, bapatiza naamanga ti regbo gu bakere adunguratise nga ga aDezire Yekova nga ga uru sa watadu ga aˈuru biata. Ti digido gu gumbapai du tipa bapatiza, bagumbapai nika sana agu aboro nazio bapatiza i ru kuari ka karagapai kuti asanahe ue na fugoyo kuari:

1. Ya mo mo saberã ti gamo aingapai, ki kpara gamo raka fu Yekova, na ki idi kuti gu gene Yekova afu bata ngbaha vurube Yesu Kristo?

2. Ya mo mo rugu tiro na ni nga gamo bapatiza nayugoho nga mo nga Dezire Yekova nakoda tiro na ga Yekova riigbu?

Pa karaga agu aboro pai nika zio bapatiza kuti agi asanahe re na fugoyo kuari nayugo na ni nga i ima “kusapa gayo idapase gbaiga” na i na idapase kuti ga Yesu motumo na i ima kpara gayo raka naabaha fu Yekova. (Rom. 10:9, 10) Si naida agu aboro nika zio bapatiza mangi kparakpee na ki berẽkuriipa agi asanahe re wenengai mbata fu regbo tipa wa ka i karagapai kuti ni ringbisihe kuti agu apai i naidi kuti ni.

Ya mo mo kpara gamo raka fu Yekova rogo kparakpee yo, na ki kido ko nga mo nikaa iriso kina ko sa na kini peresi pa manga gupai ko akpinyemuhe ni nyanyakipa pai rogo gamo raka yo?

Ya mo mo na gu kido awere nzunzu nga si naida mo zi bapatiza ti regbo ai gu bakere dunguratise naye barambeda?

Gini aroko rẽ tipa zio bapatiza? (1 Tim. 2:9, 10; Yo. 15:19; Frp. 1:10)

Si naida ani vo “gu roko adu nga na enda ti ni ya” tipa ka yugo na ni nga ani “idi pa sinombori.” Sidu tie, agu aboro nazio bapatiza si aidanga i vo agu aroko nagbida boro agbida watadu agu aroko du na kekeapai ti ni watadu asura te. Si naida i vo agu aroko du ni wene bibihe, ni gigirihe na rẽarẽ tipa gu mbakadapai re.

Wai du si aida ga boro mangapai du ho ni azio bapatiza ni? (Rk. 3:21, 22)

Ga Yesu bapatiza na maa wene kpiapai fu aKristano areme. Ko aima rugatiko na gupai nga bapatiza nga nyanyakipa diandue, na gipai re adu ni yuguyuguhe rogo asinoko gbiati gako mangaapai. Sidu, si aidanga ba bapatiza du ni gu ba nga ga ba wia, ba ngimbaro, ba guzo ime watadu gu kura mangapai rengbe ka sa gu mbakadapai re ka paha nyakinga ya te; na si aidanga vovo Kristano nimangipai wa ka i ya ni ima du na bakere diabese te. Wa duhe nga regbo bapatiza nga regbo ngbarago, si aidanga gu ngbarago re fu afu rii ome te.

Wai du ndu tipa adunguratise dedede na kini koditise na dungurati nika undo ro mo kakuti gamo kparatise fu Yekova?

Tingbafuo zio mo bapatiza, tipagine si nika ida ti ni mo ni wisigipai nisaro na kini ndu gene tungusapai yo dedede?

ARUGAPAI FU ABAAKUMBA

Ho gu batungusipai ataziongo bapatiza ya ayugoho ni nga ni naida ka zio bapatiza, si naida i ngarasi ni ni fugü gu riipai nga, “Asanahe fu Agu Aboro Naida ka Zio Bapatiza” sirisiri, du ti kpewaraga 185-207 nga ga gi buku re. Si naida i gbe berãni kuti gu paparaha nga “Waraga fu gu Batungusipai Ata Ziongo Bapatiza Ya,” du ti kpewaraga 182, nga gu nasakapa wai rengbe ni ka mbakada ti ni tipa gani sakapai na abaakumba. A wa si nagumbaha yo, ni ima rengba ka mangasunge na gani kekeapai du rogo gu waraga re na ni ima rengba ka zakaha ti regbo sakapai. Ono tie, si aidanga kura boro fugü agi asanahe re na ni mbata fu abaakumba te.

Agu aboro dunduko naida ka zio bapatiza, i gumbaha fu barii gu rondo nga ga abaakumba. Tingbafuo ni gedi gu riipai nga, “Asanahe fu Agu Aboro Naida ka Zio Bapatiza,” barii gu rondo nga ga abaakumba nika sana ni singia ni ima kpara gani raka fu Yekova rogo kpee yo ka manga gupai ko akpinyemuhe. Kangia ni ima kpara gani raka fu Yekova, barii gu rondo nga ga abaakumba nika manga mbakadapai tipa abaakumba ue sakipai na ni riipa gu paparaha nga “Asanahe fu Agu Aboro Naida ka Zio Bapatiza.” Si naida i fu apaparaha ni bakiakia fu agu abaakumba re. Ndupai ho tipa i pidi kina gu regbo i nika pe pa bakere dunguratise i kini ru ka manga gi sakapai re te.

Agu apaparaha du ue re, i rengbe ka mangaha bara ue gu sa tipa saa sa, wa vura duhe vurũ nga pai ho gberẽ ti dia bakere regbo ka si du nga si naidaha wo te. Si naida i tona wisigoho na kparakpee na ki digisihe a na kparakpee. Si aidanga gu boro naida ka zio bapatiza watadu abaakumba nioro aora gbua rii agu asanahe re te. Agu abaakumba i nafu gi sunge re fuyo, si naida i peresi paha mbatayo fu kuraapai.

Dedede, si ni wenepai ka fugo agi asanahe re na aboro ni basasa angianga ni badona ya. Ka gu boro naida ka zio bapatiza re karagapai kuti agi asanahe re ni basasa dũ, si nasa abaakumba i rugutiyo wenengai na gani giarogopaiyo, na ka bihe singia ni rẽ tipa bapatiza watadu ni ata rẽnga te. Kurii gure, si ima rengba ka mbu gene funi ni peke agu apai du kpotoni yo ka si du nga ni nisani. Kumba na diako ima rengba ka manga gi wisigopai re kina sa.

Ho du he ni nga gu boro naida ka zio bapatiza re nga dee, si naida i mangi gi wisigopai re rogo gu ba du aboro rogoho ono zanga apai ni tiwi ku tuyo yo. Si ngbaangba ka dia gu kura boro na mo, ningia bakumba watadu moundo abaakumba, nibipa gu paparaha oni andu ka fugoho a wa i nafura tipaha rogo gu genewaraga ngbefuo gere.

Rogo agu adungurati du na kina bete abaakumba, agu amoundo abaakumba du na inohe du na ruru bipai ima rengba ka fugö agu asanahe du tipa bapatiza na boro du rogo “Bambata Paparaha: Agu Aida Nga ga AKristano.” Kina abaakumba sa si aida i wisigi “Ue Paparaha: Gu Raka Nga ga Akristano.” Ka si du nga dungurati na agu akumba rogoho nangbembatayo ni kina beteyo, i gumbaha fu babi rimbasa tipa ko diberã singia gu dungurati du mbembedi rengbe ka undo.

Ho du he ni nga gu boro naida ka zio bapatiza re nga tooni gude, si naida avunguru du kina pati gu sakapai re. Ka si du nga avungu gu gude re adunga ho te, abaakumba ue (watadu bakumba na moundo abaakumba, nibipa gu paparaha oni andu ka fugö ho) rengbe ka manga apaparaha ni basasa.

Si naida abaakumba ini gupai nga gu boro naida ka zio bapatiza re ima ruga tini na bete gu bangua ayugopai nga ga Baibiri. Kurii gure, si naida i ini aino singia gu boro re nabi rengo na nyanyakipaha na ni na dudunguro irisa tipa ga Yekova riigbu. Kangia ni aruganga tini wenengai na gu bangua ayugopai nga ga Baibiri te, abaakumba nika manga mbakadapai tipa ni gbia undo wa ka ni rẽ tipa bapatiza ti gu kura regbo. Agu akurayo kinaho si naida i fu regbo fuyo tipa i rugutiyo na pa nyaka sunge tungusapai watadu ranigose fu agu ambakadapai nga ga riigbu. Abaakumba du si aida i ini gu bakio regbo si aida i dihe kuti agi apapara gi wisigopai re ni basasa tipa ka rugatiyo wenengai singia gu boro re ima rẽ tipa bapatiza. Wa vura duhe nga kura asanahe rengbe ka dia regbo ka agu akuraha adianga ha ya, agu asanahe re dunduko si aida i fuguhe.

Agu abaakumba i nasia yo i fugu agi asanahe re si nika ida i gbiatiyo tingbafuo gu ue paparaha ka diaberã singia ni rẽ tipa bapatiza watadu ni arẽnga te. Si naida abaakumba berãkuriipa agu apai du tipa aboro ni basasa, gayo tandu mangaapai, gbiati gu kura apai. Gupai ani aidaha nga ka maaberã rani fuo agu aboro fu kpotoyo yo fu Yekova na niima rugatiyo na gu bangua arengo nga ga Baibiri. Mbiko gaoni undo, agu aboro nika zio bapatiza re nika mbakadatiyo wenengai ka manga gayo sunge wangia yo abamangisunge wene pangbanga.

Tingbafuo ho, bakumba sa watadu agu abaakumba du ue re nika gbia gu boro re na ki pehe funi nga ni ima rẽ tipa bapatiza watadu ni arẽnga te. Kangia ni ima rẽ, agu abaakumba re fugu gu paparaha na ni nga “Yangara Sakapai na Agu Aboro Nika Zio Bapatiza,” du ti kpewaraga 206-207. Kangia ni ata nyasanga wisigo gu buku nga Mo Raki Nyeanye Kindi na Ngbarago! te, i ngarasi ni nga ni nyasi wirikaha fuo zio ni bapatiza. Oni pehe funi nga i nika rimiso gu ramediwi ni nazi bapatiza ti ni ku rogo gu waraga nga Fuo ga Batungusipai Sunge Rogo Dungurati nga gu du ti rimo ni. Oni tingidi ni na gupai nga abaakumba naroga gani fuo sunge tipa riigbu rengbe kaa ngerafuo agu asunge nga ga Mbori aDezire Yekova amangaha rogo zegino dunduko na wa ka ni rengbe a kaa manga agu apai nga ga toro na kini gbia undo rogo toroyo. Kurii gure, abaakumba rengbe ka tingida vovo abatungusipai na gupai nga agu atingidapai du tipa boro, i namangapai kuti ni ringbisihe kuti Global Data Protection Policy of Jehovah’s Witnesses, du rogo jw.org. Si naida gi sakapai re du gbua tipa aminiti bawe watadu kusende ti ni.

Garã sa tingbafuo gu boro re zi bapatiza, si naida abaakumba ue ndu fuo ni ka ngarasa ni na ki fu agu aberãpai rengbe ka undo. Si naida bakumba sa du nga bangerekurii sunge tungusapai rogo gani badona. Ka si du nga tooni gude du, si naida avungu ru du kinaho. Si naida gi dunguratise re du ni gupai nika fu ngarasaro. Abaakumba nika sakapai tipa wai ni nasono rogo toro yo na ki fu wene aberãpai tipa wai rengbe ni kaa ndu kumbatayo kindi na gani wisigopai nisase gbiati geda Baibiri na aˈuru dũ, manga gu irisombori nga ga aborokporo na aposo dũ, ye tipa adunguratise na kini fu akaragapai baha yo, gbiati tungusapai na aposo dũ. (Ef. 5:15, 16) Kangia ni ata nyasa nga wirika gu buku nga Mo Raki Nyeanye Kindi na Ngbarago! te, si naida abaakumba mangi mbakadapai tipa boro undo ni. Si naida abaakumba tambua gu boro re wenengai. Dedede rugute sa na aberãpai riipa pai watadu ue adu ni wenehe.