Ana Nakpara fu Mbori Tipa Kumbagude

Kura boro Yisaraere sa rimoko angia Erikana adu na adee beko ue, arimoyo angia Ana na Penina, ono ko akpinyemu Ana kisusi. Penina anaasawia Ana na aregbo dũ mbiko Ana aavunganga te ono Penina adu tigari na dungu agude beri. Rogo agarã ni basasa dũ, Erikana anaandu na gako aborokporo ku rogo gu banye naadu Siro yo tipa irisombori. Ti gu kura regbo sa ho i adu ni yo, ko abi gupai nga gu diako nangia Ana nga guri ko akpinyemuri akpi gbe, adu na kere gberãrago. Ko aya furi wẽ: ‘Ako Ana ka mo kparingo ya. Mi kina ane foro. Mi ima kpinyemuro.’

Kusa, Ana andu ka manga kparakpee nisari. Gene aadunga beri wa ka ri mbu kpee ho ri aazungodi Yekova ni ko undo ri te. Ri amangi kidohe ki ya: ‘Yekova, ka mo fu kumbagude fere, mi afu ko foro, na ko nika mangasunge foro rogo gako raka yo naabaha.’

Gu gbiamotumo nangia Eri abi Ana ri nikpari ni aume rogo patapata yo, ko ki berẽhe tigako nga ri ima kpibuda. Ana akaragapai ki ya: ‘Oó, gi gbia, mi akpingo buda te. Mi rogo kere kpakarapai, na mi nafura na Yekova tipaha.’ Eri abi gupai nga si aarunga ko fura wo furi te na ko ki ya furi: ‘Mbori funga gu he afu foro mo aidaha.’ Rago angba ti Ana ri ki guari ki karaga tiri. Si aadianga garã te, ri ki vungugude ki yambu rimoko nga Samuere. Ya mo mo rengbe ka berãnga pa gu ngbarago Ana adu na ni?

Bangiri Ana aagonga ti gu gari kidohe ri amangihe fu Yekova te. Nibasa fuo mbu ri ko ti mai, ri andu na ko ko nimangisunge banye yo. Ri aya fu Eri wẽ: ‘Gi gude re du mi akpari tipa ko. Mi kpara ko fu Yekova wa du ko ni ungako kindi.’ Erikana na Ana anaandu kaa bi Samuere na agarã dũ na kini ndu na vovo aroko fuko. Yekova ki fu akumbagude berewe biata fu Ana na adegude ue.