Ga AYisaraere Bambata Bakindo

Yekova aima fu abasapungbanga fu aYisaraere i ningbe fuyo kumbatayo, ono i aaida na bakindo. I aya fu Samuere wẽ: ‘Agu aringara dunduko du pa tirani na kina gayo abakindo. Ani naida bakindo a tigaani.’ Samuere abihe nga gupai re arunga te, sidu, ko akpari fu Yekova tipa gupai re. Yekova aya fuko wẽ: ‘Anga mo agu aboro re na ká ro te. Mi du i aká re. Mo ya fuyo i ima rengba kadu na bakindo beyo ono gu bakindo re nikaa ida dungu apai beyo.’ Wa si avura duwo, aboro aya: ‘Gure na pai te. Ani naida na bakindo!’

Yekova aya fu Samuere wẽ, kumba du rimoko nga Saura nika ngia bambata bakindo. Ho Saura andu ni ka bi Samuere Rama yo, Samuere ambedi Saura ni bakindo niuka ko nzeme kuriko yo.

Kusa, Samuere adungura aYisaraere ku rogo ba sa ka yugo gayo vovo bakindo fuyo. Ono i aarengbanga ka bi Saura te. Mo ini tipagine? Bambiko ko agbu dagba atindiro yo. Ho i abiko ni ni yangaraha, i akusi ko ku zegi yo ki rugusi ko bebere aboro yo. Saura asono ki gba rii aboro dunduko, na bibi ko ki ima ngba. Samuere ki ya: ‘Oni bi guko Yekova nasia ko.’ Aboro ki ta ngbayo ki ya: ‘Bakindo raki araka ni gbangaha!’

Ti tonatonaha, Bakindo Saura anaadegatuko adega fu Samuere na kini gisangba Yekova. Ono fuoho, ko asa sinoko. Ni kpiapai, si anaaidanga bakindo zo motumo te. Ti kura regbo sa, Samuere aya fu Saura ko pidi ko mbata ko ye, ono ka Samuere ayengo nibasa kina tigu regbo re ya. Sidu, Saura ki diberã ka zo motumo nitiko. Ginipai Samuere amangihe? Ko aya fuko: ‘Si naaidanga mo basasangba Yekova te.’ Ya mo Saura arengbe ka wirikapai tigako ingahe?

Kusa, ho Saura andu ni ka sovura na aAmareko, Samuere aya fu Saura wẽ ka ko mbu nga boro sa dagbayo ni ungani ya. Ono Saura adiberã nga ko aidanga ka imo Bakindo Agaga te. Yekova aya fu Samuere wẽ: ‘Saura ima mbure, ko agianga sangbare te.’ Rago aima gberã ti Samuere ni kerehe, na ko ki ya fu Saura: ‘Bambiko wa mbu mo giasangba Yekova, ko nika sia kura bakindo.’ Ho Samuere asa tiko ni kaa ga, Saura andukudi ko giiko yo ngba gako roko ki siri. Fuoho, Samuere ki ya fu Saura: ‘Yekova ima siro kindo kusayo bero.’ Yekova nika fu kindo fu gu boro nikaa giasangba ko.