Davide na Goriata

Yekova aya fu Samuere: ‘Mo ndu ku rogo gu kporo nga ga Yisai. Wiriko sa dagba akumbagude nika du ni ue bakindo nga ga Yisaraere.’ Sidu, Samuere andu kua Yisai yo. Ho ko abi gu wiriko ni nga unvuru, ko aberẽhe nga: ‘Si rengbe ka du nga gi paranga kumba re du.’ Ono Yekova aya fu Samuere wẽ, gi ko re te. Yekova aya: ‘Mi nabi gupai du kpotoboro yo, angianga wai ni angera ti kpotoni ya.’

Yisai ki ye na agu awiriko naadu sita fu Samuere. Ono Samuere aya: ‘Yekova asianga agiyo a tere. Ya mo kura akumbagude bero berewe?’ Yisai ki ya: ‘Gu kurako kinaho sa nga kiaro, du rimoko nga Davide. Ko nangerafuo gimi akandoro ko ane te.’ Ho Davide aye ni, Yekova aya fu Samuere: ‘Gi ko re du!’ Samuere auka nzeme kurii Davide yo, ki mbedi ko ni gu bakindo nika ngia ga Yisaraere ko.

Tifuo bete regbo kusa, aYisaraere adu ba vura yo na aFereseto, nga aguyo naadu na gu kere basovura naasovura fuyo rimoko angia Goriata. Goriata anaabisirapa aYisaraere ti aregbo dũ. Ko apoi kuari ki ya: ‘Oni kedi kumba fere nga gu ni nika sovura na mi. Ka ko di bere, ani nika du ni gaoni akanga . Ono ka mi di beko, oni ki du ni gaani akanga.’

Davide andu na riahe fu aunvurako ku rogo gu bataya ga aYisaraere abanzengere adu rogoho. Ko agi gupai Goriata agumbaha na ko ki ya: ‘Mi nika sovura na ko!’ Bakindo Saura aya: ‘Ono mo nga kungbo gude gbua.’ Davide akaragapai nga: ‘Yekova nika undo re aundo.’

Saura aˈasadi ka fu gako roko vura fu Davide, ono Davide aya: ‘Ka mi songa vura na ni te.’ Davide adi gako barioko ki ndu ku dio yo. Ko asia zezerenge ambia bisue ki moihe ku mangu yo. Davide ki oro koyo du Goriata ni. Gu diangbadiangba kumba re ki poi kuari ki ya: ‘Mo ye kono tooni ko. Mi nika fu pasioro fu azire ari na fu anyanvuo.’ Davide aagundenga te. Ko apoi kuari nga: ‘Mo naye na basape na baso, ono mi naye tigimi ti rimo Yekova. Mo asonga vura kuti rani te; mo nasovura kuti Mbori. Aboro dunduko nika bi gupai nga Yekova du na bakere ome kisusi basape watadu baso. Ko nika furoni dunduko ku berani.’

Davide amoi mbia ku rogo gako barioko na ki mikipoho nyanyaki wa omeko arengbe na ni. Mbiko ga Yekova undo, gu mbia re azi Goriata ti kpakpuko ki rindo ti ni. Gi diangbadiangba kumba re ati kusande ki kpi. AFereseto ki oro ka batasa ungayo. Ya mo mo nakido kuti Yekova wa gu Davide amangihe?