Yonatana Angia Ngangarã Boro na ni Ruruko

Wiri Bakindo Saura nga unvuru nangia Yonatana angia kere ngangarã basovura. Davide aya, Yonatana aipi kisusi dingimo na kidu nyanyaki gbe kisusi bahu. Rogo kura uru sa, Yonatana abi abanzengere 20 rii mbia yo nangia aFereseto. Ko aya fu gako bazadi unvura wẽ: ‘Ani nika zubo yo kina gu ka Yekova yuguhe furani nga, si naida ani zubo yo. Ka aFereseto ya furani wẽ ani ye fuoyo, gure nika yugo na ni nga si naida ani zubo yo.’ AFereseto apoi kuari nga: ‘Oni ye ku ari no ka sovura!’ Sidu, agu akumba ue re adakpa kurii mbia ariyo, ki dibe agu abanzengere re.

Bambiko wa Yonatana adu ni gu wiri Saura nangia unvuru, ko aima rengba kangia gu boro ka di ba Bakindo Saura. Ono Yonatana aima ino gupai nga Yekova aima sia Davide ko du ni ue bakindo nga ga Yisaraere; wa si avura duwo, ko aadunga na kpihe te. Yonatana na Davide ada ni mbembedi abakure. I akidohe dagbatiyo ka banda tiyo na ka nyakasa tiyo nitiyo. Yonatana afu gako roko, basape, mboto, gbiati gako giri dimose fu Davide tipa ka yugo gayo pabakure.

Ho Davide aaora ni be Saura, Yonatana andu fuoko ki ya: ‘Mo du ngangarã kidu na wingbaduse. Yekova ima sia ro mo du ni bakindo. Zavura buba ima inoho.’ Ya mo mo naida ka du na wene bakure wa Yonatana?

Yonatana amoi gako raka ngbapai yo bara dunguhe, tipa ka undo bakureako. Ko aima ino gupai nga, Bakindo Saura aaida ka imo Davide, sidu, ko aya fu bako wẽ: ‘Si adu ni ingapai foro ka imo Davide; gbegberẽpai ho ko namangihe te.’ Saura azingi ni kerehe kuti Yonatana. Tifuo bete agarã kusa, aSaura na Yonatana akpi ti ngba vura yo.

Tifuo Yonatana kpi, Davide ata tipa wiri Yonatana nangia Mefibosete. Ho Davide agbia ko ni, ko aya fu Mefibosete wẽ: ‘Bambiko wa bamo angia wene bakureami, rogo raka ro yo naabaha, mi nika ngerafuoro. Mo nika raka kpure yo na kini rihe rii gimi mbisa.’ Bangiri Davide aagonga ti bakureako nangia Yonatana te.