Asanahe Be Agedihe

Tipagine 2 Samuere 21:7-9 aya ti ni wẽ Davide “abatasi Mefibosete” ono fuo gure ko kini fu Mefibosete i imiko?

Agu aboro nageda gi pangbanga re niipo ima fu gu sanahe re. Ono rogo agu averesi yo re, akumba adu yo ue ni bakiakia i anaayamba yo dunduko nga Mefibosete, na ani ima rengba ka wirikapai nifugö ani agu apai namangi.

Bakindo Saura nangia ga Yisaraere ko adu na akumbagude beko saba na adegude ue. Bambata wiri Saura angia Yonatana. Kusa, Risepa nangia debadia avungu gude fu bakindo Saura i ayambu rimoko nga Mefibosete. Gu kurapai berewe nga, wiri Yonatana adu kinaho rimoko angia Mefibosete. Rogo gi gene re, rimo wiri Bakindo Saura angia Mefibosete na rimo titako ki ngia kina Mefibosete.

Ti kura regbo, Bakindo Saura asatiko kuti aGibono naaraka dagba aYisaraere na kini asadi ka ba tungayo kpäkäyo. Si nawira wa i aima imo badunguyo. Gupai re aima du ziazia nga gbegberẽpai. Tipagine? Bambiko ti regbo Yosua, agu abaakumba nangia ga aYisaraere yo amangi mozunga nga ga zereda na aboro Gibona.​—Yos. 9:3-27.

Gu mozunga re aamangasunge kindi ti regbo Bakindo Saura. Bakindo aasadi ka ba tunga aGibono kpäkäyo kusayo, nga gupai naadu kia ti mozunga. Sangbana gu mangapai re adu “tipa Saura na angbatungako nga aukakure.” (2 Sam. 21:1) Ni yangaraha, Davide ada ni bakindo. Agu aGibono nabati agumbapa gu kere gbegberẽpai re fu Davide. Davide asanayo tipa gupai rengbe ko ka mangaha tipa ka dada ga Saura kere ingahe tipa si zaki gene Yekova fu maku kurogo ringara Yisaraere. Kuba gupai nga aGibono sanahe tipa marã, i asanahe tipa agu akumbagude saba nangia awiri gu kumba ‘nasangi pai kuti’ yo i kusiyo na ki imi yo. (Geda 35:30, 31) Davide aima ida gupai i asanahe tipaha.​—2 Sam. 21:2-6.

Ti gu regbo re, aSaura na Yonatana aima kpi ba vura yo, ono wiri Yonatana nangia Mefibosete adu kindi ni unga ko. Ko agbarĩ mbuko kindi ni gunde ti regbo béno na ko aafunga bee sa gu zubohe nangia ga titako kuti aGibono te. Davide amangi mozunga nga ga pabakure na Yonatana, nga gu narengbe ka undo ngbatunga Yonatana, kodihe na wiriko nangia Mefibosete. (1 Sam. 18:1; 20:42) Gu pangbanga re na ya: “Bakindo [Davide] abatasi Mefibosete, tita Saura, ni wiri Yonatana, bambiko gu ga Yekova zungahe naadu dagba yo.”​—2 Sam. 21:7.

Wa si avura duwo, Davide aima mangapai kuti ga aGibono sanahe. Ko aima fu awiri Saura ue, gu kurako sa rimoko angia Mefibosete, na atita Saura bisue. (2 Sam. 21:8, 9) Ga Davide mangapai arugusi ukakure kusayo rogo ringara.

Anga kungbo pangbanga gbua nga gipai re te. Ga Mbori ndiko aima du ziazia. Si aya: “Ka i ími nga agude tipa ga abayo pai a ya.” (Pa Rug. 24:16) Ka Yekova aidi nga pai wa gure mangi awiri Saura ue gbiati atitako bisue ka si adu nga i angia aboro wenesa te. Gu ndiko re agbia kurapai nga: “Aboro ni ba sa sa ka kpida kina pa gayo ingapai.” Si nawiraha wa, agu awiri Saura saba nakpi re, aima fubee tigaha tooni kuti ga Saura asadatise ka ba tunga aGibono. Nisangbana gipai re, agi akumbagude saba re atumo tipa gayo iraira mangaapai.

Gi pangbanga re nayugo gupai nga boro arengbanga ka songodapai kubara ni yo tipa manga ingahe kini berẽ gupai watadu kini ya ni napekafuo arugapai gbua te. Fugo tatamana nga ga sanza naya: “Mo nimbákadi ba nduro kpasakpasa, si du gamo apai ka du ti ni dunduko ni mbakadimbakadihe.”​—Snz. 4:24-27; Ef. 5:15.