I Afu Mbusa fu Gbegberẽ Nakindo

Bakindo Aba aru ti gako bangiri bambu kini bi gu ati bakakue nangia ga gu kumba rimoko angia Nabota. Aba aaida gu ati bakakue re, na ko ki asadi ka ngbehe be Nabota. Ono Nabota aima ká ka bagaha fuko bambiko ga Yekova aNdiko aaidanga boro bagi gu dagbangua nga ũkumbo te. Ya mo Aba airisi Nabota tipa manga rurupai? Oó. Aba adu na bakere zinga. Ko adu na bakere gberãrago si ki sa ko ka ko kurunga dimo yo ya, na ka ko ringa riahe a ya.

Dia Aba nangia gu gbegberẽ Nakindo nangia Izebere aya fuko: ‘Mo nga Bakindo Yisaraere. Mo ima rengba kadu na ai guhe mo aidaha. Mi nika dia gu dagbangua re adia foro.’ Ri akeke awaraga fu abaakumba nga ga bakporo yo, ki pe gupai fuyo nga i kitingbanga Nabota nga ko tiwa Mbori na i ki sopo ko na mbia sa kpio. Agu abaakumba re amangi kina gupai Izebere agumbaha fuyo i mangihe, na fuoho, Izebere ki ya fu Aba: ‘Nabota ima kpi. Ati bakakue nga gamo.’

Anga Nabota nangia gu yangara boro Izebere aimi ni te. Ri aima imo badungu agu aboro naakpinyemu Yekova. Ri anaairiso kpiahe na kini mangi kura gbegberẽ apai. Yekova aima bi gu gbegberẽ apai dunduko Izebere aamangaha. Ginipai ko arengbe ka mangaha tipa ri?

Tingbafuo kpi Aba, wiriko nangia Yorama ada ni bakindo. Yekova akedi gu kumba nangia Yeu ko fu mbusa fu Izebere na gari aborokporo.

Yeu aoro rii gako ngbagidavura ku Yizerere yo, yo Izebere aaraka ni. Yorama aye rii gako ngbagidavura ka gbia Yeu na ki sanako nga: ‘Pazereda du?’ Yeu ki karagaha ki ya: ‘Zereda adunga te ka namo nga Izebere aandu kindi kumbatayo kaa manga gbegberẽ apai.’ Yorama aˈasadi ka aria gako ngbagidavura tipa ka ora. Ono Yeu anõ Yorama na bamara na ko ki kpi.

Fuoho, Yeu andu fuo Izebere ku kpuri yo. Ho ri agi gupai ni nga ko naye, ri ambakadi tiri, ki fongo tiri gbiati mangeriri, na kini ngere ti bangiri bambu. Ho Yeu ada ni, ri afu sene fuko na kina zinga. Yeu atangbako fu gari amoyambu naaru patiri ki ya: “Oni bá ri ku sende no!” I ki ba ri ku sende yo, ri ki kpi.

Fuo gure, Yeu ki imi awiri Aba 70 na ki girisi ringara ti iriso Bara. Ya mo mo ini gupai nga Yekova ima ino apai dunduko, na ko nafu mbusa afu fu agu aboro namanga gbegberẽ apai?