Ezara Ayugu ga Mbori Andiko

Agarã aima manga wa 70 wa aYisaraere aga ku Yerusarema yo, ono aguyo adu kindi naaraka rogo ga aParaso zogarago. Boro sa dagbayo yo angia gu boromotumo nangia Ezara, naayugo ga Yekova andiko. Ezara aye ka ino gupai nga agu aboro naadu Yerusarema yo aapekanga fuo aNdiko te, na ko ki idi ka ndu ka undo yo. Bakindo aParaso nangia Arutasasata aya fuko: ‘Mbori asa ro ni iratatamana tipa mo yugupai fu gako aboro. Mo ndu, ki di agu aboro naida ka ndu na mo.’ Ezara afura na agu aboro dunduko naaida ka karagatiyo ku Yerusarema yo. I ki kpari fu Yekova ko undo yo ti gu gbanga nunguro re, na fuani i ki ndu.

Fuo adiwi biama kusa, i ada Yerusarema yo. Agu abazogo naadu yo aya fu Ezara: ‘AYisaraere ima basa Yekova na ki rogo agu adee nairiso kungbo ambori.’ Ginipai Ezara amangihe? Bara bangiri aboro dũ, Ezara akuku sande na ki kpari nga: ‘Yekova mo ima manga dungu apai furani, ono ani ima inga kutiro.’ Aboro asa gayo berã, ono i aamanga agu apai kindi naadunga ni ruruhe ya. Ezara asia abaakumba na abasapungbanga i ngere ku rogo gupai re. Fuo adiwi biata kusa, aguyo naaidanga ka iriso Yekova ya i ado yo kusayo.

Agarã aima susa nga bawe na ue. Ti kina gu bangisa regbo re, i adua gu ndugu nga ga Yerusarema kubaha. Sidu, Ezara adungura aboro ku rogo bakere vurukporo tipa ka geda ga Mbori aNdiko fuyo. Ho Ezara azaki buku ni, aboro aru kuari. Ko atambua Yekova i ki tumba beyo kuari yo ka yugoho nga i ima idaha. Fuani, Ezara agedi aNdiko na ki sakirogoyo, na aboro ki degetuyo wenengai. I aidipa gayo ingahe nga i ima inga kuti Yekova, na i ki kpari ni aume. Fuo girorago, Ezara agedi aNdiko berewe. I abihe nga si naida i mangi Pumbo Abasura. I atona ka mbakadatiyo nibasa tipa gu pumbo re.

Tipa agu aˈuru saba nangia ga pumbo, aboro adu na ngbarago na ki tambua Yekova tipa ke ahe ati yo. Naatona ti regbo Yosua, Pumbo Abasura ho i amangihe wa gure te. Tingbafuo pumbo, aboro adunguratiyo na ki kpari nga: ‘Yekova, mo abatasi rani be sunge kanga, ki rigi rani ngbakungbo yo, na ki fu wene ringara furani. Ono dedede, ani aagianga sangbaro te. Mo akedi anebi i za rani, ono ani aagianga ha te. Ono wa si avura du wo, mo ahipai furani. Mo akakuti gamo kidohe fu Abarayama. Awere, ani kidohe nga ani nika giasangba ro agia.’ I ake gayo akidohe, na abazogo, aRevi, na aboromotumo ki moi fuo beyo ti ni.