Yesu Ayugu Wai ka Kparakpee fu Gako Abawiriki

Agu apai aFarusi anaamangaha dunduko, i anaamangaha ka sa ngbarago ti aboro. Ho i animangi wenepai ni, i anaamangaha aboro dunduko inipai tipaha. I anaamanga kparakpee rogo agu aba du dungu aboro rogoho tipa gupai nga i nibiyo na ni. AFarusi anaadogoda agu akparakpee du ni gbangaha na kini fuguhe bambutiria yo na ngboso agene tipa aboro ni gihe. Sidu, iriworago aima ti ti aboro ho Yesu aya ni fu yo wẽ: ‘Ka oni kparingo wa aFarusi ya. I naberã gupai nga Mbori nika gia gayo akparakpee mbiko dungu afugo, ono ko agianga ha te. Kparakpee nga gupai du dagbaro na Yekova. Ka oni dogodi nga kina bangisapai bara dunguhe ya. Yekova naida mo gumba kina boro gupai fuko du kpotoroyo.

‘Si naida oni kpari wa gere: “Barani du ngbangbaturũ yo, Ani írisi rimoro airisa. Ga ngbi yé, Ani mángi rogo kpotosende wa mo akpinyemuhe, wa du he ngbangbaturũ yo.” ’ Yesu agumba gupai fuyo a nga, i kpari tipa gu riahe nga ga gu uru re, tipa mbupai ti gayo aingapai, na tipa gu kura apai nabipa boro.

Yesu aya: ‘Ka mo mbunga kparakpee ya. Mo nisana Bamo kindi, nga Yekova, tipa wene ahe. Avungu agude dunduko naida kafu wene ahe fu wiriyo. Ka wiro sana ro tipa kpakuto, ya mo mo fu mbia fu ru? Ka u sana ro tipa tĩo, ya mo mo fu wo fu ru?’

Fuani, Yesu asakirogo gupai re nga: ‘Ka oni ini wai ka fu wene agamahe fu awironi, oni berẽnga pa wai rengbe gu Baroni, nga Yekova, ka fu ziazia toro furoni te? Na gupai si aida mo mangihe gbua, nga ka sanahe.’ Ya mo mo napekafuo ga Yesu arugute? Gini ngbatunga ahe mo akpara tipaha?