Yesu Arigi Akutu Aboro

Ngbutuko mbata fu gu Pumbo Susiri naadu rogo gu garã nangia 32 Fuo Batikayo Kristo, amokedi ayego gene tungusapai yo. I aima mbu gbe, sidu, Yesu aya fuyo, i ndu na ko ku Betesaida yo na bakurungba, tipa i ongodi yo. Ono ho kurungba ambedi ni ku pangba ime, Yesu abi gupai nga akutu aboro aima pefuo yo koyo. Wa vura duhe nga Yesu aaida ka du ni kina nisako na gako amokedi, ko aima dia aboro kugume wenengai. Ko ahusi ga aboro akaza na ki tona ka yugopai fuyo. Rogo gu uru re naabaha, Yesu ayugupai fuyo tipa ga Mbori Kindo. Ho nyemu ada ni, gako amokedi aye fuoko ki ya: ‘Si ima rengba ka du nga gomoro namanga aboro awere. Mo mbuyo i ga tipa wa ka i gbia guhe ka i rihe.’

Yesu aya: ‘Si aidanga i guari te. Oni fu he fuyo i rihe kina ane.’ Amokedi ki sanahe nga: ‘Mo naida ani ndu ka ngbe kpakuto fuyo?’ Gu kura mokedi nangia Firipo ki ya: ‘Ka si vura du nga marã ima kio berani, ani arengbanga ka ngbe kpakuto si ki rengbe na gi ndurumo aboro re te.’

Yesu ki sanahe nga: ‘Gu riahe du beroni bakioho wai?’ Andarea aya: ‘Kpakuto berani bisue na rukutu atĩo ue. Si arengbanga kandara tooni te.’ Yesu aya: ‘Oni ye na gu kpakuto re fere gbiati agu atĩo re.’ Ko aya fu aboro wẽ i susungu rii nvuo rogo abadona nga ga 50 na 100. Yesu adi kpakuto na atĩo, ki ngere kuari ku ngbangbaturũ yo, na ki kparikpee. Fuoho, ko afu gu riahe re fu amokedi, na i ki kparakaha fu aboro. Agu aboro naadu 5,000 nga akumba na adee gbiati agude dunduko re ari riahe daho i ambiki ni. Tingbafuoho, amokedi adungura gu yangaraha naahe, tipa ka si gberẽnga ya. Si ahíki abaga 12! Si adu ni gu riko bawene iˈiriwopai, nga wo te?

Rago aima ngba ti aboro ni kerehe na i ki idi ka maa Yesu ni gayo bakindo. Ono Yesu aima ino gupai nga, regbo ata danga be Yekova ko moi ko ni bakindo te. Sidu, ko aya fu gu rimbasa aboro re wẽ i ga, na ko na gako amokedi ki ndu ku rogo gu kura papara gu di kia nga Gariraya. I adakpa ku rogo gayo kurungba, Yesu ki ndu kurii bagangara yo nisako. Tipagine? Bambiko ko aaida regbo tipa ka kpara fu Bako. Wa vura duhe nga apai aima nge gbe ti Yesu, ko anaamaa regbo amaa dedede tipa kparakpee.