Yesu Andu Rii Ime

Yesu anaahusa nga kina kaza na kini zingisi aboro be kpio te, ono ko aima rengba a ka rugusa wege gbiati mai. Fuo Yesu mangi kparakpee rii bagangara yo, ko angere ku rogo gu baime nga Gariraya ki bi bavugumo si nimangi. Gako amokedi adu rogo gayo kurungba kini sota na gu wege naaya. Yesu azorõ ki tona ka ndu rii ime bara koyo gayo kurungba adu ni. Ho amokedi abi boro ni ni nindu rii ime, i aima gunde ni kerehe. Ono Yesu aya fuyo wẽ: ‘Mi du. Ka oni gundenga ya.’

Petero aya: ‘Gbia, ka si du nga boro mo du nzunzu, mo ya fere mi ye fuoro.’ Yesu ki ya fu Petero wẽ: ‘Mo ye fuore.’ Sidu, Petero aguari kurungba yo bavugumo kini mangi na ki ndu rii ime koyo Yesu adu ni. Ono ho ko aambeda ni na ko, Petero abi bavugumo na ki tona ka gunde. Ko ki bi tiko nga ko ima tona ka rindo. Petero ki kpari ki ya: ‘Gbia, mo batasi re!’ Yesu ki zadi beko, ki ya: ‘Tipagine mo nitona ka tikö ti ni? Gamo idapase wari?’

Yesu na Petero adakpa ku kurungba yo, na bavugumo ki ru nibasa. Mo rengbe ka berẽpa gu ngbarago amokedi adu na ni? I aya: “Wiri Mbori nga mo ni rengo.”

Anga gure nangia gu yangara regbo Yesu arugusi wege te. Ti gu kura regbo, ho Yesu na gako amokedi aandu ni rogo kurungba ku rogo gu kura papara baime du ku bani, Yesu andu ki pi mburu kurungba ya. Ho ko aara ni, kere gbegberẽ bavugumo atona ka manga. Ime kini sungburo ku kurungba yo, kurungba ki hi be ime. Amokedi azingisi Yesu ki tangbayo nga: ‘Bayugupai ani nika kpi! Mo undu rani!’ Yesu aguari kuari ki ya fu baime wẽ: “Mo zéredi, ki ru zaa!” Nibasa, bawege gbiati ime ki zeredi. Yesu asana amokedi nga: ‘Gaoni idapase wari?’ I ki ya dagba yo: “Da du re, yuge agia sangbani na baime a?” Amokedi awiriki gupai nga, ka i kido kuti Yesu na kpotoyo yo dunduko, si aidanga i gunde be ai he te.