WIRIKAPAI 11
Gu Gene Rengbe Mo ka Gbia Undo Gbe Ngbaha ti Baibiri
Ya mo mo adunga na nyemu ka tona manga gupai du ni bakiki he ono mo ki tona kaa bihe nga si ima kpakara? Isoke tipa ka saha si du taata, mo akparakaha kurogo rukutu apaparaha kaa mangaha ti aregbo ni bakiakia. Kina gu bangisapai re nga rengo ho daha ni ti geda Baibiri. Mo ima rengba ka sanahe nga, ‘Wari gu mi nika tonaha ni?’ Rogo gi wirikapai re, ani nika sakapai tipa gu taata apai rengbe mo ka mangaha si undo ro mo nigbia ngbarago ti geda Baibiri na wisigoho.
1. Tipagine si aida ani naageda Baibiri ti ni dedede?
Gu boro nageda Baibiri dedede watadu ‘gu rugute nga ga Yekova,’ ni nadu na ngbarago na kidu na diabese. (Mo gedi Atambuahe 1:1-3.) Tipa ka tonaha, mo asadi kaa gedaha tipa bete aminiti na aˈuru dunduko. Wa mo nikaa inido tiro na Fugo Mbori, kinawo a mo nikaa gbia ngbarago ti geda Baibiri.
2. Ginipai nika undo ro mo gbia undo ti geda Baibiri?
Tipa ka gbia undo ni bakerehe ti geda Baibiri, si naida ani ru ka berãkurii gupai ani agedaha. Si naida ani ta geda Baibiri kini ‘mákia paha.’ (Yosua 1:8) Wa mo nikaa gedaha, mo nisana tiro na asanahe wagu nga: ‘Ginipai gipai re ayugoho fere tipa Yekova? Waigu rengbe mi ka mangapai kuti gipai re rogo gimi raka yo? Waigu rengbe mi ka mangasunge na agi averesi re ka undo kura aboro?’
3. Gini regbo rengbe mo ka siaha tipa kaa geda Baibiri?
Ya mo mo naasota asota ka gbia regbo kaa geda Baibiri? Badungu rani si amanga rani wo. Mo asadi ‘ka banda gamo saa tipa mangaapai.’ (AEfeso 5:16) Mo rengbe ka manga gipai re ni kpara mo regbo tipa kaa geda Baibiri na aˈuru dũ. Gu kura aboro ni naadia regbo kaa geda Baibiri ngbawiso. Agu akurayo na sia kaa gedaha uru isoke ti regbo ongoda nga ga riahe. Aguyo naagedaha nyemu mbata fu i ndu ka pi. Gini regbo rengbe kadu ni wenehe foro?
MO WIRIKI KURA DUNGU APAI
Mo wiriki wai rengbe mo ka sa gamo geda Baibiri sidu ni bawenehe gbe. Mo bingo wai rengbe mo ka mbakadatiro tipa ka gbia undo ni bakerehe ti wisigo Baibiri.
Kina wai ani naima rengba ka wirika ka kpinyemu ri ngbatunga ariahe ni bakiakia, kina wo a ani naima rengba ka wirika wai ka gbia ngbarago ti geda Baibiri
4. Mo wiriki wai kaa gbia ngbarago ti geda Baibiri
Si taata ka tona geda Baibiri te. Wa vura duhe wo, ani ima rengba ka ‘kpinyemu’ mangaha wo, kina wai boro naima rengba ka sonosa nyemu ri vovo riahe. Mo gedi 1 Petero 2:2, na tifuoho, mo ki sakipai tipa gi sanahe re:
Ya mo mo nabihe nga ka mo ageda Baibiri na auru dunduko si rengbe kada ni gupai mo agbia ngbarago agbia ti ni na ni gupai mo angera kumbatayo tipa mangaha?
Mo bi gu VIDIO re ka bi wai kura aboro atona ka gbia ngbarago ti geda Baibiri. Na tifuoho, mo ki sakipai tipa agu asanahe ngbe fuoho.
Rogo gu vidio re, gini akpakarapai paranga aboro adi behe?
Ginipai naundo yo i kakuti gu gayo sásá nga ga geda Baibiri?
Waigu i asa gayo geda Baibiri si du ni bawenehe gbe?
Agu aberãpai rengbe ka undo ro mo tona geda Baibiri:
Mo sia gu sasa fugo Baibiri du ni ruruhe. Mo asadingo gu sasa fugo Baibiri nga New World Translation ka si dunga si ho rogo gamo fugo yo.
Mo tona gedaha ti gu paparaha ngba tiro gbe. Ka mo aida ka bi kura aberãpai, mo bi gu gbakigbaki he du riihe nga “Mo Nigedi Baibiri na Aˈuru Dũ.”
Mo ni keke pa gu paparaha mo nagedihe. Mo mangisunge na gu gbakigbaki he du riihe nga “Mo Gbahe Tii Gamo Geda Baibiri” du rogo gi buku re.
Mo mangisunge na JW Library® app. Ho mo amangasunge ni na ni, mo ima rengba ka geda Baibiri na kini degeturo kuti woro ho rogo ai ba ni manga mo sunge na terefuni watadu gu kura ahe na kusa woro fugo.
Mo mangisunge na gu appendixes du rogo New World Translation. Si nakoda gbakigbaki kpia arago, gbakigbaki agene, gbiati glossary nga gu rengbe ka sa gamo geda Baibiri si du ni bawenehe gbe.
5. Mo mbakadi tiro tipa gamo wisigo Baibiri
Mo gedi Atambuahe 119:34, na tifuoho, mo ki sakipai tipa gi sanahe re:
Tipagine duhe ti ni ni wenepai ka manga kparakpee mbata fu mo gedi Baibiri watadu mbata fu mo mbakadi tiro tipa gamo wisigo Baibiri?
Waigu rengbe mo ka gbia undo ni bakerehe gbe ti ai gu regbo mo awisigo Baibiri? Wa mo nikaa mbakada wirikapai sa dagba agu awirikipai dunduko du rogo gi buku re, mo asadingo agi aberãpai du re:
A. Mo gedi agu agene waraga du ti tonatona wirikapai.
B. Mo gedi agu averesi du rogoho, na ki bingo wai duhe na ngbanya na gupai re.
D. Mo gbahe tii gu memeapai nakaragapai kuti asanahe ni basasa; gipai re nika undo ro ti gu regbo oni nikaa sakapai tipa gipai re na gamo bayugupai.
Ya mo mo iningo gipai re?
ADezire Yekova ima mangasunge na dungu sasa afugo Baibiri. Ani na bakere tambuahe gbe tipa gu sasa fugo Baibiri nga New World Translation of the Holy Scriptures bambiko si ni ruruhe, si ziazia, na si namangasunge na rimo Mbori.—Mo bi gu kekeapai du rogo gaani bangiriba nga ga Internet du riihe nga “Ya Mo ga aDezire Yekova Baibiri Kia?”
GU KURA ABORO NAPE GUPAI NGA: “Wisigo Baibiri ima kpakara.
Gamo bipai nga gine?
GINIPAI MO NAWIRIKIHE?
Tipa ka gbia undo ni bakerehe ti geda Baibiri, mo moi regbo kaa gedaha, mo mangi kparakpee tipa ka rugatiro na gupai mo agedaha, na mo mbakadi tiro wenengai tipa gamo wisigo Baibiri.
Fugöpai
Ginipai nika undo ro mo gbia undo ni bakerehe ti Baibiri?
Gini regbo rengbe mo ka siaha tipa kaa geda Baibiri na kini wisigihe?
Tipagine duhe ti ni ni wenepai mo mbakadi tiro tipa gamo wisigo Baibiri?
MO WETEKE GU KURA APAI
Mo fugü agu aberãpai nga gu naima rengba ka undo ro mo gbia undo ni bakerehe ti geda Baibiri.
Wai ka Gbia Undo ti Geda Ziazia Kekeapai” (Ngbaõbambu Sinziri Na. 1 2017)
Mo wiriki agene biata nga gu rengbe mo ka geda Baibiri ngbaha.
Mo gbata gene wai rengbe mo kaa gbia ngbarago ti geda Baibiri.
Mo gbia aberãpai nibipa wai ka wisigopai be agu aboro naima dia dungu agarã kuti geda Baibiri.