Wai Rengbe mi ka Tonaha?

Gini wene gene rengbe mo ka geda Ziazia Kekeapai ngbaha ki gbia undo ti ni? Mo bingo agene bisue naima undo dungu aboro.

Mo Mbakadi ba Tipa Gedapai. Mo asadi ka gbia gu ba adunga waawaa rogoho ya. Mo di agu ahe dunduko rengbe ka gbe berãro ti gupai mo agedaha. Wene imarago na gu ba du ni zezeredihe rengbe ka sa ro mo gbia undo ti gamo geda Ziazia Kekeapai.

Mo du na ruru bipai berãro yo. Wa duhe nga Ziazia Kekeapai aye be gu Barani du ngbangbaturũ yo, mo nika gbia undo gbe ka mo du na gu bipai du agu agude na ni nakpi nyemu ka wirikapai be avunguyo. Ka mo du na kura bipai kia tipa Ziazia Kekeapai, si naida mo moi agu bipai re mbata kusayo ki mbu Mbori ko yugupai fuko.​—Atambuahe 25:4.

Mo mangi kparakpee mbata fu mo gedipai. Ziazia Kekeapai na ga Mbori aberãpai rogoho, si du si aida undo ti ni tipa ka gia rogoho yo. Mbori nakidohe tipa ka gama “Ziazia Toro fu agu yo nasana ko.” (Ruka 11:13) Ziazia toro rengbe ka undo ro tipa mo gi rogo ga Mbori aberãpai yo. Fuo bete regbo, si nika zaka berãro tipa mo gi rogo gu “dudungura apai nga ga Mbori.”​—1 AKorindo 2:10.

Mo gi rogo gupai yo mo agedaha. Ka mo gedinga pai gbua tipa ka nyasa gupai mo agedaha ya. Mo berẽkurii gupai mo agedaha. Mo sana tiro na agu asanahe du wa: ‘Gini asino mi abihe ti gu boro mi agedapai tipa ni re? Wai gu rengbe mi ka mangasunge na gipai re rogo gimi raka?’

Mo moi asásá. Tipa ka gbia undo ti gamo geda Ziazia Kekeapai, mo sia gupai rengbe mo ka wirikapai tipaha si ki undo ro rogo gamo raka. Mo rengbe ka maa asásá wa gere: ‘Mi naida ka wirikapai gbe tipa Mbori nitiko.’ ‘Mi naida ka du ni wene sino boro, wene kumbakudee watadu wene diakumba.’ Fuoho, mo sia gu papara Ziazia Kekeapai nika undo ro mo dati gamo asásá.a

Agi aberãpai du bisue re nika undo ro tipa mo tonaha. Ono wai rengbe mo ka sa gamo geda Ziazia Kekeapai sidu berewe ni wenehe kisusi? Gu kekeapai ngbefuo gere na bete kura aberãpai.