Gupai Si Aida Oni Inihe Tipa Sunge Abinza

SI NI bakpakarakpakaraha ka ringbisapa gu vovo sunge abinza du ti gaani regbo. Gere wo bambiko gupai nga agu aboro namangaha, i nibakiakia bakere gbe. Bangua tandu ho watadu yugopai watadu buku tipa ka kpamia gayo aida te. I na kparakapai a tipa sinoatitase, mbakadapai, gene vuga ahe, na ki duna kparakapai rogo gayo aberã tipa agu ambori si aida i fu irisa fuyo. Nakeapai sa ayaa: “Gu ngbii nga ga gbugbu apai nafu gene fu boro ‘ni duna ranirii tipa sia’ aberãpai.’ ” Gu kura nakeapai ayaa: “Dungu Vovo Apagano na zanga giatise dagbayo mbembedii rii wiri apai dunduko.”

Tipa dungu aboro, gu tagbagatagbagaapai re na pai tini te. Buku rugute sa tipa agu aboro naida ka duni abinza nayaa: “Ho oni angera ni bangironi na gu tingidapai du wa si natagbagapai tini, oni wisigi gi tingidapai re na ki diberã tipa gupai rengbe ka ye fuo gure. Oni mangipai kuti gaoni bipai. Rogo kura afugo, oni sia sino vuga ahe sa na buku rugute vuga ahe a sa tipa ka diaberã tipa gu oni aberãha ya si ruu.”

Tipa agu aboro ini gu sino nga ga rengo, ngbatunga gu tagbagatagbagaapai re nga kpakarakpakarapai fuyo. Rengo nga ndikidipai, nga gupai duni nzunzuhe. Anga apai ni rengo gbua mbiko boro naberãha wo watadu ni namaabangiri ni tipaha si du wo watadu idaha wo te. Ni kpiapai, ti kura regbo sa amonganga aidi kuti gupai nga i rengbe arengba ka husa kaza ngazira ni yera yo rogo kondo yo ue ki pigi agu apapararu ue re rii ngbadu boro kaza. Zanga kapa, dungu aboro kaza aidi gupai nirengo nga gi sunge re ahusa yo ahusa. Ono tie, gayo aida na amaabangirise adunga na gume dagbaha na rengo te—ngbatunga gu mangaapai re ahusanga kaza ngazira te. Aboro akusanga rengo te; i na’asada tiyo a’asada tipa ka rugatise na rengo.

Baibiri nayaa si na rengo rogoyo tipa agu apai nga ga toro. Ho Yesu Kristo aduni auru kpotosende, ko aya fu Bako rogo kparakpee yo wee: “Ga pai [fugo ro, NW ] nga rengo.” (Yoane 17:17) Gu mokedi nangia Pauro akepai ya: “Ziazia Kekeapai dunduko si aye be ga Mbori Toro.” (2 Timoteo 3:16) Dungu agu aboro namanga sunge abinza na giatise dagba yo te. Kuba gure, i nangereka tipa yugopai na rugute rogo pature, kuru apambori, na zavura rogo gu rungbarungba berãpai nga ga birĩ-inohe. Ono tie, anga si niruru berã kandara ka makia gupai Baibiri apehe tee? Nirengo, aboro mbembedii dunduko rogo zegino nabihe ni ziazia buku. Si a nga gu bakuru buku kisusi nga ga pambori nga gu nabati be apai. I ake Baibiri vuru regbo susi agarã 1,600, si ki vura du wo gaha yugopai kina kubani sa. Ani ringbisinga ga Baibiri ayugopai na bete agu aida rengbe na arago dunduko nga gu agu aboro agumbaha nasonosa sunge abinza.

Ada Naraka Rogo gu Ngbii nga ga Atoro?

Bambata sanahe rogo gbata gene rugati na agu apai nga ga toro nga, Ada naraka rogo gu ngbii nga ga atoro? Wa vura duhe nga badungu agu abinza du ti gaani regbo namanga gu idapase nga ga sinoatitase, na kini idi kuti dungu ambori, beteyo nairiso gu bakere mbori-dee nga nayo, nga guri i abi ri ya ri na asunge beri biata nga devurukporo, naagude, na sonzorasonzora ngbinza dee, nga gu narukuba apai biata nga ga raka. Bakpinyemu ri nga gu mbori duna agbanga riko yo. Gu kura abinza nairiso mbori-kumba na mbori-dee tibarayo ue dunduko. Gu kura bakeapai sa nayaa: “I nabi Mbori-dee na Mbori-kumba ni agu aome yugotise nga ga zagino. I nibasasa [na] gu kparakpara asino tiyo nga gu i ata kodaha si kini kusi unga kina kubani sa.” Gu kura nakeapai sa nake gupai nga: “Gu sa dagba gu nyanyakipa siapai du rogo Sunge Abinza nga pa sia agu ambori (Ambori-akumba/Ambori-adee) nga aguyo oni ka mangasunge na yo. . . . Gu Sunge Abinza re nafu ranirii fu roni tipa oni sia ngbatunga gu Mbori oni aida ni na fuo gure, kini fu irisa funi.”

Guho sa dagba agi aberãpai re Baibiri asongodaha te. Yesu Kristo amangi gako sunge nabaha tipa ka yugopai fu kura aboro tipa Yekova, nga “bangisa ndikidi Mbori.” (Yoane 17:3) Baibiri nayaa: “Bambiko Yekova nga bahe, rengbe na tambua ko bakere gbe, i ka agunde ti ko susi ambori dunduko. Bambiko ga aboro ambori dunduko nga kina kungba ahe.”—1 Pekapai 16:25, 26

Ginipai tipa Bakitingbanga? Gu buku sakarogopai nga Webster’s Ninth New Collegiate Dictionary nasakapa sunge abinza ya si nga “fugodagbase na bakitingbanga.” Si rengbe ka duni bakpakarakpakarapai areme ka bi binza sa nga guni rengbe ka ida gi sakarogopai yo re, bambiko dunguyo aidanga kandara gupai nga Satana Bakitingbanga kina tini naraka araka te. Paranga dee sa nga guri i aringbisi pari rogo gu waraga pangbanga nga The Irish Times ni “bakikipa binza na ni naira gu nyanyakipa gbuu nga ga abinza nga ga Ireland,” ayaa: “Ida kuti Bakitingbanga nayugo gupai nga boro idi kuti gu pambori nga ga aKristano. . . . [Bakitingbanga] arengbanga ka raka rogo gu ngbii adunga Mbori rogo ya te.”

Baibiri nanyakasa gupai nga Bakitingbanga kina tini naraka araka na kini gumba gupai nga ko du gu bakere arungo na kereapai du auru kpotosende kuvuru beko. (Yugoti 12:12) Anga Yesu ayugu kina gupai gbua sa nga Bakitingbanga kina tini naraka araka te, ono ko ayugu gupai a nga boro rengbe arengba ka manga gupai Bakitingbanga akpinyemuhe zanga ni inihe. Ni kpiapai, agu abarumbatayo rogo pambori nanabi tiyo niruru aboro bangiriyo rogo bambata kama agarã anyakasi gupai nga, ngba kura gene, i angia awiri Mbori na ki idi kuti gupai nga i anamanga gupai Mbori akpinyemuhe. Yesu, nga gu ko narengbe ka ino gupai nadu ngbaduyo yo, aini gupai nadu kia. Ko agumbaha fuyo nibasa ki ya: “Awiri Bakitingbanga nga oni nga baroni, gu nyemuhe nga ga baroni si oni akpi nyemu manga ha.” (Yoane 8:44) Kurii gure, gu ga Baibiri buku nga Yugoti nagumba gupai nga Bakitingbanga “nga banangi aboro kpotosende yo dunduko.”—Yugoti 12:9.

Ya Mo Kura Ngua Ho Duni Wenehe?

Rengo ngaha, i nakoda ngua dedede kuti gbugbu apai.a Dungu agu aboro nadu mbata na aguyo du areme idi gupai nga gu sunge ngua abinza amangaha, i namangaha tipa ka imisa kura aboro. I nazio gupai kuti abinza nga i na ome tiyo ka imisa aboro nikerehe na ki imi yo a na ngua. Ni sino aboro, i aima digo ni bira abinza tipa gu kereapai nga gu adunga digidoho tini ya nga gu ninaamanga aboro, kodihe na akaza, kpio, na zanga ida ahe atiyo.

Abinza nati kango gu kitangbaangase re areme nyanyakii. Wa i avura niidi gupai nga ti kura aregbo, gbegbere binza nidu aduho nga guni napefuo gbigbitapai, badunguyo nye kindi kuti gupai nga i namangasunge na gayo ngua tipa undo aboro, angianga ka imisa yo ya. Abinza nayugo gupai nga sunge abinza naye na mokiisa bara biata fu gu boro namangaha na ki ya si nga gu bangua ndupai nakiso gene beyo ti tiwa aboro. Kpiaapai tipa gu ngua ya yo si niwenehe re nakoda gu ngua du tipa ka bandaroni, ka giriso kpuroni be gu gbegberepai gu boro ambuhe rogo nga guni naaraka ho mbata, ka sa boro ni duna kpinyemuse tipa roni, ka husa kpotoroni na ka saha si du wenengai, ka ka na gene be gupai nga ga mburoni ti gaoni sunge, na ka sa roni oni gbia marã. Ni gumba yo gupai nga ngbatunga gi bakere ome re naye be sunge abinza, si airiwonga te, si du ngba gipai re tini ti aboro gbe.

Ono tie, Baibiri ayugonga kparakparapai dagba gu ngua duni wenehe na gu duni gbigbitaha te. Rogo gu Ndika Mbori afuhe fu Mose, ko agumba gupai ziazia ko akpinyemuhe. Ko ayaa: ‘Ka oni manginga ngua ya.’ (Pa Amotumo 19:26, NW ) Ani nageda gupai a nga: ‘Ka boro dunga dagba roni namanga ngua ya, na guni namanga pa soroka, na ni adoavure, na ni binza, namanga aboro na ngua, na nasana sangbaatoro ya.’—Pa Fu Rugute ni Ue he 18:10, 11, NW.

Tipagine Mbori ape gupai re tini? Anga si wo mbiko ko naida ka bengeta rani ti gupai nafu undo fu rani te. Yekova afu agi andika re fu gako aboro mbiko ko akpinyemu yo na ka ko aidanga gunde be sangbaatoro dibe yo ya. Kuba gure, ko nayamba gako amoyambu i sanako tipa agu ahe nga gu i aidaha. Ko nga Bafu “wene gamahe dunduko, na ziazia ũgamahe dunduko.” (Yakoba 1:17) Gu mokedi nangia Yoane akido akurako aidipase niyaa: “Gu he ka ani ho, ani di he adia be [Mbori], bambiko ani ka kuti gako rugute, ki nimangi agu apai ngba angba bangiriko.”—1 Yoane 3:22.

Ginipai Tipa Gbigbita Atoro?

Dungu abinza idi kuti gupai Baibiri agumbaha tipa gipai re: Nga gbigbita atoro kina tini. Rogo kura keke pangbanga sa, basongodi sunge abinza sa ayaa: “Gi Mbiisimbiisi ahe re gudu kinaho: I naraka araka, rogo gu ngbii ka ani abinga ha ya nga gu du wa kina gaani, nga gu hi be kusikusi unga ahe. . . . Agu afugo nga ‘Tooni daimona’, ‘Gbigbita Toro’ na ‘Daimona,’ si gu daada nzunzu. I ni nyanyaki yo. . . . Gu ngbatunga yo tatamana kisusi . . . rengbe arengba (ka sino boro ngba gbe ka zaka ngbadimo fuyo) ka rimo kurogo gaani zegino. . . . I rengbe arengba ka rimo ku kpotoroni yo. . . , na ki dadironi na bete ome. Ii, gere nzunzu wa kina gu kuru apangbanga du tipa wai Daimona azio boro.”

Ti agu aregbo i ake Baibiri, adaimona anazio aboro rogo agene nibakiakia. Bete aguyo adaimona aziyo arengbanga ka fura te, gu kurayo angia airavurari, gu kurayo nzanga kini mangi yo, na gu kurayo ki duna ome susi ga aboro. (Matayo 9:32; 12:22; 17:15, 18; Marako 5:2-5; Ruka 8:29; 9:42; 11:14; Amokedi 19:16) Ti kura aregbo, gu rungo re anidu nibakerehe gbe ho dungu adaimona anizi boro ni ti bangisa regbo. (Ruka 8:2, 30) Nirengo tie, wene ndupai kinaho Yekova aza gako aboro tini i ru tururũ kusayo ti sunge abinza na gu kura gbugbu apai nga ga sangbaatoro.

Gu Pambori Du Mburuhe Rii Rengo

Dungu aboro naora areme fuo sunge abinza mbiko si nawira gu pambori aimisanga boro ya, duni weneringihe, na du kuti sino aboro. I aima diaha kugume rogo gu kura abadona nga ga aboro. I agundenga behe te. Kuba gure, si ima da ni gu pambori nga gu rengbe na arago dunduko. Rogo agu arago i ambu gene ni fu aboro i sia gu pambori i aidaha zavura gu gbegberehe du kia, i nabi sunge abinza rogo agu arago re na bakere irisa.

Nirengo, gu zegino nga ga apambori ima da ni ba fu aboro i siaka gu pambori na ranirii nga gu ngba tiyo, wa kina gu rengbe boro ka ngbe rakata nzengu yo. Na kparapai ti gure, Yesu afura tipa apai gbua ue nga gu rengbe boro ka siapai dagbaha. Ko ayaa: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:13, 14) Si nirengo nga, ani ngbarirani ka sia gu gene ani aida ka ndu ngbaha. Ono wa duhe tie nga pa raka ani nyeanye kindi gudu ngbapai, gu siapai re na nyanyakipaha kisusi. Tipa ka gbia gu rugatinapai nga ga toro, ani du wa ka ani ndu ngba gu gene nga ga rengo—nga gu gene ani abihe kina rogo Fugo Mbori, nga Baibiri.

[Gu rukutu kekeapai du bandu kpewaraga yo]

[Gu kpiahe du ti kpewaraga 5]

Dungu aboro nabi sunge abinza areme wa gu pambori aimisanga boro ya du kuti sino aboro

[Gu kpiahe du ti kpewaraga 6]

I nakoda ngua dedede kuti gu gbugbu apai nga ga sangbaatoro

[Gu kpiahe du ti kpewaraga 6]

Ya mo agu aboro namanga sunge abinza namanga gupai Bakitingbanga akpinyemuhe zanga ino yo ho?

[Gu kpiahe du ti kpewaraga 7]

Baibiri nayugo gu gene nga ga rengo