Wari Rengbe Oni ka Bi Zereda nga ga Ngbaduseyo Ni?
Dungu kparakparaapai gu duho dagba gaani regbo na gu regbo nangia ga Thoreau, nga guko fura yo tipa ko rogo gu paparaha ye mbata fu gere. Bakere kparapai sa nga, zingo ho areme ti arugute tipa wai ka gbia gu zereda nga ga berã te. Abawirikipai tipa berã aboro na abakeke agu abuku du tipa undo aboro—zavura abake awaraga pangbanga—nafu gayo aberã a. Gayo arugute rengbe ka fu undo tipa guru regbo; ono tipa ka nyasa apai tipa gbanga regbo, si naida gupai duna bakere rugatinapai rogoyo susi gure. Gure nangia gupai agu aboro akurubaraha fura yo tipa yo rogo gu paparaha ye mbata fu gere.
ANTÔNIO, Marcos, Gerson, Vania, na Marcelo aye rogo arago nibasasa, na i adu a na gayo fudifudiapai nibakiakia. Ono apai ho kandara biata nga gu nadu tipa yo dunduko. Bambatapai nga, regbo adu kinaho nga gu i “adu nga na maabangirise . . . [ya], ki zanga Mbori zegino.” (AEfeso 2:12) Uepai nga, i anakpinyemu gu zereda nga ga berã. Na biatapai nga, i dunduko abi gu zereda nga ga ngbaduseyo nga gu i aidaha fuo ida yo pa wisigo Baibiri na aDezire Yekova. Wa gayo inohe aasona, i aye ka ino gupai nga Mbori na nyemu yo tiko. Nirengo, a wa Pauro agumbaha fu agu aboro Atenai nadu ti gako regbo, Mbori “aturã nga na ani wa sa te.” (Amokedi 17:27) Ida gipai re ni ndikidi rengo nga bakere ndupai tipa gbia gu ngbarago nga ga ngbaduseyo.
Tipagine Du Zereda Ho Tini Gbua Niwiri Toonihe?
Baibiri nafu nyanyaki nduapai ue tipa gu zingo zereda du rogo zegino—singia gu zereda nga ga ngbaduseyo watadu gu zereda du dagba aboro. I sakipai tipa gu bambata nduhe rogo Yeremaya 10:23: “Gu pai nga ga boro si rogo ni yo te, gu boro nata, pa ruga gani apai si rogo ni yo te [“anga si fu gu boro nata tipa ni rugu gani diandue te,” NW ].” Boro na tatamana singia bipai kumbatayo tipa ka zoga ti ni zanga undo te, na gu yangara undo duna nyanyakipaha naye kina be Mbori. Agu aboro agbatanga gu rugapai nga ga Mbori ya agbianga nyenye zereda wa gu sa te. Ani nabi ue ndupai tipa zingo zereda rogo afugo gu mokedi nangia Yoane: “Zegino dunduko du ni zogozogo ho be gbegberẽ ko.” (1 Yoane 5:19) Zanga gu rugapai nga ga Mbori, ga boro asadatise tipa ka gbia zereda nikaa du dedede ni gbarasigbarasihe be gu mangimangiapai nga ga gu boro i abinga ni ya, ono nga ndikidi boro—duna ome kisusi—nga gu “gbegberẽ ko,” nga Satana.
Tipa gi nduapai du ue re—dungu aboro agbatanga ga Mbori rugapai te, na gu nga Satana namangasunge nyanyakii rogo zegino—ngbatunga aboro dunduko du rogo gbegbere sino raka. Gu mokedi nangia Pauro aringbisipaha wenengai niyaa: ‘Kusikusiahe dũ mongo niukaga omehe nimbu be ima kina ku awere.’ (ARomo 8:22) Da rengbe ka tikango gu wisigopai re? Rogo kumukokumuko aringara wa sa na gu rungorungoho, gu fudifudiapai nga ga aborokporo, kuoandika, zanga rurupai, gu tagbagapai nakura mbiko soga gu mangimangiapai nga ga kura aboro, zanga duna kido tipa pa mosoro, agu asogote nga ga angbatunga, rungosi aboro, kaza, na gu kura dungu apai, nadia ga aboro zereda nga ga berã kusayo.
Gu Rago Rengbe Ani ka Bi Zereda nga ga Ngbaduseyo Rogo
Ho Antônio, Marcos, Gerson, Vania, na Marcelo awisigi Fugo Mbori ni, nga Baibiri, i awiriki agu apai nga gu na’aria gayo raka. Pai sa nga, i awirikihe ya agu apai namanga rogo zegino a’ariatihe a’aria rogo kura uru sa. Anga gere gbua nga kungbo maabangirise ya apai dunduko angba angba ni yangaraha te. Si nga gu kido du mburuhe ni moimoihe wenengai, ya Mbori na ringbisapai beko tipa ngbatunga aboro na zavura awere, ani rengbe arengba ka gbia undo be gu ringbisapai re ka ani amanga gupai ko akpinyemuhe. I amangi agu apai i awirikihe rogo Baibiri yo, na apai kini mo ka ngba fuyo. I agbia ngbarago na zereda susi gu bakioho i aberẽ gupai nga si rengbe ka du.
Antônio berewe dagba gu rimbasa aboro nazinga gbayaga tipa ka yugo gupai arunga bangiri yo ya te, watadu ka rimiso tiko kurogo gu vura nga ga aboro sunge a te. Ko ini gupai nga agu a’ariapai rengbe ka ye ngba gu gene re ni kina betehe gbua na tipa kina guru regbo. Gi wirina nadu mbata ni makungu re ima wirikapai tipa ga Mbori Kindo. Si nga gu Kindo badungu amirioni aboro naakpara tipaha ho i nagumba ga Gbia Kparakpee (watadu gu kparakpee nga Barani) ni ngbariyo na kini gumba gupai fu Mbori nga: “Gamo Kindo ye.” (Matayo 6:10a, New International Version) Antônio awiriki gupai nga ga Mbori Kindo nga ndikidi zogarago nga ga ngbangbaturũ nga gu nika ye na ndikidi zereda fu ngbatunga aboro.
Marcos awiriki wai kaa manga gu ga Baibiri rugute nga ga tatamana nga gu du tipa rogatise. Ni sangbanaha, gi kuru boro birĩ zogarago re na ngbarago awere na ki du nikpamiakpamia ko na diako berewe. Ko nangera a kumbatayo tipa gu regbo, nga gu nika ye mbembedii, ho ga Mbori Kindo nika diaba gu zegino ni du awere nga ga ngbaduse, na duni ga ringi na ki moi gu sinoraka kubaha ngbaa kisusi gure. Ko na dudunguro giarogo gupai yo du rogo ga Gbia Kparakpee nga gu nayaa: “I mangi gupai mo akpinyemuhe auru kpotosende a wa i amangaha ngbangbaturũ yo.” (Matayo 6:10b, NIV ) Ho i ka manga gupai ni auru kpotosende Mbori akpinyemuhe, aboro adu rogo ngbatunga gu raka i abingoho mbata ya.
Ginipai tipa Gerson tigako? Ko berewe ni batakuari na ni iradii te. Gu raka nga ga gi gude nadu mbata ni gude bangiri gene re awere na rogoyo tini bambiko ko namangasunge na omeko tipa kaa undo kura aboro i gbia gu zereda nga ga ngbaduseyo. A wa agi apai du tipa agi aboro re ayugoho, wisigo Baibiri na kini mangi agu apai si agumbaha rengbe ka aria ga boro raka ni bakerehe si dani bawenehe.
Zereda nga ga Ngbaduseyo Rogo Fudifudi Zegino
Nyanyakipa boro rogo kuruapai dunduko rogo manga gupai Mbori akpinyemuhe nga Yesu Kristo, na ho aboro awisigo Baibiri ni na aDezire Yekova, i nawirikapai gbe tipa ko. Ni gu yuru i abatika ko, amaraika abi bia taarimo fu Mbori niyaa: “Taarimo dú fu Mbori ri arago dũ, zereda dú dagba aboro sende no, i ngba ti ko!” (Ruka 2:14) Ho Yesu asono ni, ko abakabangiriko tipa mbakada ga aboro raka. Ko arugutiko na gayo aberã na ki yugu gu nunga nadunga ti kura boro ya tipa rungorungo aboro na agu aboro nanakakaza. Na ringbisihe na sangba amaraika, ko aye na bete zereda nga ga ngbaduseyo fu bayee aboro. Ti digido gako sunge, ko aya fu gako abawiriki wee: “Zereda mi ahe na oni; gi zereda mi afu fu roni. Mi afu nga ha fu roni, wa aboro nafu he fu roni zegino te. Ka oni rúngo nga kpotoroni yo ya, ka oni gúnde nga a ya.”—Yoane 14:27.
Yesu adunga gbua ni kina baundo aboro te. Ko aringbisi tiko kuti babanda avusende, na ko ki ringbisi gu bayee aboro nanapekafuo ko kuti avusende ho ko aya ni wee: “Mi aye ami du ni ungara, ungara ki du na ome rengbe arengba. Mi nga wene babanda [avusende]. Wene babanda [avusende] nabaga kpioni tipa [avusende].” (Yoane 10:10, 11) Ii, na kparapai ti gu badungu abarumbatayo du areme nga aguyo nangera gbe ni bambatapai tipa kina agu apai du tipa yo, Yesu afu ungako tigako tipa gako avusende.
Waigu rengbe ani ka gbia undo be gupai Yesu amangihe re? Dungu aboro ima inido tiyo na agu afugo nga: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Manga idapase kuti Yesu naida gupai ni bambataha nga boro duna inohe tipa ko na tipa Bako, nga Yekova. Inohe tipa Mbori na tipa Yesu Kristo rengbe ka ndu na ani ani duna dawedawe ngbanya dagbarani na Yekova Mbori, nga gu ngbanya nika undo rani ani da ti gu zereda nga ga berã.
Yesu ayaa: “Gimi [avusende] nagia fugore, mi ini ra, ami ki nipeke re. Mi nafu nyenye unga fu ra; ami akpíka nga berewe te, a nga boro sa ka tuka ra be re te.” (Yoane 10:27, 28) Nga agu afugo nunga nafu wasa! Rengo ngaha, Yesu agumbaha mbembedii wa agarã kutu ue kusayo, ono si na ome awere a wa kina gu si adu nani bakuruyo ti gu regbo re. Ka bangirani ya gonga ti gupai nga Yesu Kristo kindi ni ungako na ki du zaaza ya, kini zogorago awere ni gu Bakindo sungu rii gu mbatabakindo nga ga ga Mbori Kindo nga ga ngbangbaturũ. A wa kina gu regbo ko anata auru kpotosende badungu agarã nasusi fuoho kusayo re, ko nabakabangiriko kindi tipa gu bayee aboro nga aguyo naida zereda nga ga berã. Kurii gure, ko kindi nga Babanda gako avusende. Ka ani apeka fuo ko, ko aundo rani aundo ani gbia gu zereda nga ga ngbaduseyo, nga gu nakoda ndikidi kido tipa bi nzunzu zereda kumbatayo—nga gu nika yugopa go zuu kusayo, vura, na kuondika.
Ndikidi aundo naye be ino gupai nga Yekova nika undo rani rogo Yesu yo na be ida ani he. Ani natingidipa Vania, nga guri i ambu rõrõi atindiro furi mbu ri kindi ni tooni degude, na ri kini berẽ gupai nga bangiri Mbori aima go tiri? Awere Vania ini gupai nga Mbori agindigonga ri te. Ri nayaa: “Mi awiriki gupai nga Mbori nga ndikidi boro, nga guni duna bawene asino tini. Gako nyemuse afõngbaduko yo ko kedi Wiriko ku auru kpotosende tipa ko fu unga fu rani. Si ni nyanyakipa pai ka ino gipai re.”
Marcelo namanga dezirepai tipa gupai nga gako ngbanya dagba ko na Mbori ni ndikidihe. Gi wirina nanidu mbata ni bandu ku kporo agbere yo re nagumba gupai nga: “Paranga aboro ainonga gupai dedede rengbe yo ka mangaha te, sidu gu yangarapai namanga yo nga i naimisa tiyo. Gu kurayo narimiso tiyo kurogo inga mangasunge na kere angua, a wa mi amangihe. Mi namaabangire nga gu kura badunguyo agbia maku, a wa mi agbiaha, ni wirika yo rengo tipa Mbori na Wiriko.”
Mbiko sirisiri wisigo Baibiri, Vania na Marcelo asonosi nyanyaki idapase kuti Mbori gbiati kido kuti pa ida ko gupai nga ka undo yo i nyasi na gayo fudifudiapai. Ka ani mangi gupai nga gu i amangihe—nga ka wisigo Baibiri na kini mangi agu apai si agumbaha—ani akurabara bakere zereda nga ga ngbaduseyo, a wa kina gu i akuru baraha. Sidu gu ngarasahe nga ga gu mokedi nangia Pauro adu nirengo tipa rani: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.”—AFiripoio 4:6, 7.
Bi Ndikidi Zereda Areme
Yesu Kristo naruga ndu agu aboro gomoro rengo amanga yo kungba gu gene nga gu nandu sa nyenye unga rogo paradiso nga ga kpotosende. Wa ko angbe fu yo kumbatayo sa ndikidi iriso Mbori, i nagbia gu zereda du wa kina gu ringbisi yo paha rogo Baibiri: “Gimi aboro asúnga rogo zezeredi kporo, na rogo ndikidi abaraka, na rogo zezeredi abaongoda.” (Yesaya 32:18) Na gure gbua nga hia gu zereda nga gu i ka gbia ngbarago behe kumbatayo. Ani nageda gupai nga: “Bayee aboro adía kumbo ringara, ki du na ngbarago tipa gu wenepia du kpaima. Ruru aboro adía kumbo ringara, ki nye anye kindi.”—Atambuahe 37:11, 29.
Sidu ya mo ani rengbe ka duna gu zereda nga ga ngbaduseyo areme? Ii. Kurii gure, ani rengbe ka duna gu kido nga mbembedii kumbatayo, Mbori afu maku afu na gu zereda naadunga mbata ya fu gu ngbatunga aboro nga agisangbaa. Tipagine tie, ka oni asananga ko tini rogo kparakpee tipa ko fu gako zereda fu roni ya? Kangia oni na apai ho nga gu ninaadia gaoni ngbarago kusayo, oni kparikpee rogo gu gene Bakindo Davide akparikpee rogo: “Mo zéresi gu fudifudiapai du kpotore yo [“gu fudifudiapai du ngbadureyo ima nge,” NW ], mo kúsi re rogo gimi dungbapai. Mo bérẽ pa gi gberãngbi na gi mbugo, ki vu re ti gimi ingaapai dunduko.” (Atambuahe 25:17, 18) Oni ini gupai nirengo nga Mbori nadega tuko adega sa ngbatunga agu akparakpee re. Ko nataa beko na kini fu zereda fu aguyo dunduko nagbataha na ndikidi ngbaduyo yo. I kido rani ni nyemuse ya: “Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo. Ko nadigisa gu nyemuahe nga ga agu yo nagunde ti ko; ko nagia gayo kpe ku ari a, ki nibatasi yo.”—Atambuahe 145:18, 19.
[Gu tingidapai du ti kpewaraga 5]
Boro na tatamana singia bipai kumbatayo tipa ka zoga ti ni zanga undo te, gu yangara undo duna nyanyakipaha naye kina be Mbori
[Gu tingidapai du ti kpewaraga 6]
Inohe tipa Mbori na tipa Yesu Kristo rengbe ka ndu na ani ani duna dawedawe ngbanya dagbarani na Yekova Mbori, nga gu ngbanya nika undo rani ani da ti gu zereda nga ga berã
[Gu tingidapai du ti kpewaraga 7]
Manga gu rugute nga ga Baibiri nafubee sa zezeredi ramukporo