Oni Ni gu Kristano ‘Ima Sona’?

“HO MI adu ni ni gude mi [an]agumba pai wa gude, mi ki niberẽ pai wa gude.” Wogu gu mokedi nangia Pauro akehe. Nirengo, ani dunduko nadu ti kura regbo ni agu agude kaa manganga wiripai ya. Ono tie, ani anyenga anye kindi wa gure te. Pauro nayaa: “Awere wa du mi ni kumba, mi mbu agu apai nga ga agude.”—1 AKorindo 13:11.

Wa kina gure, aKristano dunduko natona gayo raka ni gu fogo agude nga ga toro yo. Ono kusa, i dunduko rengbe ka ‘du sa rogo idapase yo, na ki du sa na gu ruru inohe nga ga Wiri Mbori, sa du ni gu boro ima sona, sa rengba na sona sa gu hibepai nga ga Kristo.’ (AEfeso 4:13) Rogo 1 AKorindo 14:20, i nangarasa rani niyaa: “Awirina, ka oni dú nga ni agude rogo gaoni berã ya . . , ono rogo berã oni dú ni sosono aboro [“oni duni sosono aboro rogo gu tandu nga ga rugatinapai,” NW ].”

Padu nyanyaki aKristano ho nga aguyo ima sona nga maku fu ga Mbori aboro areme, si wo gbe mbiko badungu vovo aboro gu duho. Agu aKristano ima sona nasa dungurati si du nyanyakii. I na wene ome kurii gu sino berã moipai rogo agu adungurati dunduko du yo rogo.

Wa vura duhe nga sona ti kpotose wa gupai namanga nisaha, sona rogo toroyo naye tigaha mbiko regbo na mbiko gu asadatise boro amangaha. Si airiwonga te, bakuru kusayo rogo agu auru nangia ga Pauro, bete aKristano akpa ti ‘susa kumbatayo ka dati nyaka,’ wa i avura mangasunge Mbori tipa dungu agarã vurũ. (AEbere 5:12; 6:1) Ginipai tipa roni? Kangia oni aima digo nindusunge Mbori tipa dungu agarã watadu oni mangihe gbua tipa kina wiri bete regbo, si adu fu roni ni wenepai ka oni wisigi tironi zanga nangahe. (2 AKorindo 13:5) Oni dagba aguyo rengbe yo ka yamba yo nga nyanyaki aKristano watadu aguyo ima sona? Ka si adunga wo ya, waigu rengbe oni ka da wo?

“Sosono Aboro Rogo gu Tandu nga ga Rugatinapai”

Gu boro nga fogo gude rogo toroyo “nawo ku bani niya ni yuge ayugopai dunduko, be ga aboro biriki, ni nangahe, ku sangba birĩingapai yo.” Sidu, Pauro nangarasa rani niyaa: ‘Ani sono rogo nyemuse rogo apai dunduko kurogo ko nga riihe nga kina Kristo.’ (AEfeso 4:14, 15) Waigu boro amangaha wo? AEbere 5:14 (NW ) nayaa: “Nyanyaki riahe tipa sosono aboro, fu aguyo nasonosa gayo aome nga ga makiapai nimanga yo sunge nani tipa ka kparakapai dagba rurupai na irairapai.”

Oni kparia gupai nga sosono aboro nasonosa gayo aome nga ga makiapai nimanga yo sunge nani, watadu rogo gu inohe du yo nani rogo manga agu andika nga ga Baibiri. Si tie ziazia nga, boro asonanga ki nyaki vuru guru regbo te; si nadia regbo tipa boro sono rogo toroyo. Si ki vura du wo, oni rengbe ka manga dungu apai si mbakadi gene fu roni tipa sona oni rogo toroyo ni wisigo oni pai nisaroni—gbe nga wisigo gu dudunguroapai nga ga Fugo Mbori. Rogo agu aregbo susi bambedaa, Ngbaõbambu Sinziri asakipai tipa dungu dudunguro riiapai. Agu aboro ima sona anenga ngbatunga gu papara kekeapai re mbiko si “ni kpakarakpakara ha tipa rugati na paha” te. (2 Petero 3:16) Kuba gure, i narita gu nyanyaki riahe re na nyemuhe!

Zaza Abatungusipai na Abayugupai

Yesu arugu gako abawiriki niyaa: “Oni ndú . . . ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na [ti rimo] Wiri na [ti rimo] Ziazia Toro; ki nirugu yo a i niká kuti agu apai dunduko mi arugu roni kuti ni.” (Matayo 28:19, 20) Du zaaza rogo sunge tungusapai rengbe a ka ipiso gaoni sona rogo toroyo. Tipagine ka oni a’asadanga tironi tini ka manga sunge tungusapai wenengai wa rengbe agu apai du tipa roni ka fu gene fu roni tipa mangaha ya?—Matayo 13:23.

Ti kura aregbo, gu fudifudiapai nga ga raka rengbe ka sa pa bi regbo ka tungusapai nikpakarakpakarapai. Si ki vura du wo, ni ‘asada oni tironi nyanyakii’ ni abatungusipai, oni nayugo wai nyakipa “wene pangbanga” bangironi. (Ruka 13:24; ARomo 1:16) I rengbe ka bi roni rogo gi gene re “ni kpia pai fu agu yo idi pai.”—1 Timoteo 4:12.

Akakuti Idapase

Sona oni ki da ti nyaka nakoda asada oni tironi a ka banda gaoni kakuti idapase. A wa duhe nikekehe rogo Atambuahe 26:1, Davide ayaa: ‘Ako Mbori, mo sápu ngbanga fere, bambiko mi ata ni irarengo rogo gimi mangapai.’ Kakuti idapase nga manga ruru apai, rogo apai nabaha. Ono tie, anga rogoyo nga duni rengberengbe boro te. Davide nitiko amangi dungu kere ingaapai. Ono mbiko ko adi rugute kugume na ki mbakadi gako agene, ko ayugu gupai nga ndikidi nyemu Yekova Mbori adu kindi ngbadukoyo. (Atambuahe 26:2, 3, 6, 8, 11) Kakuti idapase nakoda fu ngbaduse nabaha. Davide aya fu wiriko nangia Soromo wee: “Mo íni ga bamo Mbori, ki nimangi pa ko na kpotoro yo ni ziazia ha [nabaha, NW ].”—1 Pekapai 28:9.

Kakuti idapase nakoda ‘zanga du ni boro zegino,’ ki niru tuturũ ti gu birĩ zogarago nga ga rikaaboro na gayo avura. (Yoane 17:16) Oni du wa ka oni ne manga irairaapai a, ngbatunga gu du wa meteka, bari, na ingamangasunge na kere angua. (AGaratio 5:19-21) Ono tie, kakuti idapase nakoda dungu apai susi gu gbua nga ka ne agu apai re. Soromo azahe niyaa: ‘Kpikpi azii nasa ga bamangi furũ nzeme si nifũ gbegberẽ; kina wo bete mungo nasusa pa tatamana na irisa.’ (Batungusipai 10:1) Ii, zavura kina ‘bete mungo,’ ngbatunga gu du wa gbegbere buga watadu yugo nyemuse dagba kumba na dee nga gu arunga tipa yo ya rengbe ka ye na gbarasarimo gu boro duna ‘tatamana.’ (Eyobo 31:1) Sidu, oni yugu gupai nga oni ima nyaka ni asada oni tironi ka duni kpiapai rogo gaoni mangaapai dunduko, zavura “agu apai nangera ni gbigbitaha,” oni nehe.—1 ATesaroniko 5:22, King Version.

Ruru Aboro

Gu Kristano ima sona, ni niruruni a. A wa ani agedaha rogo AEfeso 4:24, gu mokedi nga Pauro nangarasa aKristano niyaa: “[Oni] ukadi gu vovo boro, fu yo ni ku sangba Mbori yo na rurupai na ziaziapai nga ga rengo.” Rogo gu Kekeapai du rogo pa-Giriki, gu bambata fugo du tipa ‘du niruruse,’ si na gu berã nga ga du ziazia, duna irisa. Ruru boro nga gu boro fu tini sa pai, nayugo irisa tipa Mbori; nabipa gani asunge Mbori dunduko na rubangirise.

Gini bete agene rengbe oni ka sonosa ngbatunga gu du niruruse re rogo? Gu sa dagbaha rengbe ka du nga, oni mangisunge wa sa na agu abaakumba du rogo gaoni dungurati. (AEbere 13:17) Ni ino yo gupai nga i amoi Kristo ni Rii dungurati nga ga aKristano, agu aKristano ima sona, i niruruyo fu aguyo i asia yo i ‘rígi ga Mbori dungurati.’ (Amokedi 20:28) Nga gu irairapai kangiaha ka boro sakipa gu pagbia nga ga agu abaakumba i asia yo watadu ka umbasipaha! Si naida oni du a na gu berã nga ga du niruru roni fu ‘ruru kangara moyambu’ na agu agene i amangasunge nani kaa kparaka ‘riahe ti ragoho.’ (Matayo 24:45) Oni ipisi tironi ka geda agu apai du rogo Ngbaõbambu Sinziri na gu kusikusi abuku nandu nani sa ki nimangi agu apai si agumbaha.

Yugo Nyemuse Rogo Gaoni Mangaapai

Pauro akepai fu agu aKristano nadu Tesaronike yo niyaa: “Gu nyemuse du dagba roni yo dunduko ni ba sa sa tipa akuaroni si kii gbe.” (2 ATesaroniko 1:3) Sona rogo nyemuse yo nga kparakpara nyanyaki papara gaani sona rogo toroyo. A wa duhe nikekehe rogo Yoane 13:35, Yesu ayaa: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” Ngbatunga gu nyemu awirina re ayenga gbua be gu kungbopai nafõngbadu boro yo watadu gupai boro aberãha aberã gbua te. Gu buku nga Vine’s Expository Dictionary of Old and New Testament Words nayaa: “I rengbe ka ino nyemuse sa kina ti gupai si afõ boro ni mangihe.” Ii, oni nasona ka da ti nyaka rogo gi gene re ni mbu oni nyemuse si mangisunge!

Ni kpiapai, ani nageda gupai rogo ARomo 15:7 nga: “Oni di akuaroni . . . ku gume.” Gene sa ka yugo nyemuse rogo nga ka paakuti akuaroni aidipase na ka paakuti vovo aboro pati adunguratise—dawedawe na zaaza! Oni asadi ka ino yo nitironi. Oni ‘duna nyemu ga akuaroni apai’ tironi. (AFiripoio 2:4) Isoke oni rengbe ka duna gu sino nga ga dia yo kugume ni yamba oni yo wa du yo nibakiakia ku kpuroni yo. (Amokedi 16:14, 15) Ti kura aregbo, gu zangarengba nga ga akuarani rengbe ka maa bakio gaani nyemuse tipa yo rogo asada, ono wa oni awirika wai ka “hi pai fu akuaroni ni nyemuse,” oni nayugo gupai nga oni nasona.—AEfeso 4:2.

Mangasunge na agu Ahe Du Berani ka Sonosa Ziazia Iriso

Rogo agu aregbo nadu mbata, anga ga Mbori aboro dunduko namangi gu gayo asunge dunduko nangia gayo ka songoda ga Yekova yekaru te. Si du Mbori anakeda anebi tini wa Agai na Maraki i fõngbadu Gako aboro yo i mangi gipai re. (Agai 1:2-6; Maraki 3:10) Agu aKristano ima nyaka namangasunge areme na ngbarago na agu ahe du beyo kaa songoda ga Yekova iriso nani. Oni wiriki aguyo re nimanga oni gu ndika dedede du rogo 1 AKorindo 16:1, 2, “[ki] nimoi . . . ahe pati roni ni ba sa sa ni igiigi he” ka fu gamahe kurogo dungurati na ka songoda ga aDezire Yekova sunge rogo zegino dunduko. Fugo Mbori nakido rani niyaa: “Gu ni ka mi tunga toni ni [a]ke he a toni; gu ni ka mi tunga gbe, ni [a]ke he a gbe.”—2 AKorindo 9:6.

Ka bangironi gonga ti gu kura ahe du beroni wa sa ya, ngbatunga gu du wa gaoni regbo na omeroni. Oni asadi ‘ka ngbe regbo’ be agu apai anyakanga paha ya. (AEfeso 5:15, 16; AFiripoio 1:10, NW ) Oni wiriki wai ka mangasunge wenengai na gaoni regbo zanga gbarasaha. Manga oni he wo asa roni oni duna regbo beroni ka du ti manga asunge mbakada Bambu Kindo na gu kura asunge du wa ha nga gu nasonosa ga Yekova iriso. Manga oni sunge na agu ahe du beroni rogo gi gene re angia gopai nga oni ima tona ka da ni gu Kristano ima sona.

Oni Susi Kumbatayo sa Nyaka!

Agu akumba na adee nga abawisigipai na duna inohe, du zaaza tipa tungusapai, adunga irairapai ti gayo kakuti idapase ya, duni ruruyo ki duna nyemuse, na nga aguyo duna nyemu ka koda beyo na ka fuka ahe tipa ka songoda gu sunge nga ga Kindo, i nga bakere maku nirengo. Sidu tie, si airiwonga te, gu mokedi nangia Pauro afu gu ngarasahe nga: “Wa duhe awere nga ani ima mbu tonatona yugopai tipa Kristo, ani susi kumbatayo dati nyaka”!—AEbere 6:1, NW.

Oni ni gu Kristano ima sona, na ki nyaki? Watadu oni kindi rogo kura agene, wa kina fogo gude rogo toroyo? (AEbere 5:13) Kangia oni nga guni ima nyaka watadu du kindi, oni diberã ka fu tironi sa wisigopai, sa tungusapai, na sa yugo nyemuse fu awirinaroni. Oni di ngbatunga agu arugute dunduko na rugapai ka gu nyanyakiyo fuhe fu roni. (Asanza 8:33) Oni tindi gu gaoni tindiro nabaha nga ga aKristano. Wa regbo kaa susa na wa oni kaa asadatironi, oni rengbe arengba tigaoni a ka da ti ‘du sa rogo idapase yo, na ki du sa na gu ruru inohe nga ga Wiri Mbori, sa du ni gu boro ima sona, sa rengba na sona sa gu hibepai nga ga Kristo.’—AEfeso 4:13.

[Gu kpiahe du ti kpewaraga 5]

Agu awirina ima nyaka nafubee sa gu toro nga ga dungurati ni du yo na nyemu akurayo tiyo