“Ragoho Da”

‘Ragoko da ko guari kusayo rogo gi zegino re ka ga koyo du Bako ni.’—YOANE 13:1.

1. Wa gu pumbo Susiri nga ga 33 ti Gaani Regbo ambeda, berãpa ginipai hi Yerusarema behe, na tipagine?

TI RAGO gako bapatiza rogo 29 ti Gaani Regbo, Yesu atona gu sunge si adu nga si nika ndu na ko sa ‘rago’ kpioko, zingako bekpio, na taarimo. Awere nga tonatona kito nga ga 33 ti Gaani Regbo. Kina bete aposo gbua susi wa gu bakere ba pengbanga nga ga aYuda, watadu ga aYuda Abororondo atona tabura Yesu ka imoko. Fuo ino ko gupai i asogima mangaha, isoke ngba Nikodemo, nga guni sa dagba gu ga aYuda Abororondo nazi bakure na ko, Yesu guari kusayo Yerusarema yo na ki mere ku ringara yo mbiti gu Di nga Yaradene. Wa pumbo Susiri ambeda, dungu aboro guari ringara yo ka ndu ku Yerusarema yo, gu bagbata re kini hi be berãpa Yesu. Aboro nasana akurayo niyaa: “Gini pai oni aberã? Ya ko aye nga sa pumbo te?” Agu arugute agbia motumo na aFarusi nafuhe gara aboro agara rogo gayo gbäräkägbäräkä afugo, nga agu arugute nayaa ka boro ini bara Yesu, si naida ni ye ka tingida yo nani.—Yoane 11:47-57.

2. Gini ga Maria mangapai nakusa kango, na ga Yesu karagapai sani ni ngbe ko na ri nayugo ginipai tipa ruga ko tiko na pa ‘ragoko’?

² Arame sita mbata fu uru pumbo Susirii, rogo Nisana ti rameru 8, Yesu ima karaga tiko berewe ku pati Yerusarema. Ko naye ku Betania yo—nga gu gbata abakureako nga Marata, Maria, na Razaro araka rogo—du baturoho ti Yerusarema wa akirometere 3. Gu uru re nga Rago Bisue nyemu, sidu Yesu nasungo kina yo rago Sabiti. Ho Maria amangasunge ko ni ni mbeda ri nduko na kikii geno wene fuõ nzeme rogo gu nyemu naye fuo gure, gako abawiriki naka pa mangaha wo. Yesu nakaragapai niyaa: “Mo he ri ri ka kuti ni sa rago kpisida re. Bambiko rungorungo aboro du na oni waragoagira; ono mi adu nga na oni a waragoagira te.” (Yoane 12:1-8; Matayo 26:6-13) Yesu ini gupai nga ‘ragoko ima da ko guari kusayo rogo gi zegino re ka ga koyo du Bako ni.’ (Yoane 13:1) Fuo arame bisue, ko nika “tumo dungu yo ni ungako.” (Marako 10:45) Tona ti gi regbo re ka ndu kumbatayo, Yesu tona kaa mangaapai dunduko niipo na gako yugopai a wo. Nga gu bawene kpiapai gere afuhe fu rani wa ani asungudo digido gi sinoraka re kakaka! Ani makianga gupai namangi tipa Yesu rogo kina boro gu uru naye fuo gure.

Gu Uru Yesu Arimo ku Yerusarema yo Na Irisa

3. (a) Waigu Yesu arimo ku Yerusarema yo Rago Poso, rogo Nisana ti rameru 9, na ginipai dungu agu aboro du pati ko amangaha? (b) Gini karagapai Yesu nafuhe fu agu aFarusi nakpakanahe tipa gupai rimbasa aboro amangaha?

³ Rago Poso, rogo Nisana ti rameru 9, Yesu naye ku Yerusarema yo na irisa. Wa ko ambeda na gu bagbata re—kini ndu rii paranga wiri dongi nidigisidigisi sangba Zekaraya 9:9—dungu agu aboro dungura tiyo ku pati ko nagbaraga gayo abaukadi bangiri gene, baraho gu kurayo akukuo be angua ni kini gbaragihe sande. “Mbori fu maku fu gu bakindo naye ni rimo Gbia! [Yekova, NW ]” wogu i apaa kuari. Gu kura aFarusi dagba gu rimbasa aboro re naida Yesu za gako abawiriki. Ono tie, Yesu nakaragapai niyaa: “Mi nagumba ha fu roni ya, ka agi aboro ongo aonga re, ambia [poi] apáa ku ari.”—Ruka 19:38-40; Matayo 21:6-9.

4. Tipagine Yerusarema awo awo tini ho Yesu arimo ni kurogo gu bagbata re?

⁴ Kina bete aposo gbua susi kusayo wa dungu agu aboro du dagba gu rimbasa aboro re abi Razaro Yesu nazingisiko. Awere, agi aboro re nafura kindi fu akurayo tipa gi iiriwopai re. Sidu wa Yesu arimo ku Yerusarema yo, gu bagbata re nawo awo. Aboro nasanahe niyaa: “Da nga gi boro re?” Na rimbasa aboro kini karagapai kindi niyaa: “Nebi nga gi ko re nga Yesu, ye Nazareta yo, du Gariraya yo.” Ni bi yo gupai namanga, aFarusi nakpara niyaa: “Aboro ndu andu fuo ko zegino dũ.”—Matayo 21:10, 11; Yoane 12:17-19.

5. Ginipai mangi ho Yesu nandu ni ku yekaru yo?

⁵ A wa sinoko anidu ho ko anandu ni ku Yerusarema yo, Yesu, nga Bakere Bayugupai, ndu ku yekaru yo ka yugopai. Yo ngaha re, airavurari na gbarigbari aboro ye koyo du ko ni, na ko kini husi yo. Ho agbia motumo na abakeapai abi gere ni na i kini gi agude i nipoi kuari niyaa, “Mo batasi[rani], ani nakpara foro wiri Davide!” i nazinga. I kini sanahe niyaa: “Mo gi gu pai agi yo agumba ha re?” Yesu nakaragapai niyaa: “Ii: oni ageda nga ha, ya ‘Mo rugu pa tambuahe zaa ku ngba rukutu agude na ahaamai’, te?” Wa Yesu aayugopai kindi, ko nakparia agu apai sirisiri namanga yekaru yo.—Matayo 21:15, 16, “oni ringbisingaha na NW”; Marako 11:11.

6. Waigu du ga Yesu birĩ mangapai awere kia ti gu nadu mbata, na tipagine duhe tini wo?

⁶ Nga gu kparakparapai du dagba ga Yesu birĩ mangapai awere na gu nadu mbata adiwi nasusi fuoho sita! Ti gu regbo re, ko aye ku Yerusarema yo tipa Pumbo Abasura, ono ‘si adunga gbayaga te, si adu ni gbuko.’ (Yoane 7:10, NW ) Na ko anabanda tiko dedede tipa ka bata ho gako raka aniduni ngbapai. Awere ko narima kurogo gu bagbata re gbayaga, yo i aima fu rugute ni fu aboro tipa i ziko! Si aadunga a ni sino Yesu kaa takapande tiko ni Masiya te. (Yesaya 42:2; Marako 1:40-44) Ko anakpinga nyemu i nitakipande ko na awowo watadu kaa meresa iraira apangbanga tipa ko nga gu boro agiaha ngba kura ni kini mere nani kumbatayo te. Awere rimbasa aboro natakapandeko ni Bakindo na ni Batasi—nga Masiya—na ko kini bisirapa agu aberã nga ga agu abarumbatayo rogo pambori naya fuko ko ongosi gu rimbasa aboro re! Tipagine du gi ariapai tini re? Mbiko “ragoho da, i taasi rimo Wiri boro,” a wa Yesu agumbaha rogo gu uru naye fuo gure.—Yoane 12:23.

Mangapai Zanga Gunde—Fuo Gure gu Yugopai Nabatasa Unga

7, 8. Waigu gu ga Yesu mangapai ko amangaha rogo Nisana ti rameru 10 rogo 33 ti Gaani Regbo ayugo kina gu bangisapai ko amangihe mbata ti regbo pumbo Susiri nga ga 30 ti Gaani Regbo?

⁷ Fuo da ko yekaru yo Rago Sa Sunge, rogo Nisana ti rameru 10, Yesu namangapai tipa gupai ko abihe rogo gu nyemu nasusi. Ko tona ka “bafa agu yo ku zegi yo nanababaga ahe, na agu yo nanangbeka ahe yekaru yo, ki vavagadi ga abaundaamarã ambisa na agu ambata nga ga agu yo nanababaga ambipo. Ka ko aida nga fu boro ni tindi he yekaru yo wa sa ya.” Ni bisira ko pa agu aboro ingapai re, ko nayaa: ‘Anga si ni keke he ya, “I aya ti gi bambu bambu kparakpe tipa rikaaboro dunduko tee”? Ono oni sa ha ni yaro abatuka.’—Marako 11:15-17.

⁸ Ga Yesu mangapai nayugo kina gu bangisapai ko amangihe mbata agarã nasusi fuoho kusayo biata ho ko andu ni ku yekaru yo ti regbo pumbo Susiri nga ga 30 ti Gaani Regbo. Ono tie, ti gi regbo re, gi bisirapayo re ima egirã. Ko nayamba agu ababagiahe du yekaru yo re awere nga “abatuka.” (Ruka 19:45, 46; Yoane 2:13-16) I nga abatuka mbiko i namaa bakere geno kurii agu anyaa aboro aida ka ngbe ra tipa ka tumo na ami. Agbia motumo, abakeapai, na ga aboro abaakumba gi gupai Yesu amangaha sidu i kini gbata gene berewe ka imoko. Ono tie, i ainonga wai ka i nyasi riipa Yesu te, mbiko agu aboro dunduko gako yugopai airiwo tiyo, i zi tiyo kindi kuti ko kaa gia gako apai.—Marako 11:18; Ruka 19:47, 48.

9. Ginipai Yesu ayugoho, na gini yambahe du fu agu aboro nadega tuyo kuti gako yugopai yekaru yo?

⁹ Wa Yesu ayugopai kindi yekaru yo, ko nayaa: “Ragoho da, i taasi rimo Wiri boro.” Ii, ko ini gupai nga kina bete arame gbua nye koyo fuko tipa gu gako raka nga ga boro. Fuo fura ko tipa wai si aida gu tunga he du wa mapunga kpi tipa ka kusa zuzuhe—nga gupai naringbisatihe kuti pa kpioko na pa da ko ni gu gene nafu nyenye unga fu kura aboro—Yesu nayamba agu aboro nadega tuyo kuti ko niyaa: “Ka boro ra fere, ni nipeke re apeka; ho du mi ni, gi moyambu adú a ho; ka boro ra fere, Buba irisi ni airisa.”—Yoane 12:23-26.

10. Waigu Yesu aberã tipa gu eegirã kpio napido ko?

¹⁰ Ni berã ko tipa gu eegirã kpio ko ka kpihe nga gu nye arame koyo tipaha gbua biama, Yesu nayaa: “Mbisimore narungo arungo awere; mi aya wãi? ‘Buba, mo bátasi re ti gi rago re.’ ” Ono ka Yesu nenga gupai napido ko te. Sidu ko nayaa: “A si mi aye sa ni kuti gi rago re.” Nirengo, Yesu ima ida na gu ringbisapai dunduko nga ga Mbori. Ko ima diaberã ya kina gupai Mbori akpinyemuhe nirugu gako mangaapai daa kuti kpioko nga ga motumo. (Yoane 12:27) Nga gu bawene kpiapai ko amoihe fu rani—nga ga ranigose dunduko ka manga gupai Mbori akpinyemuhe!

11. Gini apai Yesu ayugoho fu gu rimbasa aboro gi fugo bambeda ngbangbaturũ yo?

¹¹ Ni baka ko bangiriko gbe tipa gupai kpioko nika ye nani kurii rimo Bako, Yesu nakparakpee niyaa: “Buba, mo táasi rimoro.” Gupai nairiwo ti agu aboro dungura tiyo ku yekaru yo nga, fugo napaa ngbangbaturũ yo niyaa, “Mi tasi he, mi atáasa ha ataasa berewe a.” Bakere Bayugupai namangasunge na gi mamu re ka gumba ndu gupai fu aboro gi yo fugo tini, na sangbana kpioko nikangia gine, na ndu gupai si aida tini i mangi idapase kuti ko. (Yoane 12:28-36) Nirengo, gu yangara auru ue susi ahi be sunge tipa Yesu. Ono nyanyakipa uru kumbatayo kindi.

Uru Nyanyaki Bisirapayo

12. Rago Ue Sunge, rogo Nisana ti rameru 11, waigu abarumbatayo rogo pambori a’asada ka zio Yesu ti fugoko, na sangbanaha nga gine?

¹² Rago Ue Sunge, rogo Nisana ti rameru 11, Yesu nandu berewe ku yekaru yo ka yugopai. Kere aboro gu susungu yo ka degatuyo. Ni fura yo tipa gu ga Yesu mangaapai nadu rogo gu uru susi, agbia motumo na ga aboro abaakumba nasanako niyaa: “Gini tandu mo amanga agi apai na ni re? da asia agi apai foro mo amanga re?” Bangbasia Bayugupai naongosa yo na gako karagapai, na ko natangara nyanyakipa asanza biata—gu dagbaha ue tipa ati bakakue na gu kuraha tipa pumbo rogatise—nga gu nakusipa wai asogoko aduni gbigbita yo. Fuo ima ngbaduyo be gupai i agiaha, abarumbatayo rogo pambori nakpinyemu ka zioko. Ono i nagunde agunde be rimbasa aboro, nga aguyo nabi Yesu ni nebi. Sidu i nagbata gene ka biriko ko ko gumba gupai rengbe yo ka zioko tini. Agu akaragapai Yesu afuhe fuyo nasayo i ongo.—Matayo 21:23–22:46.

13. Gini rugute Yesu afuhe fu agu aboro nadega tuyo kuti ko tipa abakeapai na aFarusi?

¹³ Wa duhe nga abakeapai na aFarusi nayaa i nayugo ga Mbori Ndika, Yesu nangarasa agu aboro nadega tuyo kuti ko niyaa: “Agu apai dunduko . . . i ka gumba pa ha fu roni, oni mángi kina ha ki ka kuti ni; ono ka oni péke nga sinoyo ka manga wa yo ya; bambiko i nagumba pai, ono i amanga nga ha te.” (Matayo 23:1-3) Nga gu nyanyaki bisirapayo gbayaga! Ono Yesu atanyasanga pa bisirapayo te. Gere nga gako yangara uru yekaru yo, sidu zanga gunde, ko nakusa asino yo—gu ti mburu kuraha wa gumba naasumbo.

14, 15. Gini kere bisirapa abakeapai na aFarusi Yesu amangaha?

¹⁴ “Na gberẽ he fu roni abakeapai na aFarusi, nga airabiriki!” Yesu nagumba gipai re bara sita. Wo du yo, mbiko a wa ko asakarogoyo, i nakiso ngbadimo gu Kindo nga ga ngbangbaturũ be aboro, zanga mbu aguyo naida ka rimo koyo i rimi. Agi airabiriki re nasi baime na kini ndu kurogo kura ngbii kubani ka sa boro kurogo gayo pambori, ka sa ni berewe tipa kina gbarasa ni nyeanye kindi. Baraho i “[a]he manga gu pai [ni] kii dagba arugute, nga [ruru] sapangbanga, na inapai, na idapase,” i namaaberãyo gbe kina fuo pa fu sa dagba bawe. Ni sangbanaha, i nagirisa “gii inga yo na gii kurungbu yo, ono vuru he yo hi ahi be gbu ahe na ruguzuruguzu apai,” rogo gu gene nga gu furũ apai du kpotoyo, si ni õkoõkoho kugii kpia sinombori yo. Kurii gure, i na nyemu ka me muro anebi na ki kendegehe ka gbeberã aboro kuti gayo asino nga ga fu agamahe, wa vura du yo ni “awiri agu yo naimi anebi” vurũ.—Matayo 23:13-15, 23-31.

¹⁵ Ni bisira ko pa gu sino avurako nga ga zanga duna gu weneapai nga ga toro, Yesu nayaa: “Na gberẽ he fu roni, nga iravurari [ni] angbembatayo fu aboro.” I nga airavurari rogo mangaapai mbiko i nanyakasa kina pa gu dahabu nga ga yekaru susi agu apai nga ga toro du tipa gu ba iriso re. Ni fura ko kindi, Yesu nakusa agu afugo ko nga ga nyanyaki bisirapayo. Ko nayaa: “Oni nga awo, oni nga wiri awo, oni awira pa bata be gu mbusa nga ga Geyena wãi?” Ii, Yesu nagumbaha fuyo ya mbiko ndu yo ngba gayo gbigbita gene, i nika rungo be nyenye gbarasayo. (Matayo 23:16-22, 33) Ani dunga na wingbaduse a rogo takapande gu pangbanga nga ga Kindo, zavura ho si aida gupai ni nga ani kusipa agu apai nga ga zire pambori vurũ.

16. Baraho sungu ko ni rii Bagangara Aeraya yo, gini nyanyakipa sangbanebi Yesu agumbaha fu gako abawiriki?

¹⁶ Yesu kuru awere kusayo yekaru yo. Wa uru azera vuro nyemu, ko na gako abawiriki dakpa kurii Bagangara Aeraya yo. Baraho sungu yo ni yo, Yesu nagumba gako sangbanebi tipa gbarasa yekaru na gupai i ka ino padu ko ho tini na ome kindo be ko na pa digo sinoraka. Padu gi sangbanebi re na nyanyakipaha naye ki da ti gi gaani regbo re. Rogo gu nyemu re, Yesu nagumba gupai a fu gako abawiriki nga: “Oni ini ya fuo rame ue pumbo susiri nikada, i ki fu Wiri boro i wagi ko.”—Matayo 24:1-14; 26:1, 2.

Yesu ‘Nakpinyemu Gako Aboro Dati Yangara Regbo’

17. (a) Ti regbo pumbo Susiri rogo Nisana ti rameru 14, ginipai Yesu ayugoho fu agu amokedi du 12? (b) Gini tingidapase Yesu atona mangaha fuo fu ko gene fu Yuda Keriota?

¹⁷ Tipa gu kura auru ue ye fuo gure—nga Nisana ti rameru 12 na 13—Yesu ayugonga tiko gbayaga yekaru yo te. Abarumbatayo rogo pambori nagbatako ka imoko, sidu ko aidanga pai gbarasipa manga ko pumbo Susiri na gako amokedi te. Regbo ti uru Rago Biama Sunge nga tonatona rame Nisana 14—nga yangara ga Yesu raka auru kpotosende ni boro. Rogo gu nyemu re, Yesu na gako amokedi dungura tiyo kutii bambu Yerusarema yo nga gu i ambakadi apai rogo tipa manga pumbo Susiri. Wa i angba be riahe nga ga pumbo Susiri, ko nayugo bawenepai fu agu amokedi du 12 tipa i duna umbasitise ni zunda ko anduyo. Fuo fu ko gene fu Yuda Keriota ko guari kusayo dagba yo, nga guko ima ida ka kusa Bairako tipa zau feda 30—nga kungbo geno kanga gbua kuti ga Mose Ndika—Yesu tona manga Tingidapa kpioko.—Gate 21:32; Matayo 26:14, 15, 26-29; Yoane 13:2-30.

18. Gini kurapai Yesu ayugoho ni nyemuse fu gako ruru amokedi 11, na waigu ko ambakada yo wa ko ka guari pati yo?

¹⁸ Fuo nyasa yo na tonatona manga Tingidapase, amokedi tona kere kango tipa gini guni kii pani kisusi. Kuba gupai nga Yesu bira yo, ko nayugopai fuyo ni zerangbaduse tipa wai du pa ndusunge kura aboro na kikipaha. Ni bi ko gupai na nyanyakipaha nga i azi tiyo kuti ko rogo gako a’asada, ko namanga mokido na yo tipa kindo. (Ruka 22:24-30) Yesu nafu rugute fuyo a i kpinyemu akurayo a wa ko akpinyemu yo. (Yoane 13:34) Wa ko aima kindi kutii gu bambu re, ni nyemuse, Yesu nambakada yo wa ko nambedi ka guari kusayo pati yo. Ko nakidohe ya abakureako nga yo nirengo, kini ngarasiyo i nimangi idapase, na ki kido yo tipa gu undo ziazia toro ka fuhe fuyo. (Yoane 14:1-17; 15:15) Mbata fu guari ko kusayo tii gu bambu re, Yesu nazungadi Bako niyaa: “Ragoho da; mo táasi rimo wiro, wiro táasi rimoro.” Nirengo, Yesu ima mbakada gako amokedi wa ko ka guari kusayo pati yo, na ko ‘nakpinyemu gako aboro dati yangara regbo’ nirengo.—Yoane 13:1; 17:1.

19. Tipagine du Yesu tini rogo ima ati Getesemane yo?

¹⁹ Bebere yuru vura susa ho Yesu na gako ruru amokedi 11 ada ni rogo gu ati nga Getesemane. Wo ko anandu koyo dedede na gako amokedi. (Yoane 18:1, 2) Vuru bete asaa, Yesu nika kpi wa ka i ya wasiwasi bakuo ndika nga ko. Imisiri gipai ko amaabangiriko tipaha re na wai si ka ye na gbarasarimo kurii Bako ima egirã ki da ti gupai nga ho Yesu akparakpee ni, gako randimo natoga wa kure kusande. (Ruka 22:41-44) Yesu nayaa fu gako amokedi: “Ragoho da. . . . Oni ngére gu ni nikakusa re ni mbedi.” Si kina kungbako, Yuda Keriota ima da, na bakere rimbasa aboro fuoko nga aguyo nagasa ko na abaro beyo na aramba gbiati aũvura. I ye ka zio Yesu. Yesu asonga vura na yo te. Ko nasakarogoyo niyaa: “Ziazia Kekeapai awira pa diga wãi wo? wa si agumba ha ya si amánga amanga wo.”—Marako 14:41-43; Matayo 26:48-54.

Taasapa Wiri Boro!

20. (a) Gini kereapai namanga Yesu fuo zio yo ko? (b) Ngbutuko mbata fu kpioko, tipagine kpari Yesu tini kuari niyaa: “Si nyasi”?

²⁰ Fuo zio yo ko, airazire adezire nakitangbaanga Yesu, iraira abasapungbanga kini gbarasi ngbanga fuko, Pondio Pirato kini saringbanga ko, agbia motumo na ndurumo aboro kini sawia ko, abanzengere kini mamuko na kini rungosiko. (Marako 14:53-65; 15:1, 15; Yoane 19:1-3) Bara bebere uru Rago Bisue Sunge, i kini banga Yesu kuti ngbunduru ngua nga ga mbusa, ko kini rungo be kere ima wa barõa ko na anaari asiro oro ti abeko na anduko. (Yoane 19:17, 18) Bara ti saa biata fuo bebere uru, Yesu nakpara kuari niyaa: “Si nyasi.” Ii, ko ima nyasa agu apai dunduko ko aye ku auru kpotosende ka mangaha. Ni fu ko toroko fu Mbori, ko dua riko ki kpi. (Yoane 19:28, 30; Matayo 27:45, 46; Ruka 23:46) Rogo biata uru fuo gure, Yekova nazingisa Wiriko. (Marako 16:1-6) Areme 40 fuo gako zingabekpio, Yesu kini dakpa ku ngbangbaturũ yo na Mbori kini taasi pako.—Yoane 17:5; Amokedi 1:3, 9-12; AFiripoio 2:8-11.

21. Waigu rengbe ani ka wirika Yesu?

²¹ Waigu rengbe ani ka ‘peka fuo Yesu sirisiri’? (1 Petero 2:21) Wa kina ko, ani nyakasi tirani nyanyakii kuti sunge tungusapa Kindo na pa sa aboro ni abawiriki na ki du ngangaraa zanga gunde rogo pe fugo Mbori fu aboro. (Matayo 24:14; 28:19, 20; Amokedi 4:29-31; AFiripoio 1:14) Ka bangirani ya gonga ti ino wari du ani ni vuru regbo wa si andu ya, watadu ka kpa ti fõngbadu akuarani yo sa nyemuse na sa wene asunge ya. (Marako 13:28-33; AEbere 10:24, 25) Ani mbunga gaani gene mangaapai dunduko tie kina gupai Yekova Mbori akpinyemuhe nirugungaha na ino gupai nga ani naraka rogo ‘digido regbo.’—Daniere 12:4.

Waigu Ka Oni Karagapai?

• Ino Yesu gupai nga kpioko nambeda aduna gini sangbanaha kurii gako sunge tungusapai yekaru yo Yerusarema yo?

• Gine nayugo gupai nga Yesu ‘akpinyemu gako aboro dati yangara regbo’?

• Gine gu mangaapai du rogo ga Yesu yangara asaa nga ga gako raka ayugoho tipa ko?

• Waigu rengbe ani ka wirika Kristo Yesu rogo gaani sunge tungusapai?

[Gu kpiahe du ti kpewaraga 15]

Yesu ‘nakpinyemu gako aboro dati yangara regbo’