Asanahe be Agedihe

Kuti ga Baibiri arugute tipa ruru mangasunge na kure, waigu aDezire Yekova abi gu sunge amonganga nga ga mangasunge na kina ga boro kure?

Kuba gupai nga aKristano nibasasa diberã nabaha tipa kina gupai ngbaa tiyo watadu mbiko kina gupai amonganga aya i mangihe, i nibasasa du wa ka i makia gupai nyanyakii Baibiri agumbaha. Si ni gupai du dagba ni na Yekova.

Yekova, nga gu Boro ani araka mbiko ko, arũ ndika ya ka boro ringa kure ya. (Bambata Pai 9:3, 4) Rogo gu Ndika i afuhe fu agu aYisaraere nadu mbata, Mbori azahe ti mangasunge na kure ki idipaha tipa kina kura apai mbiko si narukuba unga. Ko arũ ndika ki ya: “Unga ahe du rogo kure he yo; mi fu he fu roni oni nifu he ri bamotumo ka manga pa dada ingapai [nani] tipa mbisimoroni.” Ginipai ka mangi ka boro imi nyaa tipa ka ri ru? Mbori aya: “[“Ho si ka aniduni wo,” NW ] ni aniuka kurera ku sande ki kpisidi he ni nvutu.”a (Pa Amotumo 17:11, 13) Wo Yekova anafugö gi rugute re berewe na berewe. (Pa Fu Rugute ni Ue he 12:16, 24; 15:23) Gu ga aYuda kekeapai nga Soncino Chumash nayaa: “Si aidanga i igi kure te, ono i bihe ni guhe arẽnga tipa i mangisunge nani ya ni uka yo ho ku sande.” Boro Yisaraere ho si aru funi ni kpara kure tipa kurapai, ka igoho, na ka mangasunge na kure kura kusikusihe, nga gu du gaha unga ni ga Mbori te.

Gu dingisoro nangia ga irisa gu Ndika nga ga Mose adigi ho Masiya akpi ni. Si ki vura du wo, ga Mbori bipai tipa du kure ni ziazia he anye kindi kina kubaha. Ga Mbori ziazia toro asa amokedi i rugu aKristano ya i ‘ne kure.’ Si aidanga i bi gu ndika re na paha taata te. Paha anyaki wa kina pa ne wasiwasi kodaba watadu ne iriso kpiahe. (Amokedi 15:28, 29; 21:25) Ho gama kure fu aboro na dia kure kutii kpotoseyo arengbe ni na arago dunduko rogo gu 20 kama agarã, aDezire Yekova agirogoyo tigayo ya gi mangapai re natagbaga tihe na Fugo Mbori.b

Ti kura aregbo, monganga rengbe ka ngarasa borokaza ni fu kureni i igihe mbu bete aposo kumbatayo kindi fu gu regbo i ka gba gani kaza tipa kangia zingo aduho tipa kure, ko kini fu kina ga borokaza kure kutii kpotoniyo. Ono tie, ngbatunga gu dia kure re, kini igihe, na kini fuhe kutii kpoto boro yo natagbagatihe nibasa na gupai gumba yo ho rogo Pa Amotumo na Pa Fu Rugute ni Ue he. Si aidanga i igi kure te; si tipa i ukaha ku sande—ka karagaha fu Mbori, ka gumbapai ngba kura gene. Rengo ngaha, ga Mose Ndika amanganga sunge awere te. Si ki vura du wo, aDezire Yekova nairisa gu ndika mangapai Mbori akodihe kurogo, sidu i ima diaberã ka ‘ne kure.’ Sidu, ani agamanga kure fu kura aboro, watadu ka igo kurerani tipa i fuhe berewe kutii kpotoraniyo te, nga gu kure ka i ni ‘ukaha kusayo.’ Gu mangapai re nasovura na ga Mbori ndika.

Gu kura mangaapai na kure watadu wisigo ga boro kure gu duho adunga na tagbagapai dagbaha ziazia na gu ga Mbori ndika gumba yo paha re ya. Ni kpiapai, dungu aKristano naidi i kusi bete kureyo tipa ka wisigoho watadu ka wetekaha, fuo gure i ki ba gu kure re kusayo. Monganga rengbe arengba a ka ida gupai nga i mangi kpakarakpakara sunge na kure boro.

Ni kpiapai, ti regbo kura sunge gbakaza, i rengbe ka mangasunge na agu aũsunge nasa kure si du nzaranzara. I nakusa kure kusayo ti kpoto boro ki moihe kurogo gu makana nasaha si naake kirikiri. Gu kure nye kindi rogo borokaza i nangba ime ziga kurogoho tipa si du nzaranzara. Kusa, i kini zaki gene fu kureni si karagatihe kutii kpotoniyo, rogo gi gene re bakio kureni kini karagatihe mbembedii kubaha. Teketeke a, i rengbe ka dia gu kure nakura bangiri oro ki wiraha tipa ka karaga zamba kure fu borokaza; i nayamba gi mangapai re nga cell salvage. Rogo gu kura mangapai du kia, i rengbe ka sa kure boro si oro kurogo makana tipa regbo ngbutuko nga gu makana namanga gu sunge abarapa boro naamangaha (ni kpiapai, wa gu bagunda, pusa, watadu awiri mbia naamangaha). Fuo gure, i kini mo ka karaga gu kure du rogo gu makana re kutii kpoto borokaza yo. Rogo gu kura mangaapai, i narimiso kure kurogo kangira (gu makana nakangira ahe) tipa ka kusa gu kure kusayo gbere. Watadu gupai i aida ka da tini rengbe ka du nga ka kpara bete papara kure kusayo tipa ka mangasunge nani rogo kura papara kpoto boro. Gu kura wisigoapai kinaho a nga gu i adia bete ga boro kure rogo tipa ka fu rimo fuhe watadu ka kodaha na ziga, kini ruho ka karagaha berewe kutii kpoto borokaza yo.

Gu futufutuapai du tipaha rengbe ka du nibakiakia, na nirengo, i rengbe arengba ka kusa kura vovo mangaapai, vovo sunge husa kaza, na vovo wisigoapai. Anga gaani sunge ngaha ka wisigoho nibasasa wa duhe nibakiakia kini ru ka diaberã tipaha te. Kristano du wa ka ni diberã ni ti ni tipa wai i ka mangasunge na kureni ti regbo sunge gbakaza, ti regbo wisigopa kaza, watadu vuru gu regbo husa gani kaza du ni kungbaha awere re. Mbata fu regbo, si naida ni gbia atingidapai be monganga watadu bafungua tipa gupai i ka mangaha na kureni ti regbo gba gani kaza. Fuo gure, ni du wa ka ni diberã ringbisihe kuti gupai sangbakpotoni ambu ni ni mangihe. (Oni bi sanduki.)

Si naida aKristano moi pa gayo kparatise fu Mbori berãyo yo na gayo dingisoro ‘ka kpinyemu ko na kpotoyo yo dunduko, na mbisimoyo dunduko, na omeyo dunduko, na gayo bẽra dunduko.’ (Ruka 10:27) Zanga du wa gu dungu aboro du rogo zegino, aDezire Yekova nabanda gayo pagume wenengai na Mbori. Bafu-Unga nangarasa aboro dunduko i duna kido kuti gu kure Yesu nauka. Ani nageda gupai nga: “Bambiko tumori du fu rani rogo [Yesu] Kristo yo mbiko kureko vu rani ti tiandika, ku sangba gu ũkumuko yo nga ga Mbori undahe.”—AEfeso 1:7.

[Gu rukutu kekeapai du bandu kpewaraga yo]

[Sanduki/kpiahe ti kpewaraga 31]

ASANAHE TIPA ONI SANA TIRONI NANI

Kangia i amaa bete kurere kurogo makana kini ka karagaha kutii kpotoreyo watadu i ki rengbe a ka rugusa gu kure re gene tipa bete regbo wa si afu, ya mo sangbakpotoreyo ambu re mi bi gu kure re ni papara re kindi, sidu ka si aidanga gupai nga i ‘ukaha ku sande ya’?

Gu gimi sangbakpotoyo mi arabaha kuti Baibiri aduni fudifudihe ka gupai mangi nga ti regbo wisigo gimi kaza watadu ti regbo husa gimi kaza i adia bete kurere kusayo, ki aria bete apai ti ni, na ki karagaha kutii kpotoreyo berewe?