Ababiapai na Amoyambu undo I Nasia Yo Rogo Gu Gene Nga Ga Siokrasia
“Oni bánda tironi na agu [avusende], Ziazia Toro asa roni ni ababandara [“ni ababiapai kurira,” NW ].”—AMOKEDI 20:28.
1, 2. Waigu Yesaya 60:22 adigo areme?
YEKOVA aima gumba gupai bakuru kusayo nga baiiriwopai amanga ti digido rago. Rogo gu nebi nangia Yesaya, ko agumba gupai nga: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.”—Yesaya 60:22.
2 Ya mo gopai ho nayugo gupai nga gi sangbanebi re nadigo areme? Nirengo, si kinaho! Rogo agu agarã nangia ga 1870, i asigira dungurati sa nga ga ga Yekova aboro Allegheny, Pennsylvania yo, du Amerika yo. Tona ti gu wiri umba mburupai re, dungu abawe akutu nga ga adungurati ima kura na kini moipai rogo zegino dunduko. Dungu amirioni abatakipande Kindo—nga nyanyaki rikaaboro—nakoda tiyo awere na adungurati susi 91,000 rogo aringara 235 auru kpotosende kirikiri. Zanga kapa, gere nayugo gupai nirengo nga Yekova naipisa dungura ndikidi airisiko mbata fu rikito “bakere gberãngbi,” nga gu naima mbeda awere gbe.—Matayo 24:21; Yugoti 7:9-14.
3. Rogo gupai yo nga ka zio bapatiza ‘ti rimo Ba, na Wiri, na ziazia toro’ nga gine?
3 Fuo kpara yo tiyo nisayo fu Yekova, na ni manga yo pai ringbisihe kuti ga Yesu arugute, i afu bapatiza fu gi dungu amirioni aboro re ti “rimo Mbori nga Ba na [ti rimo] Wiri na [ti rimo] Ziazia Toro.” (Matayo 28:19) Zio bapatiza ‘ti rimo Ba’ nayugo gupai nga agi aboro kpara tiyo re, i ini Yekova ni gu Bayo nga ga ngbangbaturũ ko na ni gayo Bafu-Unga na ki rafu gako bakere pagbia. Bapatiza ‘ti rimo Wiri’ nayugo gupai nga i nakusapa Yesu Kristo ni Batumoriyo, ni gayo Barumbatayo, na ni gayo Bakindo. I inipa gu sunge a ga Mbori ziazia toro, watadu zaaza ome amangaha, rogo ruga gayo raka. Gere nayugo gupai nga i aima zio bapatiza ‘ti rimo ziazia toro.’
4. Waigu i asa aKristano ni abamangisunge?
4 Ti regbo gayo bapatiza, i nasa yo ni vovo abawiriki ni ga Yekova Mbori abamangisunge. Da nasa abamangisunge? Gbe, agu afugo du rogo 2 AKorindo 3:5 gudu tipa yo: “Gaani rengba na pai [ni abamangisunge gu]du be Mbori.” Kura bakere irisa ho i aidaha susi gu nga kina boro Yekova Mbori nitiko sa yo ni abamangisunge te! Fuo gayo bapatiza, i nikaa sona kindi kumbatayo rogo toroyo ni abamangisunge nga ga “wene pangbanga” wa i kaa dia agu arugapai kugume nga ga ga Mbori ziazia toro na kini mangi agu apai du rogo Fugo ko yo.—Matayo 24:14; Amokedi 9:31.
I Nasia Yo Rogo gu Gene nga ga Siokrasia — Aboro Natumba Beyo ka Sia Yo Te
5. Ya mo aboro natumba beyo ka sia agu ababiapai na amoyambu undo nga aKristano? Oni sakinga rogoyo.
5 Si naida gu ngerakurii apai nga ga nyanyaki ababiapai na gu wene undo nga ga amoyambu undo tipa kaa ngerafuo agu azingo rogo toroyo nga ga gu zaaza abamangisunge bangeyo asona kina kumbatayo. (AFiripoio 1:1) Waigu i asia ngbatunga agu akumba nga ga toro yo re? I asianga yo rogo agu agene i naasia aboro rogo rogo agu akanisa nga ga Ngbiiakristano te. Ni kpiapai, anga aboro nasia agu ababiapai nga aKristano te, naida ka ya, ni tumba dungu aboro beyo rogo dungurati tipa gu boro i aida ni te. Kuba gure, i nasia agi awirina re rogo gu gene nga ga siokrasia. Gure nayugo ginipai?
6. (a) Ndikidi siokrasia nga gine? (b) Tipagine du pa sia ababiapai na amoyambu undo tini ni gupai du kuti siokrasia?
6 Ka pepai taata, ndikidi siokrasia nga zogarago be Mbori. Ga Yekova aDezire nara na nyemuhe fu gako zogarago na kini kodi beyo wa sa kaa manga gupai ko akpinyemuhe. (Atambuahe 143:10; Matayo 6:9, 10) Pa sia yo agu ababiapai nga aKristano, watadu abaakumba, gbiati amoyambu undo ni gupai namanga rogo gu gene nga ga siokrasia mbiko pa fu rimoyo na pa sia ngbatunga agu abangerekurii apai re namanga ringbisihe kuti ga Mbori mbakadaapai a wa yugu yo ho rogo Ziazia Kekeapai. Na ni gu Boro du “ku ri ahe dũ,” kina Yekova sa duna rengo beko ka inopa wai gu gako riigbu i abihe abi amangasunge.—1 Pekapai 29:11; Atambuahe 97:9.
7. Waigu i arugapa ga aDezire Yekova sunge?
7 Na kparapai ti gu dungu apambori du rogo Ngbiiakristano, aDezire Yekova adianga berã nitiyo tipa gu ngbatunga mbakadapai nga ga pambori nga gu i aida kaa mangasunge tii gaha rugapai te. Agi aKristano nga akpinyemu rengo re na’asada tiyo nyanyakii ka kakuti ga Yekova andika. Anga abarũndika, na abazogo kanisa, watadu atakpoto du rogo ngbatunga gu zogarago nga ga kanisa namaa agu ababiapai du dagbayo te. Kangia agu aboro du rogo zegino nagbata gene ka rimiso tiyo kurogo pa sia agi ababiapai re, ga Yekova aboro naka gupai re. I nakakuti gupai nyanyakii agu amokedi nadu rogo bambata kama agarã ayuguhe ziazia ho i agumba gupai ni nga: “Ani du wa ka ni gi sangba Mbori ni bazogo kuba giasangba aboro.” (Amokedi 5:29) Sidu, aDezire narafu Mbori rogo apai yo dunduko. (AEbere 12:9; Yakoba 4:7) Mangapai ringbisihe kuti gu gene nga ga siokrasia nasa gupai nga Mbori idi na gupai re.
8. Gini kparakparapai duho dagba ga aboro sia aboro na gu mangapai nga ga siokrasia?
8 Ni agu amoyambu nga ga Yekova yo, nga Bakere Baira Siokrasia, si ni wenepai fu rani ani ini gu kparakparaapai du dagba gu gene sia aboro nga ga aboro na gu nga ga siokrasia. Ga aboro agene sia barumbatayo naida i mangihe ringbisihe kuti bange agu aboro nasongoda ni, na dedede i namanga tua bawaraga na kini mo ka sia gu boro dungu aboro nabawaraga fu ni. I arimisonga ngbatunga agu apai re kurogo gu sia aboro nga ga siokrasia te. Gere ayenga be aboro te; si ayenga a be kura riigbu nga gu ke yo paha kuti ndika te. Si nawiraha nga, ho ko afura ni tipa pa sia Yesu na Yekova ko ni “ga aGendiria mokedi,” Pauro ayaa fu aGaratio wee “boro aasia nga paha fere te kina Yesu Kristo, na Mbori nga Ba, gu ko nazingisi ko dagba akangba.”—ARomo 11:13; AGaratio 1:1.
Ziazia Toro Nasia Yo
9. Ginipai Amokedi 20:28 agumbaha tipa pa sia agu ababiapai nga aKristano?
9 Pauro atingidi agu ababiapai naaraka Efesa yo na gupai nga ga Mbori ziazia toro nasiayo. Ko ayaa: “Oni bánda tironi na agu [avusende], Ziazia Toro asa roni ni ababandara [“ni ababiapai kurira,” NW ], oni rígi ga Mbori kanisa nga gu ko angbe ni kureko.” (Amokedi 20:28, pigipigi kekeapai nga gaani.) Agu ababiapai nangia aKristano re, si aidi gupai nga i niidihe kindi fu ziazia toro si niruguyo wa i aamanga gayo asunge ni ababanda ga Mbori rimbasa avusende. Si adu nga ka boro duho rogo gu ba i asia ni kurogo ono nga guni naamanganga pai berewe ringbisihe kuti ga Mbori ndika ya, ziazia toro amangasunge amanga ti wene regbo tipa ka dia ni kusayo rogo gu ba re.
10. Waigu duhe nga ziazia toro namanga nyanyakipa sunge rogo pa sia awirina rogo gu gene nga ga siokrasia?
10 Waigu duhe nga ziazia toro namanga bangua sunge rogo pa sia aboro? Ni bambatapai, gu kekepai duna agu apai rogo si aidaha tipa boro ningere kurii apai rogo toroyo, ziazia toro nadu kugiipa kehe. Rogo gako awaraga fu Timoteo na Tito, Pauro ayugu agu andika si aida ababiapai na amoyambu undo nimangihe. Wa duhe nabaha dunduko, apai 16 nibakiakia si aidaha beyo. Ni kpiapai, si adu nga ababiapai du zanga pai ti rimoyo, ki duni bayee aboro rogo gayo mangaapai, na wene berã, zanga ruguzuruguzu, kini di aboro kugume, ki rengbe ka yugopai, na ni agu abairakporo du gayo kpiapai ni wenehe. Si aidi i nimbiri eerẽ buda rengbe arengba, zanga duni abakpinyemu marã, na ki duni agu aboro duna rugatise. Kina wo a, i amoi tumbatumba andika fu agu akumba na’asada ka rẽ i sia yo ni amoyambu undo.—1 Timoteo 3:1-10, 12, 13; Tito 1:5-9.
11. Gini bete apai du agu akumba wa ka i mangihe na’asada tiyo ka rẽ tipa agu asunge nga ga dungurati?
11 Ngera berewe rii agi apai re nayugo gupai nga agu aboro nangbe kumbatayo rogo iriso Yekova du wa ka i duni wene kpiapai rogo gu mangapai nga ga aKristano. Agu akumba na’asada ka rẽ tipa agu asunge nga ga dungurati du wa ka i fu gopai nga ziazia toro namangasunge rogoyo yo. (2 Timoteo 1:14) Gopai du wa ka si duho nga ga Mbori toro nakusa ngbatunga asino rogoyo yo wa gu nga ‘nyemuse, na ngbarago, na zereda, na gbanga hipai, na weneringise, wene sino, idapase, na zera, na rugatise.’ (AGaratio 5:22, 23) Si naida i yugu ngbatunga gu zuzu toro re rogo gayo mangapai na akurayo aidipase. Rengo ngaha, beteyo rengbe ka susa rogo manga kura zuzu toro, baraho agu akurayo aringbisa gu kura apai ni nasa ababiapai i rẽ wenengai gbe. Ono tie, rogo gayo gene raka nabaha, agu aboro dunduko namaabangiriyo tipa sia yo ni ababiapai watadu ni amoyambu undo, si naida i yugu gupai nga i nga ga toro akumba, nga aguyo namangapai ringbisihe kuti agu apai du rogo Fugo Mbori yo.
12. Da rengbe yo ka yaa ziazia toro naasia ni?
12 Ho Pauro angarasi akurako ni i duni awiriki ko, ko arengbe ka gumbaha wo na ranirii mbiko ko nitiko aawirika Yesu Kristo, nga guko ‘nahe kpiapai fu rani, ani nipeke fuo ko sirisiri.’ (1 Petero 2:21; 1 AKorindo 11:1) Sidu tie, agu awirina namangapai ti gu regbo i asia yo ni ababiapai watadu ni amoyambu undo ringbisi kuti agu apai si aidaha beyo rogo Kekeapai, ani rengbe ka yaa ziazia toro naasia yo.
13. Waigu ziazia toro aundo agu awirina nafu rimo akumba tipa sia yo i nandusunge rogo dungurati?
13 Gu kurapai kinaho nayugopa wai ziazia toro amangasunge ho i afu rimo aboro ni i siayo ni ababiapai na ho i asiayo ni. Yesu ayaa, ‘Buba du ngbangbaturũ yo nafu ziazia toro fu aguyo nasana ko.’ (Ruka 11:13) Sidu ho agu abaakumba du rogo gu dungurati nga ga dagbarago agbiatiyo ni ka fu rimo akumba tipa agu asunge nga ga dungurati, i nakparakpee tipa ga Mbori toro ruguyo. I namaamburu pa fu rimo aboro rii agu apai gumba yo ho rogo Fugo Mbori, na ziazia toro kini undo yo i ini singia gu boro i aberãpa sia ni re namanga agu apai si aidaha be ababiapai watadu amoyambu undo rogo Kekeapai. Si aidanga pa du boro ti kpoto ni, pa agu apai ni amangaha mbiko gani wirikapai, watadu pa gani asino tatamana duni gupai i amaamburu pa fu rimo ni riihe te. Gu bambatapai si aida i moiberãyo fuoho nga ka ino singia gu boro re nga ga toro boro, nga gu boro agu aboro du rogo dungurati arengbanga ka tikö ka ndu fuo ni tipa gu rugute nga ga toro ya.
14. Ginipai ani awirikaha rogo Amokedi 6:1-3?
14 Wa vura duhe nga gu rondo nga ga abaakumba na agu ababiapai ninaata ata ninaafu rimo awirina i sia yo tipa mangasunge ni abaakumba watadu amoyambu undo, i namanga ndikidi sia yo kuti gu gene nadu rogo bambata kama agarã. Ti kura regbo sa, zingo aduho tipa agu akumba narẽ arẽ nga ga toroyo tipa i ngerefuo kura nyanyakipa sunge. Si ki ta du were, riigbu bipasunge kini mo ka fu gi rugute re: “Oni sía akumba saba dagba roni, agu yo ngba ringiyo angba, hiki be Toro na tatamana, ani asia pa gi pai re fu yo.” (Amokedi 6:1-3) Wa si avura du nga agu aboro nadu nibasa rogo gipai re nafu rimo aguyo si aidi i sia yo, kina agu awirina nadu Yerusarema yo nga aguyo nadu na asiahe beyo tipa sia aboro nasia aguyo i afu rimoyo re. Kina ngbatunga gu kpiapai re i apefuoho areme.
15. Waigu du Riigbu Bipasunge nirimisirimisihe kurogo pa sia akumba?
15 Kina gu Riigbu Bipasunge nga ga aDezire Yekova nasia agu awirina du rogo agu Arondo nga ga Abe-basunge. Baraho i adiaberã ni tipa agu aboro rẽ na ngbatunga gu roroi tindiro re, aboro Riigbu Bipasunge na gupai berãyo yo Yesu agumbaha, nayaa: “Gu ni i ka fu dungu he fu ni, i asána ni ti ni gbe; gu ni i ka asia pa dungu ahe fu ni, i ki kpi nyemu he be ni bakere a.” (Ruka 12:48) Kurii gu sunge nga ga sia agu awirina du rogo Rondo nga ga Be-basunge, Riigbu Bipasunge nasia agu abaakumba nga ga Beteere yo na agu ababiapai naata ata. Ono tie, i nafu sunge fu agu awirina rengbe yo ka kido kutiyo tipa i nimangisunge kubayo rogo kura sia awirina. Kpiapai kinaho a rogo Ziazia Kekeapai tipa gere.
‘Mo Moi Abaakumba a wa Mi A’asiapaha Foro’
16. Tipagine Pauro ambu Tito tini Kurete yo, na gere nayugo ginipai tipa sia awirina areme rogo gu gene nga ga siokrasia?
16 Pauro ayaa fu gako badiasunge nga Tito wee: “Mbiko gi pai re mi ahe ro Kurete yo [tini], ya mo mbákadi agu apai nakpa, ki moi abaakumba rogo akanisa rogo abaakporo yo dũ, a wa mi aasia pa ha foro.” (Tito 1:5) Fuo gure, Pauro kini mo ka yugo agu apai si aida Tito ningere tipaha ti ngbatunga agu akumba ka rẽ tipa ko sia yo. Sidu areme a, Riigbu Bipasunge nasia agu awirina rẽ arẽ rogo abe-basunge tipa i nimangisunge kubayo rogo sia abaakumba na amoyambu undo. Rubangirise gu duho tipa gupai nga aguyo namangasunge kuba Riigbu Bipasunge, i rugutiyo wenengai na kini pefuo agu arugute nga ga Kekeapai nga gu du tipa ngbatunga gu sia aboro re. Were, pa sia agu akumba rẽ arẽ tipa i nindusunge rogo agu adungurati nga ga aDezire Yekova rogo zegino dunduko namanga tii gu rugapai nga ga Riigbu Bipasunge.
17. Ho i afu rimo awirina ni tipa i sia yo ni ababiapai na ni amoyambu undo, waigu be-basunge amangasunge nani?
17 Ho i afu rimo awirina ni kurogo gu be-basunge nga ga Watch Tower Society tipa i sia yo ni ababiapai na ni amoyambu undo, agu akumba duna inohe nakido kuti ga Mbori toro si niruguyo ho i asia awirina ni. Agi akumba re ima ino gupai nga i akaragapai akaraga fu Mbori, kini ini gupai nga si aidanga i moibeyo niipo rii boro te, i ka du na ni ti gani ingapai.—1 Timoteo 5:22.
18, 19. (a) Waigu i akedapa sia kura awirina? (b) Waigu i amanga agu apai dunduko du tipa fu rimo awirina na pa siayo?
18 Gu kura sia awirina gu duho i narengbe ka keda paha na gu waraga duna gu sitembu tini naye be gu basunge ke yo paha kuti ndika. I rengbe ka mangasunge na ngbatunga gu waraga re ka sia dungu awirina rogo dungurati.
19 Pa sia aboro rogo gu gene nga ga siokrasia naye be Yekova rogo Wiriko yo na rogo gu Gako gene ko amangasunge nani auru kpotosende, nga ‘ruru kangara moyambu’ na gaha Riigbu Bipasunge. (Matayo 24:45-47) Ziazia toro du kugii agu apai dunduko du tipa pa fu rimo awirina i siayo na pa siayo. Gere wo mbiko agu apai si aidaha be agu aboro rẽ i siayo, si gudu rogo Fugo Mbori yo nga gu naye be ziazia toro, na gu boro i asia ni re nafu gopai nga ni naamanga zuzu toro amanga. Sidu tie, si naida ani nibipa sia abaakumba na amoyambu undo ni gupai naye be ziazia toro. A wa kina gu i anasia ababiapai na amoyambu undo rogo gu gene nga ga siokrasia rogo bambata kama agarã, kina gu bangisapai re du areme.
Ani Na Tambuahe Tipa ga Yekova Rugapai
20. Tipagine du ani tini ti ga Davide berã nga gu duni kekehe rogo Atambuahe 133:1.
20 Rogo gi regbo nga ga zugo rogo toroyo na ga sona agu apai nga ga siokrasia nga gu namanga rogo gu gene nga ga sunge tungusapa Kindo re, ani na tambuahe tipa gupai nga Yekova ni bambatapai nangerakuriipa sia ababiapai na amoyambu undo. Gi mbakadapai nga ga Kekeapai re nasa gupai nga ani kakuti gu tumbatumba andika nga ga Mbori nga gu du tipa rurupai dagba rani nga aDezire Yekova. Kurii gure, gu toro nga ga aKristano gbiati gu nyanyaki asadatise nga ga agi akumba re nafubee bakere gbe sa gaani zereda na kpamiatise wa du ani ni ga Yekova amoyambu. Wa kina gu bake Atambuahe nangia Davide, pai nafõngbaduraniyo tie ani ngbiko na fugo niyaa: “Oni ngére, nga gu wenepai na wenerago a ka awirina sungu sa na berã sa!”—Atambuahe 133:1.
21. Waigu Yesaya 60:17 adigo areme?
21 Nga gu tambuahe du ani nani fu Yekova tipa gako rugapai rogo Fugo ko na rogo gako ziazia toro! Na nirengo, agi afugo duni kekehe rogo Yesaya 60:17 na rogoyo tini: ‘Mi ayé na dahabu ku ba sirigi, mi ki ye na feda ku ba marã; na ku ba ngua, mi ki ye na sirigi, ku ba ambia mi ki ye na marã. Mi afú zereda ni gaoni abarukuriapai a, na rurupai ni gaoni abarugupasunge.’ Wa i naamanga agu apai nga ga siokrasia ti mburu kuraha dagba aDezire Yekova, ani aima bi agi apai nga ga maku nga gu gumba yo paha re rogo ga Mbori riigbu nga ga kpotosende.
22. Ginipai ruhe aru ani duna tambuahe tipaha, na ginipai si aida ani diberã kaa mangaha?
22 Ani na bakere tambuahe tipa gu mbakadaapai nga ga siokrasia nga gu du dagba rani. Na ani tambuahe bakere tipa gu nyanyaki sunge, ono nafu ngbarago nga gu agu ababiapai na amoyambu undo amangaha nga aguyo i asiayo rogo gu gene nga ga siokrasia. Na ngbaduraniyo dunduko, ani nataasarimo Barani nga ga ngbangbaturũ ko, nga guko nafu gu kumuko fu rani nga ga toro na ki nifu maku fu rani kpaima. (Asanza 10:22) Sidu tie, ani diberã kaa ndu sa na ga Yekova riigbu. Kurii apai dunduko, ani nindusunge kindi ni kpamiakpamia rani, tipa gu irisa, na sambuahe, na taarimo nga ga bakere ziazia rimo Yekova.
Waigu Rengbe Oni Ka Karagapai?
• Tipagine rengbe ani tini ka gumba gupai nga pa sia ababiapai na amoyambu undo namanga rogo gu gene nga ga siokrasia, anginga aboro nasiayo ya?
• Waigu ziazia toro asia agu akumba nga aKristano nga aguyo nangerakurii apai?
• Waigu du Riigbu Bipasunge nirimisirimisihe kurogo pa sia ababiapai na amoyambu undo?
• Tipa gu sia awirina nga gu namanga rogo gu gene nga ga siokrasia, tipagine si aida tini ani duna tambuahe fu Yekova?
[Gu kpiahe du ti kpewaraga 9]
Abaakumba na amoyambu undo na mamu beyo ka mangasunge mbiko i asiayo rogo gu gene nga ga siokrasia