Oni Nindu Sa Na Ga Yekova Riigbu
‘Mbori zereda sa roni ziazia tipa manga gupai ko akpinyemuhe rogo wene apai yo dunduko.’—AEBERE 13:20, 21.
1. Bange aboro wai rogo zegino dunduko, na bange aboro wai i ageda yo ya i rogo kura apambori?
ROGO gu garã nangia 1999, bange aboro ada auru kpotosende nga 6,000,000,000! Gu buku nga The World Almanac nayugo gupai nga rogo gi bange aboro re, aboro wa 1,165,000,000 nga aMasarami; aguyo 1,030,000,000 nga aKatoriko; aguyo 762,000,000 nga aHindu; aguyo 354,000,000 nga aboro Buddhisme; aguyo 316,000,000 nga aPurusitanti; na aguyo 214,000,000 nga aboro Orthodox.
2. Ginipai rengbe ani ka gumbaha tipa gupai du areme tipa apambori?
2 Nibi gu kparakaro nga ga apambori na gu vunduvunduapai du areme, ya mo gi badungu amirioni aboro re namangapai ringbisihe kuti gupai Mbori akpinyemuhe? Oó, “bambiko a nga Mbori ni Mbori ruguzuruguzu pai te ono zereda.” (1 AKorindo 14:33) Ngba kura gene, ginipai du tipa agu awirinarani du rogo dungu aringara nga ga Yekova amoyambu? (1 Petero 2:17) Wisigopai na rubangirise nayugo gupai nga ‘Mbori zereda nasa yo i rẽ tipa manga sangbako rogo wene apai yo dunduko.’—AEbere 13:20, 21.
3. Ginipai namangi Yerusarema yo rago Pendekote rogo 33 ti Gaani Regbo, na tipagine?
3 Na wai tie, anga bange agu aboro nakoda tiyo na aDezire Yekova nga gupai rengbe yo ka ino tini nga Mbori idi na gayo pai te; na anga bange aboro a nasa Mbori ko duna bakere ngbarago te. Ko a’asianga aYisaraere mbiko i “nange ki susi gu rikaaboro a te.” Nirengo, i angia “umba rikaaboro.” (Pa Fu Rugute ni Ue he 7:7) Ono mbiko gupai nga aYisaraere adunga niruruyo te, Yekova adi gako weneringise kusayo riyo ki moihe kurii gu vovo dungurati apefuo Yesu Kristo adu rogo rago Pendekote rogo 33 ti Gaani Regbo. Yekova ambedi yo na gako ziazia toro na i ki tona kaa ndu kumbatayo zaaza nagumba rengo tipa Mbori na tipa Kristo.—Amokedi 2:41, 42.
Nduge Kumbatayo Zanga Piriga
4. Tipagine rengbe oni tini ka yaa gu bambata dungurati nangia ga aKristano aandu kumbatayo zanga piriga?
4 Rogo bambata kama agarã, gu dungurati nangia ga aKristano aandu kumbatayo zanga piriga, kini zaki vovo arago, kini sa aboro ni abawiriki, na kini duna bakere giarogopaiyo tipa ga Mbori ringbisaapai. Gu bambata aKristano re anandu sa na gu giarogopaiyo nga ga toro nga gu nanaaye rogo agu awaraga ga Mbori toro adu kugii pa kehe. Ho amokedi watadu gu kura awirina aniye ni ka bi yo, si anifõngbaduyo yo tipa i nyasi manga gayo sunge. Gipai re ni wene kekehe rogo ga aKristano Kekeapai rogo pa-Giriki.—Amokedi 10:21, 22; 13:46, 47; 2 Timoteo 1:13; 4:5; AEbere 6:1-3; 2 Petero 3:17, 18.
5. Tipagine ga Mbori riigbu asona tini areme, na tipagine si aida tini ani nindu sa nani?
5 Wa kina agu aKristano nadu mbata, gu ga Yekova aDezire du areme aduni beteyo ti tonatonaha. (Zakaraya 4:8-10) Na tona ti digido 19 kama agarã, gopai niduho ziazia nayugo gupai nga ga Mbori toro gudu kurii gako riigbu. Mbiko ani nidu na kido kuti gu rugapai nga ga ga Mbori ziazia toro, angianga kuti ga aboro ome ya, ani naasona kindi rogo gaani giarogo Kekeapai yo na rogo manga gupai Mbori akpinyemuhe. (Zakaraya 4:6) Wa duhe awere nga ani rogo ‘yangara arame,’ si na nyanyakipaha nga ani nindu sa na gu ga Yekova riigbu nasona kina kumbatayo. (2 Timoteo 3:1-5) Mangaha wo nasa rani ani banda gaani maabangirise ni ungaha na ani ki du ti manga dezirepai tipa gu ga Mbori Kindo i naima sigiraha, mbata digido apai nika ye ka dia gi sinoraka re kusayo.—Matayo 24:3-14.
6, 7. Gini apai biata ani ka wisigoho nga gu ga Yekova riigbu nasono rogo kumbatayo?
6 Awirina gu duho dagba rani nga aguyo naima digo nikodi tiyo na ga Yekova riigbu rogo agu agarã nangia ga 1920, ga 1930, na ga 1940. Rogo gu bambata agarã re, da dagba rani narengbe ka berãpa gu iiriwo zugo na sonakumbatayo nga gu mangi rogo riigbu daa ku areme? Oni berẽnga pa gu iiriwoapai namangi rogo gu vovo pangbanga du areme tipa rani! Nirengo, si ni gupai nafu ngbarago ka berãkurii gupai Yekova namangihe rogo gu gene nga ga gako aboro, nga aguyo duni mbakadimbakadiyo rogo gu gene nga ga siokrasia.
7 Ho Davide aabi ga Yekova iiriwo asunge ni, ngbako azere. “Mo angeesi gamo iiriwo mangaapai na gamo aberã du kono du ani ni; i arengba nga na ringbisa ha” te. (Atambuahe 40:5) Ani a kina wo, ani arengbanga rogo gi gaani uru re ka tangara gu dungu kikindigi mangaapai na apai nga ga taarimo nga ga Yekova te. Si ki vura du wo, ani wisiginga apai biata nga gu ga Yekova riigbu asusi rogo kumbatayo: (1) sonakumbatayo tooni tooni rogo rugatise na agu apai nga ga toro, (2) mbakada gu sunge tungusapai ima maapai, na (3) agu a’ariapai naye ti wene regboho rogo agu apai nga ga riigbu.
Ani Na Tambuahe Tipa Duna Rugatinapai Rogo Toroyo
8. Ringbisihe kuti Asanza 4:18, rugatinapai rogo toroyo nasa rani ani kparia ginipai tipa pa Kindo?
8 Asanza 4:18 nidu nirengo tipa gu rugatinapai rogo toroyo ninaamanga tooni tooni. Si nayaa: “Ga ruru aboro gene du wa gu imarago nga ga ngbawiso, naki̇̃ aki̇̃ ki susi ki da ti kina bebere uru.” Nga gu tambuahe du ani nani tipa gu rugatinapai rogo toroyo bi ani he! Pati gu bakere dunguratise nadu Cedar Point, Ohio yo, rogo 1919, i anyakasipa ga Mbori Kindo. Yekova namangasunge na gako Kindo ka sa rimoko si duni ziaziaha na ka diapai kusayo rii gako bakere pagbia. Nirengo, rugatinapai rogo toroyo asa rani ani kparia gupai nga, tona rogo Bambata Pai ki da ti Yugoti, Baibiri nafura tipa ga Yekova ringbisapai ka sa rimoko si du ziazia rogo gu gene nga ga Kindo, nga gu Wiriko nika zogaha. Gere nga gupai akpinyemu rurupai dunduko amaabangiriyo tipaha.—Matayo 12:18, 21.
9, 10. Rogo agu agarã nangia ga 1920, ginipai i awirikihe tipa Kindo na tipa agu ariigbu ue nasovura dagbaha, na waigu gere naaundo rani?
9 Pati gu bakere dunguratise nadu Cedar Point yo rogo 1922, bangbasia bagumbapai, nangia J. F. Rutherford, angarasi ga Mbori aboro ya i “takipande kindo, i takipande kindo, i takipande kindo na gaha Bakindo.” Rogo gu papara kekepai nangia “Pa Vunga Rikaaboro,” nga gu i akusihe rogo gu kusikusi Ngbaõbambu Sinziri (rogo pa-Ngirisi) nangia ga Marungu ti rameru 1, rogo 1925, i agbeberã aboro kuti gupai nga si naida ani duna dudungurobipai rogo toroyo tipa gu sangbaanebi nga gu naafura kumbatayo tipa pa sigira ga Mbori Kindo rogo 1914. Rogo 1920, i aye ka ino gupai a nga ariigbu ho ue nasovura dagbaha—ga Yekova na ga Satana. Gu vura du dagbaha namanga kindi wa du rago re, ani adu rogo gu paparaha nika duna diabese kinagu sa ka ani aandu sa na ga Yekova riigbu.
10 Waigu ngbatunga gu rugatinapai rogo toroyo re naundo rani? Wa duhe nga ga Mbori Kindo na gaha Bakindo nga Yesu Kristo ni papara zegino te, ani arengbanga a ka duni papara zegino te. Ni kpara ani tirani ti zegino, ani nayugo gupai nga ani kubara rengo yo. (Yoane 17:16; 18:37) Ho ani abi gu kpakarakpakaraapai ni narungosi aboro rogo gi gbegbere sinoraka re, nga gu tambuahe du ani nani tipa zanga duni papara ga Satana riigbu! Na nga gu wenepai mangi Yekova ha fu rani ka mbakada barani rogo toroyo rogo gako riigbu!
11. Gini rimo nga ga Ziazia Kekeapai ga Mbori aboro adihe kuriyo rogo 1931?
11 Pati gu bakere dunguratise nadu Columbus, Ohio yo rogo 1931, i amangisunge wenengai na gupai du rogo Yesaya 43:10-12. Abawisigi Baibiri adi gu kparakpara rimo kuriyo nga aDezire Yekova. Nga gu bakere mamu ngaha kaa yugo rimo Mbori fu kura aboro tipa i rengbe tigayo a kaa yambaha tipa ka gbia bata!—Atambuahe 83:18; ARomo 10:13.
12. Gini rugatinapai rogo toroyo tipa bakere rimbasa aboro i asakirogoyo rogo 1935?
12 Mbata fu agu agarã nangia ga 1930, dungu ga Mbori aboro aainonga pa gayo maabangirise nzunzu tipa gu raka du kumbatayo te. Gu kurayo aduna aberã tipa gu raka nga ga ngbangbaturũ, ono gu yugopai nga ga Baibiri tipa paradiso nga ga kpotosende airiwo tiyo. Pati gu bakere dunguratise nadu Washington, D.C. yo rogo 1935, si aduni bakere ngbarago ka ino gupai nga gu ndurumo aboro, watadu bakere rimbasa aboro du payo rogo Yugoti kapita 7, i nga gu riko duna gu maabangirise nga ga kpotosende. Natona ti gu regbo re, pa dungura bakere rimbasa aboro naandu kumbatayo niipo gbe. Anga ani tie na tambuahe tipa gupai nga pa ino bakere rimbasa aboro ni gasigasipai fu rani te tee? Padu gupai nirengo nga i nadungura aboro ni badunguyo gbe dagba rikaaboro dunduko, na ngbatungayo, na afugoyo nafõngbaduraniyo ani mangisunge nyanyakii wa ani andu sa na ga Yekova riigbu.
13. Gini bakere pai i anyakasipaha pati gu bakere dunguratise nadu St. Louis yo rogo 1914?
13 I anyakasipai tipa gu bangua pai si aida riko aboro dunduko nibakibangiriyo tipaha pati gu bakere dunguratise nadu St. Louis yo, Missouri yo rogo 1941. Si nga gu zogarago nga ga haurago, watadu bakere pagbia nga ga haurago. Gere nga gupai si aida i mangipai tipaha niipo, mbiko gu bakere iiriwo uru i ka manga gupai re rogo nambeda wa pai! I asakipai a rogo 1941 tipa gupai nga ga kakuti ruru mangapai, nga gu mangapai nayugopa da du ani kubara ni yo nibipa ga Mbori bakere pagbia.
14. Pati gu bakere dunguratise nangia ga dungu aringara nga gu nadu rogo 1950, ginipai i awirikihe tipa agu abazogo gumba yo payo rogo Yesaya 32:1, 2?
14 Pati gu bakere dunguratise nadu New York City yo rogo 1950, i ayugupa agu abazogo ziazia du payo rogo Yesaya 32:1, 2. Si aduni nyanyakipa regbo ho gu Wirina nangia Frederick Franz afura ni tipa gi riipai re na ki saki gupai nga agu abazogo nga ga vovo zegino yo kina dagba rani. Pati gu bakere dunguratise re na pati agu akuraha naye fuo gure, dungu atimarago watadu asakarogopaiyo akuru nga ga toro. (Atambuahe 97:11) Nga gu tambuahe du ani nani tipa gupai nga gaani gene “wa [kina] gu imarago nga ga ngbawiso, naki̇̃ aki̇̃ ki susi ki da ti kina bebere uru”!
Sona Kumbatayo Rogo Gaani Sunge
15, 16. (a) Waigu ani asono kumbatayo rogo gaani sunge rogo agu agarã nangia ga 1920 na 1930? (b) Gini abuku ninaanyakasapa gu sunge nga ga aKristano rogo agi aregbo re?
15 Gu ue gene ga Yekova riigbu nasono rogo kumbatayo nga rogo pa manga gaani bangua sunge—nga tungusapa Kindo na sa aboro ni abawiriki. (Matayo 28:19, 20; Marako 13:10) Tipa ka nyasa manga gi sunge re, gaani riigbu naanyakasa gupai fu rani zanga piriga nga si na nyanyakipaha ani kiisi gaani sunge tungusapai. Rogo 1922, i angarasi aKristano dunduko i du ti manga sunge tungusapai. Si adu nga si nabi kina boro nitini ka ni aida timani nihasirago na ni ki du ti sunge manga dezirepai tipa rengo. (Matayo 5:14-16) Rogo 1927, i atona kaa kpara Rago Poso ni uru tungusapai atiyo. Na tona rogo 1940, aboro anirengbe dedede kaa bi aDezire bangiri agene rogo aba bagaahe i nikparaka agu amagazini nga Ngbaõbambu Sinziri na Wasa (du awere nga Oni Zingi Rameyo! ).
16 Rogo gu garã nangia 1937, i akusi gu wiri buku rimoho angia Kpiapai Tipa Wisigopai Na Aboro (rogo pa-Ngirisi), nga gu nanyakasipa karagatise ka biko aboro tipa ka yugo gu rengo fuyo nga ga Baibiri. Rogo agu agarã naye fuo gure, i anyakasipa gu sunge bakere gbe nga ga wisigo Baibiri na aboro. Nyakasapa gi papara sunge re adu gbe ho i akusi gu buku ni nga “Mbori Du Ni Irarengo” rogo 1946, na rogo 1968, i ki kusi gu nga Gu Rengo Nandu sa Nyenye Unga (si dunduko rogo pa-Ngirisi). Wa du rago re, ani namangasunge na gu buku nga Gu Inohe Nandu sa Nyenye Unga. Nyasa wirika ngbatunga gu buku re namaa nyanyaki mburupai nga ga Kekeapai rogo aboro yo tipa sa yo ni abawiriki.
Mbakada gu Gene Mangaapai Du Rogo Riigbu
17. Rogo mangapai ringbisihe kuti Yesaya 60:17; waigu ga Yekova riigbu nasono kumbatayo?
17 Gu biata gene ga Yekova riigbu asono rogo kumbatayo nga rogo mbakada agu apai nga ga riigbu. Kuti Yesaya 60:17, Yekova akidohe ki ya: ‘Mi ayé na dahabu ku ba sirigi, mi ki ye na feda ku ba marã; na ku ba ngua, mi ki ye na sirigi, ku ba ambia mi ki ye ye na marã. Mi afú zereda ni gaoni abarukuriapai a, na rurupai ni gaoni abarugupasunge.’ Ni mangapai ringbisihe kuti gi sangbanebi re, i ima manga apai tipa ka mbakada pa ngerakurii sunge tungusapa Kindo na ngerafuo rimbasa avusende.
18, 19. Gini mbakadaapai rogo riigbu namangi rogo agu agarã susi?
18 Rogo 1919, i asia barugupa sunge tungusapai rogo agu adungurati nibasasa nanasanahe i mbakadihe tipa sunge tungusapai. Gere anyakasipa gaani sunge tungusapai atiyo. Gupai nga ga tumba bee ka sia abaakumba na adiakona adigi rogo 1932, si kini sa gupai nga ani mbu agu agene aboro naasia aboro rogo sa sunge. Gu kura nyanyakipa pai amangi rogo 1938, ti gu regbo gupai atona nga si naida i nisia agu amoyambu dunduko du rogo dungurati ringbisihe kuti gu mbakadaapai tipa sia aboro nga ga siokrasia nga gu nadu rogo gu bambata dungurati nangia ga aKristano. (Amokedi 14:23; 1 Timoteo 4:14) Rogo 1972, i anasia ababiapai na amoyambu undo tipa i nindusunge, a wa ngbatunga agu akumba re anamangaha dagba bambata aKristano. Kuba gupai nga kina bangisa boro nimangisunge rogo dungurati ni babiapai, AFiripoio 1:1 na gu kura averesi nayugo gupai nga agu aboro namanga agu apai Kekeapai aidaha be ababiapai, i rogo gu rondo nga ga abaakumba.—Amokedi 20:28; AEfeso 4:11, 12.
19 Rogo 1975, i atona mbakadapai tipa agu arondo nga ga Riigbu Bipasunge nga ga aDezire Yekova ningere kurii agu asunge du rogo ga Mbori riigbu rogo zegino nabaha. I atona kaa sia aboro kurogo Arondo nga ga Be-basunge tipa i ningerekurii sunge tungusapai rogo agu aringara du yo rogo. Na tona ti gu regbo re, i naamaaberã fuo gupai nga ka sa sunge si du taata rogo gaani riibasunge na rogo agu abe-basunge nga Watch Tower Society tipa ka ‘rugatise na pa agu apai duna nyanyakipaha gbe.’ (AFiripoio 1:9, 10, NW ) Agu atindiro du kurii agu ababanda avusende namangasunge kutiibe Kristo nakoda pa ngbe kumbatayo rogo sunge tungusapai yo, yugopai rogo dungurati, na ngerafuo ga Mbori rimbasa avusende.—1 Timoteo 4:16; AEbere 13:7, 17; 1 Petero 5:2, 3.
Ga Yesu Zaaza Ngbembatayo
20. Ndu sa na ga Yekova riigbu naida gupai berani nga ani ini ginipai tipa ga Yesu ba?
20 Ndu sa na gu ga Yekova riigbu nasona asona naida gupai berani nga ani inipa gu ga Yesu Kristo sunge fu Mbori he fuko, nga ko duni “ri kanisa.” (AEfeso 5:22, 23) Gu nyakipaha a nga gupai du rogo Yesaya 55:4, yo gumba yo gupai ni fu rani nga: “Oni ngére mi [nga Yekova] fu ko ni dezire fu aboro, ni bangbembatayo fu aboro ni gbia a.” Yesu ima ino wai nzunzu ka ngbembatayo fu rani. Ko ima ino gako avusende na gayo mangaapai a. Nirengo, ho ko aawisigo agu adungurati ni saba nadu Asia Minor yo, ko agumba gupai bara bisue nga: “Mi ini ga mangaapai.” (Yugoti 2:2, 19; 3:1, 8, 15) Yesu ima ino gaani azingo a, wa kinagu ini Bako ho, nga Yekova. Mbata fu gumba Kpia Kparakpee, Yesu ayaa: “Baroni ini agu apai zingo ho amanga roni, mbata oni nikasana ko ti ni.”—Matayo 6:8-13.
21. Waigu du ga Yesu pa ngbembatyo niyuguyuguhe rogo gu dungurati nga ga aKristano?
21 Waigu du ga Yesu pa ngbembatayo niyuguyuguhe? Gene sa ko amangaha rogo nga rogo agu ababiapai nga aKristano, nga “agamahe rogo aboro yo.” (AEfeso 4:8) Yugoti 1:16 nayugo agu ababiapai mbedi yo ni toro ya i rogo kumbabe Kristo, tii gako rugapai. Areme, Yesu du narugapa gu mbakadapai du tipa abaakumba, singia ngbatunga agu akumba re na gu maabangirise nga ga ngbangbaturũ watadu ga kpotosende. Wa i aima sakapai tipaha rogo gu papara kekepai susi mbata fu gere, ziazia toro du nasiayo ringbisihe kuti agu apai Kekeapai aidaha. (1 Timoteo 3:1-7; Tito 1:5-9) Rogo bambata kama agarã, umba rimbasa abaakumba adu Yerusarema yo nga aguyo nadu rogo riigbu bipasunge kini ngerekurii adungurati na agu asunge nadu tipa tungusapa Kindo nabaha. Kina ngbatunga gu kpiapai re i apefuoho rogo ga Yekova riigbu areme.
Oni Ndu Sa Na Riigbu!
22. Gini undo Riigbu Bipasunge naafuhe?
22 I fu agu asunge nga ga Kindo auru kpotosende fu “[ruru, NW ] kangara moyambu,” nga gu gu Riigbu Bipasunge nga ga aDezire Yekova arukubaha. (Matayo 24:45-47) Gu bambatapai Riigbu Bipasunge aberã tipaha nga pa fu yugopai nga ga toro na kini mangi rugapai tipa gu dungurati nga ga aKristano. (Amokedi 6:1-6) Ono tie, ho agberango ati ni kurii akurayo airisimbori, agu awirina du rogo Riigbu Bipasunge nasana gu basunge watadu abasunge ke yo paha kuti ndika tipa si fu undo na ki mbakadi agu akporo watadu Abambu Kindo gu gberango re nagbarasihe. Ka aboro amanga kura aKristano gbegbere watadu ka i arungosiyo, i namangapai tipa ka ngarasayo rogo toroyo. Na ti ‘rago fudifudiapai,’ i namanga asadatise dunduko tipa ka mbu sunge tungusapai si naandu kina kumbatayo.—2 Timoteo 4:1, 2.
23, 24. Ka si vurangia kina ginipai naye kurii gako aboro, ginihe Yekova afuhe fuyo zanga piriga, na si naida gaani diaberã du nga gine?
23 Ka si vurangia kina ginipai naye kurii gako aboro, Yekova nafu riahe gbiati rugute nga ga toro fuyo zanga piriga. Mbori nafu rugatinapai na dudungurobipai a fu agu awirina nangerakurii apai tipa i nimbakadi tiyo tipa ka sona berewe kumbatayo na ka mbakada apai rogo gu riigbu nga ga siokrasia. (Pa Fu Rugute ni Ue he 34:9; AEfeso 1:16, 17) Zanga kpa, Yekova nafu agu ahe dunduko fu rani ani aidaha tipa ani nyasi gaani sunge sa aboro ni abawiriki na ani nyasi gaani sunge tungusapai rogo zegino nabaha.—2 Timoteo 4:5.
24 Ani na kido nabaha nga Yekova ambunga gako ruru aboro te; ko abatasa yo abatasa rogo gu “bakere gberangbi” naye re. (Yugoti 7:9-14; Atambuahe 94:14; 2 Petero 2:9) Ani na nduapai berani dunduko ka kakuti gu gaani kido nyanyakii ani adu nani ti tonatonaha da ti digidoho. (AEbere 3:14) Sidu tie, ani dinga berã kaa ndu sa na ga Yekova riigbu.
Waigu Ka Oni Karagapai?
• Tipagine rengbe ani tini ka yaa ga Yekova riigbu nandu kina kumbatayo?
• Gini gopai duho nayugo gupai nga ga Mbori aboro nagbia ngbarago be gu rugatinapai rogo toroyo nga gu namanga tooni tooni?
• Waigu i amangi ambakadapai rogo gaani sunge nga ga aKristano?
• Gini mbakada gu gene mangaapai du rogo riigbu i amangihe ti wene regbo dagba ga Yekova amoyambu?
[Gu kpiaahe du ti kpewaraga 11 na 12]
Wa kina Davide, ani arengbanga ka geda ga Yekova iiriwo asunge dunduko te
Ga Mbori rimbasa avusende agbia undo be gu mbakada apai naye ti wene regbo rogo gako riigbu