Oni Ningi Angi Na Gu Mbori Nga Ga Ngbarago Ko

‘Niyangaraha, awirina, oni ningi angi kindi, gu Mbori nga ga nyemuse na ga zereda ko ki du adu na oni.’—2 AKORINDO 13:11, NW.

1, 2. (a) Tipagine dungu aboro anginga tini rogo gayo raka yo ya? (b) Gu fugo nga ka ngi nayugopa gine, na waigu rengbe ani ka sonosa gu sino re?

ROGO agi auru nga ga gberangbii re, dungu aboro abinga dungu nduapai nga gu ka i angi mbikoho te. Ho gberango ati ni kuriyo watadu kuri badiangbayo, i rengbe ka berãpai wa kina gu dumbata nangia Eyobo, nga guko nayaa: “Gu boro de avungu ni gani arame ni kina guru he gbua, ki hi ahi be fudifudiapai.” (Eyobo 14:1) AKristano agasanga agu apai nafuda berã aboro rogo gi “gbegbere aregbo [du] nikpakarakpakaraha ka mangapai sani” re te, na sidu si airiwonga tirani ka bi gupai a nga kpoto ga Yekova ruru amoyambu yo nazera azera ti kura aregbo te.—2 Timoteo 3:1.

² Si ki vura du wo, aKristano rengbe arengba kaa ngi kindi, zavura ho i arungosiyo ni vurũ. (Amokedi 5:40, 41) Tipa ka rugatise na wai rengbe gere ka du, ani wisiginga gu fugo mbata nga ka ngi. I nasakarogo gu fugoyo nga ka ngi ya si nayugopa “gu ngbarago naye ho boro agbia guhe ni ni amaabangirini tipaha watadu ho ni amaabangirini ni tipa wenepai.”a Nibi gipai re, ka ani di regbo kaa berã tipa gu wene apai du berani awere na kini berẽkuriipa agu angbarago napido rani kumbatayo rogo ga Mbori vovo zegino, ani rengbe arengbe kaa ngi.

3. Rogo gini gene rengbe ani ka yaa aboro dunduko duna nduapai beyo kandara ni betehe nga gu rengbe yo kaa ngi mbikoho?

³ Aboro dunduko duna bete amaku beyo nga gu si aida i duna tambuahe tipaha. Ni kpiapai, si rengbe ka du nga bairakporo zanga gako sunge. Ni sino aboro, ko kini bakibangiriko tipaha. Ko naida ka ye na ahe fu abadiangbako. Si ki vura du wo, ka ko du nyanyakii ti kpotoko na ki duna wene auwakpotose, ko rengbe arengba ka duna tambuahe tipa gure. Ka ko bi kura sunge, ko rengbe arengba ka mangaha nyanyakii. Kura kpiapai nga, si rengbe ka du nga kaza azi gu dee nga Kristano nitunguotunguoho nga gu ninaarungosi ri. Si ki vura du wo, ri rengbe arengba ka fu tambuahe tipa gu undo agu abakure nakpinyemuri afuhe furi na gu a gari aborokporo afuhe tipa ri nisota na gari kaza rogo gu gene duna irisa na ngara. Na ka kina ginipai vura du tipa ndikidi aKristano, i dunduko rengbe ka ngi be gu gayo mamu nga ga ino Yekova, nga ‘Mbori ngbarago,’ na Yesu Kristo, nga gu ‘bangisa Bazogo duna ngbarago.’ (1 Timoteo 1:11; 6:15) Ii, Yekova Mbori na Yesu Kristo nga agu aboro duna ngbarago gbe. I akakuti gayo ngbarago, apai ki vura du kia auru kpotosende ti gu Yekova aida ti tonatonaha si du vurũ. Gayo kpiapai rengbe ka yugopai fu rani ni bakerehe tipa wai rengbe ani kaa ngi angi kindi.

I Azanganga Gayo Ngbarago Wa gu Sa Te

4, 5. (a) Waigu Yekova amangipai ho bambata aboro asamungu ni kuti ko? (b) Rogo gini gene Yekova akakuti wene berã koyo du aboro ni?

⁴ Ati Edene yo, Adamu na Eva aduna ngbarago be wene auwakpotose nga gu nasa yo i ningere pongopongo gbe na ki duna rengberengbe aberãyo. I aduna bawene sunge beyo tipa mangaha na ki duna bawene rago beyo tipa manga gu sunge re rogo. Gu nangba kisusi angia, i aduna gu mamu beyo nga ga fura dedede dagbayo na Yekova. Ga Mbori ringbisapai adu tipa yo nga i duna wene raka kumbatayo. Ono bambata avungurani aarengbanga be gi wene agamahe dunduko te re; ono i adi zuzu “gu ngua nga ngua ina wenepai na gbegberẽpai,” nga gu i aima zahe tipaha. Gi mangapai nga ga basasangbaa re amoi mburu gu zanga ngbarago dunduko namanga rani areme, nga atitayo.—Bambata Pai 2:15-17; 3:6; ARomo 5:12.

⁵ Ono tie, Yekova aambunga gu mangapai zanga tambuahe nangia ga Adamu na Eva si di gako ngbarago kusayo te. Ko aduna kido tipa gupai nga ngbadu kandara bete awiri Adamu na Eva afõyo afõ tipa i nimangi gako sunge. Nirengo, ko aduna kido gbe da ti gupai nga, zavura mbata Adamu na Eva nika batika bambata wiri yo, ko aima tingidapa gako ringbisapai ka batasa agu atitayo si adu nga i angia agisangbaa! (Bambata Pai 1:31; 3:15) Vuru gu kama agarã naye fuo gure, badungu ngbatunga aboro gbe aapeka kina fuo Adamu na Eva, si ki vura du wo, Yekova aasanga giiko sa riko aboro mbiko ngbatunga gu basasangbaa namoipai re te. Kuba gure, ko adungura berãko fuo agu akumba na adee ‘nasa kpoto ko yo si ningi,’ nga aguyo nanamanga ndikidi asadatise ka sa ngbarago tiko mbiko i anakpinyemu ko.—Asanza 27:11; AEbere 6:10.

6, 7. Gini apai naundo Yesu ko nye na ngbarago?

⁶ Ginipai tipa Yesu tigako—waigu ko akakuti gako ngbarago? Ni gu kusikusi toro nadu na ome ngbangbaturũ yo, Yesu aduna amamu beko dunduko tipa ka bi gu mangaapai nga ga akumba na adee du auru kpotosende. Gayo zangarengba adu gbayaga, si ki vura du wo, Yesu akpinyemu yo kindi. (Asanza 8:31) Kusa, ho ko aye ni ku auru kpotosende na “ki niraki dagba” aboro, gako bipai tipa ngbatunga aboro a’arianga tihe te. (Yoane 1:14) Ginipai nasa gu rengberengbe Wiri Mbori re ko kakuti ngbatunga wene bipai wa gure tipa agu aboro nga aingipai?

⁷ Ni bambatapai, Yesu aduna ruru berã tipa agu apai ko aidaha be tiko na be kura aboro. Ko aima ino gupai nga ko a’arianga gu ida nga ga zegino te. (Matayo 10:32-39) Si du ko anidu na ngbarago tini zavura ho kina bangisa boro anikaragapai ni wenengai tipa gu pangbanga nga ga Kindo. Wa gu mangaapai na berã nangia ga gako abawiriki aavuranga du dedede ni wenehe ya, Yesu aima ino gupai nga ngbaduyo yo, i aida aida nirengo ka manga gupai Mbori akpinyemuhe, sidu ko kini kpinyemu yo mbiko gupai re. (Ruka 9:46; 22:24, 28-32, 60-62) Gu nyakipaha gbe nga, rogo kparakpee fu Bako du ngbangbaturũ yo, Yesu agurusipa gu wene gene gako abawiriki aamangapai rogo daa kuti gu regbo re: “I ka kuti ga pai.”—Yoane 17:6.

8. Oni gumbanga pa gu bete agene rengbe ani ka wirika Yekova na Yesu rogo ka ani aida kaa ngi angi kindi.

⁸ Zanga kapa, ani dunduko rengbe ka gbia undo be wisigo gu kpiapai Yekova Mbori na Kristo Yesu amoihe rogo gipai re. Ya mo ani rengbe ka wirika Yekova wenengai gbe, isoke ni zanga du ani na bakabangirise kisusi ho apai amanganga ni wa gu ani amaabangirani tipaha ya? Ya mo ani rengbe ka pefuo Yesu sirisiri ni ka ani kuti gaani wene bipai tipa agu apai du tipa rani, na ki du a na ruru berã tipa agu apai ani aidaha be tirani na be kura aboro? Ani binga wai rengbe ani ka mangasunge na bete agi apai re ngba wene gene rogo gu bangiri ba du paha nyanyakii ngbadu zaza aKristano yo rogo arago dunduko—nga sunge tungusapai.

Ani Banda Wene Bipai Tipa Sunge Tungusapai

9. Waigu Yeremaya atona ka ngi berewe, na waigu rengbe gako kpiapai ka undo rani?

⁹ Yekova naida ani duna ngbarago rogo gako sunge yo. Si aidanga pa gaani ngbarago ru riipa agu apai ani agbiaha ni sangbana gaani sunge te. (Ruka 10:17, 20) Gu nebi nangia Yeremaya atungusipai tipa dungu agarã rogo gu rago naakusanga zuzuhe ya. Ho ko adungura berã ko ni kuriipa gu gbegbere karagapai nangia ga aboro, ko azanga gako ngbarago. (Yeremaya 20:8) Ono ho ko anaberã ni kuriipa ngbanya gu tingidapai re, ko azambuasi gako ngbarago berewe. Yeremaya ayaa fu Yekova wee: “Mi bi gamo apai, mi ki ri he, ga pai ki sa tihe fere ni ngbarago ni gu pai kpotore yo nangi mbiko ho; bambiko i yambu re ti rimoro, Ako Yekova.” (Yeremaya 15:16) Ii, Yeremaya angi angi be gako mamu kaa tungusa fugo Mbori. Ani rengbe kaa ngi angi a.

10. Waigu rengbe ani ka banda gaani ngbarago rogo sunge tungusapai, ka si vura du nga gu gaani rago ani atungusapai rogo akusanga zuzuhe awere vurũ te?

¹⁰ Ka dungu aboro avuranga kaa karagapai wenengai sa wene pangbanga ya, ani na nduapai berani dunduko tipa kaa ngi angi wa ani arimiso tirani kurogo sunge tungusapai yo. Oni tingidi gupai nga, Yekova aima duna kido ziazia tipa gupai nga ngbadu kura aboro yo afõyo afõ i mangi gako sunge. Wa kina Yekova, si naida ani duna maabangirise nga kandara bete aboro ainopa gu ngbanga aino du tipa gu boro rengbe ka duna bakere pagbia beni rogo haurago na ki di gu pangbanga kugume nga ga Kindo. Ka bangirani ya gonga ti gupai nga agu apai du tipa aboro na’ariatihe a’aria ya. Ho tunguotunguopai agbiayo ni nga gu nasa yo i zanga gayo ahe watadu ho gberangbii ati ni kuriyo, zavura agu aboro ima rengba be ahe kini berẽ kina pa tiyo, i rengbe ka tona berã nyanyakii tipa ndu raka. Oni aduho ka fu undo ti gu regbo ngbatunga gu boro re ka ‘inopa gani zingo nga ga toro’? (Matayo 5:3, NW ) Na wai tie, boro kinaho rogo gu gaoni rago nga ga tungusapai rengbe arengba ka degatuni kuti wene pangbanga ti gu regbo oni ka ndu berewe ka bi ni!

11, 12. Ginipai namangi rogo kura gbata sa, na ginipai rengbe ani ka wirikaha ti gupai re?

¹¹ Agu apai du rogo gu rago ani atungusapai rogo rengbe arengba ka ariatihe a. Ani makianga kpiapai sa. Rogo kura umba gbata sa, kpamiakpamia umba rimbasa nga ga paranga arogotise anaraka yo na awiriyo. Ho aDezire Yekova anindu ni ka bi yo, i anagbia tiyo na bangisa karagapai ti angbadimo dunduko, nga “Ani na nyemu gia gaoni pai te!” Kangia boro aniyugu gupai nirengo nga ni na nyemu gu pangbanga nga ga Kindo tini, gani amurakporo anizeresi kpotoniyo ni kina ipo tipa ka ni furanga berewe na aDezire ya. Si ziazia nga, si aduni kpakarakpakarapai ka tungusapai rogo gu rago re. Wa si avura du wo, aDezire aambunga nduge koyo te; i anandu andu kindi kaa tungusapai yo. Sangbanaha angia gine?

¹² Kusa, dungu agu agude nadu rogo gu gbata re asono, ki mangi rogatise, na ki momoi akpuyo rogo gu gbata re. Ni bi yo gupai nga gayo gene raka aafunga ndikidi ngbarago fuyo te, bete gu paranga aboro re atona kaa gbata rengo. I abihe ho i akaragapai ni wenengai sa gu wene pangbanga aDezire aatakapandehe. Sidu fuo dungu agarã, gu wiri umba dungurati re kini tona kaa sona. Oni berẽnga pa gu ngbarago nangia ga agu abatungusipa Kindo naambunga gayo sunge re ya! Pa ka ani kuti sunge tungusa gu taasitaasi pangbanga nga ga Kindo sanga rani a ani ningi angi!

Agu Akuaroni Nga Aidipase Aundo Roni Aundo

13. Ada rengbe ani ka ndu koyo du yo ni ho kpotoraniyo azera ni?

¹³ Ho fudifudiapai akio ni watadu ho gberango ati ni kuri roni, wari rengbe oni ka ndu kuho ni tipa ka gbia wasa? Dungu amirioni gu ga Yekova amoyambu nga aguyo naima kpara tiyo fuko nandu ni bambatapai fuo ko rogo kparakpee yo, fuo gure, i kini mo ka ndu fuo agu awirinayo nga aKristano. Ho ko aduni auru kpotosende, Yesu nitiko anabi gu songodahe nangia ga gako abawiriki na nyanyakipaha. Rogo gu yuru nadu mbata fu kpio ko, ko afura tipa yo ni “agu yo naadu na mi ho i aasadi re ni.” (Ruka 22:28) Rengo ngaha, agu abawiriki re angia kpakpa aboro, ono pa zio yo tiyo niruruyo kuti Wiri Mbori afu wasa fuko. Ani rengbe arengba a ka gbia ome be akuarani nga airisimbori.

14, 15. Gine naundo arogotise ue i dibe pa kpio wiriyo, na ginipai oni awirikaha ti gupai namangiyo re?

¹⁴ Arogotise ue ni aKristano nga Michel na Diane awiriki wai rengbe gu songodahe nga ga awirinayo ka duna nyanyakipaha. I abi hihihe ti dudu wiriyo, nangia Jonathan, nga guko garãko adu 20, ni gu Kristano nadu na ome tiko ki duna wene maabangirise kumbatayo. Amonganga a’asadi tiyo nyanyakii ka batasa ko, ono ga Jonathan kaza aanyaka kina kumbatayo, daho ko ati ni nirame rogo kpio yo rogo kura nyemu sa. Gupai nadu ti Michel na Diane anyasi. I ainihe ya gu Dunguratise nga ga Sunge nga gu i aringbisipaha kurogo gu nyemu re aima mbeda ka nyasa. Si ki vura du wo, i kini idi nyanyakii i fu wasa fuyo, si du i asana gu bakumba tini nadu na yo tipa ko gasi yo ku Bambu Kindo yo. I ada yo ti gu regbo i aatingidapa kpio Jonathan fu dungurati. Fuo dunguratise, awirina ake pati avungu Jonathan nga aguyo nadu na aume bangiriyo yo, kini dungo yo na kini gumba agu afugo fuyo nafu wasa. Diane natingida gupai nga: “Gu du tirani anyasi ho ani ada ni Bambu Kindo yo, ono nga gu wasa ani agbiaha yo be awirinarani—na nairiwo wai i atumba toro rani! Wa i avuranga rengba ka dia gaani imisiri kusayo ya, i aundo rani tipa ani hi gu fudifudipai re!”—ARomo 1:11, 12; 1 AKorindo 12:21-26.

¹⁵ Gberangbii asa Michel na Diane i mbedi fuo awirinayo. Si asa yo a i du mbembedii dagba tiyo. Michel nayaa: “Mi wiriki wai ka ngera wenengai fuo diare nga badiangbare susi gu nadu mbata. Ti agu aregbo du ani na gberarago, ani nafura dagba rani tipa gu rengo nga ga Baibiri na tipa wai Yekova asongoda rani.” Diane nagbia gupai kuti ni nga: “Gu maabangirise nga ga Kindo na bakere rogoyo tini fu rani awere susi gu nadu mbata.”

16. Tipagine duhe tini na nyanyakipaha ani duni bambata aboro ka sa awirinarani i ini agu apai du ani na zingoho?

¹⁶ Ii, agu awirinarani nga aKristano rengbe arengba ka du ni ‘ũngarasahe’ fu rani ti regbo gu kpakarakpakaraapai nga ga raka na kini undo rani tipa ani kakuti gaani ngbarago. (AKorosaio 4:11) Rengo ngaha, i arengbanga ka ino agu apai du berãraniyo te. Sidu ho ani aida ni i songodi rani, si ni wenepai fu rani ka sa yo i inipa gaani azingo. Fuo gure, ani kini yugu gaani ndikidi tambuahe fuyo tipa gu wasa dunduko rengbe yo ka fuhe fu rani, kini bihe wa gupai naye be Yekova.—Asanza 12:25; 17:17.

Oni Binga Gaoni Dungurati

17. Gini kpakarakpakaraapai kura naagude duni sari naagbia tiri nani, na waigu ani abi agu aboro du wa ri?

¹⁷ Wa oni akparia akuaroni aidipase wenengai, kinawo a oni ka wirika wai ka duna tambuahe tipa yo na kini bi ngbarago rogo kodatise na yo. Oni binga gaoni dungurati. Gini apai oni abihe? Bangisa vunguagude ho nasota na pa sonosa awiiri rogo gu gene nga ga rengo? Oni moinga berã roni kuti gu wene kpiapai ri amaaha? Oni asadinga ka berãpa bete gu kpakarakpakaraapai namanga ri. Gu naagude nasonosa awiiri nisari nga Jeanine, nagumbapa bete agi apai re: padu nisase, kpasaka boro nga gu ni aidanga ha ya be agu akumba du basunge yo, na kere banda marã. Ri nayaa, gu babakere pai nakiso gene beri nga ka ngerafuo agu apai du ngbadu awiiri yo, mbiko agude dunduko du nibakiakia. Jeanine nagumba kurapai niyaa: “Si rengbe ka duni ndikidi kpakarakpakarapai ka neka gu sino nga ga sa gu gude nga kumbagude ko naangerafuo kporo kuba kumba. Wire tini nga degude, sidu si nikpakarakpakarapai ka tingidaha ya si aidanga mi nifudi ri na gu gimi apai du tipa tire te.” Wa kina gu dungu akutu bangisa avunguagude nagunde ti Mbori, Jeanine namangasunge tungusapai ti aregbo dũ na kini ngerefuo gari kporo. Ri nawisigo Baibiri a na awiiri, kini yugu sunge tungusapai fuyo, na kini ye na yo ku pati adunguratise yo. (AEfeso 6:4) Nga gu ngbarago du Yekova nani wa ko abi ga agi aborokporo asadatise na auru dunduko re tipa ka kakuti manga rurupai! Anga duna ngbatunga agu aboro re dagba rani naye na ngbarago ku ngbaduraniyo tee? Ii, si nafu ngbarago afu nirengo.

18, 19. Oni yugunga kpiapai tipa wai rengbe ani ka kiiso gaani tambuahe tipa agu aboro du rogo dungurati.

¹⁸ Oni binga gaoni dungurati berewe. Oni rengbe ka bi ruru adekurugbo nga aguyo ‘akpanga’ pati adunguratise ya. (Ruka 2:37) Ya mo i nabi tiyo wa agu aboro du nisayo ti kura aregbo? Ii, wo duhe. Nga gu riko zingo du yo nani tipa gayo abadiarogatise! Ono i futiyo tipa manga ga Yekova sunge na ki duna nyemu akurayo. Gayo wene berã, nga gu awonga ya nakiiso gu ngbarago nga ga dungurati! Gu Kristano nga guri ima mangasunge Kindo ti aregbo dunduko tipa agarã susi 30 ayaa: “Gu sa dagba agu apai mi naagbia ngbarago behe gbe nga ka bi gu sosono awirina nasusi rogo dungu a’asada ono nga aguyo namanga ga Yekova sunge kindi niruruyo!” Ii, gu sosono aKristano du dagba rani nga mburu bakere ngarasahe fu gu paranga yo.

¹⁹ Ginipai tipa gu vovo aboro tona koda tiyo kina bambeda na dungurati? Anga ngbaduraniyo nafõ rani ho i afura ni tipa gayo idapase pati adunguratise tee? Oni berẽnga pa gu sonakumbatayo i namangihe wa i atona kaa wisigo Baibiri. Yekova nirengo na ngbarago beyo. Ani na ngbarago tigaani? Ani nayugo gupai fuyo nga ani naida na gayo pai, kini tambua yo tipa gayo asadatise?

20. Tipagine rengbe ani ka gumba gupai tini nga agu aboro nibasasa du rogo dungurati na nyanyakipa sunge beyo?

²⁰ Oni ni arogotise, watadu ni gu boro amanganga rogatise ya, watadu ni bangisa vunguagude? Oni ni wirinyaure watadu ni dekurugbo? Oni ni gu boro naima du rogo dungurati tipa dungu agarã watadu oni ni guni tona kodatise kina bambeda nani? Oni ini gupai nirengo nga gaoni ruru kpiapai nangarasa rani dunduko. Sidu ho oni akoda fugo roni ni rogo bi gu bia nga ga Kindo, na ho oni akaragapai ni watadu ho oni amanga gu sunge ni i naafuhe fu abawisigipai rogo Sukuru Sunge Siokrasia, pa manga oni he nakiiso gaani ngbarago. Gu nyakipaha berewe kisusi nga, si nasa gupai nga ngbadu Yekova yo ningi angi.

21. Ginipai du ani na dungu nduapai berani kaa mangaha, ono gini asanahe nakura?

²¹ Ii, zavura rogo gi kpakarakpakara aregbo re, ani rengbe arengba kaa ngi rogo iriso gaani Mbori ngbarago. Ani na dungu nduapai berani ka karagapai sa ga Pauro ngarasahe nga gu nayaa: ‘Oni ningi angi kindi, gu Mbori nga ga nyemuse na ga zereda ko ki du adu na oni.’ (2 AKorindo 13:11, NW ) Ginipai tie ka mangi, ka ani gbia tirani na gu gberango nga ga zegino, na rungosi, watadu kere zingo nga ga mosoro? Ya mo ani rengbe kaa ngi angi kindi ngbatunga agu apai re ki vura kaa manga rani vurũ? Oni karagapai tipa tironi wa oni kaa wisigo gu papara kekepai naye fuo gere.

[Gu rukutu kekepai du bandu kpewaraga yo]

Oni Rengbe ka Karagapai?

• Waigu i asakarogo gu fugo yo nga ka ngi?

• Waigu rengbe kakuti wene berã ka undo rani ani ningi angi kindi?

• Ginipai rengbe ka undo rani ani duna wene bipai tipa gu rago du fu gaani dungurati tipa tungusapai rogo?

• Rogo gini agene oni naabi agu awirina du rogo gaoni dungurati na nyanyaki payo?

[Gu kpiahe du ti kpewaraga 21]

Agu aboro du rogo gu rago ani atungusapai rogo rengbe arengba ka aria gayo berã

[Gu kpiahe du ti kpewaraga 23]

Gini fudifudiapai agu aboro du rogo gaoni dungurati agbia tiyo nani?