Oni Gbia Ngbarago Be Gamahe!
“Ngbarago ho gbe rogo gamahe susi gu duhe rogo diaha.”—AMOKEDI 20:35, NW.
1. Waigu Yekova ayugo gu ngbarago naye be gamahe?
GU NGBARAGO naye be ino rengo na agu aundo si afuhe, si nga nyanyakipa agamahe fu rani be Mbori. Agu aboro ini Yekova, i na dungu nduapai beyo nga gu rengbe yo ka duna ngbarago mbikoho. Ono tie, wa vura duhe nga boro nagbia ngbarago ho i agamahe ni funi, ngbarago kinaho a ho boro agamahe ni. Yekova nga Bagamu “wene gamahe dunduko,” na ko nga ‘Mbori ngbarago.’ (Yakoba 1:17; 1 Timoteo 1:11) Ko nayugopai fu agu aboro dunduko nadegatuyo kuti fugo ko, ki duna ngbarago be gu giasangbaa nga ga agu aboro ko ayugopai fuyo, a wa avunguagude nidu na ngbarago ho awiriyo airisa gayo arugute ni.—Asanza 27:11.
2. (a) Ginipai Yesu agumbaha tipa gamahe? (b) Gini ngbarago ani agbiaha ho ani ayugo gu rengo ni nga ga Ziazia Kekeapai fu kura aboro?
2 Teketeke a, ho Yesu aduni auru kpotosende, ko aduna ngbarago ka bi aboro i ni karagapai wenengai sa gako yugopai. Gu mokedi nangia Pauro ake fugo Yesu niyaa: “Ngbarago ho gbe rogo gamahe susi gu duhe rogo diaha.” (Amokedi 20:35, NW ) Gu ngbarago ani agbiaha ho ani ayugo gu rengo ni nga ga Ziazia Kekeapai fu aboro, si ayenga mbiko kina gupai gbua nga boro idi kuti agu aida du rogo gaani pambori yo te. Si naye gbe be ino ani gupai nga ani nagama guhe funi duna nyanyakipaha nyeanye kindi. Ni gama ani guhe fu kura aboro duna nyanyakipaha rogo toroyo, ani rengbe ka undo aboro i gbia undo awere na kumbatayo nyeanye kindi.—1 Timoteo 4:8.
Gamahe Naye Na Ngbarago
3. (a) Waigu agu amokedi nangia Pauro na Yoane ayugupa gu ngbarago i agbiaha be undo kura aboro rogo toroyo? (b) Ho ani ayugo gu rengo ni nga ga Ziazia Kekeapai fu kina boro awirani, tipagine duhe tini ni gaani yugo nyemuse?
3 Ii, aKristano nagbia ngbarago be gamahe rogo toroyo wa kina gu a Yekova na Yesu agbiaha be gamahe rogo toroyo. Gu mokedi nangia Pauro agbia ngbarago be ino gupai nga ko aundo kura aboro i wiriki gu rengo du rogo Fugo Mbori yo. Ko akepai fu gu dungurati nadu Tesaronike yo ki ya: “Gine tie nga gaani maabangirise, na ngbarago, na ũtaarimo? Nga kina roni, te? barangba gaani Gbia Yesu ho ko ka ye ni. Bambiko oni nga gaani taarimo na gaani ngbarago.” (1 ATesaroniko 2:19, 20) Teketeke a, ho gu mokedi nangia Yoane afura ni tipa agu awiriko nga ga toroyo, ko akepai ki ya: “Bakere ngbarago ti re susi gi te re, ya mi gi pa awire i nita rogo rengo.” (3 Yoane 4) Oni berẽnga pa gu ngbarago a duho ti undo kina boro ndikidi awirani i da ni agu awirani nga ga toro yo! Sonosa agude rogo “ga Gbia rabahe na rugahe” nga gu gene avunguagude ayugo gayo nyemuse rogo fu awiriyo. (AEfeso 6:4) Ni mangaha wo, avunguagude nayugo gupai nga i nabaka bangiriyo abaka tipa ga awiriyo nyenye wene raka kumbatayo. Ho agude airisa agi arugute ni re, avunguyo nagbia ngbarago ni bakerehe.
4. Gini kpiapai nayugopa gu ngbarago naye be gamahe rogo toroyo?
4 Dell nga namangisunge Kindo ti aregbo dunduko na agude beri bisue. Ri nayaa: “Mi rengbe ka rugatire wenengai na fugo gu mokedi nangia Yoane mbiko mi na bakere tambuahe tipa gupai nga awire biama ‘nata rogo rengo yo.’ Mi ini gupai nga, si nafu irisa na taarimo fu Yekova ho du aborokporo ni nikpamiakpamiayo rogo ndikidi irisombori, sidu mi na bakere ngbarago ka bi ga Yekova maku kurii gu asadatise mi amangaha ka rimiso rengo ku ngbadu awire yo. Gu bawene maabangirise du ani nani tipa raka nyeanye kindi rogo Paradiso na gimi aborokporo, si nasa re mi duna bakere maabangirise na si kini fõngbadureyo mi hipai, fudifudiapai ki vura du na aũkota vurũ.” Si nafu gberarago ka ino gupai nga, i akusi wiri Dell sa nga degude kusayo rogo dungurati mbiko pa ndu ri ngba gu gene angianga ga aKristano ya. Wa vura duhe wo, Dell na’asada tiri nyanyakii kindi ka kakuti wene berã. Ri nayaa: “Mi na maabangirise ya, rogo kura uru sa, wire adu adu na umbasitise ki karaga tiri berewe koyo du Yekova ni. . . . Ono mi nafu tambuahe fu Mbori tipa gupai nga dungu awire nandu kumbatayo kindi na iriso ko ni ruruyo. Gu ngbarago du mi nani ningia mburu gimi nyaka.”—Nemaya 8:10.
Zio Nyenye Bakure
5. Wa ani afu tirani sa gu sunge nga ga sa aboro ni abawiriki, ino ginipai nafu bakere ngbarago fu rani?
5 Yesu arugu apefuo ko ya i sa aboro ni agu abawiriki nga aKristano kini yugupai fuyo tipa Yekova na tipa agu apai ko akpinyemuhe. (Matayo 28:19, 20) Yekova na Yesu aundo aboro i wiriki rengo. Sidu ho ani afu tirani ni sa gu sunge nga ga sa aboro ni abawiriki, ani na ngbarago mbiko ani ini gupai nga ani nawirika Yekova na Yesu, a wa bambata aKristano amangihe. (1 AKorindo 11:1) Ho ani amangasunge ni wa sa na gu Mbori duna tandu apai dũ na gu Wiriko kpi ko nyemu ko gbe, gaani raka na ndikidi nduhe tini. Nga gu wenepai ngaha fu rani tipa i gedi rani ku dagba ga Mbori “abadiasunge”! (1 AKorindo 3:9) Anga si ni pa ngbarago ka ino gupai nga zavura amaraika namanga gi sunge tungusa wene pangbanga a tigayo re tee?—Yugoti 14:6, 7.
6. Wa ani amanga gu sunge nga ga gamahe rogo toroyo, ada nada ni abakurea rani?
6 Nirengo, ni manga ani gi sunge nga ga gamahe rogo toroyo re, anga ani nada sa ni kina ga Mbori abadiasunge te, ono ani nazio nyenye bakure na ko a. Mbiko gako idapase, i anayamba Abarayama nga bakurea Yekova. (Yakoba 2:23) Wa ani a’asada tirani nyanyakii ka manga gupai Mbori akpinyemuhe, ani rengbe arengba a ka da ni abakurea Mbori. Ka ani aamanga gure, ani rengbe a ka da ni abakurea Yesu. Ko agumba gupai fu gako abawiriki nga: “Mi yambu roni ni abadiangba [abakureami, NW ]; bambiko agu apai du[nduko] mi agi ngba Buba mi yugu he fu roni.” (Yoane 15:15) Badungu aboro duna ngbarago ka duni abakurea kikindigipa aboro watadu agu aboro duna pagbia kurii aboro, ono ani rengbe tigaani ka duni abakurea agu aboro ue kiipayo kisusi aboro dunduko rogo arago dunduko.
7. (a) Waigu kura wirina azi ndikidi bakure? (b) Pai amanginga fu roni wa gure?
7 Kurii gure, ho ani aundo aboro ni i ini Mbori, i nada ni abakurea rani a, si kini fu gu ngbarago fu rani duni kparakparaha. Joan, nga guri naraka Amerika yo, atona wisigo Ziazia Kekeapai na dee du rimori nga Thelma. Wa ga Thelma aborokporo avura kaa soga gari wisigopai, ri akakuti ni kindi na ki zi bapatiza fuo garã sa. Joan ake gupai nga: “Gaani kodatise aanyasanga kuho te; kuba gure, ani azi bakure nga gu ima manga agarã awere 35. Vuru agu agarã re, ani anandu sa tipa sunge tungusapai na kini ndu a sa ku pati kikindigi adunguratise yo. Ni yangaraha, mi aga kurogo gu vovo kporo du baturoho kusayo nga akirometere 800 ti kua Thelma. Wa vura duhe wo, ri nakekeda bawene awaraga kindi fere nga ga nyemuse, kini gumba gupai fere nga ri nidu na ngbarago kaa berã pare na ri nafu tambuahe fere mbiko padu mi ni nakureari, na tipa gu wene kpiapai ri abihe bere, na tipa pa yugo mi rengo furi rogo Ziazia Kekeapai. Padu mi na bawene nakureami nga guri mi akpinyemu ri wa gure nga bawene mosoro fere tipa gu asadatise mi amangihe ka undo ri ri wiriki rengo tipa Yekova.”
8. Gini wene berã nika undo rani rogo gaani sunge tungusapai?
8 Gu maabangirise du ani nani tipa gbia gu boro naida ka wirika rengo rengbe ka undo rani ani duna hipai, ka gu dungu aboro ani agbia yo vura duna nyemu Fugo Yekova tiyo gbua tooni watadu ki zanga duna nyemuhe vurũ. Ngbatunga gu zanga nyemupai re rengbe ka fuda gaani idapase na gaani hipai. Ono tie, wene berã rengbe ka undo rani. Fausto, du Guatemala yo, ayaa: “Ho mi naatungusapai ni fu kura aboro, mi naberãpa wai rengbehe ka ngba gbe ka gu boro mi afura na ni re da ni wirina nga ga toro ni rogo kura uru sa. Mi naaberã gupai nga, mi agbia boro agbia kandara sa nga guni nika dia gu rengo kugume niyangaraha du rogo Fugo Mbori. Gu berã re naundo re mi nindu kindi kumbatayo na tungusapai na si nafu ndikidi ngbarago fere.”
Dungura Ũkumuko ku Ngbangbaturũ Yo
9. Ginipai Yesu agumbaha tipa pa dungura ũkumuko ku ngbangbaturũ yo, na ginipai rengbe ani ka wirikaha be gipai re?
9 Si ni taatapai ka sa awirani watadu ka sa kura kungbo aboro ni abawiriki te. Si naida regbo, hipai, na kakutipai. Ono tie, oni tingidi gupai nga dungu aboro dedede na nyemu mangasunge nyanyakii tipa ka dungura aũzegino gbe, nga agu ahe ayenga dedede na ngbarago fuyo ya, na nga agu ahe anyenga a ya. Yesu agumba gupai fu agu aboro nanadegatuyo kuti gako yugopai nga, si ni wenepai ka duna kumuko rogo toroyo. Ko agumbaha ki ya: “Ka oni dúngura nga ũkumuko ni gaoni zegino ya, no ayawe agbarasa ahe ni na gbegbe, no airadĩ akua bambu ni nidĩ ahe. ono oni dúngura ũkumuko ni gaoni ku ngbangbaturũ yo; yo ayawe agbarasa nga ahe ni na gbegbe ya, yo airadĩ akua nga bambu ni nidĩ ahe ya.” (Matayo 6:19, 20) Ni du ani na apai bangirani nga gu ani asogima ka mangaha rogo toroyo, nga agu apai nakoda manga gu nyanyakipa sunge nga ga sa aboro ni abawiriki, ani rengbe ka duna ngbarago ka ino gupai nga ani namanga gupai Mbori akpinyemuhe, na ki ini gupai nga ko afu mosoro afu fu rani. Mbiko gu mokedi nangia Pauro akepai ki ya: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko [te].”—AEbere 6:10.
10. (a) Tipagine Yesu adu tini na ũkumuko beko nga ga toro? (b) Waigu Yesu afu tiko, na gini bakere undo si afuhe fu aboro?
10 Ka ani aamangasunge sa aboro ni abawiriki nyanyakii, ani adungura ‘ũkumuko ni gaani ku ngbangbaturũ yo,’ a wa Yesu agumbaha. Gere nafu gu ngbarago fu rani ani agbiaha ho i agamahe ni fu rani. Ka ani agamahe zanga ringi, ani aduni airakumuko niyangaraha. Yesu aima manga ga Yekova sunge niruruhe tipa gu bange agarã adunga bagedaha tini ya. Oni berẽnga pa gu ũkumuko ko adunguraha ku ngbangbaturũ yo! Wa si avura du wo, Yesu aagbatanga kina agu apai nangba tiko te. Gu mokedi nangia Pauro akepai ki ya: “[Yesu] nafu tiko tipa gaani gbegberẽapai, ko batasi rani be gi gbegberẽ zegino re, a wa Mbori akpi nyemu he nga Barani.” (AGaratio 1:4, pigipigi kekeapai nga gaani.) Anga Yesu afu kina tiko sa tipa gako sunge te, ono ko afu kina boro unga ko a ni tumorii wa ka kura aboro duna mamu beyo ka dungura ũkumuko ku ngbangbaturũ yo.
11. Tipagine du gamahe nga ga toro tini niwenehe susi gama aũzegino?
11 Ni yugo ani pai tipa Mbori fu aboro, ani naundo yo i bi wai rengbe yo a tigayo ka dungura gu kumuko nga ga toro nga gu kaa gberanga ya. Gini kura gamahe kii susi gure rengbe oni ka gamaha fu aboro? Ka oni gamu nyanyaki gino saa, nyanyaki gino tarambiri, watadu kporo fu bakurea roni, gu bakurea roni re adu nirengo na tambuahe tipaha na ki duna ngbarago, oni kini gbia gu ngbarago tigaoni naye be gamahe. Ono waigu pa gu gamahe re ka nyaka bangironi fuo agarã 20? Fuo agarã 200? Fuo agarã 2,000? Ngba kura gene, ka oni fu tironi ka undo boro ni irisi Yekova, ni rengbe ka gbia undo be gu gamahe re nyeanye kindi.
Gbata agu Aboro Naida Rengo
12. Waigu dungu awirina afu tiyo ka undo kura aboro rogo toroyo?
12 Tipa ka gbia gu ngbarago naye be gamahe rogo toroyo, ga Yekova aboro ima ndu ki da ku digido kpotosende yo. Badungu yo mbu gayo akporo na ki mbu agumeyo ki di gu sunge kubeyo nga ga amokedi rogo agu aringara si aidi i wiriki vovo fugo aboro rogo na gayo sino mangaapai. Gu kurayo aga kurogo agu arago rogo gayo aringara du bakere zingo rogo tipa abatungusipa Kindo. Agu akurayo awiriki vovo fugo aboro, si kini fu amamu fuyo i tungusipai rogo gayo dagbarago fu gu kungbo aboro yego kurogo gu dagbarago re kina boro rogo fugo agu aboro re. Ni kpiapai, fuo sonosa yo awiriyo ue nga aguyo namangasunge awere rogo gu rii-basunge nga ga aDezire Yekova, arogotise ue rogo gu gbata nga New Jersey, du Amerika yo atona mangasunge ni abazakigene na ki wiriki pa aboro China. Vuru agarã susi biata, i awisigi Ziazia Kekeapai na aboro 74 nga aguyo nape pa aboro China, nga agu aboro naawirikapai rogo kura bakere sukuru sa nadu mbembedii pakpuyo. Oni rengbe ka kiiso gaoni sunge tungusapai rogo kura gene tipa ka bi bakere ngbarago rogo gu sunge nga ga sa aboro ni abawiriki?
13. Ginipai si aida oni mangihe ka oni aida gaoni sunge duna zuzuhe tini gbe?
13 Si rengbe ka du nga oni na nyemu wisigo Ziazia Kekeapai na boro ono ka gene adunga beroni ka bi ni ya. Rogo kura aringara, si ni kpakarakpakarapai ka bi agu aboro duna nyemu rengo. Isoke agu aboro oni agbia yo, i na nyemu Ziazia Kekeapai tiyo te. Kangia wo duhe, oni rengbe tie kaa kparakpee dedede tipa gupai oni akpinyemuhe, ki ini gupai nga Yekova na Yesu Kristo na bakere nyemu gu sunge re tiyo, na i rengbe arengba ka ndu na oni fuo gu boro du wa vusende. Oni sana agu awirina duna inohe gbe tipa tungusapai rogo gaoni dungurati tipa i fu berã fu roni watadu aguyo du gayo sunge tungusapai na zuzuhe tini gbe. Oni gbia undo be gu yugopai na aberã i afuhe pati agu adunguratise nga ga aKristano. Oni gbia undo be gu rugute nga ga agu ababiapai naata ata na be adiayo. Kurii gure dunduko, ka ome roni batinga ya. Gu boro tatamana nangia Soromo akepai ki ya: “Mo ru ga tunga wiso, ka mo mbú nga ru he nyemu ya; bambiko mo aina nga pa gini gu nikaida te.” (Batungusipai 11:6) Wa oni kaa manga gaoni sunge, oni tingidipa gu ruru aboro nadu mbata, wa Noa na Yeremaya. Wa kina bete aboro avura karagapai wenengai sa gayo tungusapai, gayo sunge aduna diabese. Kurii gure dunduko, si afu ngbarago fu Yekova.
Manga Gupai Rengbe Ome Roni Nani
14. Waigu Yekova abi agu aboro ngbinza kuti ngba gako sunge?
14 Si rengbe ka du nga agu apai du tipa roni ambunga gene fu roni oni mangi sunge tungusapai ni bakerehe wa gu oni aida ka mangaha te. Ni kpiapai, gbinza rengbe ka sa roni ka oni manginga ga Yekova sunge wa oni aidaha ya. Ka si vura du wo, oni tingidi gupai boro tatamana akehe: “Nvue nga kpakpari taarimo fu boro; ni nibi he be kina gu pai nga ga rurupai.” (Asanza 16:31) Tipa Yekova, gu boro nyasi gani raka nabaha kuti ngba gako sunge nasa ngbarago tiko gbe. Kurii gure, Ziazia Kekeapai nayaa: “Dati gbinza roni a Mi nga Ko, mi atínda roni kindi dati rago kura nvue rironi yo. Mi amangi roni, mi aáka roni; mi atínda roni ki batasi roni.” (Yesaya 46:4) Gu Barani duna nyemuse nga ga ngbangbaturũ ko nakido rani ya ko asongoda gako ruru aboro asongoda.
15. Oni idi gupai nga Yekova ima ino agu apai du tipa roni? Tipagine?
15 Isoke kaza gu duho oni asota nani, watadu sogote be gu gaoni badiarogatise angianga idipase ya, watadu oni na dungu asunge beroni nga ga kporo, watadu gu kura fudifudiapai. Yekova ima ino gaani angbanda na ki ima ino agu apai du tipa rani, na ko nakpinyemu rani mbiko gu nyanyaki asadatise ani amangaha tipa kaa manga gako sunge. Ka si vura du nga gu sunge ani amangaha adanga wa ga kura awirina te, ko nakpinyemu rani kindi. (AGaratio 6:4) Yekova ima ino gupai nga ani nga kpakpa aboro, sidu ko naida kina agu apai berani rengbe ani ka mangaha. (Atambuahe 147:11) Ka ani mangi gupai rengbe ome rani nani, ani rengbe ka ino gupai nirengo nga nyakipa rani anyaka bangiri Mbori, na bangiriko agonga ti gaani asunge nga ga idapase te.—Ruka 21:1-4.
16. Rogo gini gene awirina dunduko nidu ti sa boro ni bawiriki?
16 Oni tingidi gupai a nga, sunge sa aboro ni abawiriki nga gu sunge nga ga kodabee. Anga bangisa batungusipai ho nisani nasa boro ni bawiriki te, a wa kina gu ka bangisa togotogo mai atudanga tamahe ya. Rengo ngaha, bangisa Dezire rengbe ka kura bara boro nga guni duna nyemu rengo na kini wisigi Ziazia Kekeapai na ni. Ono fuo ye gu vovo boro re kindi ku Bambu Dunguratise yo, awirina nabayo naundo ni ni ini rengo. Gu ngbarago nga ga awirina nayugopa gu ome du ga Mbori toro nani kuriyo. (1 AKorindo 14:24, 25) Rukutu agude na sosono agude nafu agu akaragapai nafõngbadu aboro yo, kini yugu gupai fu gu vovo boro re nga gaani paranga aboro kia ti agu aparanga du rogo zegino. Agu awirina duna kaza, aguyo anyakanga kpotoyo ya, na gu sosono yo du rogo dungurati nayugo gine nga hipai fu gu vovo aboro re. Ka bange garã rani vura du kina wai, ani dunduko namanga nyanyakipa sunge rogo undo vovo aboro wa gayo nyemu Ziazia Kekeapai asona, i kini ndu kumbatayo sa zio bapatiza. Agu asaa nibasasa ani adiaha kuti ngba sunge tungusapai, agu aboro dunduko ani akaraga tirani ka biko yo, agu afugo dunduko ani afura dagba rani Bambu Dunguratise yo na gu boro duna nyemu rengo ti ni, si rengbe ka wira guhe anyakanga paha ya, ono si nga papara gu bakere sunge Yekova amangaha areme.
17, 18. (a) Kurii gupai nga ani namanga sunge sa aboro ni abawiriki, gini kura agene rengbe ani rogo ka gbia gu ngbarago naye be gamahe? (b) Ni du ani ti gu ngbarago naye be gamahe, ada ani awirika yo?
17 Rengo ngaha, kparakusayo ti manga ani gu nyanyakipa sunge nga ga sa aboro ni abawiriki, ani nga aKristano nagbia ngbarago a be gamahe rogo kura agene. Ani rengbe ka kpara bete marã kusayo tipa ka fuhe ni gamahe si songodi ndikidi irisombori na si undo agu awirina du rogo zingo. (Ruka 16:9; 1 AKorindo 16:1, 2) Ani rengbe ka gbata agu agene rengbe ani rogo ka dia awirina kugume. (ARomo 12:13) Ani rengbe ka asada tirani nyanyakii ka ‘manga gupai ngba angba fu aboro dunduko, fu aguyo gbe duna ani ti idapase.’ (AGaratio 6:10) Na ani rengbe rogo kura taata agene, nga gu duna nyanyakipaha ka fu agamahe fu akuarani, wa gu nga ka ke waraga fuyo, ka fura na yo rogo terefuni, ka gamahe fuyo, ka fu undo fuyo, na ka gumba gu fugo fuyo rengbe ka ngarasa yo.
18 Ni gaani gamahe, ani nayugo gupai nga ani nawirika gu Barani nga ga ngbangbaturũ ko. Ani nayugo gaani nyemuse nga ga awirina a, nga guhe i aino ndikidi aKristano tini. (Yoane 13:35) Tingidapa agi apai re rengbe ka undo rani ani gbia gu ngbarago naye be gamahe.
Oni Rengbe ka Sakarogoyo?
• Waigu Yekova na Yesu amoi gu kpiapai nga ga gamahe rogo toroyo
• Waigu rengbe ani ka zio nyenye bakure na aboro?
• Gini apai rengbe ani ka mangaha tipa ka sa gaani sunge si duna diabese gbe?
• Waigu rengbe awirina dunduko rogo dungurati ka du ti gu ngbarago nga ga gamahe?
[Gu kpiaahe du ti kpewaraga 27-31]
Ho agude amangapai ni ringbisihe kuti ga avunguyo rugute, avunguyo nagbia bakere ngbarago
Ni sa ani aboro ni abawiriki, ani rengbe ka zio ndikidi bakure na yo
Yekova nasongoda sosono aboro
Rogo gu taata agene, nga gu duna nyanyakipaha, ani nagbia ngbarago be gamahe