Oni Ningi Angi Kindi Rogo Ga Yekova Sunge
“Oni ngí rogo Gbia yo dedede: mi agumba ha berewe, Oni ngí.”—AFIRIPOIO 4:4.
1, 2. Waigu wirina sa na gako aborokporo arengbe kaa ngi angi kindi, i ki vura zanga gayo ahe vurũ?
JAMES, nga gu Kristano du garãko 70 naraka Sierra Leone yo amangisunge nyanyakii rogo gako raka nabaha. Oni berẽnga pa gako ngbarago ho ko arengbe ni niyangaraha ka igo marã nga gu narengbe ka ngbe gu kporo akionga gbe ya, nadu na avurubambu yo rogo biama! Ono tie, tipa bete regbo fuo James ga na gako aborokporo kurogo gu kporo re, vura arikito dagba aboro gu ringara re, sidu i kini mo ka zo kpuyo nabaha. I azanga gayo kporo, ono i azanganga gayo ngbarago te. Tipagine?
2 James na gako aborokporo aadunguranga berãyo kuti pa guhe i azangaha te, ono kuti pa guhe nanye kindi. James nasakarogoyo niyaa: “Zavura ti regbo kere apai, ani anamanga adunguratise, kini gedi Baibiri, kini kparikpee kina sa, na kini gamu gu bete ahe nadu berani fu akuarani nga aboro. Ani arengbe kaa ngi angi kindi mbiko ani arengbe ka dungura berã rani kuti gu bawene pagume du dagba rani na Yekova.” Ni berã yo kurii gu wene apai i aagbia ngbarago behe, du gu kii gbe dagbaha nga duna wene ngbanya dagbayo na Yekova, gi ruru aKristano re arengbe kaa ‘ngi angi kindi.’ (2 AKorindo 13:11, NW ) Rengo ngaha, si adunga fuyo ni taatapai ka hi gayo arungo te. Ono i aahenga ngi rogo Yekova yo te.
3. Waigu bete bambata aKristano anangi angi kindi?
3 Bambata aKristano agbia a’asada wa kina gu James na gako aborokporo agbiaha. Si ki vura du wo, gu mokedi nangia Pauro ake agi afugo re fu agu aKristano nangia aEbere: “[Oni adu] na ngbarago ho i agbu gaoni ahe ni.” Fuo gure, Pauro asakipai tipa mburu gupai i aangi mbikoho: “Wa ini oni he ya oni na wene ahe be roni susi gure nga nyenye he.” (AEbere 10:34, pigipigi kekeapai nga gaani.) Ii, agu aKristano nadu rogo bambata kama agarã re aduna nyanyaki maabangirise. I anangera kumbatayo na kido tipa gbia guhe boro arengbanga ka gburihe ya—nga gu “kpakpari unga” kaa gberanga ya, rogo gu ga Mbori Kindo nga ga ngbangbaturũ. (Yugoti 2:10) Areme, gu gaani maabangirise nga ga aKristano—singia ga ngbangbaturũ watadu ga kpotosende—si rengbe ka undo rani ani ningi angi kindi zavura ho ani agbia tirani ni na agberango vurũ.
‘Rago Ngba Tironi na Maabangirise’
4, 5. (a) Tipagine gu ga Pauro rugute nga, “rago angba ti roni na maabangirise” aye tini ti wene regbo fu aRomo? (b) Gini apai rengbe ka sa Kristano bangirini go ti gani maabangirise?
4 Gu mokedi nangia Pauro angarasi agu akurako nga aidipase nadu Roma yo ya ‘rago ngba angba tiyo na maabangirise.’ (ARomo 12:12) Gu rugute re aye ti wene regbo fu aRomo. Agarã adanga bawe fuo ke Pauro gako waraga fuyo te, i ki gbia tiyo na kere rungosi, na i ki rungosi aguyo da ti kpio mbiko gu ndika Bakindo Nero afuhe. Zanga kapa, gu gayo idapase nangia Mbori afu gu kpakpari unga afu fuyo ko akidohe tipaha asongodiyo rogo gayo rungo. Ginipai tipa rani tigaani areme?
5 Ni aKristano, ani namaabangirani a tipa rungosi. (2 Timoteo 3:12) Kurii gure, ani ini gupai nga “rago gbia kuti mamu” namanga rani dunduko. (Batungusipai 9:11) Beno rengbe ka dia gu unga nga ga badiangbarani kusayo. Gu kaza nandu sa kpio rengbe ka imo vungu boro watadu wene bakureani. Ka ani amaanga berã rani dedede tipa gu gaani maabangirise nga ga Kindo ya, ani rengbe ka du ngbapai rogo toroyo ho ngbatunga agu a’asada akura ni re. Sidu, si ni wenepai fu rani ani sana tirani niyaa, ‘ “Rago nangba tire na maabangirise?” Mi naadia regbo bara wai dedede kaa berã kuriipaha? Ya mo gu Paradiso nambeda re ni parengo fere? Mi naberãpa tire koyo? Mi na kakaka nyemu gupai nga digido gi sinoraka re ye wa gu mi adu nani mbata ho mi awiriki rengo ni?’ Gi yangara sanahe re gu rẽ arẽ ani berẽ kuriihe nyanyakii. Tipagine? Bambiko kangia ani na wene auwakpotose, ki du rogo wene raka, na kini raki rogo gu papara kpotosende adunga vura rogo gbe ya, adunga zingo riahe rogo ya, watadu adunga agu agberango nga ga zegino rogo ya, bangirani rengbe arengba ka go—kandara ni betehe—ti gu nyanyaki zingo du tipa pa ye ga Mbori vovo zegino.
6. (a) Ho aPauro na Sira aarungo ni, ginipai i adungura berãyo kuti ni? (b) Waigu rengbe gu kpiapai nga ga Pauro na ga Sira ka ngarasa rani areme?
6 Kurii gure, Pauro arugu aRomo i “zádi pai azada rogo rungosi.” (ARomo 12:12) Pauro aazanganga inido tiko na rungosi te. Ti kura regbo sa, ko abi kumba rogo yuguyugupai nga guko nayambu ko ko “si ku Makedonia” yo tipa ka undo agu aboro nadu yo i wirikipai tipa Yekova. (Amokedi 16:9) Nibasa, Pauro, wa sa na Ruka, Sira, na Timoteo, andu nunguro na kurungba ku Putu yo. Ginipai naasungudo gu zaza amokedi re? Rungosi! Fuo tungusa yo pai rogo gu bagbata nga ga Makedonia nangia Firipoi, i ataki aPauro na Sira na akpudu na ki bafu yo ku bambukiso yo. Ziazia tie, anga agu aboro naaraka Firipoi yo azanga kina nyemu gu pangbanga nga ga Kindo sa te—ono i aduna kere sogote a. Ya mo gi gene apai a’ariatihe rogo re asa gi zaza amokedi re i zanga ngi? Oó. Fuo taka yo yo na ki bafu yo ku bambukiso yo, “ho si adu ni wa ka bebere yuru da aPauro na Sira i anikpari nibi aimina fu Mbori.” (Amokedi 16:25, 26, pigipigi kekeapai nga gaani.) Rengo ngaha, gu egetere naye be taka Pauro na Sira aasanga yo i ningi angi te, ono anga gure nangia gupai agu amokedi ue re adungura berã yo kuti ni te. I adungura berãyo kuriipa Yekova na kuriipa agu agene ko aafu maku fuyo rogo. Ni ‘zada yo pai rogo rungosi,’ aPauro na Sira adu ni wene kpiapai fu agu awirinayo nadu Firipoi yo na rogo kura arago.
7. Tipagine si aida tini ani kodi fugo tambuahe kurogo gaani akparakpee?
7 Pauro akepai ki ya: “Oni kpátagara kuti kpe kindi.” (ARomo 12:12) Oni naakparakpee ti agu aregbo du oni na abakabangirise? Gini apai oni naakparakpee tipaha? Si nawira oni nigumba kina boro gupai namanga roni fu Yekova na ki sana ko tipa undo. Ono oni rengbe arengba a ka koda afugo tambuahe kurogo tipa agu amaku oni angi mbikoho wa du rago re. Ho kpakarakpakaraapai akura ni, berãkurii gu wene apai Yekova amangaha fu rani naundo rani tipa ‘rago ngba ti rani na maabangirise.’ Davide, nga guko gako raka ahi be fudifudiapai, akepai ki ya: “Ako Yekova gi Mbori, mo angeesi gamo iiriwo mangaapai na gamo aberã du kono du ani ni; i arengba nga na ringbisa ha na mo te! Bambiko ka mi vura nitaki pande he ki nigumba pa ha, si asúsa gu ka i gedi he.” (Atambuahe 40:5) Wa kina Davide, ka ani aaberã dedede kuriipa agu amaku ani agbiaha be Yekova, si asa rani ani ningi angi nirengo.
Oni Kakuti Wene Berã
8. Ginipai naundo Kristano ni ningi angi kindi ho i anarungosi ni ni?
8 Yesu nangarasa apefuo ko ya i kakuti wene berã ho i agbia tiyo ni na a’asada nibakiakia. Ko nayaa: “Maku fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re.” (Matayo 5:11) Gini ndupai du berani ka duna ngbarago tii ngbatunga apai wa gure? Pa rengba ani ka ru nyanyakii barabangiri sogote nga gopai ya ga Yekova toro gudu kuri rani. Gu mokedi nangia Petero ayaa fu agu akurako nangia aKristano nadu ti gako regbo wee: “Ka i agbarasa rimoroni mbiko rimo Kristo, airamaku nga oni; mbiko gu toro nga ga taarimo nasunga ku ri roni, nga ga Mbori Ziazia Toro.” (1 Petero 4:13, 14) Rogo gu gene nga ga gako toro, Yekova aundo rani aundo ani hipai, na ni sangbanaha, ani kini ngi angi kindi.
9. Ginipai naundo bete awirina i bi nduapai kaa ngi angi kindi ho i aduni bambukiso yo tipa gayo idapase?
9 Zavura ho du ani ni rogo kereapai kisusi, ani rengbe arengba ka bi nduapai nga gu rengbe ani kaa ngi mbikoho. Gu Kristano du rimoko nga Adolf abi gipai re ya si wo. Ko naraka rogo gu ringara i aima zahe rogo tipa ga aDezire Yekova sunge tipa dungu agarã. Bambiko i asogo pa mbu gu gayo aida du mburuhe rii Baibiri, i azi Adolf na dungu kura abadiangbako nga adee na akumba ki saringbangayo na dungu agarã ku bambukiso yo. Raka nga ga bambukiso adu nikpakarakpakaraha, ono wa kina Pauro na Sira, Adolf na abakureako abi nduapai tipa fu tambuahe fu Mbori. I ayaa pa zio yo ku bambukiso yo aundo yo i nyakasi gayo idapase na ki sonosi nyanyakipa asino nga ga aKristano, ngbatunga gu du wa gamahe, nunga, na nyemu awirina. Ni kpiapai, ho zizi boro anigbia tiiso ni nga gu i anikedihe funi kporoyo, ni anagamaha fu akurani nga aidipase, nga aguyo tigayo nanabi agi akura agamahe re wa si naye be Yekova, nga yangara Bagamu “wene gamahe dunduko, na ziazia ũgamahe dunduko.” Ngbatunga gu mangaapai nga ga weneringise re anaye na ngbarago fu gu boro nanagama ahe na fu aguyo nanadiaha. Sidu, gu mangapai i aida si kuo gayo idapase, kina boro ho nirengo nanyakasihe rogo toroyo!—Yakoba 1:17; Amokedi 20:35.
10, 11. Waigu wirina sa amangipai sa agu asasanahe i aasana ri nani zanga piriga, nga gu gbanga zio aye fuoho?
10 I azi Ella, nga guri naraka a rogo gu ringara i aima zahe rogo tipa gu sunge nga ga Kindo tipa gbanga regbo tipa gupai nga ri aafura na kura aboro tipa gu gari maabangirise nga ga aKristano. Tipa adiwi muambe, i anasasana ri zanga piriga. Ho i aye ni na ri ni yangaraha ka gia gari ngbanga, i azi ri na agarã bawe kurogo gu bambukiso kura airisi Yekova adunga rogo ya. Ti gu regbo re, garã Ella adu gbua 24.
11 Rengo ngaha, Ella amaanga bangiiri tipa ka dia dungu agarã paranga ri kurogo gu vurubambu nga ga bambukiso te. Ono mbiko wa ri aarengbanga ka aria gupai nadu tipa ri ya, ri adiberã ka aria gari bipai. Sidu, ri atona kaa bi bambukiso wa kina boro gu gari rago du furi tipa manga dezirepai rogo. Ri nayaa: “Sunge tungusapai aduho gbe tipa mangaha, . . . da ti gupai nga agu agarã re ki susi ni kina ipo.” Fuo agarã susi bisue, i asasana Ella berewe. Ni ino yo gupai nga agu aparamarã nga ga bambukiso aarengbanga ka gbarasapa gari idapase te, abasanari agumba gupai furi nga: “Ani arengbanga ka kusa ro te; mbiko mo ata arianga sinoro te.” Ga Ella nyanyaki karagapai angia, “ono mi ima aria sinore! . . . Mi awere na wene aberã susi gu regbo mi arimi ku bambukiso no, na gimi idapase ima nyaka gbe susi gu nadu mbata!” Na ri agbia gupai kuti ni nga: “Ka oni aidanga ka kusa re ya, mi anye ku bambukiso no daho Yekova nika bihe ni nga si gu daada ko kusi re.” Pa zio Ella tipa agarã bisue na beberehe adianga gari ngbarago kusayo te! Ri awiriki wai ka duna ngbarago rogo agu apai dunduko ri abi tiri rogo. Pai ho rengbe oni ka wirikaha ti gari kpiapai?—AEbere 13:5.
12. Gine rengbe ka ye na zereda nga ga berã fu Kristano ho du ni ni rogo kpakarakpakaraapai?
12 Ka oni digisinga ha kuti gupai nga Ella na gu gamahe beri adunga be kura aboro ya te, nga gu nasa ri ri ru barabangiri ngbatunga gu kpakarakpakaraapai re. Ni fura ri tipa gu regbo nangia ga agu asasanahe ri asusi rogo rogo agu adiwi nadu mbata fu i sari ngbanga ri, Ella nayaa: “Mi natingidapa wai mi ari ngba rindire, sidu mi kini bi tire wa kina gundegunde bavurukporo.” Ono tie, Ella na nyanyaki idapase kuti Yekova. Ri ima ino wai kaa kido kuti ko. (Asanza 3:5-7) Ni sangbanaha, Mbori da ni ndikidi boro furi susi gu nadu mbata. Ri nasakarogoyo niyaa: “Ti agu aregbo dunduko mi anarimo kurogo gu bambu nga ga asasanahe, mi anibi zereda si niye kurire. . . . Gu regbo gupai re aniba bakere gunde tire, zereda anikii gbe a.” Yekova nangia mburu gu zereda re. Gu mokedi nga Pauro nasakarogoyo niyaa: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.”—AFiripoio 4:6, 7.
13. Gine nasa rani ani rugutirani na gupai nirengo nga ka gberangbii vura da tirani, ani du adu na gu ome ani aidaha tipa ka hihe?
13 Ella, nga guri i aima kusa ri ti gu regbo re, aangi angi kindi, rungosi ki vura du vurũ. Ri amangi gere, angianga mbiko gari ome ya, ono mbiko gu ome Yekova afuhe furi. Kina gu bangisa pai re nadu tipa gu mokedi nangia Pauro, nga guko nakepai ki ya: ‘Mi asámbua he zaaza ni ngbarago tie ti agu apai mi arungbura ti ni, ya gu ome nga ga Kristo du auru re, bambiko ho mi nirungbura ni, gu regbo gu tie du mi nyanyakii.’—2 AKorindo 12:9, 10.
14. Oni yugunga wai Kristano narengbe ka duna wene bipai tipa gupai naida ka asada ni na gupai rengbe ka duni sangbanaha.
14 Si rengbe ka du nga gu fudifudiapai oni agbia tironi tini areme, si kia ti gu wisigi ani pai tipaha herẽ. Avurũ, ka fudifudiapai vura ye kina rogo gini angbatungaha, si ni kpakarakpakarapai ka hi he. Ni kpiapai, si rengbe ka du nga gaoni bairasunge nabisirapa gaoni sunge gbe—kini bisirapa gaoni sunge kisusi pa ga agu abamangisunge du gayo aida nga ga pambori kia ti gaoni. Si rengbe ka du nga oni arengbanga ka gbata kura sunge te. Waigu rengbe oni kaa ngi angi kindi? Oni tingidipa Adolf na abadiangbako, nga aguyo gayo zio ku bambukiso yo ayugupai fuyo tipa i sonosi nyanyakipa asino. Ka oni mangi ndikidi asadatise ka sa ngbarago ti gaoni abairasunge—zavura “aguyo duhe nikpakarakpakaraha ka sa ngbarago tiyo”—oni asonosa ngbatunga gu sino aKristano du wa hipai na gbanga hipai. (1 Petero 2:18, NW ) Kurii gure, oni rengbe arengba ka da ni nyanyakipa bamangisunge, nga gupai rengbe ka kiiso agu amamu du tipa gbia wene sunge rogo kura uru. Awere, ani wisiginga bete agu agene rengbe ani ngbaha kaa ngi angi kindi rogo ga Yekova sunge.
Aria Gaoni Raka Si Du Taata Nandu sa Ngbarago
15-17. Ginipai arogotise ue ainihe nga si rengbe ka umbasi gayo fudifudiapai, wa i avuranga rengba ka dia mburu gupai naye nani dunduko kusayo ya?
15 Si rengbe ka du nga ngenga siapai beroni tipa ngbatunga gu sunge zegino rengbe oni kaa mangaha watadu tipa gu rago ka oni mangisunge rogo te, ono kura gaoni agene raka kinaho rengbe oni arengba kaa rugapaha. Ani wisiginga gipai du kusende re, nga gu namangi.
16 Arogotise ue nga aKristano ayambu bakumba sa ku kpuyo yo tipa riahe. Ti regbo gayo sungo rogo gu nyemu re, gu wirina na diako re avoto gupai fu gu bakumba re nga, tipa gu regbo susi bambeda kusayo, i aaberã gupai nga gu fudifudiapai nga ga raka ima furii omeyo. Wa si avura du nga i tibarayo ue dunduko gayo asunge aida i nimangihe ti aregbo dunduko na si kini idi asadatise sani, gene aadunga beyo wa ka i gbata kura sunge te. I aabakabangiriyo tipa wai i ka ndu kumbatayo na gipai re.
17 Ho i asana gu bakumba ni re tipa rugute, ko ayaa, “Oni aria gaoni raka si du taata.” Rogo gini gene? Gu kumba na diako re anadia asaa da ti biata na auru dunduko kaa ndu ku basunge yo na kini yego. Gu bakumba re, nga guko naima ino agu arogotise re wenengai, afu gu berã fuyo nga i berẽpa gate kporo kurogo gu rago du mbembedii na gayo basunge, tipa wa ka i rengbe ka umbasi bange agu asaa i anadiaha kaa ndu ku basunge yo na kini yego ku kporoyo na auru dunduko. Ko agumba gupai fuyo nga gu regbo i ka igoho re, i rengbe kaa diaha tipa ngerafuo kura nyanyakipa apai—watadu ka ongoda rogo. Kangia gu fudifudiapai nga ga raka nadia bete gaoni ngbarago kusayo, tipagine ka oni awisiganga gupai tini du tipa roni ka bihe singia oni rengbe ka gbia ongoda nimanga oni bete ariapai ya?
18. Tipagine duhe tini na nyanyakipaha tipa boro berẽ wenengai mbata fu dia ni berã sa apai?
18 Gu kura gene tipa umbasi fudifudiapai nga berã wenengai mbata fu diaberã sa apai. Ni kpiapai, Kristano sa adiberã tipa ka dua bambu. Ko kini mo ka sia gu gbakigbaki agene kpia dua bambu duni bakpakarakpakaraha, wa ko aavuranga dua bambu mbata vurũ ya. Awere, ko ini gupai nga ka ko arengbe arengba ka ne gu kpakarakpakaraapai nadu zanga nduhe re ka ko ‘awisigi pa gako nduge’ mbata fu sia ko gu gbakigbaki agene kpia dua gako bambu re. (Asanza 14:15) Gu kura Kristano aidi ka ru kugiipa dia bape fu kurako nga idipase. Kuti gayo giatise, si adu nga kangia gu wirina naadia bape re arengbanga ka gasaha te, gu wirina naru kugiipa dia gu bape re si ka du fuko ni dingisoro tipa gasaha. Ti tonatonaha, apai aandu andu wenengai, ono kusa, ka badibape amanganga gupai i agi tiyo tipaha ya. Bafubape agunde na ki sana baru kugiipa diabape tipa ko gasi gu bape re nabaha. Gure afudi baru kugiipa diabape nyanyakii. Ya mo ko arengbe ka ne gupai re wa ka ko aberẽ wenengai tipa agu apai dunduko du tipa dia bape mbata fu ida ko pa gu tindiro nga ga gasa bape?—Asanza 17:18.
19. Gini bete agene rengbe ani rogo ka umbasi gu fudifudiapai du rogo gaani raka?
19 Ho ani ambu ni, ka ani yaa digisinga ha kuti gupai nga, ani rengbe arengba ka umbasi bete gu fudifudiapai du kuri rani na ki gbia ngbarago ni umbasi ani bakio gu regbo ani adiaha ku pati wisigo Baibiri nisarani, kuti ngba sunge tungusapai, na ku pati adunguratise ya. Oó, ka ani ya manginga gure ya, mbiko gere nga gu nyanyakipa agene rengbe ani ka gbia ga Yekova ziazia toro rogo, nga gu du zuzuhe nga ngbarago. (AGaratio 5:22) Dedede, gu mangaapai nga ga aKristano nazambuasi rani, na si abanga mbugo tirani kisusi dedede te. (Matayo 11:28-30) Gu si awiraha gbe nga, agu asunge nga ga zegino na ambaro nasa rani ani duna mbugo, angianga agu apai nga ga toro ya. Wirika wai ka ndu ku barame yo ti wene saa rengbe arengba ka undo rani ome rani karagatihe kubaha. Wiri bete ongoda rengbe ka fu undo nibakerehe. Nathan Homer Knorr, nga guko namangisunge ni guni sa dagba agu awirina du rogo Riigbu Bipasunge nga ga aDezire Yekova da ti kpioko, anagumba gupai dedede fu amokedi nga: “Ho rago agbera ni tironi, gu bambata pai si aida oni mangihe nga ka ongoda tooni. Ngbaroni azera ka bi wai rengbe oni ka nyasa apai dunduko taata fuo ra oni wenengai yuru!”
20. (a) Ni guruhe, oni gumbanga pa agu agene rengbe ani rogo kaa ngi angi kindi. (b) Gini nduapai rengbe oni ka berãpaha nga gu rengbe ka sa roni oni ningi angi kindi? (Oni bi sanduki ti kpewaraga 17.)
20 AKristano na gu mamu beyo nga ga ndusunge fu gu “Mbori [nga ga] ngbarago” ko. (1 Timoteo 1:11, NW ) A wa bi ani he, ani rengbe kaa ngi angi kindi zavura ho ani agbia tirani ni na nyanyaki fudifudiapai vurũ. Sidu, ani moinga gu maabangirise nga ga Kindo barabangirani, ani kini mbakadi gaani bipai ho ka si aidaha ni, na ki sa gaani raka si du taata. Sidu, ka ani vura bi tirani kina rogo gini ngbatunga pai, ani akaragapai sa afugo gu mokedi nangia Pauro, nga gu nayaa: “Oni ngí rogo Gbia yo dedede: mi agumba ha berewe, Oni ngí.”—AFiripoio 4:4.
Oni Berẽnga pa agi Asanahe re Wenengai:
• Tipagine si aida tini aKristano moi bangiriyo nyanyakii kuti gu maabangirise nga ga Kindo?
• Gini apai rengbe ka undo rani ani ningi angi kindi rogo kpakarakpakaraapai?
• Tipagine si aida tini ani asadi ka aria gaani raka tipa si du taata?
• Rogo gini agene kura awirina a’aria gayo raka si du taata?
[Sanduki/kpiahe ti kpewaraga 27]
Gu Kura Nduapai Rengbe ka Sa Rani Ani Ningi Angi Kindi
Ni aKristano, ani na dungu nduapai berani nga gu rengbe ani kaa ngi mbikoho. Oni berẽnga pa agi apai naye re:
1. Ani ima ino Yekova.
2. Ani aima wirika gu rengo du rogo Fugo Mbori.
3. I rengbe ka mbupai fu rani ti gaani ingapai mbiko gaani idapase kuti ga Yesu motumo.
4. Ga Mbori Kindo nazogarago awere —vovo zegino nika ye mbembedii!
5. Yekova ima ye na ani kurogo gu paradiso nga ga toro.
6. Ani nagbia ngbarago be wene kodatise nga ga aKristano.
7. Ani na gu mamu berani nga ga du ti manga sunge tungusapai.
8. Ani ni unga rani, na ki duna bete ome tirani.
Bange kura nduapai wai rengbe oni ka gumbapaha nga gu rengbe ka sa roni oni ningi angi kindi?
[Gu kpiahe du ti kpewaraga 24]
APauro na Sira aangi angi kindi, zavura bambukiso yo a
[Gu kpiahe du ti kpewaraga 26]
Oni ima maaberã roni nyanyakii ti gu maabangirise nga ga ngbarago nga gu du tipa ga Mbori vovo zegino?