Asanahe Be Agedihe

Gine nga gu “ongoda” gu mokedi nangia Pauro afura tipaha rogo AEbere 4:9-11, na waigu boro ‘arimo kurogo gu ongoda re’?

Pauro akepai fu agu aKristano nangia aEbere nadu rogo bambata kama agarã ki ya: “Si du ongoda nga ga sabiti nasunguda ga Mbori aboro . . . . Bambiko gu ni narimi ku rogo gani ongoda yo ni aima ongoda a tigani be gani mangaapai, a wa Mbori aongodi be gako. Si du ani ka fu tirani ti ni nyanyaki ka rima ku rogo gu ongoda re.”—AEbere 4:9-11.

Ho Pauro afura ni tipa ongoda Mbori ti Gako sunge, si nawira ko aataabeko sa gupai du nikekehe rogo Bambata Pai 2:2, yo ani ageda gupai ni nga: “Ti saba uru Mbori ki nyasi gako sunge nga gu ko amangi he, saba uru ko ki ongodi ti gako sunge dunduko nga gu ko amangi he.” Tipagine Yekova atona kaa ‘ongoda tini rogo saba uru’? Nirengo, si aadunga wo mbiko ko aaida ka baomeko “ti gako sunge dunduko nga gu ko amangi he” te. Gu veresi naye fuo gure naundo rani ani girogo gupai yo re: “Mbori ki fu maku ku ri saba uru ki kpara ha ziazia, bambiko rogo ho Mbori aongodi be gako sunge dunduko nga gu ko afu ki mangi he.”—Bambata Pai 2:3; Yesaya 40:26, 28.

Gu “saba uru” adu kia ti agu auru sita dunduko naye mbata fu gu uru re, mbiko si Mbori afu maku kuriihe ki saha ziazia, watadu ki kparaha tipa kparakpara ringbisapai. Gini kparakpara ringbisapai nangiaha? Mbata kusayo, Mbori aima yugo gako ringbisapai tipa rikaaboro na tipa kpotosende. Mbori ayaa fu bambata kumba na diako wee: “Oni zúga azuga, ki nge ange, ki hisi kpotosende . . . ki zogo ho; ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.” (Bambata Pai 1:28) Wa Mbori avura tona apai auru kpotosende rogo gu gene nadu ni rengberengbehe, ki kusi aboro ni rengberengbe yo a, si adu nga si adia regbo ni gbangaha tipa aboro zogo kpotosende na ki saha ni gu paradiso nika hi be rengberengbe rikaaboro, a wa Mbori aringbisipaha. Rogo gi gene re, Mbori aongodi rogo “saba uru” rogo gu berã nga ko akusanga kura ahe ku auru kpotosende te, kini mangihe wo tipa ka mbu agu ahe ko aima kusaha si zugo ki da kuti wai ko aida si du. Ti digido gu “uru” re, si adu nga agu apai dunduko Mbori aringbisipaha nika da ni parengo. Bagizo gu ongoda re nga agarã wai?

Ni karaga ani tirani berewe sa fugo Pauro nga gu du rogo gu buku nga AEbere, ani nabihe ya ko ayugu gupai nga “ongoda nga ga sabiti nasunguda ga Mbori aboro” kindi, na ko angarasi akurako nga aKristano i asadi tiyo nyanyakii tipa ka “rima ku rogo gu ongoda re.” Gure nayugo gupai nga, ti gu regbo Pauro ake agu afugo re, gu “saba uru” nga ga ga Mbori uru ongoda nga gu naima tona agarã nasusi kusayo 4,000, aandu kindi kumbatayo. Si adigo ti kina gu regbo ga Mbori ringbisapai tipa rikaaboro na tipa kpotosende nika manga nabaha ti digido Zogarago Tipa Agarã Kutu nga ga Yesu Kristo, nga “gbia sabiti.”—Matayo 12:8; Yugoti 20:1-6; 21:1-4.

Gi wene maabangirise re nadu bangiri Pauro ho ko aasakapai ni tipa wai rengbe boro ka rimo kurogo ga Mbori ongoda. Ko akepai ki ya: “Gu ni narimi ku rogo gani ongoda yo ni aima ongoda a tigani be gani mangaapai.” Gere nayugo gupai fu rani nga, wa aboro avura du nirengberengbeyo ti tonatonaha, i dunduko naarimonga kurogo ga Mbori ongoda ya. Gipai re adu mbiko aAdamu na Eva aadunga na irisa tipa ga Mbori ongoda rogo “gu saba uru” ni dia yo gako ringbisapai kugume tipa gbanga regbo te. Kuba gupai nga i mangihe wo, i asamungu kuti Mbori kini idi kaa manga apai ngbariyo. Nirengo, i aidi na gu buro nangia ga Satana kuba gupai nga i di gu rugute kugume Mbori afuhe fuyo ni nyemuse. (Bambata Pai 2:15-17) Ni sangbanaha, i aarengbanga berewe ka raka nyeanye kindi rogo paradiso auru kpotosende te. Natona ti gu regbo re ka ndu kumbatayo, rikaaboro dunduko adani akanga fu ingapai na fu kpio.—ARomo 5:12, 14.

Ga aboro samungu aagbarasanga pa ga Mbori ringbisapai te. Gako uru ongoda nandu kindi kumbatayo. Ono tie, Yekova aima manga wene mbakadapai ni nyemuse, nga ka tumorii aboro dunduko rogo Wiriko yo nga Yesu Kristo. Agu aboro dunduko duna ida kuti gu tumorii re nasungudo gupai kumbatayo nga i kusi yo kusayo be ingapai na be kpio na i ki gbia ongoda. (ARomo 6:23) Gure nga ndu gupai Pauro angarasi akurako nga aKristano tini ‘i ongodi be gayo mangaapai.’ Si aidi gupai beyo nga i idi na ga Mbori mbakadapai tipa bata, ka i agbatanga bata ngba gayo gene, wa gu Adamu na Eva amangihe ya. Si aidi a i mbu orafuo gu gayo asunge i amangaha tipa ka diapai riyo kusayo nisayo.

Nirengo, gupai nafu ongoda fu boro na kini zambuasi ni nga, mbu ni pa gani kungbo asunge nga ga gbangbati kini mangi gupai Mbori akpinyemuhe. Yesu nayamba rani niyaa: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. Oni dí gi gonga ku gorõroni, ki wiriki pa re; bambiko bayee boro nga mi nga irazerangbaduse, oni ki bi ongoda tipa mbisimoroni. Bambiko kii nga gi gonga te, na gi tindiro ni aakpura ha.”—Matayo 11:28-30.

Ga Pauro sakapai tipa ga Mbori ongoda na tipa wai rengbe boro ka rimo kurogo gu ongoda re angarasi agu aKristano nangia aEbere nadu Yerusarema yo nirengo, nga aguyo nahi bakere rungosi na sawia mbiko gayo idapase. (Amokedi 8:1; 12:1-5) Teketeke a, fugo Pauro rengbe ka ngarasa agu aKristano du areme. Ni ino ani gupai nga, gu ga Mbori mokido du tipa pa sa kpotosende ni paradiso tii gu ruru zogarago nga ga gako Kindo ima mbeda, si naida ani ongodi a tigaani be gaani mangaapai na kini asadi tirani nyanyakii ka rimo kurogo gu ongoda re.—Matayo 6:10, 33; 2 Petero 3:13.

[Gu kpiahe du ti kpewaraga 31]

Ga Mbori mokido tipa sa kpotosende ni paradiso amanga ti digido gako uru ongoda