Sovura Na Diabese Kuti ‘Kiwe Tii Kpotoseyo’
“Gimi undahe [“weneringise arẽnga aboro tipaha ya,” “NW” ] rengbe foro.”—2 AKORINDO 12:9.
1, 2. (a) Tipagine si aidanga berã rani vundu tini zavura ho ani agbia a’asada ni na fudifudiapai ya? (b) Tipagine si aida ani du tini na kido zavura ho ani agbia tirani ni ti a’asada vurũ?
“IARÚNGOSI agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.” (2 Timoteo 3:12) Tipagine duhe tini wo? Mbiko Satana nanyakasa afugo ya aboro namangasunge fu Mbori tipa kina agu ahe i aidaha beko, na ko na’asada tiko rogo apai dunduko ka sa gako pai si du nirengo. Ti kura regbo sa, Yesu arugu gako ruru amokedi ki ya: “Satana [n]akpi nyemu ka dia roni ka igita roni wa tunga.” (Ruka 22:31) Yesu aima ino gupai nga, Mbori nambugene ambu fu Satana ko asadi rani na agu apai duni imiimihe. Rengo ngaha, anga gure nayugo gupai nga gu fudifudiapai dunduko ani agbia tirani ti ni naye kina boro be Satana watadu be gako adaimona te. (Batungusipai 9:11) Ono Satana na nyemu ka mangasunge na agu apai dunduko du kuvuru beko tipa ka sa rani ani he kakuti gaani ruru mangaapai.
2 Ziazia Kekeapai nangarasa rani ya ka ani mbunga agu a’asada nakura sa rani si iriwo tirani ya. Agu apai dunduko ka mangi rani, anga si ni vovo apai watadu ni agu apai nika tunguo rani atunguo te. (1 Petero 4:12) Nirengo, kina “ngbatunga agi ahipai re namanga [awirinarani dunduko] du rogo zegino.” (1 Petero 5:9) Gupai Satana amangaha areme nga ka ye na kere fudifudiapai kisusi fu ga Mbori amoyambu dunduko. Rago nangba ti Bakitingbanga ka bi gupai nga ani narungo be gu dungu fudifudiapai du wa akiwe. Tipa ka manga gupai re, ko namangasunge na gako zegino rogo gu gene nawira gbe wa ka si gbia kura akiwe kuti agu ‘akuraha ima du tii kpotoraniyo,’ watadu ka sa gu kiwe ima duho si imi kisusi. (2 AKorindo 12:7) Wa vura duhe wo, si aidanga ani mbu Satana na gako avura kuti rani si sa rani ani he kakuti gaani ruru mangaapai te. A wa Yekova nika ‘mbakada gene’ ani hi asada, ko amanga kina gu bangisapai re ho ani agbia tirani ni ti gu fudifudiapai du wa akiwe tii kpotoraniyo.—1 AKorindo 10:13.
Wai ka Sovura na Diabese Kuti Kiwe
3. Wai Yekova akaragapai ho Pauro asana ko ni ko di gu kiwe kusayo nadu tii kpotokoyo?
3 Gu mokedi nangia Pauro ahõpai be Mbori ko di gu kiwe nadu tii kpotokoyo kusayo. “Tipa gi pai re mi azungadi Gbia bara biata, ya si guari ti re.” Gine nangia ga Yekova karagapai kuti gi ga Pauro kakaka sanahe re? Ko ayaa: “Gimi undahe [“weneringise arẽnga aboro tipaha ya,” NW ] rengbe foro, bambiko gi tandu du ni mbakadimbakadi he ziazia rogo rungbura yo.” (2 AKorindo 12:8, 9) Ani wisiginga gi ga Mbori karagapai re tipa ka bi wai rengbe he ka undo rani ani sovura na diabese kuti agu apai naimisa rani wa akiwe.
4. Rogo gini agene Pauro agbia undo be ga Yekova weneringise arẽnga aboro tipaha ya?
4 Oni kparia gupai nga, Mbori angarasi Pauro ko duna tambuahe tipa gu weneringise arẽnga aboro tipaha ya nga gu i aima taaha fuko rogo Kristo yo. Nirengo, Mbori aima fu maku fu Pauro nibakerehe rogo dungu agene. Ni nyemuse, Yekova aidipa gu mamu fuko nga ga duni bawiriki, wa ko avura du mbata ni kere barungosi apefuo Yesu vurũ. (Amokedi 7:58; 8:3; 9:1-4) Fuo gure, ni weneringise Yekova afuku dungu iiriwo asunge na amamu nga ga kura apai fu Pauro. Gupai rengbe ani ka wirikaha be gipai re si ziazia, nga, zavura ti agu aregbo gbere apai kubara rani yo, ani kindi na dungu amaku nga gu rengbe ani ka duna tambuahe tipaha. Si aidanga ani mbu agu a’asada nagbia rani si sa rani bangirani go ti gu dungu weneapai Yekova namangihe fu rani te.—Atambuahe 31:19.
5, 6. (a) Wai Yekova ayugu gupai fu Pauro nga Gako ome “ni mbakadimbakadi he ziazia rogo rungbura yo”? (b) Wai ga Pauro kpiapai asa Satana ni iraziree?
5 Ga Yekova weneringise arẽnga aboro tipaha ya nirengberengbehe rogo kura agene. Ga Mbori ome ima kio kisusi gu ani aida tipa si undo rani ani hi a’asada. (AEfeso 3:20) Yekova ayugu gupai fu Pauro nga Ko namanga gako ome “ni mbakadimbakadi he ziazia rogo rungbura yo.” Wai ko amangaha? Ni nyemuse, ko afu gu ome fu Pauro dunduko ko aidaha tipa ko sovura na diabese kuti gako a’asada. Tipa Pauro tigako, gako hipai na pa kido ko kuti Yekova ayugu gupai fu aboro dunduko nga, ga Mbori ome aduna diabese rogo gi kumba nadu ni rurungbura ko na nangia boro ingapai re. Awere oni binga sangbana gipai re kurii Bakitingbanga, nga guko nayaa aboro namangasunge fu Mbori kinaho du apai ni wenengai kubara yo yo na ka pai adunga ho nafuda yo ya. Ga Pauro kakuti ruru mangapai adu wa kina yawa kpakpu bakitingbanga!
6 Pauro nadu re, nangia guko nakodi tiko mbata kuti Satana ka sovura kuti Mbori, kingia kere basogo aKristano, gu Farusi nadu zaaza rogo gako sunge, zanga kapa, kingia gu kumba nadu rogo wene raka mbiko i abatika ko kurogo gu kporo nadu na kumuko. Ono awere Pauro aamangasunge fu Yekova na fu Kristo ni “gu umba ni dagba amokedi yo dunduko.” (1 AKorindo 15:9) Fuo duhe were, ko amoi tiko kutiibe gu pagbia nangia ga gu riigbu bipasunge nga ga aKristano nadu rogo bambata sa kama agarã. Na wa kiwe avura du tii kpotokoyo, ko aahipai kindi niruru mangapai. Agu a’asada dunduko Pauro agbia tiko ti ni azeresanga kpotokoyo te, nga gupai tie nagbere ti Satana nikerehe. Bangiri Pauro agonga ti gu maabangirise ko adu nani tipa ka du ti gu zogarago nga ga Kindo nga ga ngbangbaturũ nga ga Kristo na kura aboro te. (2 Timoteo 2:12; 4:18) Anga kiwe aduho, ka vura ima wai narengbe ka zeresa kpotokoyo te. Ani nyenga anye kuti gaani ngara wa kina gure! Ni songoda Yekova rani na gaani fudifudiapai, ko nade kiki kuti rani ni fu ko gu mamu fu rani nga ga yugo Satana ni iraziree.—Asanza 27:11.
Gu Mbakadimbakadiapai nga ga Yekova na Nyanyakipaha
7, 8. (a) Rogo gini gene Yekova afu ome fu gako amoyambu areme? (b) Tipagine du geda Ziazia Kekeapai tini na auru dunduko ni nyanyakipa pai tipa ka sovura na diabese kuti kiwe tii kpotoseyo?
7 Areme, Yekova nafu ome fu rani nga ruru aKristano rogo gako ziazia toro, rogo Fugo ko, na kube akuarani aKristano. Wa kina gu mokedi nangia Pauro, ani rengbe ka pepa agu apai nafuda rani fu Yekova rogo kparakpee. (Atambuahe 55:22) Wa vura duhe nga Mbori avuranga dia gaani fudifudiapai kusayo te, ko rengbe arengba ka fu tatamana fu rani ani sovura na diabese kuti ni, zavura gu adunga bahihe tini ya vurũ. Yekova rengbe arengba a ka fu ome fu rani ani hihe, kini fu gu “bakere tandu susi” tipa si fu undo fu rani ani hipai.—2 AKorindo 4:7.
8 Wai ani agbia ngbatunga gu undo re? Si naida ani wisigi Fugo Mbori zanga nyomoro, mbiko yo rengbe ani ka gbia ndikidi wasa ni. (Atambuahe 94:19) Rogo Ziazia Kekeapai, ani nageda agu afugo yo nazio ngbaduraniyo, nga agu afugo ga Mbori amoyambu anazungodi Mbori nani tipa undo. Gu ga Yekova akaragapai, nga gu nanakoda afugo wasa dedede, ni agu afugo si aida ani berẽ kuriihe. Wisigo ani fugo Mbori anyakasa rani si ki da ziazia nga, “gu bakere tandu susi ye[he] be Mbori, be rani te.” A wa ani aida ka ri ndikidi riahe na auru dunduko tipa si rigi kpotorani na ka fu ome fu rani, kinawo a si aida ani naariga tirani na afugo Mbori dedede. Ani naamanga gipai re? Ka ani mangihe wo, ani abi gupai nga, “gu bakere tandu susi” ani agbiaha be Mbori aundo rani aundo ani hi agu apai dunduko du wa akiwe rengbe ka rupo rani awere.
9. Wai rengbe abaakumba ka undo agu aboro nasovura kuti fudifudiapai?
9 Agu abaakumba ni aKristano nagunde ti Mbori rengbe ka du “wa kina bagbuko be [gu] yuge” nga ga rungo, ni “okooko ba be gugugu yuge” nga ga fudifudiapai. Agu abaakumba naida gi ringbisapai re du tipa yo, nasana Yekova rogo umbasitise ko fu ‘gu mirãse fuyo nga ga abayugupai’ tipa i rengbe ka ino wai ka karagapai na ruru afugo fu agu aboro narungo. Agu afugo nga ga abaakumba rengbe ka du wa gu mai nana zoo kini zeresi toro rani ti regbo fudifudiapai na kini fu wasa fu rani ti regbo gbegbereapai. Ni ‘sóngoda abaakumba agu aboro narungbura,’ i naundo awirinayo nirengo nga aguyo vura kaa rungbura watadu kpotoyo yo nazere mbiko gu bete akiwe du tii kpotoyo yo.—Yesaya 32:2; 50:4; 1 ATesaroniko 5:14.
10, 11. Wai rengbe ga Mbori amoyambu ka ngarasa kura aboro nga aguyo narungo be kere a’asada?
10 Ga Yekova amoyambu dunduko nibasasa ni papara agu aKristano duni kpamiakpamia yo. Ii, ani “ni ba sa sa nga apa akuarani” ki du tii gu dingisoro ru aru ka ‘kpinyemu akuarani.’ (ARomo 12:5; 1 Yoane 4:11) Wai ani amanga gi sunge duni gu dingisoro ru aru fu rani re? Kuti sangba 1 Petero 3:8, ani namangaha wo ni ‘du ani na nunga akuarani ki duna nyemuse tirani nga ga awirinaa, ki duna weneringise koyo du yo ni.’ Tipa agu awirinarani nasovura kuti gu fudifudiapai naimisa yo wa kiwe tii kpotoyo yo, singia i nga aparanga watadu sosono aboro, ani dunduko rengbe ka undo yo. Rogo gini gene?
11 Si naida ani asadi tirani ka ino pai tipa agu apai i arungo behe. Ka ani du sakparakpa, watadu zanga nunga yo, si rengbe ka imisa yo susi zanga ino ani he. Pa ino ani agu apai nafuda yo fõngbaduraniyo du wa ka si sa rani ani banda tirani ti agu apai ani apehe, na gu gene ani apehe rogo, na gu gene ani amangapai ngbaha. Pa manga ani yo rogo wene sino na kini ngarasi yo rengbe ka fu undo rogo zeresa bete yososo egetera agu akiwe naimisa yo. Ni manga ani he were, ani kini yugu gupai nga, ani ni agu aboro nanyakasa yo nirengo.—AKorosaio 4:11.
Gu Gene Bete Aboro Asovura Ngbaha na Diabese
12-14. (a) Ginipai Kristano sa amangihe ka sovura na diabese kuti kenisa? (b) Wai awirina gi wirinarani re rogo toroyo asongodi ri na ki ngarasi ri?
12 Wa ani ambeda na digido gi yangara arame re, ‘arungo’ nikaa kio kina kumbatayo na auru dunduko. (Matayo 24:8) Si ki ta du were, si nawira aboro dunduko nika gbia tiyo agbia na a’asada auru kpotosende, gbe ga Yekova ruru amoyambu, nga aguyo nagbata gene ka manga gupai ko akpinyemuhe. Ni kpiapai, oni berẽnga pa gu Kristano naamangasunge tungusapai ti aregbo dũ. I abi gu kaza tiri nga kenisa na si ki idi i gbaha tiri ka kusa gu undu pasio kusayo tiri ninaakusa sure na ka kusa gu kuraha berewe ninaakusa gu ime kure asungo rogoho. Ho ri aini gupai ni gbiakuti kumbaari nga gi kaza re ima zio ri, i tibarayo ue nibasa akpari fu Yekova kakaka kini zungodi ko ko undo yo. Fuo susa regbo kusa, ri ayaa zereda aye kurii yo nga gu i aberãnga ya ka si mangi ya. Wa si avura du wo, ri ahi pai ni gbangaha vuru gu regbo kaza anatazinga na kini zere, gbe ho ri anahi egitere agu aziga ni ri anadiaha.
13 Tipa i mangipai tipa gari kaza, gi wirinarani re gbiakuti kumbaari a’asadi tiyo ka ino dungu apai tipa kenisa. Ri asana gari monganga tipaha. Rogo agu akpewaraga nga ga Ngbaõbambu Sinziri na ga Awake!, na rogo gu kura abuku nga ga aKristano, ri abi apangbanga yo nga ga agu aboro gi kaza re aima zio yo mbata furi na ki bi wai i asovura na diabese kuti gu ima ngbaduseyo si aye nani fuyo. Ri agedi gu papara Ziazia Kekeapai narẽ na gipai re nga gu nayugopa ga Yekova tandu ka songoda gu gako aboro du rogo fudifudiapai wa ngbatunga gure, na ki gedi gu kura apai a rengbe ka fu undo.
14 Gu kura papara kekepai sa rogo magazini tipa wai ka sovura na diabese kuti zanga du na maabangirise aduna gi veresi re rogo: “Gu ni nakpara tini nagbata kina gu pai ni akpi nyemu he.” (Asanza 18:1) Sidu, gu papara kekepai re afu gi rugute re rogo (pa-Ngirisi): “Oni Sovura Kuti Kpara Tironi Kusayo ti Akuaroni.”a Fugo gu wirinarani re nayaa: “Dungu aboro aya fere i aakpara fu Mbori tipa re; aguyo anafura na mi rogo terefuni. Abaakumba ue anaye ka bi re dedede. Awirina anakekeda ambumbudo fere na kekeapai ti dungu akadisi. Aguyo anaye ka manga riahe fere. Kurii gure a, dungu yo nanagasa re ku bambungua yo.”
15-17. (a) Wai Kristano sa asovura na diabese kuti gu fudifudiapai nakuru sari be agu abeno nga ga atarambiri ri atiwi nani? (b) Gini undo agu aboro du rogo dungurati afuhe furi?
15 Ga Yekova moyambu tipa gbanga regbo du New Mexico yo Amerika yo atiwi na tarambiri bara ue. Ri aho ti gori na kpurunga aberi, si kini kiisi gu kuru kaza naima du tiri nga gu ri aima digo nisovura kuti ni tipa agarã susi 25. Ri nayaa: “Si adu fere niba mbumbuhe ka banda rire nitumbatumbaha kuari na ka tinda gu wiri tooni tindiro du baroãha wa akiro ue. Ono kakaka kparakpee fu Yekova ima undo re bakere gbe. Na agu apapara kekeapai nadu rogo aNgbaõbambu Sinziri nga gu ani anawisigoho anaundo re a. Gu kuraha sa asakipai tipa Mika 6:8, kini tingidi gupai nga, pa ta boro na Mbori rogo umbasitise, rogoyo nga boro ini pa agu apai ni arengbanga ka mangaha ya. Si aundo re mi ini gupai nga, wa apai avura gbera kubara re yo, si aidanga kpotoreyo zere te, wa mi avura nidi kina bete regbo gbua kuti ngba sunge tungusapai tooni ti gu mi aidaha vurũ. Mangasunge fuko na wene ndu mangaha, nga gupai nyakipaha gbe.”
16 Ri atingidi gupai a nga: “Abaakumba anatambua re dedede tipa gimi bakere asadatise ka du pati adunguratise na ka ndu ku gene sunge tungusapai yo. Rukutu agude anapaa kuti re nidudungo yo re. Anazakigene anamangaapai na mi rogo zerangbaduse, i ki da nani ti gupai nga, rogo agu auru bakura tipa tungusapai anadunga tire ya, i ana’aria agu apai i asogima mangaha. Ho gaani dagbarago aniduni na gbegbere wege, i anadia re na yo ani ndu ka biko agu aboro berewe i afura na yo mbata tipa rengo watadu ani ndu ka wisigo Ziazia Kekeapai na agu aboro i naawisigoho na yo. Na wa si adu nga mi arengbanga ka tinda mangu na abuku rogoho te, gu kura abatungusipai nanamaa gimi abuku kurogo gayo amangu ho ani anandu ni ku gene sunge tungusapai yo.”
17 Oni kparia pa gu gene agu abaakumba nga ga dungurati yo amangipai rogo ka undo agi awirinarani re i sovura na diabese kuti gu gayo akaza nadu wa akiwe. I afu wene undo nga ga weneringise i ambakadihe si duni ziga tipa ka nyasa na gu ndikidi azingo nangia ga agi awirinarani re, nangia ga toro, ga kpotose, na gu nadu ngbaduyo yo. Anga gure nangarasa roni oni fu undo fu agu wirina narungo be fudifudiapai tee? Agu roni nga aparanga oni rengbe arengba a ka fu undo fu agu aboro du rogo dungurati nga aguyo nasota na akiwe tii kpotoyo yo.—Asanza 20:29.
18. Gini ngarasahe rengbe ani ka gbiaha be agu apangbanga raka i akusihe rogo agu amagazini nga Ngbaõbambu Sinziri na Awake!?
18 Agu amagazini nga Ngbaõbambu Sinziri na Awake! aima kusa dungu apangbanga tipa aDezire nga aguyo nasovura na diabese kuti agu apai naafuda yo, na si a na apangbanga aguyo nasovura kindi kuti fudifudiapai rogo gayo raka. Wa oni kaa geda ngbatunga gu papara kekeapai re dedede, oni nika bi gupai nga, dungu agu awirinaroni nga ga toro yo rogo zegino dunduko aima digo nihi zingo mosoro, kpio abadiangbayo be agu agberango naye be gu mangapai nga ga zegino, na gu kereapai vura aye nani. Gu kurayo naraka na agu akaza nangbundasi yo. Gu taata apai rogo raka nga gu agu aboro duna wene kpotoyo abi paha gbua taata, dungu agu aboro nawoka arengbanga ka mangaha te. Gayo akaza ni kere asada fuyo, gbe ho i arengbanga ni ka manga gu sunge nga ga aKristano wa i aida ka mangaha ya. Nga gu bakere tambuahe du yo nani tipa gu undo awirinayo afuhe fuyo, gu rukutu yo na gu sosono yo!
Hipai Naye na Ngbarago
19. Tipagine Pauro arengbe tini ka duna ngbarago zavura gupai nga ko aduna gu fudifudiapai na arungbura nadu wa akiwe vurũ?
19 Pauro aduna ngbarago ka bi wai Mbori angarasi ko. Ko ayaa: “Mi asámbua he zaza ni ngbarago tie ti agu apai mi arungbura ti ni, ya gu ome nga ga Kristo du auru re. Si du mi nangi angi ti ni mbiko agu apai rungbura mi ti ni, mbiko agu apai namanga re, mbiko adingisaro, mbiko arungosi, mbiko fudifudi apai, tipa rimo Kristo; bambiko ho mi nirungbura ni mi nidu ho nyanyaki.” (2 AKorindo 12:9, 10) Mbiko kina boro gupai namangi Pauro, ko aduna kido ki ya: “Si adu nga wa mi nagumba pa zingohe te, bambiko mi aima ina pa sunga zezeredi rogo gu pai du mi rogoho. Mi ini pa umbasiti, mi ini pa kumuko, rogo apai ni ba sa sa na rogo apai dũ, mi ini gu pai nga mbi na ra na gomoro a, nga kumuko na zanga he a. Mi rengbe na manga apai dunduko rogo gu ko nanyakasa re.”—AFiripoio 4:11-13.
20, 21. (a) Tipagine rengbe ani tini ka gbia ngbarago be berã ani riipa agu ahe ani “abi nga ha ya”? (b) Gine nga bete agu ahe ani “abi nga ha ya” ani amaabangirani ka bihe rogo Paradiso auru kpotosende?
20 Sidu, ni hi ani gu fudifudiapai dunduko du wa kiwe tii kpotoraniyo, ani rengbe ka gbia bakere ngbarago rogo yugo gupai fu aboro dunduko nga, ga Yekova ome ni mbakadimbakadihe nabaha rogo gaani rungbura. Pauro akepai ki ya: “Ani arungbura nga te; . . . tororani du ku vuru he yo i nambakada ha waragoagira. Bambiko gaani gberãngbi du ni aakpura ha nga gu nanye ngbutuko, si nambakada nyenye rõrõi taarimo tipa rani susi bakere gbe; wa ani angera . . . [kuti agu ahe] i abi nga ha ya. Mbiko agu ahe i . . . abi nga ha ya, si nanye anye kindi.”—2 AKorindo 4:16-18.
21 Dungu ga Yekova aboro areme na maabangirise ka raka rogo gako Paradiso nga ga kpotosende na ka gbia ngbarago be agu amaku kido ko he tipaha. Ani rengbe ka berãpa ngbatunga agu amaku re areme ni agu ahe ani “abi nga ha ya.” Ono tie, regbo nambeda ho ani ka bi agu amaku re ni ni bangirani, ii, na ki gbia ngbarago behe nyeanye kindi. Gu sa dagba ngbatunga agu amaku re nikangia zereda be zanga ima berewe be gu fudifudiapai du wa kiwe! Wiri Mbori nika ‘gbarasa ga bakitingbanga mangaapai’ na ki “gbarasi gu ko rogo kpio yo, nadu na tandu kpio.”—1 Yoane 3:8; AEbere 2:14.
22. Gini kido na gini nyanyaki kakutipai si aida ani du nani?
22 Sidu tie, ka kina gini ngbatunga kiwe vura du tii kpotoraniyo areme ani asovura kuti ni, ani kakuti sovura kindi. Wa kina Pauro, ani aduna ome ka mangaha wo mbiko gu wene sino nga ga Yekova, nga guko nafu ome fu rani zanga ringi. Ho ani kaa raka ni Paradiso yo auru kpotosende, ani ataasa rimo Yekova gaani Mbori na auru dunduko tipa gu iiriwo apai dunduko ko namangihe tipa rani.—Atambuahe 103:2.
[Gu rukutu kekeapai du bandu kpewaraga yo]
a Oni bi gu papara kekepai du riihe nga “The Bible’s Viewpoint: How to Cope With Despair,” rogo gu Awake! nga ga Merekoko ti rameru 8, rogo 2000.
Gaoni Karagapai Nga Gine?
• Tipagine Bakitingbanga a’asada tiko tini ka sa aKristano i he kakuti gayo ruru mangapai, na rogo gini gene ko amangaha?
• Wai Yekova amanga gako tandu si “du ni mbakadimbakadi he ziazia rogo rungbura yo”?
• Wai rengbe abaakumba na kura aboro ka ngarasa aguyo naima be fudifudiapai?
[Gu kpiahe du ti kpewaraga 13]
Pauro akparikpee bara biata ya Mbori di gu kiwe kusayo nadu tii kpotokoyo