Oni Rugu Gaoni Agene Ni Agu Arugute Nga Ga Mbori
‘Yekova nayugopai foro si undo ro.’—YESAYA 48:17.
1. Wai Bakusiahe ayugo gene fu aboro?
WA ABORO birĩ-inohe amangasunge nyanyakii tipa ka ino gu gbugbuapai du rogo haurago, ngbayo nazera ka bi bakio gu ome sukadi yo ho ndendende kurogo agu ahe du pati rani rogo haurago. Gaani uru, du bakioho ku bebere rago ringbisihe na ga kura akerekuru, nakusa babakere bakio ome kisusi. Bakusiahe rengbe arengba ka banda ngbatunga gu barorõi aũ ngbangbaturũ re kutii gako bakere ome na ki rengbe ka mangasunge nani a wa ko akpinyemuhe. (Eyobo 38:32; Yesaya 40:26) Ono, ginipai tipa rani, nga agu aboro duna ranirii ka siapai, ki duna gu tandu nga ga manga rurupai, ka sakapai berã rani yo, na ki rengbe a ka ino agu apai nga ga toro? Gini gene Bamangirani abihe ya si ngbaa tipa ka yugo gene fu rani ngbaha rogo gaani raka? Ko nayugo gene fu rani ni gako rengberengbe andiko na ni gako tumbatumba arugute tipa mangaapai, kodihe kuti gaani sangbakpotoyo nga gu ani aima rabaha wenengai.—2 Samuere 22:31; ARomo 2:14, 15.
2, 3. Gini ngbatunga giasangba nafu ngbarago fu Mbori?
2 Mbori nagbia ngbarago be agu aboro duni airatatamana nasia gupai nga i naida ka giasangba ko. (Asanza 27:11) Kuba gupai nga ko mbakadi rani ani naamanga apai ku bitimo wa gu makana namangapai zanga berãpai, Yekova ambakadi rani ni agu aboro du ngbariyo ka siapai tipa wa ka ani diberã nga kina rani nitirani ka manga gupai duni ruruhe.—AEbere 5:14.
3 Yesu, nga guko nanamanga apai teketeke wa Bako, agumba gupai fu gako abawiriki nga: “Ka oni amanga agu apai mi arugu roni kuti ni, abadiangbare nga oni. Wa du rago re mi ayamba nga roni ni amoyambu te.” (Yoane 15:14, 15) Ti agu aregbo nadu bakuru kusayo, kanga anadunga na rengo beni ka sia pai te, ono kina irisa sangba bairani. Ngba kura gene, aboro nagbakure na akurayo mbiko gu wene asino i abihe tiyo. Sidu, ani rengbe arengba ka dani abakurea Yekova. (Yakoba 2:23) Gi pabakure re nanyaka be gu nyemuse du dagba tirani na ko. Yesu agbia giasangba Mbori kuti nyemuse ho ko aya ni: “Si ngia boro nakpi nyemu re, ni ka kuti gi pai. Buba akpi nyemu ni akpi.” (Yoane 14:23) Tipa ani rengbe ka manga gupai re, na tipa ko rengbe ka banda rani wenengai, Yekova nayamba rani ani raki kuti gu gako arugute adunga ngburungburu ya.
Gu ga Mbori Arugute Adunga Ngburungburu Ya
4. Wai rengbe oni ka sakarogo agu arugute adunga ngburungburu ya?
4 Gine nga agu arugute adunga ngburungburu ya? I nasakarogo agu arugute adunga ngburungburu ya ya si nga ‘bambata rengo: gu bambata andiko rengbe boro arengba ka giarogoyo, gupai idi yo kuti ni ya si nga rengo i amaa mburu agu akuraha riihe watadu i adia agu kuraha ti vuroho.’ (Webster’s Third New International Dictionary) Sirisiri wisigo Ziazia Kekeapai nayugo gupai fu rani nga, gu Barani nga ga ngbangbaturũ ko nafuka bambata arugute fu rani nga gu du tipa dungu apai nibakiakia rogo gaani raka. Ko nata manga gipai re kini berẽpa gupai nika undo rani nyeanye kindi. Gupai re na ngbanya kuti gupai gu tatamanatatamana Bakindo nangia Soromo akehe ki ya: “Ako wire, mo gi gimi apai ki di he ku gume, garã ungaro ki du ni dungu he. Mi yugu pa gene tatamana foro; mi ngbe ku mbata yo foro ngba agene rurupai.” (Asanza 4:10, 11) Gu bangua arugute adunga ngburungburu ya nga gu Yekova afuhe, si tipa gaani pagume dagba rani na ko na dagba rani na akuarani, na tipa gaani irisombori, na tipa agu apai namanga rogo gaani raka na a’uru dunduko. (Atambuahe 1:1) Ani wisiginga bete bangua agu arugute adunga ngburungburu re ya.
5. Oni funga bete kpia bangua agu arugute adunga ngburungburu ya?
5 Nibipa gaani pagume dagba tirani na Yekova, Yesu ayaa: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.” (Matayo 22:37) Kurii gure, Mbori nafu gu kura arugute adunga ngburungburu ya tipa mangaapai dagba tirani na akuarani, ngbatunga gu du wa Gu Rugute Du Wa Dahabu: “Agu apai dunduko oni akpi nyemu aboro nimangi he fu roni, oni nimángi kina ha fu yo a.” (Matayo 7:12; AGaratio 6:10; Tito 3:2) Nibipa irisombori, i nangarasa rani na agu afugo nga: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani . . . ya.” (AEbere 10:24, 25) Tipa agu apai namanga na a’uru dunduko rogo gaani raka, fugo gu mokedi nangia Pauro nayaa: ‘Singia oni narihe watadu oni nambira he watadu oni namanga kurapai kia, oni mangiapai dunduko si taasirimo Mbori.’ (1 AKorindo 10:31) Dungu kura agu arugute adunga ngburungburu ya gu duho rogo Fugo Mbori.
6. Gini kparakparapai du dagba agu arugute adunga ngburungburu ya na andiko?
6 Agu arugute du tipa mangaapai ni agu arengo nafu undo afu ka boro mangisunge nani, sidu, agu aKristano nga airatatamana nawirika wai ka kpinyemuhe. Yekova asa Soromo ni ome gako toro ko ke gupai nga: “Ako wire, mo dége turo sa gimi apai; mo yé turo sa gi gumba apai. Ka mo nimbú nga ha si go bangiro wa sa ya; mo niígi he kina ku ngbaduro yo. Bambiko si nga unga fu gu ni bi he, ni ũhusa fu kpotoni dunduko.” (Asanza 4:20-22) Gini kparakparapai du dagba agu arugute adunga ngburungburu ya na andiko? Agu arugute adunga ngburungburu ya namaa mburu apai tipa i rũ andiko auruhe. Agu arugute du ngburungburu tigaha nafura tipa kparakparapai sa, si rengbe ka du tipa kparakpara regbo, ono agu arugute adunga ngburungburu ya, si tipa aregbo dunduko. (Atambuahe 119:111) Regbo gu ga Mbori arugute adunga ngburungburu ya adigonga te watadu ka si gonga kusayo te. Agu afugo gu nebi nangia Yesaya ome ga Mbori toro adu kugiipa kehe nga bere rengo: “Nvuo nita uga, mbumbudaha ki nigboroka; ono gu pai nga ga gaani Mbori si anyé anye kindi.”—Yesaya 40:8.
Oni Berẽ na ki Mangipai Ringbisihe Kuti agu Arugute Adunga Ngburungburu Ya
7. Wai Fugo Mbori angarasa rani ani berẽ na kini mangiapai ringbisihe kuti agu arugute adunga ngburungburu ya?
7 Dedede, ‘fugo Mbori’ nangarasa rani ani ta berã kini mangiapai ringbisihe kuti agu arugute adunga ngburungburu ya. Ho boro asana Yesu ni ko gurusi sangba ga Mbori Ndiko, ko agumba guruguru afugo ue, gu sa ko anyakasipa kpinyemu Yekova rogoho, na rogo gu kuraha, ko anyakasipa kpinyemu akurase. (Matayo 22:37-40) Ni manga Yesu he were, ko adipai pirapira rogo gu sangba ga Mose Ndiko i aima gurusoho nga gu du paha rogo Pa Fu Rugute ni Ue he 6:4, 5 nga gu nayaa: “Yekova gaoni Mbori nga kina Yekova sa; oni kpí nyemu Yekova nga gaoni Mbori na kpotoroni yo dũ, na mbisimoroni dũ, na omeroni dũ.” Si ziazia nga, Yesu adu a na pa gu ga Mbori rugute bangiriko du rogo Pa Amotumo 19:18. Rogo agu afugo nadu ziazia na ki duna ome du ti digido gu buku nga Batungusipai, Bakindo Soromo agurusi sangba dungu ga Mbori andiko kurogo bete afugo niyaa: “Yangara pai du re; i ima gia ha dunduko. Oni gúnde ti Mbori, ki ka kuti gako arugute; bambiko gere nga gu pai dunduko nga ga boro. Bambiko Mbori asápa ngbanga apai dunduko ni ba sa sa, na okooko apai ni ba sa sa a, watadu si du ni wene he watadu ni gbegberẽ he.”—Batungusipai 12:13, 14; Mika 6:8.
8. Tipagine duhe tini nga, giarogo agu arugute wenengai nga ga Ziazia Kekeapai adunga ngburungburu ya nabanda rani?
8 Pa ino ani ngbatunga agu arugute wenengai adunga ngburungburu re ya rengbe ka undo rani ani girogo kura kparakpara arugute na kini mangihe. Kurii gure, kangia ngbatunga gu bangua arugute adunga ngburungburu re ya ani agianga rogoyo wenengai te watadu ani aidanga nani te, ani rengbenga ka manga wene diaberã te, na pai rengbe ka zigizo gaani idapase taata. (AEfeso 4:14) Ka ani sigira ngbatunga agu arugute adunga ngburungburu re ya ku berã rani yo na ku ngbaduraniyo, si ka sa rani ani mbakadi tirani ka mangasunge nani rogo gaani adiaberã. Ho ani amangaha ni nitatamana, si nasa rani ani duna diabese.—Yosua 1:8; Asanza 4:1-9.
9. Tipagine adunga ha tini dedede taata fu boro ni ini agu arugute nga ga Ziazia Kekeapai adunga ngburungburu ya na ka mangaha ya?
9 Pa ino boro agu arugute nga ga Ziazia Kekeapai adunga ngburungburu ya na kini mangihe ni taatapai wa manga agu andiko i aima sigiraha te. Ni du ani ni kpakpa aboro ani rengbe ka ne gu asadatise si aidaha tipa boro berẽ kurii agu arugute adunga ngburungburu ya. Ho ani agbia tirani ni na gupai naida ani diberã tipaha watadu ho du ani ni na bakabangirise, ani rengbe ka ya gu rugute du ngburungburu ka ngba. Ti kura aregbo, ani rengbe ka gbata gu rugute du ngburungburu be gu Kristano ima nyaka, isoke singia ni nga gu bakumba nga ga dungurati, kini berẽpa gbia gu rugute du ngburungburu beni tipa gupai du ani rogoho. Ono tie, Ziazia Kekeapai watadu agu abuku du mburuhe rii Ziazia Kekeapai arengbanga ka fu agu arugute du ngburungburu dunduko te, na ka si vura fu gu fu rani, si arengbanga ka undo rani ti aregbo dunduko na rogo apai dunduko te. Oni vura tingida gupai nga kura kumba sa asana Yesu ki ya: “Bayugupai, mo rúgu wirinina ani kpara ũkumbo na ko.” Kuba gupai nga Yesu fu gu rugute du ngburungburu niipo tipa wai rengbe agude ka nyasa na gu zanga giatise rengbe ka du dagbayo, ko afu gu rugute fuko adunga ngburungburu ya ki ya: “Oni gí he, . . . ka oni dí nga ngbiti ahe ya.” Were Yesu kini fu gu rugute naadunga ngburungburu ya ono nadaada tipa mangapai ti gu regbo re na daada a tipa mangaha ti gi gaani regbo re.—Ruka 12:13-15.
10. Wai pa raka ani gaani raka ringbisihe kuti agu arugute adunga ngburungburu ya ayugo agu apai nafõngbaduraniyo?
10 Isoke oni vura bi agu aboro nata irisa andiko kini kpakanahe mbiko i nagunde be gu mbusa ka i fuhe fuyo. Padu boro na irisa tipa agu arugute adunga ngburungburu ya nasa gupai nga ka ni dunga na ngbatunga agu aberã re ya. Gu sino du ti agu arugute adunga ngburungburu ya, si nisaha nafõngbadu agu aboro yo nairisaha i karagapai sani na ngbaduyo yo dunduko. Nirengo, dungu agu arugute adunga ngburungburu ya ayenga na mbusa nibasa fu agu aboro nabasaha te. Si ki ta du were, si kini fu mamu fu rani ani yugu ndu gupai ani agiasangba Yekova tini, na ka yugo gupai nafõ rani ngbaduraniyo ani nimangi apai. Ani nabi kpia gipai re rogo ga Yosefa mangapai wa ko aka gu sangba bäri dia Potifaro agumbaha fuko. Wa si avura du nga, Yekova afunga keke ndiko ti gu regbo re nga gu naasoga pa bäri na ka mbusa adunga ho beko tipa gu boro ka pi na dia kurani ya, Yosefa aima ino pa gu ga Mbori arugute adunga ngburungburu ya tipa ruru mangaapai dagba arogotise. (Bambata Pai 2:24; 12:18-20) Ani rengbe ka bi gupai rogo gako karagapai nga, ngbatunga agu arugute adunga ngburungburu re ya aima aria gako bipai mbiko ko aya: “Waĩ tie ka mi mangi gi bakere gbigbitapai re, ki ingi pai kuti Mbori?”—Bambata Pai 39:9.
11. Rogo gini apai aKristano aida gu ga Yekova arugute adunga ngburungburu ya yugu gene fuyo?
11 AKristano areme naida gu ga Yekova arugute adunga ngburungburu ya tipa si rugu yo ho daha ni ti agu apai nabiyo wa, agu aboro i aida kaa sungo na yo, agu ambaro i aida kaa ngihe, agu amonzigo i aida ka giaha, na agu apai i aida ka gedaha. (1 AKorindo 15:33; AFiripoio 4:8) Wa ani asona rogo gaani inohe, rogo giarogo ga Yekova andiko yo na kini fu tambuahe fuko tipa gako andiko, gaani sangbakpotoyo gbiati gu gaani tandu nga ga ino pa ruru mangaapai, aundo rani ani mangi gu ga Mbori arugute adunga ngburungburu ya ti regbo agu apai dunduko ani agbiaha, zavura rogo agu apai nabi kina rani nisarani. Ni mbu ani agu arugute nga ga Ziazia Kekeapai adunga ngburungburu ya si niyugu gene fu rani, ani angeranga tipa agu apai nawira si ni vunduvunduhe rogo ga Mbori andiko te; na ani awirikanga agu aboro a na’asada ka ino wai rengbe yo ka mangapai zanga i kuo kura andiko ya te. Ani ima rugatirani na gupai nga, ngbatunga gu berã re nga pamungo na si rengbe ka imisa boro.—Yakoba 1:22-25.
12. Gine nga gu banguapai rengbe ka undo boro ni naaruga gani raka kuti agu arugute adunga ngburungburu ya?
12 Agu aKristano ima nyaka ima ruga tiyo na gupai nga, gu banguapai du tipa manga gu ga Mbori arugute adunga ngburungburu ya si nga ino boro gupai Yekova aberãha tipa pai. Bake Atambuahe nangarasa rani niyaa: “Ako, agu roni nakpi nyemu Yekova, oni sógo gbigbitapai.” (Atambuahe 97:10) Ni tangara Asanza 6:16-19 bete agu apai rengbe Mbori ka ya tipaha si angbanga te, si nayaa: “Apai ho sita Yekova nasoga ha, ii, apai saba nga kere gbegberẽ he ku bangiriko; nga ngera ruka, na gu mirãse nare zire, gu be nauka kure boro wenesa, na gu ngbaduse nasanga gbigbitapai, gu ndue naipisa tihe ka ora sa gbigbitapai, irazire dezire nagumba kina azire, na gu ni naenga pa tikangu dagba awirinani.” Ho du ani ni na nyemu ka yugo ga Yekova biapai tipa ngbatunga gi banguapai re rogo gaani raka ni gu ome nazoga gaani raka, pa raka ani ringbisihe kuti agu arugute adunga ngburungburu ya nada ni sino rani.—Yeremaya 22:16.
Si Naida Wene Ndupai Tipa Mangaapai
13. Gini ngbatunga gene berãpai Yesu anyakasi paha rogo gu gako Tungusapai nadu rii Bagangara yo?
13 Pa ino ani agu arugute adunga ngburungburu ya na kini mangihe nabanda rani a be gu gbina nga ga kungbo irisombori adunga rogoyo tini ya. Kparakparapai gu duho ti manga boro agu arugute adunga ngburungburu ya na giasangba agu arugute du ngburungburu. Yesu ayugu gipai re ziazia rogo gu gako Tungusapai nadu rii Bagangara yo. (Matayo 5:17-48) Oni tingidi gupai nga, agu aboro nanadegatuyo kuti fugo Yesu angia aYuda, sidu si aidi i mbu ga Mose Ndiko si naayugo gene fuyo. Ono tie, gupai nzunzu i amangihe nga, i aima aria gayo bipai tipa gu Ndiko re. I ananyakasa kina pa irisa aboro ngbarangbara sangba Ndiko kuba undo yo aboro i girogo gupai yo nzunzu gu ndiko re aida i mangihe. Kurii gure, i anyakasipa sino atitayo, ki kiisi paha susi pa gu yugopai nga ga Mbori. (Matayo 12:9-12; 15:1-9) Ni sangbanaha, aboro dunduko i ayugonga pai fuyo i niberẽpa manga agu arugute adunga ngburungburu re ya.
14. Wai Yesu aundo agu aboro nanadegatuyo koyo du ko ni i berẽpa manga agu arugute adunga ngburungburu ya?
14 Kuba gure, rogo gu gako Tungusapai nadu rii Bagangara yo, Yesu akodi aba bisue nga ga mangaapai niruruhe nga: zinga, rogatise gbiati mbutise, manga mokido, irabape, na nyemuse gbiati sogote. Rogo agu apai re dunduko nibasasa, Yesu ayugupa gu undo du ti manga boro gu rugute adunga ngburungburu ya. Rogo gi gene re, Yesu atumbapa andiko manga rurupai kuari fu apefuo ko. Ni kpiapai, tipa pa bäri, anga kina gu rugute du tipa gaani mangaapai sa ko afuhe te, ono ko afu gu a du tipa gaani aberã gbiati gaani nyemu apai: “Gu ni nangana de ni nyemu ri ni ima manga bari na ri kpotoni yo.”—Matayo 5:28.
15. Wai rengbe ani ka ne nyemu duna kina kpia irisombori gbua?
15 Gi kpiapai re nayugo gupai nga, si aidanga ani he ino ndu gupai nzunzu Yekova afu agu arugute adunga ngburungburu re tini ya te. Nirengo, anga ani na nyemu ka gbia ga Mbori weneringise rogo kungbo irisombori te. Yesu akusi gu berã re kuyangura ya si nga biriki ho ko aafura ni tipa ga Mbori inapai gbiati nyemuse. (Matayo 12:7; Ruka 6:1-11) Ni manga ani agu arugute nga ga Ziazia Kekeapai adunga ngburungburu ya, ani ane gu asadatise nga ga raka kuti kere arugute, (watadu ka ne sosoda kura aboro i mangihe wo) nga gere si aida boro mangihe, gere si aidanga ni mangihe ya, nga agu arugute adunga rogo Ziazia Kekeapai yo ya. Gupai si aida ani naabaka bangirani tipaha gbe nga, agu arugute du tipa kpinyemu Mbori na giasangbako ti gu nga berã kina pa irisombori gbua.—Ruka 11:42.
Wene Sangbanaapai
16. Oni funga kpiaapai nga ga agu arugute adunga ngburungburu ya du kugii agu arugute nga ga Ziazia Kekeapai du ngburungburu.
16 Wa ani a’asada tirani ka giasangba Yekova, si ni nyanyakipa pai ani rugutirani na gupai nga, moi ko gako andiko rii bangua agu arugute adunga ngburungburu ya. Ni kpiapai, si naida aKristano ne iriso kpiaahe, wasiwasi kodaba, na gbegbere mangasunge na kure. (Amokedi 15:28, 29) Gine nga mburu ga aKristano bipai tipa agu apai re? Si naida ani kpara tirani fu kina Mbori sa; ani duni ruru rani fu gaani badia rogatise; na fu Yekova nga Bafu-Unga. (Bambata Pai 2:24; Gate 20:5; Atambuahe 36:9) Pa ruga ani tirani na pa agu arugute du kugii gi mangaapai re nasaha fu rani taata ani mangi gu kura andiko du wa ha.
17. Gini wene sangbanaapai rengbe ka ye fu boro tipa ino ni agu arugute nga ga Ziazia Kekeapai adunga ngburungburu ya na ka mangaha?
17 Wa ani akparia tiiworo agu arugute du kugii agi apai re, ani naino gupai nga, si tipa undo rani. Agu amaku nga ga toro ga Mbori aboro agbia ngbarago behe naafu ndikidi undo dedede. Ni kpiapai, agu aboro avunga gundö ya, naraka gigiri raka, na nabi kure ni ziazia he, i nane gu kura akaza. Teketeke a, pa raka ani na ngbanya kuti agu arengo nga ga Mbori rengbe ka fu undo fu rani rogo agu apai nabipa mosoro, rogo gu mangaapai du dagba aboro, watadu rogo ramukporo. Ngbatunga gu ndikidi aundo re nayugo ga Yekova andiko ya si nafu undo afu nirengo, ni gupai rengbe ani arengba ka mangaha rogo gaani raka. Ono anga pa gbia ani ngbatunga agu aundo re nisaha nga gu bangua ndupai ani amanga ga Mbori andiko tini te. Ndikidi aKristano nagiasangba Yekova mbiko i nakpinyemu ko, mbiko ko ima rẽ i irisi ko, na mbiko si nga gu rurupai si aida i mangihe.—Yugoti 4:11.
18. Ka ani aida ka duni agu aKristano duna diabese, gine si aida si niyugu gene fu rani rogo gaani raka?
18 Pa nungusa ani gaani raka ringbisihe kuti agu arugute nga ga Ziazia Kekeapai adunga ngburungburu ya nandu na ani sa tumbatumba gene raka, nga gu rengbe nisaha ka ye na kura aboro ku ngba ga Mbori gene. Gu nyakipaha kisusi nga, gi gaani gene raka re nafu irisa fu Yekova. Ani nakparia gupai nga, Yekova nirengo nga gu Mbori duna nyemu aboro tiko na ko naida kina bawene apai gbe tipa rani. Ho ani amanga adiaberã ni ringbisihe kuti agu arugute nga ga Ziazia Kekeapai adunga ngburungburu ya na ani kini bi wai Yekova afu maku fu rani, ani nabi gupai nga, ani ima mbeda na ko gbe. Ii, ani kini zugosi gu pagume nga ga nyemuse kumbatayo na gu Barani nga ga ngbangbaturũ ko.
[Sanduki ti kpewaraga 14]
Wilson, nga gu Kristano naraka Ghana yo, i ayaa fuko kina bete a’uru gbua nye koyo i ki mbu ko ti sunge. Rogo gu uru nangia yangara uru fuko ba gako sunge yo, baira gu basunge ko amangasunge rogoho asia ko ko zundu gako tarambiri nga gu tarambiri ko angbehe na gako marã. Ho Wilson abi bete marã ni rogo gu tarambiri re, bairako aya mbiko wa i aima mbeda ka mbu Wilson ti sunge, si du kedi Mbori gu marã tini re fuko rogo gu uru re. Ono tie, ni manga Wilson sunge na agu arugute nga ga Ziazia Kekeapai adunga ngburungburu ya, ko akaraga gu marã re fu gu barugupa sunge re. Fuo ti iriwo gipai re ti gi barugupa sunge re na ngbako ki zere, anga ko asigira kina rimo Wilson tipa sunge nyeanye kindi sa te, ono ko atumba pa Wilson kuari a ku dagba agu abamangisunge du payo kuari rogo gu basunge re.—AEfeso 4:28.
[Sanduki ti kpewaraga 15]
Rukia nga de boro Albania garãri nasusi 60. Mbiko gu zanga giatise nadu dagba ri na kawiiri kporo, ri anafuranga na ko te tipa agarã susi 17. Ri atona ka wisigo Ziazia Kekeapai na aDezire Yekova na ki wiriki gupai nga, si naida ndikidi aKristano sungu rogo pazereda na kura aboro, angianga ka sungo na kpikopai ya. Ri akparikpee yuru sasasa, na fuo girarago wiso, ngbaduri atakuo ri kini ndu kua kawiiri yo, fuo da ri yo, ri angoka ngbadimo. Wiri kawiiri ni degude azaki ngbadimo. Wa si airiwo tiri ka bi Rukia, ri asanahe ki ya: “Da kpi? Gine oni amangaha herẽ?” Rukia asanahe ya ri naida ka bi kawiiri. Ri asakirogoyo fu kawiiri ni pazereda ya fuo wirika ri agu arugute nga ga Ziazia Kekeapai adunga ngburungburu ya na ki wirikipai a tipa Yekova, si nga gupai sa ri ri kpinyemu ka mbakada gu pagume nagbere dagba tiyo na ko. Fuo kpara yo ni aume na fuo dungo yo tiyo, i amangi pumbo gi kparakpara kodatise re!—ARomo 12:17, 18.
Oni Natingidaha?
• Gine nga agu arugute adunga ngburungburu ya?
• Gini kparakparapai du dagba agu arugute adunga ngburungburu ya na andiko?
• Tipagine duhe tini ni gupai nafu undo ani niberẽpa mangaapai ringbisihe kuti agu arugute adunga ngburungburu ya?
[Gu kpiahe du ti kpewaraga 17]
Matayo 5:27, 28
[Gu kpiahe du ti kpewaraga 17]
Matayo 5:3
[Gu kpiahe du ti kpewaraga 17]
Matayo 5:24
[Gu kpiahe du ti kpewaraga 17]
“Wa Yesu abi rimbasa, ko ki dakpa ku ri bagangara yo: ho ko asungu ni, gako abawiriki ki ye fuo ko. Ko ki za ngbako ki . . . [tona ka] raba yo”—MATAYO 5:1, 2