Gu Gene I ka Dia Gbara Kusayo Rogoho

O NI berẽnga gupai nga, bangiri airavurari nabi rago, airangbiongo kini gi woro ahe dunduko, mira airabubo kini bibia ni ngbarago, na ndu gbarigbari aboro ki du nyanyakii na i ki rengbe kaa ta! Anga ani nafura herẽ tipa gu diabese nga ga birĩ-inohe rogo sunge amonganga te, ono ani nafura tipa sangbana rimiso kina boro Mbori tiko kurogo agu apai nga ga ngbatunga aboro. Ziazia Kekeapai nafura tipa apai kumbatayo niyaa: “Si du bangiri airavurari azá, tu airangbianga ki ha; terengeterenge aboro agúka wa ngbiimo, mirã kisikisi ngba boro abi bia ni ngbarago.” (Yessaya 35:5, 6) Ono wai rengbe ani ka ruga tirani nzunzu na gupai nga, gi iiriwo sangbanebi re amanga amanga nirengo?

Bambatapai nga, ho Yesu Kristo aduni auru kpotosende, ko ahusi aboro ahusa nirengo be ngbatunga awokote na agbara dunduko. Kurii gure, dungu aboro ni adezire nabi gu iiriwo apai ko amangi, zavura aguyo nangia avurako a. Nirengo, kandara tipa pai sa, agu asogo Yesu nanabisira pako awisigi gu gene ko ahusi boro rogoho tipa ka saha ni ziree. Ono tie kina rago nagbere tiyo ni yangaraha fuo bi yo gupai nga ko aima manga iiriwopai nirengo. (Yoane 9:1, 5-34) Fuo Yesu mangi kura iiriwopai berewe nga gu ka i atinga kangoho ya ono nga gu narakpa yo i ki ya: “Ani amánga wãi? Bambiko gi kumba [re] namanga dungu agu apai i aina pai ti ni.” (Yoane 11:47) Ono tie, kungbo aboro adunga na gbegbere ngbaduseyo wa gure te, mbiko dunguyo atona ka ida kuti Yesu.—Yoane 2:23; 10:41, 42; 12:9-11.

Yuguyugu Mboimboipai Tipa Kumbatayo

Gu iiriwo apai Yesu amangihe ayugu gu kura apai susi gu gbua nga Masiya nangia ko na kingia Wiri Mbori. Si amoi mburu idapase fu aboro i kido kuti Ziazia Kekeapai tipa gu gaha akidohe du tipa husa aboro giasangbaa kumbatayo. Agi akidohe re nakoda gu sangbanebi nga ga Yesaya du rogo kapita 35, nga gu gumba yo paha ti tonatona genewaraga. Yesaya 33:24 nafura tipa wai kpoto agu aboro nagunde ti Mbori nika du kumbatayo niyaa: “A nga boro kporo sa ayá, ‘Mi nawoka’ te.’ ” Teketeke a, Yugoti 21:4 nakido rani niyaa: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai [nga agu apai aboro arungo behe areme] aima nyasa.”

Aboro naakparakpee dedede tipa digisidigisi agu asangbanebi re ho i naagumba ga Yesu kpia kparakpee ni, nga gu paparaha ayaa: “Ga ngbi [kindo, NW ] yé, Ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:10) Ii, gupai Mbori akpinyemuhe nakoda kpotosende gbiati ngbatunga aboro. Wa Mbori avura mbugene fu akaza gbiati agbara na nduhe tini si naamanga aboro, regbo ima mbeda si go; si agbarasanga “gbada” ndu Mbori nyeanye kindi te.—Yesaya 66:1.a

Husa Kaza Zanga Imakpotose na Zanga Boro Tumo Tipaha

Yesu anahusa gu ngbatunga akaza dunduko nanarungosi aboro na kini mangihe zanga keesa, zanga imisa kpoto boro, na zanga aboro tumo tipaha. Pangbanga gipai re agbandaka wa we bagau, nga gupai kaa henga manga ya, na ni kina ipo “bakere rimbasa aboro ki ye koyo du ko ni, airaterenga ki du na yo, na airavurari, na kisikisi ngba aboro, nga gbarĩgbarĩ aboro, na akura yo ni dungu yo, i ki zozogo yo pati nduko; ko ki husi yo.” Ga aboro karagapai sani angia gine? Gu pangbanga nga ga Matayo nangia gu dezire nabi agi apai re ni bangiriko nandu kumbatayo kindi kini yaa: “Were si ki iriwo airiwo ti rimbasa, ho i abi kisikisi ngba aboro ni i nifura, na gbarĩgbarĩ yo i ki du na ba yo, na airaterenga i nita, na airavurari i ningere. I ki nitaasi rimo ga Yisaraere Mbori.”—Matayo 15:30, 31.

Oni kparia gupai nga, Yesu anasiakanga aboro asiaka dagba rimbasa aboro ka husa yo te, nga gu biriki gu kura aborobiriki naamangaha. Kuba gure, agume agu aboro nanawoka na abakurea yo anaye na yo ki “zozogo yo pati nduko [ndu Yesu]; ko ki husi yo.” Ani ngerenga awere berewe rii bete kparakpara kpiaapai tipa ga Yesu tandu ka husa akaza.

Vurari: Ho Yesu aduni Yerusarema yo, ko ahasi bangiri gu kumba “i avungu ko na vurari.” Aboro aini gi kumba re rogo gu bakporo ko adu rogoho ni gu iravurari nanahõahe. Sidu oni rengbe arengba ka berãpa gu takangbaa na awowo aboro aguari sani wa i abiko ko nita na kini ngere! Wa si avura du wo, anga aboro dunduko nadu na ngbarago ka bi gipai re te. Mbata fu manga agi apai re, Yesu akusi gu gbegbere mangaapai kuyangura nangia ga agu aYuda ni aboro pambori i ayamba yo nga aFarusi nga aguyo nanamapai rii aboro. Fuo ngbaduyo imi be agi afugo Yesu nadu wa egetera bando re, i aidi kakaka ka bi gopai ya Yesu ahusanga bangiri kumba te ono irabiriki nangia ko. (Yoane 8:13, 42-44; 9:1, 6-31) Sidu, i ki sana gu kumba i ahasi bangiriko, fuo gure, i ki sana avunguko, na i ki sana gu kumba re berewe. Ono tie, gu wisigopai aFarusi amangihe anyakasi gupai nga, Yesu aima manga iiriwopai nirengo, si ki imisi ngbaduyo gbe. Fuo zera ngba gi kumba Yesu ahusi ko re be gu biriki na gu irasi apai nga ga agi aboro pambori re, ko nitiko ayaa: “Wa rago aenge kindi i agia nga ha mbata ya boro hasi bangiri gu ni i avungu ni na vurari te. Ka gi kumba aye nga yo du Mbori ni re ya, ka ko mangi nga pai wa sa te.” (Yoane 9:32, 33) Mbiko gi rengopai gi kumba agumbaha re ni yugo ko gako idapase, aFarusi “[a]do ko ku sa yo,” nayugo gupai nga, gi kumba nadu mbata na vurari re, i ado ko kusayo bambutiria yo.—Yoane 9:22, 34.

Ngbiongo: Ho Yesu aduni Dekapori yo, nga gu ringara nadu mbiti Yaradene ku uroyo, “[aboro a]ye koyo du ko ni na kumba naadu na kisikisi tuko, ki nikongodi pai.” (Marako 7:31, 32) Anga gupai Yesu amangihe tipa gi kumba re nga kina husa ko sa te, ono ko ayugu dudunguro bipai tipa wai gu kumba re aaberã, nga guko zee avura kaa manga ko amanga dagba aboro. Ziazia Kekeapai nagumba gupai fu rani nga Yesu adi gu kisikisi tu kumba re “ni sa ko ku sa yo pati rimbasa” na ki husi ko nisako. Berewe, agu aboro nabi gipai re “si ki niiriwo airiwo ti yo bakere gbe” i ki ya: ‘Ko mangiapai wenengaĩ dunduko; ko nasa airangbiongo i gipai a, na airabubo i nifura.’—Marako 7:33-37.

Ngbaramoni: Ho Yesu aduni Kaparanauma yo, aboro aye na kumba nadu na ngbaramoni ki pi auru barame. (Matayo 9:2) Averesi tona ti 6 ki kodi 8 naringbisapa gupai namangi. “[Yesu] ki ya fu gu ko nadu na ngbaramoni, ‘Mo gúari, ki di ga ira, ki ga ku kpuro yo.’ Ko ki guari, ki ga ku kpuko yo. Ono ho rimbasa abi he ni, i ki gunde agunde, ki irisi Mbori, nga gu ko nafu ome fu aboro wa gere.” Yesu amangi gi iiriwopai re a ku bangiri gako abawiriki na ku bangiri asogo ko. Oni kparia gupai nga, mbiko wa gako abawiriki adunga na sogote kuti ko ya, i ‘ataasirimo Mbori’ tipa gupai i abihe.

Kaza: “Boro ngbataka ki ye koyo du [Yesu] ni, ki ta kpara fu ko, nikuku barangba ko, niya fu ko, ‘Ka mo kpi nyemu he, mo húsi re ahusa.’ Rungoko ki nimangi Yesu amanga ko ki tãi beko ki zadi ko, ki ya fu ko, ‘Mi nakpi nyemu he; mo hú.’ Ngbataka ki go ago ti ko ni ba sa, ko ki hu.” (Marako 1:40-42) Oni kparia gupai nga, anga Yesu ata kpakanahe akpakana kini husi gi kumba re te, ono Yesu ahusi ko mbiko ndikidi nunga ko namangi ko. Oni berẽnga pa tironi ya oni nga boro ngbataka. Wai ka oni berẽ fuo i husi roni nibasa zanga kpotoroni imi wa gure be gu kaza nagbarasi kpotoroni na si ki kpara roni kusayo ti aboro na kini ndu na oni sa kpio? Zanga kapa, oni rengbe ka ino ndu gupai tie awere gu kura boro ngbataka ‘avagadi tini pati ndu Yesu kini tambua ko,’ nga gu boro ngbataka Yesu ahusi ko rogo iiriwo gene.—Ruka 17:12-16.

Oro: Ga Yesu yangara iiriwopai mbata fu i zi ko na ki kenge ko ti ngua angia husa oro. Ni ipiipi mangaapai kuti agu aboro naaida ka zio Yesu, gu mokedi nangia Petero ‘amo gu basape nadu beko ki ya de ga gbiamotumo moyambu nani, ki kati kina kumba tuko.’ (Yoane 18:3-5, 10) Gu pangbanga du tipa gipai re nga gu Ruka akehe tigako nagbia gupai kuti ni nga, Yesu ‘ki zadi tuko, ki husi ko.’ (Ruka 22:50, 51) Berewe a, Yesu amangi gi wene sino re ku bangiri abakureako na ku bangiri asogoko, ti gi regbo re, agu asogoko re angia agu akumba naye ka zio ko.

Ii, wa ani awisigo gu iiriwo apai wenengai Yesu amangihe, ani nakparia gupai nga, si angia kina boro parengo. (2 Timoteo 3:16) A wa ani niima gumbaha mbata, si naida ngbatunga gu wisigopai re nyakasi gaani idapase kuti ga Mbori kidohe ka husa agu aboro nga agisangbaa. Ziazia Kekeapai naringbisapa gu idapase nga ga aKristano ya si “nga sungudo ndikidi agu apai boro amaabangirini tipaha, nga gu gopai nayugopa agu arengo i abingo ho ya.” (AEbere 11:1, NW ) Si ziazia tie nga, anga gupai Mbori angarasa aboro sani nga i idipai ku bubo watadu ka idapai gbua ya si amanga amanga te, ono ko naida i duna nyanyaki idapase du mburuhe rii gopai. (1 Yoane 4:1) Wa ani agbia ngbatunga gu idapase re, ani nabi gupai nga ani nada nyanyakii rogo toroyo na ki duna bakere wasa na ngbarago.—Matayo 5:3; ARomo 10:17.

Husa Aboro Rogo Toroyo Si Aida I Mangihe Mbata!

Dungu agu aboro du kpotoyo niwenehe na ngbarago tiyo te. Bete aguyo dagbayo na’asada ka imo tiyo mbiko i na maabangirise tipa raka kumbatayo te watadu i bi gupai nga ome apai ima fu rii omeyo. Ka pepai ni sanza, i nirengo nga gbarigbari aboro rogo toroyo, nga gu gbara gbere bangiri Mbori kisusi gbara ti kpotose. (Yoane 9:41) Ngba kura gene, dungu agu aboro duni gbarigbari yo ti kpotoyo wa Christian na Junior nga agu akumba i nigumba payo rogo gu papara ye mbata fu gere naraka wene raka ki duna ngbarago. Tipagine? Bambiko i wenengai rogo toroyo na ki duna gu maabangirise du mburuhe rii Ziazia Kekeapai nga gu nafu ome fuyo.

Ni fura Yesu tipa gu kparakpara zingo du tirani nga aboro, ko ayaa: “Boro anye nga ni ungani mbiko kina riahe [sa] te, ono mbiko agu apai dunduko naye ngba Mbori yo.” (Matayo 4:4) Ii, aboro wa anyaa te, aboro tigayo naida kura apai ku pati agu ahe nasongoda unga. Mbiko wa Mbori akusi rani rogo ‘kpiako,’ si naida ani duna gu riahe nga ga toro berani, nga gu inohe nga ga Mbori na ki rengbe kurogo gako ringbisapai na kini mangi gupai ko akpinyemuhe. (Bambata Pai 1:27; Yoane 4:34) Gu inohe nga ga Mbori nasa rani ani raki gu raka duna rogoyo tini na ki du nyanyakii rogo toroyo. Si a namaa mburu nyenye unga fu aboro rogo paradiso nga ga kpotosende. Yesu ayaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”—Yoane 17:3.

Gupai nagbeberã rani nga, agu aboro nadu ti rago Yesu anayambanga ko ni “Bahusi aboro” te, ono i anayamba ko ni “Bayugupai.” (Ruka 3:12; 7:40) Tipagine? Bambiko Yesu anayugopai fu aboro tipa ga Mbori Kindo, nga gu nika ye na nyenye ziga tipa gu fudifudiapai narungosi aboro. (Ruka 4:43; Yoane 6:26, 27) Gi zogarago nga ga ngbangbaturũ du vurube Yesu Kristo re nika zoga kpotosende dunduko na ki digisi agu akidohe dunduko nga ga Ziazia Kekeapai nga gu du tipa husa ruru aboro dunduko nyeanye kindi na ka mbakada kpotosende nabaha ni kpuyo. (Yugoti 11:15) Gere nga ndu gupai ko akodi pa ye ga Mbori Kindo tini rogo gako kpia kparakpee kuti manga aboro gupai Mbori akpinyemuhe auru kpotosende.—Matayo 6:10.

Tipa dungu gbarigbari aboro, pa wirika yo pai tipa gi iiriwo maabangirise re asa gayo aume nga ga gberarago kurogo agu aume nga ga ngbarago. (Ruka 6:21) Nirengo, Mbori nika manga apai kisusi gu nga ka dia awokote kusayo gbiati gbara; ko nika gbandaka guhe kusayo naye na rungo fu aboro, nga kina boro ingapai nitihe. Nirengo, Yesaya 33:24 na Matayo 9:2-7, nga gu i nike fugoho ti tonatona gipai re, nayaa mburu wokote nga gu ingapai du tirani. (ARomo 5:12) Sidu, fuo i di ingapai kusayo, ngbatunga aboro agbia ngbarago niyangaraha be gu “taarimo nga ga [duni] awiri Mbori.”—ARomo 8:21.

Si taata fu agu aboro du kpotoyo wenengai ka bi pa agu apai du tipa yo gbua taata. Ono anga wo duhe tipa agu aboro narungo be sangbana gu gbara du yo nani te. I ini wai kiipa du kpotose wenengai na wai kiipa unga na wai rengbe apai ka aria tihe nitunguotunguoho wa ikpirogumba. (Batungusipai 9:11) Sidu, gupai ani amaabangirani tipaha ku be gu gbarigbari aboro du dagba agedi gaani amagazini nga, i berẽ wenengai tipa gu iiriwo amokido nga ga Mbori a wa duhe nikekehe rogo Ziazia Kekeapai. Yesu atumo ni ungako tipa si duni ngbaanga ya agi apai re amanga manga. Gini kura ngbaanga duho fu rani rengbe ka ngba kisusi gure?—Matayo 8:16, 17; Yoane 3:16.

[Gu rukutu kekeapai du bandu kpewaraga yo]