Gu Iiriwoapai Nika Manga Barambeda

KA SI du nga munganga ima ringbisa gu regbo si aida i gba kpakarakpakara kaza tironi ti ni, ginipai ka oni berẽhe ka si du nga oni gi gupai nga gu munganga re aagbanga ngbatunga kaza mbata wagu re te? Zanga kapa, oni du na kina bakabangirise. Ono ginipai ka mangi ka oni gi gupai nga gu munganga re aima gba badungu aboro naadu na kina ngbatunga gu kaza re tiyo mbata i nibati abata? Ya mo oni rengbenga kadu na bakere kido kuti ní nga ní rengbe arengba ka undo roni te?

Gi kaza kaza zegino ani araka rogoho re naida i gba ha agba wo. Yekova Mbori kidohe furani rogo Fugoko yo nga Ziazia Kekeapai nga ko nika karaga Paradizo berewe ku auru kpotosende. (2 Petero 3:13) Tipa gipai re mangi, i duwa ka i di gbegberẽ aboro kusa yo dunduko nyeanye kindi. (Atambuahe 37:9-11; Asanza 2:21, 22) I nika dia gu gbegberẽ apai dunduko namanga pati rani mbata i nika sigira paradizo. Tipa gipai re mangi wo, si aida kina boro iiriwopai mangi nzunzu!—Yugoti 21:4, 5.

ADezire Yekova ima ida kuti gupai nga agi aʹariapai re nika manga barambeda. Tipagine? Bambiko gu iiriwoapai Yekova Mbori amangihe nayugo gupai nga ko na kina ome ka digiso gako akidohe. Ani ringbisinga iiriwoapai gbua sita nga gu i akehe rogo Ziazia Kekeapai yo na agu akidohe si afuhe furani tipa kumbatayo.

Oni naandunga andu kindi kumbatayo kaa wirikapai tipa agu akidohe du rogo Ziazia Kekeapai yo tipa kumbatayo. Wa gaoni idapase nikaa sona, kinawo a gaoni maabangirise tipa ka raka ti gu regbo oni nika gbia undo be gu iiriwoapai Yekova nika mangaha nikaa maapai.

[Box on page 7]

IIRIWOPAI:

YESU ARIGI AKUTU ABORO NA WIRI BETE KPAKUTO NA ATĨO.—MATAYO 14:13-21; MARAKO 8:1-9; YOANE 6:1-14.

KIDOHE:

“Sende azugasi gaha zuzu ahe; Mbori, kina gaani Mbori, naafu maku fu rani.”—ATAMBUAHE 67:6.

GUPAI SI AYUGOHO FURANI:

GOMORO AMANGANGA ABORO YO BEREWE TE.

IIRIWOPAI:

YESU AZAKI BANGIRI AIRAVURARI.—MATAYO 9:27-31; MARAKO 8:22-26.

KIDOHE:

“Bangiri airavurari azá.”—YESAYA 35:5.

GUPAI SI AYUGOHO FURANI:

BANGIRI AIRAVURARI DUNDUKO AZA.

IIRIWOPAI:

YESU AHUSI ABORO NGBARAMONI.—MATAYO 11:5, 6; YOANE 5:3-9.

KIDOHE:

“Terengeterenge aboro agúka wa ngbiimo.”—YESAYA 35:6.

GUPAI SI AYUGOHO FURANI:

I AHUSA GBARĨGBARĨ ABORO DUNDUKO.

IIRIWOPAI:

YESU AHUSI AKAZA NGBARIKO HO.—MARAKO 1:32-34; RUKA 4:40.

KIDOHE:

“A nga boro kporo sa ayá, ‘Mi nawoka’ te.”—YESAYA 33:24.

GUPAI SI AYUGOHO FURANI:

I ADIA AGU AKAZA DUNDUKO NARUNGBURASI KPOTO ABORO KUSAYO. ANI NIKA RAKA NA WENE KPOTORANI NYEANYE KINDI.

IIRIWOPAI:

YESU AZA YUGE NA SUNGBURASUNGBURA IME.—MATAYO 8:23-27; RUKA 8:22-25.

KIDOHE:

“I adúdua abambu ki niraki rogo; i arũka bakakue aati yo ki niri zuzuhe. I amánga nga sunge gbua te.”—YESAYA 65:21, 23.

“Rungosi adú ti ro tuturũ, bambiko mo agúnde nga te; gbudagbuda ki turũ na mo, bambiko si ayé nga mbembedi sa ro te.”—YESAYA 54:14.

GUPAI SI AYUGOHO FURANI:

GU GBERANGO NAYE BE GU MANGAPAI NGA GA OME ZEGINO ADUNGA YO TE.

IIRIWOPAI:

YESU AZINGISI ABORO BEKPIO.—MATAYO 9:18-26; RUKA 7:11-17.

KIDOHE:

“Agu yo . . . dunduko du rogo amurã yo, ki kuru.”—YOANE 5:28, 29.

“Baime ki gasi agu akangba nadu rogo ho, kpio na Adisi ki gasi agu akangba nadu rogo ho.”—YUGOTI 20:13.

GUPAI SI AYUGOHO FURANI:

I AZINGISA AGU ABADIANGBARANI NAAKPI BEREWE.