Asanahe be Agedihe
Ka boro imitini nisani, ya mo si adu ni rurupai fu Kristano ko mangi gu gumbapai nga ga kpio ni?
AKristano nibasasa du wa ka i diberã tipa tiyo, singia sangbakpotoyo yo rengbe ka mbu yo i mangi kpee gu boro si awira ni imitini nisani. Ho ni adiaberã ni, si naida ni wisigi agu asanahe naye re: Wai Yekova abi imo boro ti ni nisani? Ya mo gu kpio re angia boro du naimitini nisani nirengo? Nzanga nazi ni watadu agu apai nafuda boro ngbaduniyo naye nani? Wai aboro abi kpio gu boro imitini nisani rogo gu dagbarago re?
Ni aKristano, ani na nyemu ka ino wai Yekova abi kpio gu boro imitini nisani. Tipa Yekova, gu unga nga ga boro ni kikiipa he na kingia ziazia he. (Bambata Pai 9:5; Atambuahe 36:9) Ho boro ata inoaino ni kini imitini nisani, si nga kina imo boro, sidu, ka si angbanga bangiri Mbori ya. (Gate 20:13; 1 Yoane 3:15) Si ki ta du tie were, ka si aidanga i mangi gumbapai nga ga kpio gu boro imitini nisani ya?
Oni binga gupai nadu tipa gu Bakindo aYisaraere nangia Saura. Ho ko aini gupai ni nga ko abatanga rogo gu yangara gayo vura i aasoho kuti aFereseto te, “Saura ki mo gako basape ki ti ngba ha.” Ho aFereseto abi kangba ko ni, i akengehe kuti vuro ngapa gu bakporo nangia Bete-sana. Fuo bi agu aYisaraere naaraka Yabese-girada yo gupai aFereseto namangihe na kangba Saura, i adihe na i ki zoho. Fuo gure, i ki rogodi ameme ko ki kpisidihe. I agino riahe a tipa arame saba, nangia gu sino aboro anayugo gayo nunga kpio boro rogo dagba aYisaraere. (1 Samuere 31:4, 8-13; Bambata Pai 50:10) Ho Davide, nangia ga Yekova mbedimbedi boro abi gupai ni aboro Yabese-girada amangihe na kangba Saura, ko ayaa: “Yekova fú maku fu roni, wa oni amangi weneringise fu gaoni gbia nga Saura, ki kpisidi kangbako! Awere Yekova mangi weneringise fu roni na yososopai!” (2 Samuere 2:5, 6) Gu kekepai du rogo Ziazia Kekeapai re ayugongo gupai nga i asaringbanga kuti aboro Yabese-girada tipa manga gupai ka aboro arengbe ka bihe wa manga kpee Bakindo Saura te. Oni ringbisinga gure na gupai nadu tipa agu aboro i aidanga i kpisidi yo ya mbiko gayo gbegbere mangaapai. (Yeremaya 25:32, 33) Kristano rengbe ka saka gi pangbanga nga ga Ziazia Kekeapai du tipa Saura re ka bihe singia ni rengbe ka manga gumbapai tipa gu boro imitini nisani.
Gu Kristano re rengbe ka wisigo ndu gupai i amanga gu gumbapai tini nga ga kpee boro. Anga aDezire Yekova wa agu aboro idi kuti gupai nga, mbisimo ni guhe zanga kpio te, i amanganga gu gumbapai nga ga kpee boro na gu iraira berã nga ka keda mbisimo gu boro kpii kurogo kura zegino te. Anga si tipa fu undo fu gu boro kpi te, bangua ndu manga gu gumbapai nga ga kpio boro re nga ka fu wasa fu agu aboro narungo na ka manga dezirepai fu agu aboro du kporokpee na aguyo ye ku pati ni tipa ka yugo gupai fuyo du tipa gu boro kpii. (Batungusipai 9:5, 10; 2 AKorindo 1:3-5) Gu kura nyanyakipa ndupai i amanga gu gumbapai tini nga ga gu boro kpii nga ka undo aboro dunduko i sakipai berã yo yo ka ino gupai nga, ga aboro raka gbua ni kina guruhe. (Batungusipai 7:2) Ya mo agi apai tangara ani he re rengbe ka du ka i mangi gumbapai tipa gu boro imitini nisani?
Rengo ngaha, kura aboro rengbe ka berã ya gu boro ata inoaino re kini imitini, ki rugu ti ni aruga wenengai na gupai nga, ni namanga ingapai kuti Yekova. Ya mo aboro rengbe ka sigira ngbatunga agu aberã re dedede ya wo si nidu nirengo? Ya mo si arengbanga ka du nga gupai boro nitukaha atuka ka mangaha ngaha tee? Bete agu aboro na’asada ka imotiyo nisayo naabira tiyo abira tipaha na ka i aidanga ka mangaha berewe ya. Boro arengbanga ka sa gani berã ti gupai mangi ni fuo kpio ni te.
Gu kura nyanyakipa pai nasa dungu aboro i imitiyo nisayo nga nzanga gbiati agu apai nafuda yo ngbaduyo yo. I rengbe ka ya tipa agi aboro re, i nirengo imitiyo nisayo. Kuti bange agu aboro naimotiyo nisayo i awisigihe, 90 rii kama nga ga bange agu aboro naimotiyo nisayo ni agu aboro duna nzanga, apai afuda yo ngbaduyo yo, watadu i nga agu aboro fudifudiapai azi baha kuti yo. Ya mo Yekova ambupai fu ngbatunga agu aboronzanga re? Ani arẽnga ka sarangbanga singia agi aboro re amangi gu ingapai bangiri Yekova ka ko ambunga pai tipaha ya te. Si naida Kristano wisigi agu apangbanga kaza nadu tipa gu boro imitini nisani re mbata fu ni diberã singia ni nika manga gumbapai tipa kpio ni watadu ni amanganga ha te.
Gu kurapai kinaho berewe sa si aida ani wisigihe: Wai agu aboro du rogo gu dagbarago re abi imo boro ti ni nisani na kpio gu boro re? Agu aboro si aida i berẽ tipaha gbe nga agu abaakumba du rogo gu dungurati nga ga aDezire Yekova du rogo gu dagbarago re nga aguyo aidanga rimo dungurati gbere ya. Nibipa gu berã du dungu aboro nani tipa imotise nisase rogo gu dagbarago re, na gbe tipa gi kparakpara imo boro ti ni nisani mangi re, abaakumba rengbe ka ka ti manga gu gumbapai nga ga kpio gu boro re na ki zanga ida i mangihe a tii Bambu Kindo yo.
Wa vura duhe wo, kangia agume gu boro kpi re sana kura Kristano tipa ni ndu ka manga gumbapai tipa kpio gu boro re, ni rengbe ka berã gupai nga, ni nitini rengbe arengba ka mangaha angianga agu abaakumba nga ga dungurati sia ni tipaha ya. Kangia ni diberã ka mangaha, si naida ni duna rubangirise ki he nyakasa gupai nga i azingisa gi boro re azingisa. Agu amaabangirise dunduko du tipa gu kpikpiyo, si kube Yekova, na anga boro ho rẽ ka ya gu boro kpii re i azingisa ni azingisa watadu i azingisanga ni te te. Gu Kristano re rengbe ka nyakasa kina agu arengo nga ga Ziazia Kekeapai du tipa kpio na ki fu wasa fu agu aboro duna nunga.