Gu Kparaboro Nga ga AKristano Si Niʹiriʹirihe na Kini Fu Ngbarago fu Mbori

ANI berẽnga kurii gipai namanga re: Aboro nataka ngbayo kidu na rungo. Agi aboro re vodi bibiri arokoo kini kpari kperungo kini kiti abakitikpia. Aguyo nasakatiyo na gbere ringbisihe kuti woro gaza na amasikisa. Gu kurayo tigayo nataka ngbayo kini mbiri tiyó kini mamu kidu na ngbarago wa i kporo pumbo yo. Bete aguyo niʹima kpi buda ki piki tigayo sande. Ginipai du nzunzu namanga rogo gi kporo re? Rogo kura apapara zegino, wogu aboro amanga, nga aguyo dunguratiyo ku kporokpee yo.

Dungu aDezire Yekova naraka dagba agumeyo gbiati agu aboro ima gasa ngba manga sangbaatoro na kini gunde be kpikpi aboro. Dungu aboro idi kuti gupai ngawee, ho boro akpi ni, ní naga kurogo ngbii atoro na ki rengbe ka undo unga aboro watadu ka manga yó gbegberẽe. I rimisi gi ida re kurogo asino kparaboro yo. Rengo ngaha nga, irairapai ngaha boro kpari watadu kadu na nunga gu gani boro kpii te. Ti kura regbo sa, Yesu gbiati gako abawiriki aduna rungo tipa gu badiangbayo nakpi nangia Razaro. (Yo. 11:33-35, 38; Amo. 8:2; 9:39) Ono tie, i anaakparanga aboro ngba gu iraira gene aboro anaakpara aboro ngbaha ti rago yó te. (Ruka 23:27,  28; 1 Tesa. 4:13) Tipagine? Ndupai sa dagba akuraha nga, i aima ino gupai namanga ho boro akpi ni.

Ziazia Kekeapai nafura ziazia niyaa: “Agu yo du ni ungayo i ini he ya i akpí akpi, ono kpikpi aboro aina nga pai te, . . . Gayo nyemuse ima kpi na gayo sogote na gayo kpihe a . . . sunge rogo Baatoro kpikpi aboro yo [nga muro] yo mo andú ku ho ni te, berãpai na inahe na tatamana a te.” (Batu. 9:5, 6, 10) Agi averesi re nayugo gupai ziazia nga, ho boro akpi ni, ní ainongo pai berewe te. Ní arengbanga ka berã te, ka fura te, watadu ka rugatini naapa pai te. Fuo ruga aKristano tiyó naapa gi nyanyakipa pai nga rengo du rogo Ziazia Kekeapai re, wai rengbehe ka manga ariapai rogo gayó sino kparaboro?

“Ka Oni Zádi nga Birikobiriko He Ya”

ADezire Yekova dunduko rogo zegino arimisongo tiyó kurogo agu asino duna gu ida rogoho nga kpikpi aboro nikina ungayo na ki rengbe arengba ka undo unga aboro watadu ka manga yó gbegberẽe te. Ngbatunga gu sino nga ka zinahe fu aboro ya ka i ranga ya ho du kangba ni rii ba, manga karama, manga karama na agarã dunduko ka tingida pakpio gu boro nakpi, tumo fu kpikpi aboro, gbiati manga giro, si ni agu apai dunduko afunga ngbarago fu Mbori ya, mbiko mburuhe rii gu yugopai nga ga adaimona nayawee mbisimo aboro akpingo te. (Yeze. 18:4) Ndikidi aKristano ‘ambiranga he tingba gu inga nga ga Gbia, na gu inga nga ga adaimona te,’ sidu, i arimisongo tiyó kurogo agi asino re te. (1 Kor. 10:21) I nairisa gu zinahe nga: “Oni kúru dagba yo yo, ki kparaka, . . . ka oni zádi nga birikobiriko he ya.” (2 Kor. 6:17) Ono tie, anga si taata ka manga gupai re te.

Rogo Afirika na rogo kura arago a, badungu aboro idi kuti gupai nga, ka i amanganga gu kura asino ya, rago rengbe arengba ka gberã ti atoro agu atitayo nakpiki. Si rengbe ka ba bakere gberarago ti agu atoro re si ki sa gupai nga i tiwa agu aboro dunduko naraka rogo gu rago re, ka apai angbanga kubarayo yo wagu tooni ya. Wa aDezire Yekova naarimisongo tiyó kurogo gi ngbatunga apai andunga kuti sangba Ziazia Kekeapai re ya, agu aboro du rogo gayó rago gbiati agumeyo a, i naasesenga yó asesenga, kini bisira payo, na kini biyo wa akare. Kura aboro naaya fu aDezire Yekova wee, i aidanga ka kodatiyo na aboro te, na i airisanga kpikpi aboro te. Ti kura aregbo, agu aboro adunga na ani ti idapase ya, i rengbe ka zinga ki yawee kina yó nikaa ngerakurii pa kpara gu Kristano kpii. Sidu tie, kangia ndikidi aKristano nga ani, wai rengbe ani ka he tagbagaapai na agu aboro rimisi tiyó kurogo gu ngbatunga asino kparaboro asanga ngbarago ti Mbori re ya? Ginipai rengbe ani ka mangaha tipa ka bandatirani ti agu asino gbiati gu mangaapai rengbe ka gberesa gaani pagume na Yekova Mbori?

Si Naida Oni Fura Afura Ziazia

Rogo dungu apapara zegino, si nisino aboro nga, agume gu boro kpi gbiati agu abaakumba du rogo gu ngbatunga re gumbapai nibipa kpisido gu boro re. Si naida Kristano gumba gupai ziazia nga, aDezire Yekova du nika mbakadaapai dunduko tipa gu kpee re ringbisihe kuti gu bangua arugute nga ga Ziazia Kekeapai. (2 Kor. 6:14-16) Agu apai nika manga kporokpee yo, si aidanga si fudi sangbakpoto akuarani aidipase yo te, watadu ka kotosa agu aboro naima ino gaani aida gbiati agu apai ani naayugoho tipa kpikpi aboro te.

Ho i asana bakumba ni rogo dungurati ko mangi agu apai nga ga kparaboro, agu abaakumba du rogoho rengbe arengba ka fu agu aberãpai rengbe ka undo aboro tipa i mangiapai dunduko ringbisihe kuti agu arugute nga ga Ziazia Kekeapai. Ka si du nga agu aboro angianga aDezire Yekova ya naida ka rimiso gu mangaapai kurogoho agianga ga aKristano ya, si naida ani ru nyanyakii na kidu na wingbaduse tipa ka gumbapa agu apai ani naamanganga ha ya, ono si naida ani gumbaha nizera na rogo pa irisa. (1 Pet. 3:15) Na ka si du nga agu aboro re naida kindi ka rimiso agu asino kparaboro arunga ya, ginipai si aida agu agume nga aDezire Yekova mangihe? Ka si duwo, si naida ka i rimisingo tiyó kurogo gu sino kparaboro re ya. (1 Kor. 10:20) Ho ka pai mangi ni wa gere, si naida gupai nga abaakumba mangi wiri gumbapai Bambu Kindo yo watadu rogo kura rago tipa ka fu ‘wasa rogo Ziazia Kekeapai’ yo fu agu aboro gberẽ rago tiyó mbiko pakpio gayó boro. (Rom. 15:4) Ka si vura du nga kangba gu boro re ho te, si ruaru i mangi gipai re. (Pa Rug. 34:5, 6, 8) Ka agu aboro adunga na ani ti idapase ya tona fudifudiapai, si rengbe ka fu kina kura rungo berewe furani, ono ani nagbia wasa mbiko ino ani gupai nga, ho ani aru ni nyanyakii tipa ka manga gupai du niruruhe, Mbori nabihe abi, na ko nafu “tandu [furani] susi.”—2 Kor. 4:7.

Oni Kepa Gupai Oni Aidaha

Ka boro kepa wai ní aida aboro kpari ní mbata fu kpi ní, si du taata tipa ka mangapai na agu agume angianga aDezire Yekova ya, bambiko badungu aboro naairisa sangba gu boro airisa kpii. Gu nyanyakipa apai si aida boro kehe mbata fu kpi ni, si nga, wai i nika kpara ní, gu ba i nika kpara ni rogoho, na da si aida ní du nga gu bangisa boro nika mbakadaapai tipa kpara ní na kini ngerekuriihe. (Bam. P. 50:5) Ka ní ke gu waraga re ki moi fuo beni ti ni kubarabangiri adezire, si ngbaangba gbe. Agu aboro duna tatamana ringbisihe kuti gu bangua arugute nga ga Ziazia Kekeapai, i ima ino gupai nga, si aidanga i gbinza agbinza mbata watadu kaa woka sa kina kpio i kini ru ka ke gupai re te.—Snz. 22:3; Batu. 9:12.

Kura aboro nabihe nga, ka i keke ngbatunga apai wa gure, gure nga i natina kpio atina kutiyó. Ono tie, gu Kristano namanga gipai re, ní nga gu boro naima nyaka rogo toro yo, na ní naberãpa agu agumeni aberã ka ní kpi i kidu kindi tiunga. (Frp. 2:4) Si naida kina Kristano mbakadi gipai re na agume ní mbata fu kpi ni, angianga ka mbuhe fu gani aborokporo agume ye ka wayo awa nani ya, kini sosodi yó i mangi kina gupai i aida nani.

Ka Kparaboro Dunga Nibakerepai Ya

Rogo dungu arago Afirika yo, aboro na gu ida nga si naida kparaboro du nibakerepai na niiiriwoho tipa ka sa gupai nga, ka atoro agumeyo zinginga kutiyó ya. Gu kura aboro ‘naaenda’ na agu ahe du beyo ti regbo kparaboro. (1 Yo. 2:16) Aboro nadia bakere regbo na ki mangi dungu apai na ki gbarasipa bakere marã tipa ka kpisido boro ngba gu gene i aberãha nga si nga “wene kpisido boro.” Gu kura aboro naadidiko kpia gu boro kpii re rogo dungu arago, tipa dungu aboro ini pakpio ní na ki ye ku kporokpee yo. Agu akurayó nambakada afariro na kpia gu boro ti ni kpii, ki kparakaha ti agu aboro du kporokpee yo. Aguyo nangbeka agu asanduki-kangba duna bakere genoho tipa aboro bihe. Rogo kura ringara sa Afirika yo, gu kura aboro nambakada asanduki-kangba nikpia tarambiri, nikpia tiyara, na nikpia kurungba. I nambakada gu kura ahe tipa si yugupa gu kumuko du beyo, gbiati pakio payo. I rengbe ka kusa kangba rogo sandukihe ki moihe rii bawene kendegekendege barame. Kangia dee du kpii, i rengbe ka vo ri na pusi roko-rogatise na ki fongo ri na badungu afongo gbiati arẽkẽ na ki kendege kpakpuri yo na aberi, na anduri. Ya mo si ruaru fu ga Yekova boro ní rimisi tiní kurogo manga ngbatunga agu apai re?

Agu aKristano naima nyaka rogo toro yo, i nabihe nipatatamana ka mbu manga agu apai agu aboro amangaha ainongo gu bangua arugute nga ga Mbori ya, watadu aidanga ka mangaha ya. Gupai ini ani he nga, gu sino kparaboro natagbaga tihe na Ziazia Kekeapai, si ‘niga Mbori te, ono si niga gi zegino’ re, nga gu zegino nika go ago kusayo. (1 Yo. 2:15-17) Si naida ani bandatirani wenengai gbe ti rimisotise kurogo gu sino nga ga abaangira aboro amangaha, kini asaditiyo ka mangapai susi akurayó. (Gara. 5:26) Agu apai namanga rogo zegino yugu gupai nga, ho duhe ni nga aboro nagunde be kpikpi aboro nikerehe, si nasa gupai nga i naamanga kpee nibakerepai gbe, ka gene adunga tipa aboro naaruga apai kporokpee yo ya, na si rengbe ka sa gupai nga apai gberẽ dunduko kporo gu kpee re. Ka aboro airisa gu boro kpii bakere gbe, si rengbe ka ndu naayó sa kura iraira mangaapai, wa agu nga takangbaa nikpee, dudungo kpangba, fura na kpangba si kidu wa gu boro re nikina ungani, gbiati maa marã gbiati gu kura ahe pati kangba. Ka ngbatunga agi apai re mangi ti regbo kpara gu boro nga Kristano, si rengbe ka ye na bakere gbarasarimo kurii Yekova na kurii gako aboro.—1 Pet. 1:14-16.

Pa ino ani gu rengo du tipa kpikpi aboro nasa rani ani du na wingbaduse ka ani arimisongo tirani kurogo agu asino kparaboro aboro amangaha rogo zegino ya. (Ef. 4:17-19) Wa si avura du nga, Yesu angia gu boro pani anyaki gbe, i akpisidiko kina rogo iriiri gene. (Yo. 19:40-42) Tipa agu aboro duna “ga Kristo berã,” i abingo gu sino kpisido boro duwa ga Yesu re nipazee te. (1 Kor. 2:16) Ka ani mbu gu sino kparaboro nga ga aKristano si du taata, na niʹiriʹirihe, si nika sa gupai nga ani ne gu sino mangaapai du nibibirikoho Ziazia Kekeapai azahe ti ni, na si nika sa gupai a nga apai du niʹiriʹirihe na niwenehe ki rẽ na ani nga agu aboro nakpinyemu Mbori.

Ya Mo Kporokpee Nga Kporo Pumbo?

Rogo kura angbatunga, tingbafuo kpisido boro, agume, amurakporo, gbiati gu kura aboro naadunguratiyó ka ririahe, kini mbiri tiyó, na kini dogbere woro kundi kini puma. Aboro naambira bakere buda ti gi regbo re, akumba kini ndu fuo adee, adee kini ndu fuo akumba. Gu kura aboro naamanga gu pumbo re ya si nadia gu gberarago kusayo du aboro nani tipa gu gayó boro kpii re. Ono tie, badungu aboro naamanga gipai re na gu nduhe nga, si nika fu irisa na taarimo fu agu atitayo naima kpiko, na ki sa gupai nga mbisimo gu gayó boro kpii re ndu fuo mbisimo agu atitayo re.

Ndikidi aKristano ini gupai nga, patatamana du Ziazia Kekeapai apehe kini yaa: “Rungo ngba ti mongo; bambiko rungo ti kpakpuse namanga kpotoyo pusiapusia.” (Batu. 7:3) Kurigure, i ima ino gu wenepai du ti berãkurii padu raka nikina guruhe gbua na berãkuriipa gu maabangirise du tipa zingabekpio. Tipa agu aboro duna wene ngbanya dagbayó na Yekova, “rago kpio [boro]” ngbatiyo “ti rago vunga boro.” (Batu. 7:1) Sidu tie, fuo ino ndikidi aKristano gupai nga manga pumbo kporokpee nigupai nakoda sangbaatoro gbiati wasiwasi kodaba, si nasa gupai nga ka i mbakadinga pai tipaha ya watadu ka ndu kupati ni yo te. Ka ani du pati gi wasiwasi aboro re rogo agu aba i amanga agi apai re rogoho, gure yugu gupai nga ani afunga irisa fu Mbori te na ani aberãnga pa gu sangbakpotoyo nga ga akuarani aidipase te.

Si Naida Aboro Bi Gupai Nga AKristano Kia

Ani na ngbarago mbiko ani agundenga be kpikpi aboro wa agu aboro du rogo gu bitimo nga ga toro te. (Yo. 8:32) Wa duhe nga ani nga “awiri imarago,” ani nayugopa gu nunga boro kpii sa rani ngba iriiri gene na si kini yugupa gupai nga ani ima rugatirani naapa agu apai nga ga toro na kini yugupa gu maabangirise du ani nani tipa zingabekpio. (Ef. 5:8; Yo. 5:28, 29) Ngbatunga gu maabangirise re ambunga rani ani merefuo kungboapai ki ingi wa agu aboro “adu nga na maabangirise ti yo ya te.” (1 Tesa. 4:13) Gu giarogopai re nasa rani ani songodi ziazia irisombori ki zanga zera be gunde be aboro.—1 Pet. 3:13, 14.

Pa irisa ani sangba Ziazia Kekeapai nika fu momu fu aboro i bi gu ‘kparakparapai du dagba agu aboro namangapa Mbori na aguyo amanganga pako ya.’ (Mara. 3:18) Uru adu kinaho kpio nika dunga ya. (Yugo. 21:4) Wa ani apido gu uru gupai re nika manga, si naida Yekova bingo rani abi ni agu aboro zanga serõ, na ni agu aboro du nikparakparayo ti agu apai nga ga gi gbegberẽ zegino re nga gu afunga irisa fu Mbori ya.—2 Pet. 3:14.

[Gu kpiahe du ti kpewaraga 30]

Si nipatatamana tipa boro kepa wai ní aida i kpari ní ho ní ka kpi ni

[Gu kpiahe du ti kpewaraga 31]

Si naida ga aKristano kparaboro du niʹirisiʹirisihe