‘Oni Peke Fuo Re Kindi’

“Gi nga gu pai i ayambu roni kuti ni re: mbiko Kristo ahi pai a tigako tipa roni, ki he kpia pai fu roni, oni peke fuo ko [teketeke “NW” ].”—1 PETERO 2:21.

1, 2. Tipagine adunga ga Yesu rengberengbe kpiapai ti ni ni bayugupai niba tumbatumbaha kuari kisusi ba wirikaha berani ya?

YESU KRISTO angia gu bawene Bayugupai kisusi agu aboro dunduko naraki auru kpotosende. Kurii gure, ko angia rengberengbe boro, naamanganga ingapai rogo gako raka nabaha wa ko adu ni boro ya. (1 Petero 2:22) Ono tie, ya mo gure nayugo gupai nga, ga Yesu kpiapai ni bayugupai niba tumbatumbaha kuari gbe ka bawirikaha adunga berani ya bambiko wa du ani nga kpakpa aboro? Si wo te.

² A wa ani abihe rogo gu papara kekepai ye mbata fu gere, mburu ga Yesu yugopai adu rii nyemuse. Na nyemuse nga gu sino rengbe ani arengba dunduko ka sonosaha. Fugo Mbori nazungodi rani dedede ani sonosi gaani nyemuse tipa aboro na ki mbakadi gu pagume du dagba rani na yo. (AFiripoio 1:9; AKorosaio 3:14) Yekova naasananga gako aboro ko akusi yo i mangi gupai ka i arengbanga ka mangaha ya te. Nirengo, wa duhe nga “Mbori nga nyemuse,” na ko akusi rani rogo kpiako yo, ani rengbe ka ya ko amangi rani ani yugu nyemuse. (1 Yoane 4:8; Bambata Pai 1:27) Sidu, ho ani ageda gu fugo ni nga ga gu mokedi nangia Petero du nikekehe rogo gu veresi nga rii gi gaani papara kekepai re, ani rengbe ka idaha nga, ka ani mangihe amanga. Ani rengbe arengba ka pekafuo ndu Kristo teketeke. Nirengo, ani rengbe arengba ka irisa gu ga Yesu zinahe nga: ‘Oni peke fuo re kindi.’ (Ruka 9:23) Ani wisiginga wai rengbe ani ka wirika gu nyemuse Kristo ayuguhe, ni bambataha, tipa gu rengo ko anayugoho, fuo gure, tipa agu aboro ko anayugopai fuyo.

Sonosa Nyemu gu Rengo Ani Awirikaha

3. Tipagine gu kura aboro abi wisigopai ti ni ni gupai duni kpakarakpakarapai ka mangaha, ono gini rugute du rogo Asanza 2:1-5?

³ Tipa ani kpinyemu gu rengo ani ayugoho fu kura aboro, ani du wa ka ani kpinyemu wirika gu rengo re ni tirani. Rogo gu sino raka du areme nga ga zegino, ngbatunga gu nyemu wirikapai re azionga baha ti aboro dedede taata te. Mbiko gu ngbatunga apai du wa zingo wene wirikapai sukuru yo, na gu gbegbere asino aboro asonosihe mbu yo ni aparanga, si nasa dungu aboro i nye zanga nyemu wisigopai tiyo. Ono tie, si nga nyanyakipa pai fu rani ani wirikipai be Yekova. Asanza 2:1-5 nayaa: “Ako wire, ka mo agia gimi apai ki niigi sangbare ku ngbaduro yo, ki ye turo sa pa tatamana nifu ngbaduro yo tipa rugatinapai; ii, ka mo akpara ku ari tipa inahe ki nitumba fugoro ku ari tipa rugatinapai, ka mo agbata ha wa feda ki nita tipa ha wa okooko ũkumuko; si du mo ka ruga tiro ti ni na pa gunde ti Yekova, ki bi gu inahe nga ga Mbori.”

4. Rogo gu fugo yo nga ‘ka fu ngbaduroyo’ nga gine, gini bipai rengbe ka undo rani ani mangi gupai re wo?

⁴ Oni tingidi gupai nga, tona ti veresi 1 ki da kodi 4, i nazungodi rani rogoyo ani mangi bakere asadatise angianga tipa kina ‘giapai’ na ‘ki niigi he’ ya ono kini ‘gbataha’ na “ki nita tipa ha” a. Ono tie, gine nika fõngbaduraniyo ani mangi agi apai re dunduko? Oni kparianga gu fugo nga, “[mo] nifu ngbaduro yo tipa rugatinapai.” Gu kura buku sa nayugo gupai nga, gi rugute re “si aidanga kina degatue sa te; ono si naida kura sino berã: nga ka duna nyemu dia yugopai kugume.” Ginipai rengbe ka sa rani ani duni agu aboro nadiapai kugume kini kpinyemu wirika agu apai Yekova ayugoho fu rani? Si nga gu gene ani abi apai rogoho. Si naida ani bi “gu inahe nga ga Mbori” wa “feda” na wa “okooko ũkumuko”

5, 6. (a) Ginipai rengbe arengba ka manga gizo, na wai rengbe ani ka kiso gene be gupai re ka si manginga ya? (b) Tipagine si aida ti ni ani naagbia kura inohe agbia kindi nga ga rengo kurii gu ũkumuko ani aima bihe rogo Ziazia Kekeapai yo?

⁵ Si ni kpakarakpakarapai fu boro ni duna gu bipai re te. Ni kpiapai, gu “inahe nga ga Mbori” nga gu oni awirikihe nawira gupai nga si aima koda gu rengo du tipa ga Yekova ringbisapai nga, ko naida ruru ngbatunga aboro raki nyeanye kindi rogo Paradiso auru kpotosende. (Atambuahe 37:28, 29) Ho oni aini gu rengo ni re mbata, zanga kapa, oni abihe ni nyanyakipa ũkumuko nga gu inohe nahiisi berã roni na ngbaduroniyo na maabangirise gbiati ngbarago. Ginipai namanga awere? Wa regbo nasusi kusayo, ya mo gu tambuahe oni adu nani tipa gaoni ũkumuko aima nvuto? Oni asadi tironi tie ka manga agi apai du ue re. Ni bambatapai, oni zambuasi gaoni nyemupai, gure nayugo gupai nga, kaa mbakada berã roni dedede kuti kiopa agu arengo nibasasa Yekova ayuguhe fu roni, zavura gu oni aima wirikaha mbata fu dungu agarã kusayo vurũ.

⁶ Uepai nga, oni nigbata kura ũkumuko kurii gu du beroni. Ni kpiapai, ka oni ge wenehe sende yo wa feda, ya mo gupai ka oni mangihe gbua ka maaha ku mangu roni yo kini mere nani ki duna ngbarago? Watadu oni ge rago berewe ka ngera singia agu akuraha kina yo? Fugo Mbori hi be bawene arengo nga gu du wa kina feda na okooko ũkumuko. Ka si vura du nga oni ima gbia rengo wa kina ginihe vurũ, oni rengbe arengba ka gbia kuraha kurii gure. (ARomo 11:33) Ho oni agbia vovo rengo ni, oni sananga tironi ki ya: ‘Ginihe du nasaha si du ni ũkumuko bangire? Ya mo si nafu dudungurobipai fere tipa ga Yekova sino watadu gako aringbisapai? Ya mo si nafu wene rugute nga gu rengbe ka undo re mi peke fuo ndu Yesu?’ Ka oni berẽ kurii ngbatunga agi asasanahe re, si nika undo roni oni sonosi nyemu gu rengo Yekova ayuguhe fu roni.

Yugo Nyemu gu Rengo Ani Ayugoho

7, 8. Gine nga gu kura agene rengbe ani rogoho ka yugo gupai fu aboro nga ani na nyemu gu rengo tirani ani awirikihe rogo Ziazia Kekeapai? Oni yugunga kpiapai sa.

⁷ Wa ani ayugopai fu kura aboro, wai rengbe ani ka yugo gupai nga, ani nakpinyemu gu rengo akpi ani awirikihe rogo Fugo Mbori? Ni peka ani fuo ga Yesu kpiapai, ani nakido bakere gbe kina kuti Ziazia Kekeapai rogo gaani tungusapai yo na gaani yugopai. Rogo agi aregbo susi re, i aima digo ninyakasi ga Mbori aboro rogo zegino dunduko i naamangasunge nibakerehe gbe na Ziazia Kekeapai rogo gayo sunge tungusapai fu aboro gbaiga. Ho oni nikaa mangasunge ni na gu berã fu yo ho re, oni gbata agene ka sa irakporo ni ini gupai nga, kina boro oni nitironi, kiipa gupai akio bangironi oni ayugoho rogo Ziazia Kekeapai re.—Matayo 13:52.

⁸ Ni kpiapai, ti gu regbo nadu nibasa fuo zubo abamoi gu bagbata nga New York City gugorö, Kristano sa nga wirinarani ni dee aageda Atambuahe 46:1, 11 fu agu aboro ri aabiyo gene gari sunge tungusapai yo. Ri aasasana aboro mbata tipa wai i arengbe kaa raka tingbafuo gu gberango re. Ri atamangaha were kini degeturi wenengai kuti gayo akaragapai, kini idi nani, fuo gure kini yaa: “Ya mo oni na nyemu ani gedi Ziazia Kekeapai na oni nga gu nafu wasa fere vuru gi fudifudi regbo re?” Kina bete aboro gbua nakaha, ono ri amangi bawene sakapai na dungu aboro. Ho ri aafura ni fu paranga aboro, gi wirinarani ni dee re anaya fuyo dedede wee: “Mi aima digo ni yugupai rogo Ziazia Kekeapai tipa agarã 50 da ku awere. Mi nakido ro nga, mi abingo kandara wiripai sa nga gu ka gi buku re arengbanga ka fu undo tipaha ya te.” Rogo mangasunge na ndikidi nyemuhe tirani, ani nayugo gupai fu aboro nga, ani nabi gupai ani awirikihe rogo Fugo Mbori na kikiipaha na ki duna nyemuhe tirani.—Atambuahe 119:97, 105.

9, 10. Tipagine duhe ti ni ni nyanyakipa pai ani mangisunge na Ziazia Kekeapai baraho ani akaragapai ni tipa gaani aida?

⁹ Ho aboro nasana rani ni tipa gaani aida, ani na wene mamu berani ka yugo gupai fuyo nga ani nakpinyemu Fugo Mbori. Ni peka ani fuo gu kpiapai nangia ga Yesu, ani afunga gaani akaragapai kina kuti agu aberã gbua nga gaani te. (Asanza 3:5, 6) Kuba gure, ani namangasunge na Ziazia Kekeapai si fu akaragapai. Oni nagunde agunde ya kura boro rengbe ka sana roni na gu sanahe oni arengbanga ka fu karagapai sani ya? Oni wisiginga kura agene ue nga gu ka oni mangihe ki rengbe ka dia be gupai re.

¹⁰ Oni mangi gupai rengbe oni ka mangaha tipa ka mbakada tironi. Gu mokedi nangia Petero akepai ki ya: “Oni kpára Kristo kpotoroni yo ni gaoni Gbia. Oni ki mbakadi tironi dedede tipa karaga pai fu agu yo dunduko ka sana roni tipa gu pai du maabangirise ti roni mbiko ho, ono ni zera na irisa.” (1 Petero 3:15) Oni ima mbakada tironi tipa ka fu karagapai tipa gaoni aida? Ni kpiapai, ka si du nga boro nakpinyemu ka ino gu ndupai oni naamanganga agu asino ti ni nga gu adunga rogo Ziazia Kekeapai ya watadu gu mangimangiapai si asogaha, ka oni yanga aya gbua wee, “Bambiko gimi pambori aidanga ha ya te.” Ngbatunga gu karagapai re, si rengbe ka yugo gupai nga, kura aboro kia ninaamanga diaberã fu roni kini yugu gupai a nga oni rogo gu pambori du bariihe nga boro. Si rengbe ka du ni wenepai ka oni yaa, “Fugo Mbori, nga Ziazia Kekeapai, nasogaha” watadu, “Si ka ndu ka fu gberarago fu gimi Mbori.” Fuo gure oni ki sakirogoyo funi niruruhe ki yugu nduhe nga gine.—ARomo 12:1.

11. Gini buku duho tipa yugobara apai rengbe ka undo rani ani fu akaragapai fu agu aboro ninaasanahe tipa agu arengo du rogo Fugo Mbori yo?

¹¹ Ka oni bi tironi nga oni ata mbakadanga tironi te, tipagine ka oni adianga bete regbo ti ni ka wisigo gu buku nga Reasoning From the Scriptures ya, ka si du nga si kinaho rogo gu fugo rengbe oni arengba ka gia rogoyo wenengai?a Oni sia gu bete rii afugo nga gu du wa ka aboro sana roni asana tipaha, na ki moi kura averesi vuru Ziazia Kekeapai ku berã roni yo tipa tingidaha. Oni di gu gaoni buku nga Reasoning watadu gu tooni buku nga, Wai ka Tona na ki Ndu Kumbatayo na Asakapai nga ga Baibiri gbiakuti Ziazia Kekeapai na oni. Ka oni kapanga ti mangasunge nani wa duhe ti baraha ue re ya, kini pehe fu irakporo ya oni na kura buku beroni nga gu oni akpinyemu ka mangasunge nani tipa si yugubara agu akaragapai nga ga Ziazia Kekeapai kuti agu asasanahe re.

12. Wai rengbe ani ka karagapai fu boro ka si du nga ani ainonga karagapai kuti gani sanahe kurogo Ziazia Kekeapai yo te?

¹² Ka oni bakinga bangironi gbua niwia ya. Anga kpakpa boro ho duna akaragapai dunduko beni te. Sidu, ho i afu sanahe ni fu roni kurogo Ziazia Kekeapai yo nga gu ka oni arengbanga ka karagapai sani ya, oni rengbe ka fu karagapai dedede wa gere: “Tambuahe fu roni tipa fu ngbatunga gu bawene sanahe re. Ka gumba kina rengo fu roni, mi ainonga karagapai sani te, ono mi ima rugatire na gupai nga, Ziazia Kekeapai ima fura tipa gupai re. Mi nidu na nyemu weteka Ziazia Kekeapai tire, sidu, oni mbupai fere mi ndu ka wisigoho ki ye na karagapai fu roni kuti gaoni sanahe.” Ngbatunga gu pepai nirengo re, gbiakuti umbasitise re rengbe ka zaka gene tipa wene wisigopai na boro kumbatayo.—Asanza 11:2.

Ani Kpinyemu agu Aboro Ani Ayugopai Fuyo

13. Tipagine si aida ani kakuti ruru bipai tini kuti agu aboro ani naatungusapai fuyo?

¹³ Yesu anayugo nyemuse fu agu aboro ko anayugopai fuyo. Wai ka ani ru ka wirika ko rogo gipai re? Ka ani sonosinga gu sino nga ga zanga duna nunga tipa agu aboro du pati rani ya. Nirengo, “gu vura nga ga gu bakere rago nga ga Mbori, nga gu ko du na tandu apai dũ” nambeda gbe, rogo gu uru re, badungu amirioni aboro dagba ngbatunga aboro yo i ka imo yo. (Yugoti 16:14; Yeremaya 25:33) Wa vura duhe wo, ani ainonga gini aboro nika bata na gini yo nika kpiko te. Gu sapangbanga re amanga gizo kumbatayo na si kube guni Yekova nasia ni nga, Yesu Kristo. Ti gi regbo tie re mbata fu gu uru sapangbanga re, ani nabi aboro dunduko nibasasa wa i rengbe arengba ka duni ga Yekova amoyambu.—Matayo 19:24-26; 25:31-33; Amokedi 17:31.

14. (a) Wai rengbe ani ka wisigo tirani singia ani na nunga aboro tirani? (b) Rogo gini wene agene rengbe ani ka yugo gaani nunga na nyemuse rogoho fu kura aboro?

¹⁴ Sidu tie, wa kina Yesu, si naida ani asadi ka duna nunga kura aboro tirani. Ani rengbe ka sana tirani ki ya: ‘Ya mo mi na nunga agu aboro duni nanginangi yo na agu aziree nga ga pambori, na ga birĩ zogarago, na gu nga ga ababagi ahe nga ga gi zegino yo re? Ka si du nga i nabi gu pangbanga ani andu nani fuyo kpasiaka, ya mo mi nagbata gene ka rugatire na ndu gupai du yo tini wa gure? Ya mo mi rugutire na gupai nga, mi, watadu gu kura aboro nairiso Yekova awere niruru yo, adu kinawo mbata? Ya mo mi mbakadi gimi agene tungusapai wenengai? Watadu mi naadia ngbatunga agi aboro re kusayo rogo gimi berã wa agu aboro ka sanga gayo bera berewe ya?’ (Yugoti 12:9) Ho aboro ainopa gaani ndikidi nunga ni tipa yo, si nasa yo i rengbe ka ida gaani pangbanga. (1 Petero 3:8) Yugo nunga koyo du aboro ni a ni gupai nasa gupai nga ani kpinyemu agu aboro ani agbia yo gene gaani sunge tungusapai yo. Ani rengbe ka ke gayo asasanahe na agu apai i abakabangiriyo tipaha. Ho ani akaraga tirani ni fuoyo, ani rengbe ka ya fuyo wee, ani aaberãpa gupai i agumbaha ti gu bambata regbo ani aye ka biyo. Na, i rugutiyo na gupai nga, ka si du nga gu kura rikporikpopai gu duho ti gu regbo re naida undo, ani rengbe arengba ka fuhe.

15. Tipagine si aida gupai ti ni nga, ani moi berã rani tipa gu wene apai du rogo aboro yo, na wai rengbe ani ka mangaha wo?

¹⁵ Wa kina Yesu, ani nangera tipa gu weneapai du rogo aboro yo. Isoke ka si vura du nga vungugude ni dee adunga kumba beri ya namanga bakere asadatise ka sonosa awiiri. Isoke kumba nasota ka undo gako aborokporo. Sosono boro nakpi nyemu agu apai nga ga toro. Ya mo ani nabi ngbatunga agu asino re ti agu aboro ani agbia yo kini fu tambuahe fuyo wa rengbehe tipa gayo asadatise rogo agu apai i amangaha re? Ni manga ani he wo, ani nanyakasa gupai rengbe ani ka ru kuriihe na yo si ki zaki gene fu rani tipa ani mangi dezirepai fuyo tipa Kindo.—Amokedi 26:2, 3.

Umbasitise ni Bawenepai Rogo Yugo Nyemuse fu Aboro

16. Tipagine duhe ti ni ni nyanyaki pa pai ka nye ni bayee rani na ni aboro irisa koyo du agu aboro ni ani naatungusapai fuyo?

¹⁶ Nyemu agu aboro ani ayugopai fuyo nika fõngbaduraniyo ani irisi gu zinahe nga ga tatamana du rogo Ziazia Kekeapai yo nga gu nayaa: “Inahe na fu enda, ono nyemuse na nyakasa boro.” (1 AKorindo 8:1) Yesu aduna bakere inohe, ono rukoho adunga tiko te. Sidu tie, wa oni ayugo gaoni aida fu aboro, oni ne fugo kango watadu fugo ruko. Gaani sasa nga ka rimiso gu rengo ani akpinyemuhe gbe ku ngbadu aboro yo kini saha si ngba bangiriyo. (AKorosaio 4:6) Oni tingidi gupai nangia ga gu mokedi nangia Petero, ho ko arugu aKristano ni tipa i mbakadi tiyo ka fu karagapai, ko akodi gu tingidapai kuti ni nga, si naida ani mangihe wo “ni zera na [ni bakere] irisa.” (1 Petero 3:15) Ka si du nga ani ni bayee aboro ki duna irisa, ani rengbe arengba ka ye na aboro koyo du gu Mbori ni ani naairisa ko.

17, 18. (a) Wai rengba ani ka karagapai kuti gu basapa rani rengbe aboro ka pehe ya ani arengbanga ni abatungusipai te? (b) Tipagine adunga gu inohe ti ni nga ga gu kuru fugo aboro i ake Ziazia Kekeapai rogoho ni nyanyakipa pai fu abawisigi Ziazia Kekeapai areme ya?

¹⁷ Si aidanga ani ba iriwo rani ti aboro na gaani inohe watadu gaani wirikapai te. Ka singia kura aboro rogo gaoni dagbarago aidanga ka giapai ngba gu boro adunga na waraga nyasa bakere ba nga ga wirikapai na diabese ya, watadu adunga ni baworimo ya, ka sino yo zeresinga kpotoroniyo ya. Yesu amaanga berã ko kuti gupai nga, ka ko andu mbata tipa kina gu bakere sukuru nangia gu aboro anakura rogoho ni wene abayugupai ti gako regbo te; watadu ka rimiso tiko a kurogo basapa aboro ni asada tiko ka ba iriwo ko ti aboro na gako bakere inohe te.—Yoane 7:15.

¹⁸ Kuti gu bipai nga ga agu abamangi ga Mbori sunge nga aKristano, umbasitise gbiati nyemuse nyakipaha kisusi gu wirikapai nga ga sukuru. Gu bakerepa Bayugupai nga Yekova, nasa rani ani rengbe tipa manga sunge tungusapai. (2 AKorindo 3:5, 6) Si aidanga ani wiriki kina gu kuru fugo aboro nadu mbata i ake Ziazia Kekeapai rogoho mbata ani kini mo ka rengba tipa yugo Fugo Mbori fu aboro, wa gu bete kura abarumbatayo du rogo agu apambori nga ga Ngbiiakristano nagumbaha te. Yekova asa gako toro si undo gako amoyambu i ke Ziazia Kekeapai rogo gu gene du nzunzu ni ziaziaha nga gu daada tipa aboro nibasasa rengbe ka ruga tiyo na agu arengo du rogoho. Agu arengo du rogoho a’arianga tihe te, wa vura duhe nga i na’aria fugoho kurogo dungu kama fugo aboro vurũ. Sidu, wa vura duhe nga ino gu kuru fugo aboro nadu mbata gu ngbaangba ti kura regbo, ono tie, nyakinga paha te. Kurii gure, manga boro ruko tipa ni rengbe ka gumba dungu fugo aboro rengbe ka sa ni ni zanga gu wene sino nga ga ndikidi aKristano, nga, ka duna nyemu i yugupai funi.—1 Timoteo 6:4.

19. Rogo gini gene du gaani sunge tungusapai rogoho ni gu sunge ani amangaha fu aboro?

¹⁹ Zanga kapa, gaani sunge tungusapai nga ga aKristano ni gu sunge naida gu sino nga ga umbasitise. Ani nidu dedede ni agu aboro i naabasa payo kini sogo yo, zavura kini rungosi yo a. (Yoane 15:20) Wa vura duhe wo, ni manga ani gaani sunge tungusapai niruru he, ani namanga nyanyakipa sunge. Ka ani nye rogo umbasi tirani kini mangipa kura aboro rogo gi sunge re, gure nga ani nawirika pa manga gu nyemuse nangia ga Yesu Kristo tipa aboro. Oni berẽnga gupai nga: Ka si dunga si naida ani tungusipai fu bange aboro wa kutu sa nga aguyo aidanga na ani ya watadu nasoga rani, kini mangi gi tungusapai re na gu nduhe nga ka bingo kandara bangisa boro sa nga guni du wa vusende, anga gu bakere asadatise re rẽ arẽ tipa ka gbata gi boro re tee? Nirengo si daada! Sidu, ni kpatagara ani kuti gi sunge re, zanga mbuhe, gure nayugo gupai nga, ani namangasunge niruru he fu agu aboro du wa vusende nga aguyo ani atabingo yo kindi ya. Zanga kapa, Yekova gbiati Yesu nika ruga tiyo na gupai nga, ani ima kura bara badungu kura aboro mbata fu da digido gi regbo re, nga agu aboro kii payo akio bangiriyo.—Agai 2:7.

20. Gini bete agene duho rengbe ani ka yugopai rogoho ni manga ani he nga ani?

²⁰ Yugopai fu aboro rogo gaani mangimangiapai yo nga gu kura gene ani ayugo gaani nyemu mangasunge fu kura aboro rogoho. Ni kpiapai, ani naida ka yugo gupai fu aboro nga, mangasunge fu Yekova, “nga betedi Mbori,” si nga gu bawenepai kisusi rengbe boro ka mangaha rogo gani raka. (1 Timoteo 1:11) Wa i nikaa bi sino rani na gaani mangaapai dagba rani na gaani amurakporo, na akuarani sukuru yo, na gaani abadiasunge, ya mo i rengbe ka bi gupai nga, ani nga aboro ngbarago ki rengbe be agu ahe du berani? Teketeke a, ani nayugopai fu gaani abawisigi Ziazia Kekeapai ya, gu dungurati nga ga aKristano nga ba ngbarago nga ga nyemuse ni zezeredi ba rogo kere gbegbere zegino. Ya mo gaani abawisigi Ziazia Kekeapai rengbe ka bi gupai nga, ani nakpinyemu agu aboro dunduko du rogo gaani dungurati kini asadi tirani ka banda zereda dagba rani na kura aboro?—1 Petero 4:8.

21, 22. (a) Wisigotise nibipa gaani sunge tungusapai rengbe ka ndu na ani kuti gini amamu? (b) Gini apai ani nika wisigoho rogo agu apaparaha naye fuo gere?

²¹ Gu sino nga ga duna nyemu gaani sunge tirani rengbe ka fõngbaduraniyo ti kura aregbo ani wisigi tirani berewe. Badungu aboro abi tiyo nga i rengbe arengba nirengo ka kiiso gayo sunge tungusapai ni manga yo sunge tungusapai ti aregbo dũ watadu ka ndu kurogo agu aba du bakere zingo rogoho tipa yugo rengo yo fu aboro. Aguyo ima dia berã ka wirika fugo kungbo aboro tipa ka yugopai fuyo kina rogo gayo dagbarago, nga agu ayeaye bangeyo akio kina kumbatayo rogo gayo ringara. Ka singia ngbatunga agu amamu re zaki fu roni, oni fu kpe tipaha kini berẽ paha nyanyakii gbe. Raka ku tingba sunge tungusapai naye na bakere ngbarago, na rengbabepai, na zereda nga ga berã.—Batungusipai 5:12.

²² Nirengo, si naida ani ndu kumbatayo kindi rogo wirika Yesu Kristo ni sonosa nyemu gu rengo ani ayugoho na ka kiiso gaani nyemuse fu agu aboro ani ayugopai fuyo. Pa kiiso ani gaani nyemuse kini yuguhe rogo agi agene du ue re, si nika undo rani ani moi gu wene mburupai nika sa rani ni agu abayugupai du wa Kristo. Ono tie, wai rengbe ani ka sonosa tirani rii gu mburupai re? Rogo gu tangaratangara apapara kekepai naye fuo gere, si nika yugo gu kparakpara agene yugopai fu rani Yesu amangisunge nani.

[Gu rukutu kekeapai du bandu kpewaraga yo]

Gaoni Karagapai Nga Gine?

• Gini kido du ani nani nayugo gupai nga, anga ga Yesu kpiapai ni Bayugupai ni tumbatumbaha kuari gbe ka ba wirikaha adunga ti ni ya te?

• Wai rengbe ani ka yugo gupai nga, ani nakpinyemu gu rengo ani awirikihe rogo Ziazia Kekeapai?

• Tipagine duhe ti ni ni nyanyakipa pai ani nye na umbasitise wa ani asona rogo inohe?

• Gine nga bete agu agene rengbe ani rogoho ka yugo gaani nyemuse fu agu aboro ani a’asada tirani nyanyakii ka yugopai fuyo?

[Gu kpiahe du ti kpewaraga 12]

Oni mangi gupai rengbe oni ka mangaha tipa ka mbakada tironi

[Gu kpiahe du ti kpewaraga 13]

Kangia ani nabi gu “inahe nga ga Mbori” ni kumuko, ani rengbe ka mangasunge na Ziazia Kekeapai wenengai

[Gu kpiahe du ti kpewaraga 14]

Ani nayugo nyemuse fu aboro rogo tungusa wene pangbanga fuyo