“Mi Yugu [Kpia]pai Fu Roni”

‘Wa du rago re ka oni du ni abayugupai.’—AEBERE 5:12.

1. Tipagine rengbe agu afugo ti ni du rogo AEbere 5:12 ka sa Kristano ni bakibangirini tipa gani birĩ yugopai?

WA ONI ageda gu veresi duti gaani riipai nga gu veresi naye be ga Mbori toro, oni nabaka bangironi wa si nafura tipa roni? Kangia wo duhe, oni nisaro te. Ni du ani ni apefuo Kristo, ani ini gupai nga, si naida ani duni abayugupai. (Matayo 28:19, 20) Ani ini gupai nga, agu regbo ani araka rogoho naida gupai nga ani yugupai niipiipihe na ni birĩ kuti ome rani. Na ani ini gupai a nga, gaani yugopai rengbe ka ye na unga watadu kpio fu agu aboro ani ayugopai fuyo! (1 Timoteo 4:16) Nirengo tie, ruhe aru ani sana tirani ki ya: ‘Ya mo mi nirengo ni gu bayugupai si aida mi du nga ni? Wai rengbe mi ka mbakada gimi birĩ yugopai?’

2, 3. (a) Wai bayugupai sa asakirogo pa wai du mburu wene yugopai? (b) Gini kpiapai Yesu amoihe fu rani tipa yugopai?

² Si aidanga ngbatunga gu bakabangirise re zeresi kpotoraniyo te. Ka si du nga ani naberãpa yugopai wenengai kina kuti gu birĩ yugopai boro awirikihe, pa berã ani pa mbakada gaani sino yugopai fu afu rii omerani. Ono tie, mburu wene yugopai nga birĩ te, ono si nga gupai nyaki paha kisusi birĩ yugopai. Oni bingo gupai gu bayugupai nga guko ima ruga tiko na pa yugopai wenengai akehe rogo buku sa tii gu riifugo nga: “Wene yugopai arunga kurii kparakpara birĩ watadu gene mangapai, watadu sogima apai watadu kura mangaapai te. . . . Bambatapai tipa yugopai nga, si naida nyemuse.” Rengo ngaha, gi gako bipai re adu tipa gu kungbo yugopai nga ga zegino. Wa vura duhe wo, ani rengbe arengba ka mangasunge na gako bipai rogo gu yugopai ani amangaha wa du ani ni aKristano. Rogo gini agene rengbe ani ka mangaha?

³ Yesu Kristo nga gaani kpiapai rogo yugupai angianga kura boro ya, nga guko naya fu apefuo ko wee: “Mi yugu [kpia]pai fu roni.” (Yoane 13:15) Ko aayugo kpiapai kuti tiko rogo yugo ko pa umbasitise, ono gu kpiapai Yesu amoihe fu rani nakoda kiopa gu gako sunge nyakipaha kisusi kura asunge dunduko nga gu ko aamangaha ho ko aduni zegino ni boro, nangia yugopa ga Mbori Kindo fu aboro. (Ruka 4:43) Nibi gipai re, ka i sana roni ya, oni sia fugo sa ka ringbisapa ga Yesu sunge kuti ni, si nawira gupai nga, oni sia kina gu fugo nga “nyemuse,” anga si ka oni siaha tee? (AKorosaio 1:15; 1 Yoane 4:8) Ga Yesu nyemuse tipa gu Bako du ngbangbaturũ yo nga Yekova aduni bakerehe gbe. (Yoane 14:31) Ono tie, rogo gako sunge ni bayugupai, Yesu ayugu nyemuse fu aboro ngba kura agene ue. Ko akpinyemu gu rengo ko anayugoho fu aboro, na kini kpinyemu agu aboro a ko anayugoho fuyo. Ani moinga berã rani wenengai ti agu apai du ue ko amoihe fu rani nikpiapai re.

Yesu Aduna gu Nyemu ga Mbori Rengo Tiko ka Diganga Ya

4. Wai Yesu amoi nyemu agu apai Yekova anayugoho ku ngbadukoyo?

⁴ Gu sino nga ga bayugupai kuti gupai ni ayugoho na bakere sangbanaha kurii gani yugopai. Ka nyemu gupai ni ayugoho adunga tini ya, kina gupai re rengbe ka mera fuo gani abawirikipai a. Yesu adunga na zingo nyemu gu kikiipa arengo ko anayugoho tipa Yekova na tipa Gako Kindo te. Nyemu gupai Yesu anayugoho adu tiko nibakerehe. Ko amoi nyemu gupai re ku ngbadukoyo ho ko aduni ni bawiriki. Vuru gu dungu agarã dunduko bangisa Wiri Mbori araki rogoho mbata fu du ko ni boro, ko aduna bakere nyemu wirikapai tiko. Yesaya 50:4, 5 na gu kekepai rogoho narẽ na ko nga gu nayaa: “Gbia Mbori fu gu mirãse fere wa ga agu yo i ayugu pai fu yo, ya mi ini waĩ ka mi songodi gu ni nambu ni wene fugo. Ko nazingisa re wiso na awiso, ko naza ture sa gia pai wa ga agu yo i ayugu pai fu yo. Gbia Mbori za ture, mi angianga boro samungu te. Mi asa nga tire ku sa yo a te.”

5, 6. (a) Ginipai namangi fu Yesu ti regbo gako bapatiza, sangbanaha angia gine kuriko? (b) Gini kparakparapai ani abihe dagba Yesu na Satana nibipa mangasunge na Fugo Mbori?

⁵ Ho Yesu aasona ni auru kpotosende ni boro, ko anakpinyemu gu tatamana kindi nga ga Mbori. (Ruka 2:52) Na ti regbo gako bapatiza, pai amangi fuko nadu kia. Ruka 3:21 nayaa: “Ngbangbaturũ . . . [a]za.” Wa gopai ayugoho, ti gu regbo re, Yesu arengbe ka tingida pa gu gako raka nadu mbata fu du ko ni boro auru kpotosende. Fuo gure, ko araki tipa arame 40 ngbakungba yo kini gino riahe. Si nawira ko aima duna bakere ngbarago wa ko aaberã kurii gu dungu aregbo nangia ga gu wirikapai ko aawirikaha be Yekova ho ko aduni na ko ngbangbaturũ yo. Ono tie, mbata ka fuo gi berã kuriiapai re ata imanga ya, Bakitingbanga amoi gu nyemu ga Mbori rengo nadu tiko ngba asada.

⁶ Ho Yesu aduni na mbugo ki duna gomoro, Satana agbata gene ka asada ko. Nga gu riko kparakparapai ani abihe dagba agi awiri Mbori du ue re! I dunduko ue arogodi afugo rogo gu Ziazia Kekeapai i akehe rogo pa-Ebere, ono sino yo kuti ni adu nibakiakia. Satana a’aria Fugo Mbori, kini mangisunge nani zanga irisa, tipa si mangi gu gako apai nangba ti kina ko. Nirengo, gu basamungu re adunga na kurapai ngbako fuo kina bisirapa ga Mbori rengo sa te. Ngba kura gene, Yesu tigako arogodi afugo rogo Ziazia kekeapai na ndikidi nyemuhe, na kini mangisunge na Fugo Mbori ni rugatinapai ka fu karagapai nibasasa fu Satana. Yesu aima duho mbata fu ke yo agu afugo naye be ga Mbori toro re, na wa si avura du wo, ko abi agu afugo re na irisa. Si adu ni kikiipa afugo be gu bako du ngbangbaturũ yo! Ko aya fu Satana wee ngbatunga agu afugo naye be Yekova re paha anyaki kisusi pa riahe. (Matayo 4:1-11) Ii, Yesu akpinyemu agu arengo dunduko Yekova ayuguhe fuko. Ono tie, waigu ko ayugu nyemu gipai re wa ko adu ni bayugupai?

Yesu aduna Nyemu gu Rengo Ko Anayugoho fu aboro

7. Tipagine Yesu aka ti ni ka sanga gako yugopai nitiko?

⁷ Dedede, aboro aima ino gupai ziazia nga, Yesu aduna nyemu gu rengo ko anayugoho. Kurii agi apai re, ko arengbe rengba ka zunguda apai taata ti rii gu ko anayugoho. Ko aduna bakere inohe na tatamana kisusi. (AKorosaio 2:3) Ono wa si avura du wo, ko anatingida agu aboro dedede nanadegatuyo kuti ko kini gumba gupai fuyo nga, agu apai ko anayugoho aenganga beko te, ono si aenge be Bako. (Yoane 7:16; 8:28; 12:49; 14:10) Ko akpinyemu gu rengo nga ga Mbori kisusi asusa gbe si du ko amaanga sangba riko yo ti ni kubaha ya.

8. Ti tonatona gako sunge tungusapai, waigu Yesu amoi kpiapai tipa kido kuti Fugo Mbori?

⁸ Ho Yesu atona gako sunge tungusapai ni gbaiga, si aimanga te ko ki moi kpiapai. Oni berẽnga pa gu gene ko atakipande gupai rogoho fu ga Mbori aboro ya, ko nga gu Masiya i akido pako. Ya mo gupai ko amangihe gbua nga ka kura ku dagba rimbasa aboro kini tona ka takapande tiko ni Kristo, na kini mangi bakere iiriwoapai tipa aboro idipa ko? Oó. Ko andu ku bambutiria yo, yo ga Mbori aboro anageda Ziazia Kekeapai ni dedede. Yo ngaha re, ko agedi gu sangbanebi ni nga ga Yesaya 61:1, 2 na fugoko kuari, fuo gure, ko ki sakirogoyo ki ya agu arengo nga ga gi sangbanebi re adu tipa ko. (Ruka 4:16-22) Gako dungu iiriwoapai afu undo tipa ka sigira gupai nzunzu nga, Yekova kugii ko. Wa si avura du nga ko anamanga iiriwoapai, ko anakido kina kuti Fugo Mbori rogo agu apai ko anayugoho dunduko.

9. Rogo gako karagapai fu aFarusi, waigu Yesu ayugu pa gako ruru nyemu Fugo Mbori?

⁹ Ho agu aboro kango nga ga apambori yo apayasipa Yesu ni ku bangiri aboro, ko adingisonga tiko na yo tipa kaa dara kango tipa i bi gini boro rengbe ka dia be kura ni te, wa si avura du nga ka ko adi adia beyo rogo gu kango re vuru. Kuba gure, ko ahe kina Fugo Mbori si di kango kusayo ngbayo. Ni kpiapai, oni tingidinga gu kurapai berewe namangi ho aFarusi akitingbaanga ga Yesu abawiriki ni, ya i nakuo andiko nga ga Sabiti ni siro yo bete vunde ati yo kini rihe ho i asusa ni rogo ati he. Yesu akaragapai fuyo ki ya: “Oni ageda nga gu pai [Davide] amangi ni gu rago gomoro amangi ko, na agu yo naadu na ko te?” (Matayo 12:1-5) Rengo ngaha, ka si ima du nga agu aboro naamanga tiyo niruru yo re aima geda gu pangbanga duni kekehe rogo 1 Samuere 21:1-6 ga Mbori toro adu kugiipa kehe. Kangia si adu wo, i aruganga tiyo na gu banyanyakipa wirikapai nadu rogoho te. Ono tie, Yesu amangi kurapai kisusi gu nga geda kina pangbanga gbua. Ko aima berã kuriihe mbata na ki idipa gu rugute rengbe boro ka wirikaha behe. Ko akpinyemu agu arugute adunga ngburungburu ya nga gu Yekova ayuguhe rogo gu papara Ziazia Kekeapai re. Sidu, ko amangisunge na gu pangbanga re kodihe kuti gu kpiapai ko adihe rogo ga Mose Ndiko ka yugo pa ru agu aNdiko re fu aboro. Teketeke a, ga Yesu ruru nyemu Fugo Mbori afõngbadukoyo ko ru kugiihe ka bandaha be gu ome nangia ga abarumbatayo rogo pambori tipa i ka ariaha kuti gu gayo pai nangba tiyo watadu ka diaha kusayo ki moi sino atitayo kubaha.

10. Waigu Yesu adigisi gu sangbaanebi nadu tipa ngbatunga gu yugopai nangia gako?

¹⁰ Nyemu gu rengo nadu ti Yesu nga gu ko anayugoho, arengbanga ka he ko ko yugupai gbua kina ngbariko rogo gu gene ka aboro adu behe na kina mbugo kaa giaha watadu ni kpasiakaha tue yo te. Gu sangbaanebi ga Mbori toro adu kugii pa kehe ayugu gupai nga, si aida Masiya fura ‘na undohe ti kpoto ngbako,’ kini kusi “wene apai.” (Atambuahe 45:2; Bambata Pai 49:21) Yesu adigisi gu sangbaanebi re ni banda ko gako yugopai ni vovoho na nibawenehe, kini gumba “wene apai” wa ko anayugo gu rengo ko akpinyemuhe gbe. (Ruka 4:22) Zanga kapa, gako ngbarago tipa gipai re ayugutihe kpakpuko yo, na ko kini ngere na nyemu gako yugopai tiko. Nga gu bakere ngbarago nangiaha ka giapai ngbako, nga gu wene kpiapai fu rani ani peke fuoho baraho ani afura ni fu kura aboro tipa gupai wiriki ani he!

11. Tipagine pa rengba Yesu ni bayugupai asanga ko tini ko duni iraruko ya?

¹¹ Ya mo ga Yesu bakere inohe nga ga agu arengo nga ga Mbori asako ko duna ruko? Gure nga gupai ninaamanga dedede tipa agu abayugupai nga awiri aboro. Oni tingidi gupai nga, Yesu aduni iratatamana rogo gu gene nga ga gunde ti Mbori. Ngbatunga gu tatamana re, asanga boro ni iraenda te, bambiko “tatamana du fu agu yo du ni bayee yo.” (Asanza 11:2) Kurapai adu kinaho nasa Yesu ka ko dunga ni boro ruko watadu ni iraenda ya.

Yesu Anakpinyemu agu Aboro Ko Anayugopai Fuyo

12. Waigu Yesu ayugu gupai nga, ko aidanga apefuo ko gunde be ko te?

¹² Pa ga Yesu dudunguro nyemuse tipa aboro adu dedede ni yuguyuguhe gbaiga rogo gako yugopai yo. Gako yugopai adunga ni gupai nazeresa kpoto aboro yo si kini rungosi yo wa gu yugopai nga ga airaruko te. (Batungusipai 8:9) Fuo bi Petero iiriwopai sa dagba agu akuraha Yesu amangihe, iriwoho ati tiko ko ki ti sande pati ndu Yesu . Ono Yesu aidanga apefuo ko du na kere gunde be ko te. Ko aya fuko ni weneringise wee, “Ka mo gúnde nga ya,” fuo gure ko ki pepa gu bawene sunge fu Petero nga ga sa aboro ni abawiriki nga gu si adu nga ko nika mangaha. (Ruka 5:8-10) Gupai Yesu aidaha be gako abawiriki nga, gayo nyemuse tipa gu kikiipa rengo du tipa Mbori ngia gupai nika fõngbaduyo yo angianga gunde be gayo bayugupai ya.

13, 14. Rogo gini agene Yesu ayugu nunga aboro?

¹³ Ga Yesu nyemuse tipa agu aboro ko anayugopai fuyo ayugutihe a rogo gu nunga ko adu nani tipa yo. “Ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu [avusende] adu nga na babandara ti ra ya.” (Matayo 9:36) Ko adu na nunga yo tiko si ki fõngbadukoyo ko undo yo.

¹⁴ Oni bingo gu nunga aboro nadu ti Yesu ti gu kura regbo berewe. Ho dee aye ni koyo du ko ni dagba rimbasa aboro nga guri kureri anaga na ki zadi ngba gako rokoo, ri ahu be gari kaza ngba iiriwo gene. Yesu ainihe ya gako tandu guari tiko, ono ko abinga gu boro nahu be gu tandu re te. Ko anyakasipai ya ko naida ka bi gu boro zadi ko re. Tipagine ko aida ka biri tini? Ko aidanga ka biri tipa ka payasi pari tipa kuo ri agu aNdiko watadu agu arugute nga ga abakeapai na ga aFarusi wa ri avura kaa gunde nga, ri akuoho ya. Kuba gure, ko aya furi wee: “Vungu, ga idapase batasi ro. Mo ndu zezeredi ki bati be ga kere kaza.” (Marako 5:25-34) Oni bingo gu nunga du rogo agu afugo re. Ko ayanga aya gbua wee “mo hu be ga kaza” te. Kuba gure, ko aya wee: “Mo . . . bati be ga kere kaza.” Gu fugo Marako amangisunge herẽ nani rogoyo rengbe ka du nga, “taka he,” nga gu gene taka boro dedede du rogoyo nga ka rungosi ni. Sidu, Yesu aini gupai nga gari kaza aima fu rungo furi gbe, isoke si avura du nikere kaza ti borori na rogo gari berã. Ko aduna nungari tiko.

15, 16. Gini apai namangi rogo ga Yesu sunge tungusapai nga gu nayugo gupai nga, ko anangera tipa kina gu wene apai nadu ti aboro?

¹⁵ Yesu ayugu nyemuse a tipa aboro rogo gu gene nga ga ngera tipa kina gu wene sino du tiyo. Oni berẽnga pa gupai namangi tipa Natanaere ho Yesu abi ko ni, nga guko naye ka duni mokedi kusa. “Yesu ki bi Natanaere ko niye koyo du ko ni, ki ya tipa ko, ‘Oni ngére ndikidi Yisaraere [du re], biriki ti ko te!’ ” Ni iiriwopai, Yesu aima ngera kurogo gu sino nangia ga Natanaere, na ki ima ino badungu apai tipa ko. Rengo ngaha, Natanaere adunga ni rengberengbe boro te. Gako aingapai adu kina tini, a wa du ani dunduko. Nirengo, ho ko agi pa Yesu ni, ko aima tuka fugo bara ko nzakara ki ya: “Ka wene he kuru Nazareta yo?” (Yoane 1:45-51) Ono tie, dagba agu apai dunduko i arengbe ka pehe tipa Natanaere, Yesu asia kina wenehe ka berã kurii he, nga gu sino ko nangia ga pe kina rengo zanga pe ziree.

¹⁶ Teketeke a, ho barukurii aborovura isoke navurangia Gendiria aye ni fuo Yesu ka sana ko tipa ko husi gako moyambu, Yesu aima inoho nga gu barukurii aborovura re angia gu boro nanamanga irairaapai amanga. Gu barukurii aborovura nangia ga agu a’uru re, aima du nirengo na agu asinoni ni anamangaha mbata kusayo wa bakere zuũ, uka kure aboro, kodihe na pa iriso kungbo ambori a. Wa si avura du wo, Yesu amoi berã ko kina kurii gu wenepai nadu beko, gu nangia pa gako idapase nga gu nadu nibakerehe. (Matayo 8:5-13) Kusa, ho Yesu afura ni fu gu boro ingaapai i a’asi ko pati ko ti ngua mbusa, Yesu azanga ko ti gu gbegbereapai nga gu ko anamangaha mbata te, ono ko angarasi ko ko duna maabangirise tipa gu raka du kumbatayo. (Ruka 23:43) Yesu aima ino gupai wenengai nga, bisirapa kura aboro kini basa payo ni gupai naye na kina gberarago fuyo. Zanga kapa, gako bakere asadatise ka gbata kina gu weneapai nadu rogo kura aboro yo, angarasi gu kura aboro i mbakadi sino yo.

Yesu Aduna Nyemu Mangapa Aboro

17, 18. Ni ida ko pa gu sunge i afuhe fuko ko ye ku auru kpotosende ka mangaha, wai Yesu ayugu nyemu mangapa kura aboro?

¹⁷ Gu kura kikiipa gopai berewe nga ga ga Yesu nyemuse tipa agu aboro ko anayugopai fuyo angia nyemu manga payo. Mbata fu gako raka ni boro, Wiri Mbori aima duna nyemu ngbatunga aboro tiko. (Asanza 8:30, 31) Ni du ko ni ga Yekova ‘Fugo,’ watadu ni gu boro nafura kubako, ko avura gbia ngbarago rogo gako dungu mangaapai na ngbatunga aboro. (Yoane 1:1) Ono tie, papara ndu gupai “ko auka pa tiko [tini] ki du wa kina kanga,” ki mbu gako tumbatumba ba ngbangbaturũ yo ka ye ku zegino nga, ka yugopai ngburungburu fu ngbatunga aboro. (AFiripoio 2:7; 2 AKorindo 8:9) Ho Yesu aduni auru kpotosende, ko adunga na gu berã nga aboro mangisunge fuko te. Kuba gure, ko ayaa: “Wiri boro aye nga i nimangi pa ko te, ko naye ka manga pa aboro, ka tumo dungu yo ni ungako.” (Matayo 20:28) Yesu araki kina kuti agu apai re nzunzu.

¹⁸ Yesu aduna umbasitise ka ndusunge agu aboro nadu na zingo nga agu aboro ko anayugopai fuyo, kini fu tiko ka undo aboro zanga keesa. Ko anata rogo Ringara Mokido ni nduko kini ndu tipa dungu kama akirometere na anunguro nga ga tungusapai ni asadatise ka bi badungu aboro a wa ka si rengbe. Angianga wa agu airaruko nangia aFarusi na abakeapai ya, ko tigako anye ni bayee ko ki duni gu boro aboro arengbe arengba ka ndu fuo ni. Angbatunga riko aboro dunduko, kikindigipa aboro, abanzengere, abainiparugute, adee, agude, rungorungo aboro, aboro kaza, zavura aguyo i asoga yo asoga dagba aboro arengbe arengba ka ndu fuo ko ni ngbarago zanga gunde. Wa Yesu avura duni rengberengbe boro, gomoro anamanga ko amanga na omeko anabata abata a mbiko ko angia kina boro. Ono tie, zavura ho ko anidu ni na mbugo watadu kini kpinyemu ka ongoda watadu ka gbia wene regbo tipa kparakpee, ko anamaa kina nyemu gupai nga ga kura aboro kumbatayo kisusi pa gako apai.—Marako 1:35-39.

19. Wai Yesu amoi gu kpiapai nga ga mangapai rogo umbasitise, hipai, na weneringise wa ko aamangapai na gako abawiriki?

¹⁹ Yesu aduna nyemu ka mangapa gako abawiriki a. Ko amangi he wo, rogo yugopai fuyo ni weneringise na rogo zerangbaduse. Ho si aniwiri gupai ni nga bangiriyo ima go ti giarogo kura nyanyakipa gupai i aima wirikaha, rago anagberanga tiko te, ko anazinganga te, watadu kini gbarasi rimoyo a te. Ko anandu kina kumbatayo ka gbata vovo agene nga gu rengbe ka undo yo i rugu tiyo na gako yugopai. Ni kpiapai, oni berẽnga pa wai abawiriki anapapaya dagba tiyo dedede riipa gu boro pani akii dagbayo. Berewe na berewe, da kurogo gu yuru naye mbata fu imo yo ko, Yesu agbata kura vovo gene ka yugopai fuyo tipa wai rengbe yo ka mangapai na akurayo rogo umbasitise. Rogo gipai nga ga umbasipatise re, na wa duhe a tipa kura apai dunduko, si aru aru Yesu ya wee: “Mi yugu [kpia]pai fu roni,”—Yoane 13:5-15; Matayo 20:25; Marako 9:34-37.

20. Gini gene yugopai nasa Yesu akia ti aFarusi, na tipagine gu gene yugopai re adu ti ni nibawenehe?

²⁰ Oni kparia gupai nga, Yesu apenga kina pa wai gbua du kpiapai fu gako abawiriki te; ono ko ‘ayugu gu kpiapai’ fuyo si aidi i naamangaha. Ko anayugopai fuyo ni kpiapai. Ko afuranga fuyo wa gu boro kii pani akio kisusi gayo, na si ki du wa pako aima kio kisusi ba manga agu apai ko anagumba pa mangaha fuyo te. Gure nagia gu sino nangia ga aFarusi. Yesu aya tipa yo wee: “I nagumba pai ono i amanga nga ha te.” (Matayo 23:3) Yesu ayugu ndikidi rogo gako yugopai yo fu gako abawiriki ni manga ko ho nga kina boro ko nitiko ni umbasitise. Sidu ho ko azungodi apefuo ko ni tipa i naaraka taata raka, nga gu adunga na nyemu aũzegino ya, si akpakaranga fuyo i rugu tiyo na ginipai ko aberẽhe te. I arengbe arengba ka rugatiyo na ndikidi rogo gako fugoyo, ho ko ayani fuyo wee: “Ayaro be anya, agu azire du ari yo bambu be ra; ono Wiri boro adu nga [na] ba be ko ka maa riko ku auru he te.” (Matayo 8:20) Yesu andusunge gako abawiriki rogo umbasitise ni maa ko kpiapai fuyo.

21. Ginipai ani nika wisigoho rogo gu paparaha naye fuo gere?

²¹ Si ziazia tie nga, Yesu angia gu bawene Bayugupai kisusi naraki zegino! Gako nyemuse tipa gupai ko anayugoho na gako nyemuse tipa agu aboro ko anayugopai fuyo adu ziazia fu agu aboro dunduko nadu na ruru ngbaduyo yo nga aguyo nabi ko na ki gi pai ngbako. Kinawo a duhe ziazia fu agurani du areme nawirika gu kpiapai ko amoihe. Ono wai tie rengbe ani ka pekafuo gu bawene kpiapai nga ga Kristo? Gu paparaha naye fuo gere nika karagapai sa gu sanahe re.

Gaoni Karagapai Nga Gine?

• Gine nga mburu wene yugopai, na gini boro nayuguhe?

• Rogo gini agene yo Yesu ayugu nyemu gu rengo ko anayugoho?

• Wai Yesu ayugu nyemuse fu agu aboro ko anayugopai fuyo?

• Gini kpiaapai nayugopa ga Yesu nyemu mangapa agu aboro ko anayugopai fuyo?

[Gu kpiahe du ti kpewaraga 8]

Wai Yesu ayugu gupai nga ko akpinyemu agu arugute adunga ngburungburu ya du rogo Fugo Mbori?