“Ani Moi Berã Rani Susi Gu Nidu Mbata Fuo Agu Apai Ani Agihe”

‘Si du rehẽ arẽ ti ni fu rani ani moi berã rani susi gu nidu mbata fuo agu apai ani agihe tipa ka ani gbisinga ti ni kusayo ya.’—AEBERE 2:1, NW.

1. Oni yugunga ha na kpiapai, wai ka berã boro aria tihe sa kurapai si ki ndu na ni sa kpio.

GU BÉNO nga ga atarambiri naimo aboro du bangeyo wa 37,000 na agarã nibasasa rogo gu ringara nga Amerika nisaha. Agu aboro nga abangbasia abainipai naya wee, badungu aboro rengbe arengba ka neka gi kpio re ka abakama tarambiri moi berã yo wenengai fuo agu arugute du tipa nduge bangiri gene. Kura abakama atarambiri na’aria gayo berã kuti agu akpiaahe nayugo pa arugute nduge bangiri agene nga gu duni dudua duduaha pangba agene gbiati gu kpakakpaka angua i adiko kekeapai ti ni pangba agene, watadu be fugo rogo gayo rukutu aterefuni nga ga bee. Gu kura abakama tarambiri kinaho a, nafu tiyo sa ri riahe tarambiri yo ho i akama tarambiri ni. Rogo agi apai re dunduko, zanga maa boro berã ni fuo gani tarambiri rengbe ka ndu na ni sa kpio.

2, 3. Gini rugute Pauro afuhe fu agu aKristano nangia aEbere, na tipagine gi gako rugute aruaru ti ni re?

² Mbembedii wa agarã 2,000 kusayo mbata fu aboro tona manga atarambiri, gu mokedi nangia Pauro ayugupa ngbatunga kura zanga maa boro berã ni fuo pai nga gu naaye na gberango fu bete agu aKristano nangia aEbere. Pauro anyakasi gupai nga, gu Yesu Kristo i azingisi ko bekpio re, i afu gu ba fuko nakii susi ga amaraika, bambiko i asungusi ko pati kumbabe Mbori. Gu mokedi re akodi kurapai berewe kuti gure ki yaa: ‘Gure nga ndu gupai rehẽ arẽ ti ni fu rani ani moi berã rani susi gu nidu mbata fuo agu apai ani agihe tipa ka ani gbisinga ti ni kusayo ya.’—AEbere 2:1, NW.

³ Tipagine si aidi gupai ti ni nga agu aKristano nangia aEbere ‘moi berã yo susi gu nadu mbata fuo agu apai i agihe tipa Yesu’? Bambiko agarã asusi mbembedii wa 30 fuo guari Yesu kusayo auru kpotosende. Gu kura agu aKristano nangia aEbere atona kaa gbisa kusayo ti ndikidi idapase, i nangere ba Bairayo vuru. Gu pambori nangia ga aYuda naafuda berãyo, nangia gu pambori i adu rogoho mbata.

Si Aidi I Moi Berãyo Wenengai Gbe

4. Tipagine bete agu aKristano nangia aEbere arengbe ti ni ka duni asadiasadiyo ka karaga tiyo kurogo gu pambori nangia ga aYuda?

⁴ Tipagine ka Kristano arengbe ti ni ka duni asadiasadi ni ka karaga tini kurogo gu pambori nangia ga aYuda? Oni ngere, gu sino irisombori nadu tii ga Mbori Ndiko akodi agu ahe kurogoho aboro anabihe abi nibangiriyo. Aboro anirengbe arengba ka bi aboromotumo na kini gi fuõ zozo amotumo. Ono tie, rogo gu kura apai, gu pambori nga ga aKristano adu nikparakparaha kia ti gure. AKristano aduna Gbiamotumo beyo sa, nangia Yesu Kristo, ono i aabinga ko auru kpotosende te tipa agarã 30. (AEbere 4:14) I adu na Yekaru beyo, ono gaha ziazia ba angia kina boro ngbangbaturũ nitihe. (AEbere 9:24) Gu yeratise nangia ga aKristano adu ni gu yeratise “nga kina ga kpoto yo, kina rogo Toro yo,” angianga wa gu ndikidi yeratise nadu tii ga Mbori Ndiko ya. (ARomo 2:29) Sidu, gu pambori nangia ga aKristano, avura tona ka paya apaya bangiri agu aKristano nangia aEbere rogo sinoho yo.

5. Wai Pauro ayugu gupai nga, gu sino irisombori Yesu amoi mburuhe aduna kikiipaha kisusi gu nadu tii ga Mbori Ndiko?

⁵ Si aidi gupai nga, agu aKristano nangia aEbere ini gupai nadu na nyanyakipaha tipa gu sino irisombori Kristo amoi mburuhe. I amoi mburuhe gbe rii idapase angianga gupai i abihe abi nibangirise ya, wa si avura du wo, si paha akii ti gu Ndiko Mbori afuhe kube gu nebi nangia Mose. Gu mokedi nangia Pauro akepai ki ya: “Si ngia kure ameme na abaabagara, na kure wiri bagara tipa migida agu yo adu na biriko na ni, si ki ziasi yo tipa gu gira nga ga boroboro, kure Kristo kii nga ti gere susi te, nga gu ko natumo ni tiko fu Mbori rogo nyenye Toro yo, ka sirõ adunga ti ko ya, tipa girisa sangba kpotoroni yo be kpikpi mangimangi apai, ka manga pa unga Mbori.” (AEbere 9:13, 14) Ii, pa vu boro ti ingaapai mbiko gu idapase du ni nani rogo gu motumo tumorii nga ga Yesu Kristo na kikiipaha gbe ngba dungu agene kisusi gu vu boro agu amotumo i anafuhe kuti sangba ga Mbori Ndiko anamangaha fu aboro.—AEbere 7:26-28.

6, 7. (a) Ginipai nasa gupai niipo nga agu aKristano nangia aEbere ‘moi berã yo susi gu nadu mbata fuo agu apai i agihe’? (b) Ho Pauro ake gako waraga ni fu aEbere, bagizo regbo anye koyo wai tipa gbarasa Yerusarema? (Oni bi gu rukutu kekepai du ti kpewaraga 10 barii asanahe.)

⁶ Gu kura ndupai adu kinaho si aidi agu aKristano nangia aEbere moi berã yo ti ni wenengai fuo agu apai i agihe tipa Yesu. Ko aima fura tipa gupai kumbatayo nga, i agbarasa Yerusarema agbarasa. Yesu ayaa: “Rago nikaye ku ri roni, ho avuraroni ka ba nduka ni kirikiri pati roni, ki ke pati roni, ki kisi rago pati roni dunduko, ki merẽ roni ku sande, na awironi a. I ahe nga gu mbia auru kura ha rogo bakporo wa sa te; bambiko oni aina nga gu rago ye Mbori ka manga paroni te.”—Ruka 19:43, 44.

⁷ Gini regbo si adu nga gipai re amanga ti ni? Yesu ayugonga gu uru na gu saa te re. Kuba gure, ko afu kina gi rugute re fuyo: “Ho oni ka bi Yerusarema ni i nikisi he kirikiri na aboro vura, oni ki ini he, ya rago gbarasa ha mbedi. Agu aboro ka du Yuda yo i ki oro ku abaagangara yo; agu yo ka du bakporo yo i guari yo; agu yo ka du ringara yo ka i rimi nga ku rogo bakporo yo ya.” (Ruka 21:20, 21) Rogo gu 30 agarã naye fuo peka Yesu agi apai re, bangiri bete agu aKristano nadu Yerusarema yo aima go ti mangaapai niipiipihe na berãyo ki aria tihe sa kura apai . I adi bangiri yo kusayo ti gene wa kina gu boro riniyo nivundu ho ni akama tarambiri ni. Si aima du nga, ka i aruganga gayo gene berãpai ya, gberango aenga ti ku riyo te. Singia i aberãha wo watadu i aberãnga ha wo te, pa gbarasa Yerusarema aima mbeda ka manga!a Nirengo, ga Pauro arugute azingisi agu aKristano naayukuro ayukuro Yerusarema yo rogo toroyo re.

‘Maaberã Areme Susi gu Nidu Mbata Fuo agu Apai Ani Agiaha’

8. Tipagine si aida ‘ani moi berã rani ti ni susi gu nidu mbata’ kuti gu rengo nga ga Fugo Mbori?

⁸ Wa kina agu aKristano nadu rogo bambata sa kama agarã, si naida ‘ani moi berã rani susi gu nidu mbata fuo’ agu gu rengo nga ga Fugo Mbori. Tipagine? Bambiko ani a napido gu gbarasahe nika manga bambeda, angianga gu nika manga kina bangisa rikaaboro gbua ya, ono zegino dunduko nabaha. (Yugoti 11:18; 16:14, 16) Rengo ngaha, ani ainonga gu ndikidi uru na gu saa Yekova nika manga gipai re ti ni te. (Matayo 24:36) Wa vura duhe wo, ani nga agu adezire bi nibangirise nabi gu digisidigisi sangbaanebi nga ga Ziazia Kekeapai nga gu nayugo gupai nzunzu nga, ani naraka awere rogo ‘yangara arame.’ (2 Timoteo 3:1-5) Sidu tie, si naida ani banda tirani be agu apai dunduko nga gu rengbe ka aria gaani berã kusayo. Si naida ani moi berã rani kuti Fugo Mbori ki kakuti berãpa ipisotise rogo gaani mangaapai. Kina mbiko manga ani he wo rengbe ani ti ni ka “di[a] be pai ka bata be agi apai nikamanga dunduko re.”—Ruka 21:36.

9, 10. (a) Wai rengbe ani ka yugo tirani nga ani namaaberã rani amaa fuo agu apai nga ga toro? (b) Wai du Fugo Mbori ni ‘baro tipa ndurani’ na ni ‘imarago ngba gaani gene’?

⁹ Rogo gi nyanyakipa a’uru re, wai rengbe ani ka yugo gupai nga, ‘ani namaa berã rani susi gu nidu mbata’ fuo agu apai nga ga toro? Gene sa dagba agu akuraha ka ani mangihe rogoho nga kaa du dedede pati agu adunguratise nga ga aKristano na pati kikindigi adunguratise. Si naida ani du a ni agu abawisigi Ziazia Kekeapai adunga na nyomoro tipa wetekaha ya tipa wa ka ani mbedi koyo du Baenge kehe ni nga Yekova. (Yakoba 4:8) Ka ani di gu inohe du tipa Yekova rogo wisigopai nisase na pati adunguratise, ani du adu wa gu bake Atambuahe naya fu Mbori wee: “Ga pai wa baro tipa ndure, nga imarago ngba gi gene.”—Atambuahe 119:105.

¹⁰ Ziazia Kekeapai naundo rani ni ‘imarago ngba gaani gene’ ho si a pekapa ga Mbori ringbisapai ni tipa agu apai du kumbatayo. Si a nga ‘baro tipa ndurani.’ Ka pehe rogo kura afugo, si rengbe ka undo rani na gupai ka ani idi ka mangaha ho ani agbia tirani ni na gu kpakarakpakaraapai du rogo gi raka re. Si du duhe ti ni fu rani ni nyanyakipa pai “ani moi berã rani susi gu nidu mbata fuo agu apai ani agihe,” ho ani adungura tirani ni tipa arugute na akuarani aidipase na ho ani ageda Fugo Mbori ni nisarani. Agi atingidapai ani adiaha re nika undo rani ani mangi gu diaberã duna tatamana na nga gu nafu undo na kini fu ngbarago fu Yekova kini sa ngbaduko si ngi. (Asanza 27:11; Yesaya 48:17) Wai rengbe ani ka kiiso bagizo regbo gaani maa berã fuo gupai ani agiaha pati adunguratise na ti agu aregbo nga ga wisigopai nisase tipa wa ka ani gbia bakere wene undo be agu ahe nga ga toro Mbori afuhe?

Ani Sonosi Gaani Gbeberã Kuti agu Apai Du Pati Adunguratise

11. Tipagine pa maa boro berã ni fuo agu apai i agumbaha pati agu adunguratise nga ga aKristano naakpakara ti ni ti kura aregbo?

¹¹ Ti kura aregbo, maa boro berã ni fuo apai rogo agu adunguratise nga ga aKristano ni taatapai te. Berã boro rengbe ka inga taata, isoke be kpee agude watadu be agu aboro naye kusa nga aguyo nangereka tipa basungo ka sungo. Fuo dia ani gbanga regbo kuti ngba sunge, si rengbe ka du nga mbugo ima zio rani. Watadu gu boro namanga gumbapai rii tambara yo anga wene bagumbapai nga ni te, na mbata fu ruga ani tirani na gupai re, ani bi gupai nga berã rani ima inga gene berã kura apai yo nga gu ngbaa tirani, watadu ani rengbe kaa yukuro ayukuro! Nibi nyakapa gu pangbanga i ayugoho re, si naida ani mangi asadatise ka kiiso gaani ome dungura berã ka degaturani kuti agu apai i agumbaha pati agu adunguratise nga ga dungurati. Ono wai rengbe ani ka manga gipai re?

12. Ginipai rengbe ka saha fu rani taata tipa ani moi berã rani fuo agu apai i agumbaha pati adunguratise yo?

¹² Si dedede ni taatapai ka maa berã rani fuo agu apai i agumbaha pati adunguratise ka si du nga ani ima mbakada tirani wenengai. Wa duhe tie were, tipagine ka oni akparanga regbo ti ni mbata ki ima maa gupai ku berã roni yo oni andu ka wisigoho yo ya? Si nadia kina bete aminiti gbua rogo a’uru nibasasa ka geda gu papara akapita fuyoho tipa gu geda Ziazia Kekeapai nga ga poso na kini berẽ kuriihe. Ka ani sogima bete kura apai, ani rengbe arengba ka bi regbo tipa mbakada gu Wisigo Buku nga ga Dungurati na Wisigo Ngbaõbambu Sinziri a. Ka si vura du nga kina gini ngbatunga ringbisa regbo sunge du sia ani he, gupai sa duho nirengo nga: Mbakadatise nika undo rani ani moi berã rani fuo agu apai i awisigoho pati agu a dunguratise nga ga adungurati.

13. Ginipai rengbe ka unda rani ani moi berã rani kuti gupai i awisigoho pati adunguratise?

¹³ Kurii wene mbakadatise, kura aboro nabi gupai nga i namaa berayo gbe fuo gupai i agumbaha ba dunguratise yo ka si du nga i sungo mbembedii kumbatayo vuru Bambu Kindo yo. Ruga bangirani na bagumbapai kini peke fuo ko wa ko ageda averesi rogo Ziazia Kekeapai, na kini keke gu memeapai i agumbaha, nga gu kura agene tipa ka banda berã rani ka si merenga gene kura apai yo ya. Ono tie, duna mbakadimbakadi ngbaduseyo ngbaa kisusi gu kura agene dunduko du tipa dungura berã kuti pai. Si naida ani rugutirani na pa ndu gaani dunguratise. Ani naadungura tirani na akuarani aidipase na gu bambata nduhe nga ka iriso Yekova. (Atambuahe 26:12; Ruka 2:36, 37) Adunguratise nga gu nyanyakipa gene ani ari gu riahe nga ga toro rogoho. (Matayo 24:45-47) Kurii gure, si na fu mamu fu rani ani ‘nyakasi akuarani kuti nyemuse na kuti wene mangaapai.’—AEbere 10:24, 25.

14. Ginipai nzunzu nasa dunguratise si ngba?

¹⁴ Kura aboro rengbe ka ringbisa dunguratise singia ngbaha angba watadu ngbanga ha te ti vuro gu birĩ yugopai nga ga agu aboro namanga agumbapai. Ka si du nga abagumbapai ni wene abayugupai, i rengbe ka yaa ti ni wee si ni bawene dunguratise. Ono ka si wiri gupai nga wene yugopai adunga te, i rengbe ka duna gu bipai nga si angbanga te. Si nirengo nga si naida agu aboro du rogo gu mbakadapai nga ga gumbapai du wa ka i mangisunge na wene birĩ yugopai na gu susi asusa gbe nga, ka yugopai si ki zadi ngbadu aboro yo. (1 Timoteo 4:16) Wa vura duhe wo, si aidanga agurani nadegaturani ani payasi pa agu aboro nayugopai te. Wa vura duhe nga gu rengba na yugopai wenengai du ti agu aboro du rogo gu mbakadapai nga ga gumbapai rogo dunguratise na kikiipaha, anga si nga gu yangarapai nasa dunguratise si ngba te. Oni aidanga na gupai nga, gu memepai ani abakabangirani tipaha nga wai wenengai gbe ani adegaturani tee, angianga pa wai bagumbapai agumba gako gumbapai wenengai ya? Ho du ani ni pati adunguratise na kini moi berã rani fuo agu apai i agumbaha, gure nga ani nairiso Mbori ringbisihe kuti gupai ko akpinyemuhe. Gure nga gupai nasa dunguratise si ngba. Ka singia ani na nyemu ka wirika gu inohe nga ga Mbori, ani bi undo abi rogo adunguratise, zanga bipa gu birĩ yugopai nga ga bagumbapai. (Asanza 2:1-5) Nirengo tie, ani diberã ka ‘maa berã rani susi gu nidu mbata’ fuo agu apai ani awirikaha pati gaani adunguratise.

Oni Gbia Undo Wenengai be Wisigopai Nisase

15. Wai wisigopai na berã kuriihe narengbe ka fu undo fu rani?

¹⁵ Ani nagbia bakere undo gbe be ‘maa berã rani susi gu nidu mbata’ fuo agu apai ani awisigoho nisarani na kini berẽ kuriihe. Pa geda ani Ziazia Kekeapai na agu abuku nga ga aKristano na kini berẽ kuriihe dudunguroo nika fu wene amamu fu rani ka sigira gu rengo nga ga Fugo Mbori ku ngbaduraniyo. Gipai re tigaha, nika duna dudunguro sangbanaha rogo gaani berãpai na rogo gaani mangaapai. Nirengo, si nika undo rani ani bi ngbarago rogo manga gupai Yekova akpinyemuhe. (Atambuahe 1:2; 40:8) Sidu tie, si naida ani sonosi gaani ome gbeberã kuti pai tipa si undo rani wenengai ho ani awisigopai ni. Si ni taatapai tipa ani aria berã rani fuo kura apai! Gu rukutu apai rengbe ka fuda boro, wa gu woro nzoro nga ga terefuni watadu kungbo worohe rengbe ka aria berã rani kusayo ti gupai ani amanga. Watadu ka gu fudifudiapai re avuranga du ya, ani rengbe ka bihe nga si ni kpakarakpakaraha ani zi tirani kuti pai tipa gbanga regbo. Si rengbe ka du nga ani ima sungo na gu wene berã nga ka ri gu riahe nga ga toro, ono mbata ka fuoho ata imanga ya, berã rani rengbe ka mera gene kura apai kia. Wai rengbe ani ka ‘maa berã rani susi gu nidu mbata’ fuo gupai ani awisigoho nisarani rogo Fugo Mbori?

16. (a) Tipagine duhe ti ni ni nyanyakipa pai fu rani ani ringbisi regbo tipa wisigopai nisase? (b) Wiri oni pa gbia regbo wai tipa wisigo Fugo Mbori?

¹⁶ Ringbisa regbo tipa wisigopai ni gupai nafu undo na ki sia gu regbo ngbaa tipa mangaha. Tipa dungu rani, ani na kina wiri guru regbo gbua berani nga gu rengbe tipa kina agu apai nabi rani. Ani rengbe ka bi tirani wa agu apai namanga na a’uru nibasasa naora na ani wa ka kina ime afu na wiri bengua bangiri gu wiri di naora na kere oto. Nirengo, si naida ani sovura kuti agi apai re, na ki gbata wene aregbo vuru gaani regbo asunge yo tipa wisigopai. Ani arengbanga ka sungo asungo ka pido gu regbo mamu ka kura nisaha ani kini mo ka wisigopai te. Kuba gure, si naida ani rugu agi apai re ni sia ani regbo tipa wisigopai. (AEfeso 5:15, 16) Bete aboro nasia regbo niguruhe wiso, nga gu regbo dungu apai afudanga yo ti ni ya. Gu kurayo bi gupai tigayo nga, nyemu nga wene regbo tipa gu mamu re. Gu memepai ani aida ka gumbaha nga, ka ani mbunga dia gu ndikidi inohe du tipa Mbori na tipa Wiriko ya. (Yoane 17:3) Sidu tie, ani ringbisi regbo tipa wisigopai nisase na fuo gure ani ki kakuti gu ringbisiringbisi regbo re.

17. Gine nga berã kuriipai, na wai rengbehe ka undo rani?

¹⁷ Berã kuriipai na kikiipaha kisusi, nga dudunguro makiapa agu apai wiriki ani he rogo gaani wisigopai yo. Si naundo rani ani rogodi ga Mbori aberã rogo keke kpewaraga ki moihe ku ngbaduraniyo. Berã kurii apai naundo rani ani bi wai rengbe ani ka manga gu rugute nga ga Ziazia Kekeapai tipa ‘ani du ni amangipai, angianga agi pai gbua ya.’ (Yakoba 1:22-25) Kurii gure, berã kuriipai naundo rani ani mbedi na Yekova susi gu nidu mbata, bambiko si naundo rani ani berẽ kuriipa gako asino na pa wai nyakasi yo paha rogo gupai ani awisigoho ti agu aregbo nga ga wisigopai.

18. Gini apai si aidaha tipa gu berã kuriipai duna sangbanaha ti ni?

¹⁸ Tipa ka gbia undo wenengai gbe be wisigopai na kini berẽ kuriihe, ani du wa ka ani banda berã rani be agu apai na’aria berã. Tipa ka dia vovopai ku berã rani yo ho ani aberã ni kuriipai, si naida ani di agu apai na’aria berã kusayo berã rani yo nga ga gi raka du rogo gi regbo re. Manga gipai re nadia regbo na kini idi gupai nga boro sungu nisani, wa vura duhe wo, nga gu wenepai ngaha ka ri gu riahe nga ga toro na ka mbira gu ime nga ga rengo nga gu du rogo Fugo Mbori!

19. (a) Nibipa gu wisigopai nga ga boro nisani, ginipai ninaundo kura aboro i gizosi regbo maa berã yo fuo pai? (b) Gine si aida si du nga sino rani tipa wisigopai na gini undo rengbe ani ka bihe be gi nyanyakipa mangapai re?

¹⁹ Ginipai rengbe ka manga ka si du nga gaani maa berã fuo pai ni kina guruhe na fuo regbo ngbutuko fuo tona ani wisigopai berã rani ki tona kaa ta kina gene gu kura apai yo? Gu kura aboro bihe ya i rengbe ka kiiso gayo ome gbeberã kuti pai ho i atona wisigopai ni niguru guruhe, kini tona kaa kiiso regboho tooni tooni wa i andu nani kumbatayo. Gaani sasa nga ka ima kuti wisigopai angianga ka ora aora nani ya. Si naida ani sonosi bakere nyemu gu riipai ani awisigoho. Na ani rengbe ka weteka bakere dungu kura apai nimanga ani sunge na gu zegino abuku duho ruru kangara moyambu akusaha fu rani. Si na kikiipaha ka rimo kurogo gu “dudungura apai nga ga Mbori.” (1 AKorindo 2:10) Manga ani he wo nika nyakasa gaani inohe tipa Mbori na ka sonosa gaani ome kpariapai. (AEbere 5:14) Ka singia ani ni agu abawisigi Fugo Mbori adunga na nyomoro ya, ani “rengbe na yugo pai fu [kura aboro].”—2 Timoteo 2:2.

20. Wai rengbe ani ka kakuti sonosa dawedawe pagume dagba tirani na Yekova Mbori?

²⁰ Du pati adunguratise nga ga aKristano gbiati rimisotise kurogo wisigopai nisase nika koda tihe wa sa ka undo rani ani sonosi dawedawe pagume dagba tirani na Yekova na ki bandaha. Wa gopai ayugoho, gure nangia gupai nadu tipa bake Atambuahe nga guko naya fu Mbori wee: “Ako, nyemu ga rugute namanga re amanga ni rengo! Si nga gu mi nabaka bangire tipa ha na uru pitipiti.” (Atambuahe 119:97) Nirengo, si naida ani du pati adunguratise na kikindigi adunguratise dedede. Na si naida ani ngbe regbo tipa wisigo Ziazia Kekeapai gbiati berã kuriipai. Ani agbia mosoro nibakerehe tipa ‘maa berã rani susi gu nidu mbata’ fuo Fugo Mbori.

[Gu rukutu kekeapai du bandu kpewaraga yo]

Oni Natingidaha?

• Tipagine bete agu aKristano nangia aEbere agbisi ti ni kusayo ti ndikidi idapase?

• Wai rengbe ani kaa maa berã rani fuo agu apai i agumbaha pati agu adunguratise nga ga aKristano?

• Ginihe nika undo rani ani bi undo be wisigo Ziazia Kekeapai nisase gbiati berã kuriipai?

[Gu kpiahe du ti kpewaraga 9]

Si aidi gupai nga, agu aKristano nangia aEbere i moibangiriyo na pa gu gbarasa Yerusarema naima mbeda ka manga

[Gu kpiahe du ti kpewaraga 11]

Avunguagude rengbe ka undo awiriyo tipa i gbia undo be agu adunguratise nga ga aKristano