Gu Wisigopai Nisase Naundo Rani Ani Duni Abayugupai

“Mo bérẽ pa agi apai re gbe; mo fú tiro sa ni kakaka dunduko; ga susa na apai ki du ni yuguyugu he fu aboro dũ. Mo bérẽ pa tiro, na ga yugopai.”—1 TIMOTEO 4:15, 16.

1. Ginipai nga rengo tipa regbo na wisigopai nisase?

ROGO Batungusipai 3:1, Ziazia Kekeapai nayaa: “Were ahe na regboho ti ni dunduko.” Kinawo duhe nirengo tipa wisigopai nisase. Dungu aboro nabi saka agu apai nga ga toro berãyo yo nikpakarakpakarapai ka si du nga gu regbo i aida ka sakaha rogoho re, wene regbo ngaha tipaha te watadu i rogo wene ba te. Nikpiapai, ya mo ka oni ye ba nyanyaki sunge yo na ki ri bawene riahe nga ga nyemu, oni duna nyemu wisigopai tironi, gbe ka si du nga oni gu sungu auru gaoni ndoondo kiti kini bi terevizioni? Si awiranga oni duna nyemuhe tironi te. Wa duhe tie were, ginipai ka boro mangi? Si ziazia tie nga, si naida ani sia wene regbo na wene ba tipa wisigopai ka ani aida ka gbia bakere undo gbe be gaani asadatise.

2. Gini regbo dedede ngbaa gbe tipa wisigopai nisase?

² Dungu aboro bi gupai nga, gu regbo ngbaa gbe fuyo tipa wisigopai nga wiso ho adunga berã yo ni nifudifudihe ya. Gu kurayo namangaha tigayo ti regbo ongoda uru tipa ka wisigopai niguruhe. Oni kparianga pa gu regbo gumba yo paha ni regbo manga gu nyanyakipa apai nga ga toro rogoho rogo gu kpiaapai naye re. Bakindo Davide, nangia gu kumba nazogo gu ringara aYisaraere nadu mbata, akepai ki ya: “Mo ídi he mi nigí pa ga weneringise na awiso, bambiko mi nakida kuti ro. Mo yúgu gu gene fere mi ka andu ngba ha, bambiko mi natumba mbisimore koyo du mo ni.” (Atambuahe 143:8) Gu nebi nangia Yesaya ayugu nyakapa wisigopai wa kina gure ho ko ayani: “Gbia Mbori fu gu mirãse fere wa ga agu yo i ayugu pai fu yo, ya mi ini waĩ ka mi songodi gu ni nambu ni wene fugo. Ko nazingisa re wiso na awiso, ko naza ture sa gia pai wa ga agu yo i ayugu pai fu yo.” Gupai ani aida ka gumbaha nga, si naida ani wisigipai tipa kaa fura na Yekova dawedawe ho du berã rani ni ziazia, ka si vura du ti gini regbo uru vurũ.—Yesaya 50:4, 5; Atambuahe 5:3; 88:13.

3. Gini apai si aida si du tipa ka undo boro tipa ni mangi gu wisigopai duna sangbanaha ti ni?

³ Gu kurapai nga gu nafu undo tipa wisigopai du na wene sangbanaha ti ni nga ka ne sungo rogo ndoondo kiti. Sungo boro rogo ngbatunga gi kiti re aundonga ni ni ningere te. Ho ani awisigopai ni, si naida berã rani naamangasunge amanga, ono ho ani agboona ni, si nafu kina rame fu rani. Kurii gure, si naida ani sungu rogo agu arago adunga agu ahe ni nika fuda rani ya. Ka ani asadi ka wisigopai kini degeturani kuti radio, kuti terevizioni, na kini karagapai sa agu asanahe agude aye nani fuo roni, ani gbianga wene undo wagusa te. Ho Yesu aida ni ka berã kuriipai, ko andu kurogo gu rago naongo aonga kii. Ko anyakasipa kparakpee a, ho du boro ni nisani.—Matayo 6:6; 14:13; Marako 6:30-32.

Gu Ngbatunga Wisigopai Nisase Naundo Rani Ani Rengbe ka Karagapai fu Aboro

4, 5. Rogo gini agene du gu burosua nga Gine Mbori Akpinyemuhe niwene ũfu undo?

⁴ Wisigopai nisase nafu ngbarago fu rani ka ani amangasunge na agu abuku nibakiakia nasakarogo Ziazia Kekeapai yo tipa ka wetekapai dudunguroo, gbe, ka si du nga ani namangaha wo ka gbia karagapai sa gu wene asanahe boro asana rani nani. (1 Timoteo 1:4; 2 Timoteo 2:23) Nitonatona wisigopai, dungu vovo aboro nawisigo gu burosua nga Gine Mbori Akpinyemuhe be Rani?,a nga gu duho awere rogo fugo-aboro 261. Agu afugo du rogo gi buku re si nitaataha ono zukazuka na mburuhe nabaha rii Ziazia Kekeapai. Si naundo agu aboro nagedaha i ini gupai nikina ipo Mbori akpinyemuhe be aboro rogo ndikidi irisombori. Ono tie, gu gene i ambakadihe rogoho, ambunga ba fu boro ni wisigi riiapai nibasasa na afutufutuhe te. Sidu, ka gu boro oni awisigo Ziazia Kekeapai na ni kusi ruru asanahe tipa kura riiapai nga ga Ziazia Kekeapai nga gu oni awisigoho, wai rengbe oni ka gbia kura apai rogo Ziazia Kekeapai nga gu rengbe ka undo ni ni gbia akaragapai sa gi gani asanahe re?

⁵ Tipa agu aboro duna Watchtower Library beyo rogo gu ũhe nga CD-ROM rogo gu fugo ini yo ho gbiati kompiuta, si fuyo taata i gbia bakere tingidapai rogoho. Ono ginipai tipa agu aboro adunga kompiuta beyo na gu ũhe re ya? Ani wisiginga riiapai ue nga gu du rogo gu burosua nga Gine Mbori Akpinyemuhe tipa ka bi wai rengbe ani ka kiiso gaani giarogopaiyo na ki rengbe ka karagapai na afutufutuhe tipa agu asanahe ka boro kusihe, gbe, ngbatunga gu du wa, Da nga Mbori? na da nzunzu Yesu adu wa ni?—Gate 5:2; Ruka 9:18-20; 1 Petero 3:15.

Da Nga Mbori?

6, 7. (a) Gini sanahe nakura nibipa agu apai du tipa Mbori? (b) Gini nyanyakipa pai barumbatayo rogo pambori ambuhe kusayo rogo gako gumbapai?

⁶ Gu 2 Wirikapai rogo gu burosua nga Gine Mbori Akpinyemuhe nafu karagapai sa gu nyanyakipa sanahe nga, Da nga Mbori? Si nga mangupai, mbiko boro arengbanga ka iriso ndikidi Mbori ka ni ainonga Ko ya te watadu ka ni abaka kina bangirini singia Ko ti ni watadu Ko ti ni te. (ARomo 1:19, 20; AEbere 11:6) Wa vura duhe wo, aboro rogo zegino dunduko duna dungu aberã beyo nibakiakia tipa gu boro nga Mbori. (1 AKorindo 8:4-6) Gu yugopai nga ga apambori nibasasa na akaragapai nibakiakia tipa gu ngbatunga boro nga Mbori. Rogo agu apambori nga ga Ngbiiakristano, dungu aboro nabi Mbori yo ni Tirinita. Nyanyakipa barumbatayo rogo pambori sa nga boro Amerika amangi gumbapai riihe adu nga, “Oni Ini Mbori?” ono ko ayambanga rimo ndikidi Mbori kandara bara sa rogo gako gumbapai te, wa ko avura rogoda apai bara dunguhe rogo gu Ziazia Kekeapai i ake bambataha rogo pa-Ebere vurũ. Rengo ngaha nga, agi apai ko asiakaha ka gedaha re, si adu rogo gu sasa-fugo Ziazia Kekeapai namangasunge na gu fugo nga “Gbia,” nga gu fugo duna dungu arogoyo ti ni kuba ko mangisunge na Yekova watadu Yahweh.

⁷ Nga gu nyanyakipa bangiripai gu barumbatayo akpa ti gumbaha re ho ko adipai ni rogo Yeremaya 31:33, 34 nga gu nayaa: “ ‘Anga aboro nibasasa nika yugopai fu kurani watadu fu wirinani kini yaa, “Oni ini Gbia te” [pa-Ebere, “Oni ini Yekova te”], mbiko i dunduko nika ino re, tona ti guni du pani kusende ki da ti guni du pani kuari,’ wo pai Gbia [pa-Ebere, Yekova].” Gu sasa-fugo Ziazia Kekeapai ko aagedapai rogoho a wa duhe kuari re, adunga na kparakpara rimo Mbori rogoho nga Yekova te.—Atambuahe 103:1, 2.

8. Gine nayugo nyakapa mangasunge na rimo Mbori?

⁸ Atambuahe 8:9 nayugo gupai nyakipa mangasunge ti ni na rimo Yekova, si nayaa: “Ako Yekova, gaani Gbia, na ngba rimoro auru kpotosende dũ!” Wa vura duhe were, ani nagedaha rogo gu Ziazia Kekeapai nga King James Version na rogo gu kura asasaha rogo pa-Ngirisi wa gere: “Ako GBIA, gaani Gbia, nangbaa rimoro auru kpotosende dunduko!” Wa vura duhe wo, a wa i niima gumbaha rogo gu paparaha ye mbata fu gere, ani rengbe arengba ka gbia “[kina boro] gu inahe nga ga Mbori” ka ani mbu Fugoko si hasirago kurii rani. Ono gini ũfu undo tipa wisigo Ziazia Kekeapai nakaragapai fu rani zukazuka tipa nyakapa rimo Mbori?—Asanza 2:1-6.

9. (a) Gini buku rengbe ka undo rani ani rengbe ka sakarogo nyakapa yamba ndikidi rimo Mbori? (b) Wai dungu abasafugo Ziazia Kekeapai akpa ti yugo irisa tipa rimo Mbori?

⁹ Ani rengbe ka zara gu burosua du rimoho nga, The Divine Name That Will Endure Forever (Gu Rimo Mbori Nika Nyeanye Kindi), nga gu i naima saha kurogo fugo-aboro 69.b Gu paparaha du riihe nga, “Rimo Mbori, Rogoyo Gbiati Wai I Ayambaha” (tona ti kpewaraga 6 da kurogo 11) nayugo gupai ziazia nga, agu abangiri apai biama du rogo fugo Ebere i ake rimo Mbori nani re si mbembedii wa bara 7,000 rogo gu kuru Ziazia Kekeapai nadu mbata rogo pa-Ebere. Wa vura duhe wo, agu abarumbatayo rogo gu pambori nga ga aYuda gbiati aguyo du rogo agu akanisa nga ga Ngbiiakristano ata inoaino kini dihe kusayo rogo badungu gayo sasa-fugo Ziazia Kekeapai.c Wai rengbe yo ka ya i ima ino Mbori na ki duna wene pagume dagbayo na ko ka i ká ka yamba ko ti rimoko? Ndikidi rimoko nazakagene tipa boro girogo agu apai du rogo gako aringbisapai na ka ino da nga ko. Kurii gure, ka si du nga ani ayambanga rimo Mbori te, gine kangia nyakapa gu papara kpia kparakpee Yesu afuhe nga gu nayaa, “Barani du ngbangbaturũ yo, Ani írisi rimoro airisa”?—Matayo 6:9; Yoane 5:43; 17:6.

Da Nga Yesu Kristo?

10. Rogo gini agene rengbe ani ka gbia gu pangbanga nabaha du tipa ga Yesu raka na gako sunge tungusapai?

¹⁰ Gu 3 Wirikapai du rogo gu burosua nga Gine Mbori Akpinyemuhe, riihe nga “Da Nga Yesu Kristo?” Rogo agenewaraga gbua sita, si nafu gurusigurusipai tipa Yesu, tipa ho ko aenge ni, na ndugupai ko aye ti ni ku auru kpotosende. Ono tie, kpara kusayo ti abuku Wene Pangbanga, anga kura buku ho ngbaa kisusi gu buku nga, The Greatest Man Who Ever Lived te, nga gu duho rogo fugo-aboro 111 rengbe oni ka bi tangaratangara pangbanga nabaha rogoho tipa gako raka te.* Gi buku re, nga gu moi yo mburuhe rii abuku Wene Pangbanga, natangara gu pangbanga nabaha du tipa ga Kristo raka na agu apai ko ayuguhe, na kini tangaraha a wa si aamanga ti genehe, tona ti tonatonaha da kuti digidoho. Gu gaha akapita du 133 nafura tipa agu apangbanga nga ga ga Yesu raka na gako sunge tungusapai. Ka oni aida ka ino wai i afura tipaha ngba kura gene kia ti gi gumba yo paha re, oni rengbe ka zara gu buku nga Insight, gu ue Kpokutoho, tii gu riipai nga, “Jesus Christ.”

11. (a) Gine nasa aDezire Yekova i du kia rogo gayo ida tipa Yesu? (b) Gini kura averesi nga ga Ziazia Kekeapai nasa gu yugopai nga ga Tirinita niziree, na gini buku nafu undo rogo gipai re?

¹¹ Rogo agu akanisa nga ga Ngbiiakristano, kango gu du yo tipa Yesu, ya i ainonga ha te, singia Yesu nga “Wiri Mbori” na kingia “Mbori Wiri” ti kina gu bangisa regbo re watadu si wo te. Ka pehe rogo kura afugo, kango gu duho riipa gupai gu buku nga, Catechism of the Catholic Church (Gu Katekizima nga ga gu Kanisa nga ga Katoriko) apehe tipa Tirinita ya si nga “meme gu okookopai du tipa gu idapase nga ga aKristano [i ayambaha nga misterio].” Nidu aDezire Yekova kia ti agu aboro du rogo Ngbiiakristano, i idi kuti gupai nga Mbori nakusi Yesu, angianga Mbori nga ko ya. Gu buku yugu yo gipai re rogoho ziazia gbe nga gu burosua du rimoho nga, Should You Believe in the Trinity? (Ya Mo Si Naida Gupai Nga Oni Idi Kuti Tirinita?), nga gu i akusihe rogo fugo-aboro 95.d Dagba gu dungu averesi si amangasunge nani ka sa gu yugopai nga ga Tirinita niziree nga Marako 13:32 na 1 AKorindo 15:24, 28.

12. Gini kura sanahe berewe si aida ani moi berã rani fuoho?

¹² Gu sakapai du kuari tipa Mbori na tipa Yesu Kristo re nayugo agu agene rengbe ani rogoho ka manga wisigopai nisase tipa ka undo agu aboro ainonga gu rengo nga ga Ziazia Kekeapai ya tipa i ruho ka gbia ruru inohe. (Yoane 17:3) Ono tie, ginipai tipa agu aboro naima digo nikoditiyo na gu dungurati nga ga aKristano tipa dungu agarã? Wa duhe tipa yo nga i ima kumuko rogo gu inohe nga ga Ziazia Kekeapai, ya mo si naida i naamaabangiriyo kindi fuo wisigo Fugo Yekova nisase?

Tipagine Si Aida ti ni Ani ‘Moi Berã Rani Zanga Piriga’ Fuo Apai?

13. Gini iraira bipai rengbe kura aboro ka du nani tipa wisigopai nisase?

¹³ Bete aboro nga aguyo naima du rogo dungurati tipa dungu agarã rengbe ka rimiso tiyo kurogo gu sino nga ga kido kina kuti gu inohe nga ga Ziazia Kekeapai i agbiaha rogo gu bete bambata agarã ho i adani ni aDezire Yekova. Si taata boro sakipai berã ni yo kini yaa: “Si aidanga mi naawisigopai kakaka wa gu vovo aboro amangaha te. Mo binga ha abi tigamo, bara wai gedi mi Ziazia Kekeapai na agu abuku du mburuhe rii Ziazia Kekeapai vuru agu agarã susi re.” Si teketeke wa ka ni yaa: “Nirengo, si aidanga mi moibangire tipa gu riahe mi arihe awere te, mbiko, oni bingoho abi tigaoni, gu bazagino riahe mi aima digo nirihe rogo agu agarã susi.” Ani ima ino gupai nga, kpoto rani naida wene riahe zanga piriga, nga gu mbakadi yo ho wenengai, tipa si banda kpoto rani wenengai ani kini mangi apai zaaza. Pa banda ani kpotorani si du wenengai na ka duna ome rogo toroyo kiipaha kisusi gure!—AEbere 5:12-14.

14. Tipagine si aida gupai ti ni nga ani banda tirani zanga piriga ti aregbo dunduko?

¹⁴ Sidu tie, wa du ani dunduko, singia ani nga agu abawisigi Ziazia Kekeapai naima digo nimangihe watadu ani ata imanga kuti ni te, si naida ani irisi ga Pauro arugute fu Timoteo, nga guko naima du ti gu regbo re nigu babiapai naima nyaka na ki duna asunge beko ko aangera fuoho, ko aya fuko: “Mo bérẽ pa tiro, na ga yugopai; ki ka kuti agi apai re; bambiko manga mo wa gere mo abátasa tiro na agu yo nagia paha ngba ro.” (1 Timoteo 4:15, 16) Tipagine si aida gupai ti ni nga ani di ga Pauro arugute ku ngbaduraniyo? Oni tingidi gupai nga, Pauro ayugu gupai nga, ani na vura berani ani asoho kuti “ga bakitingbanga birĩ [abiriki]” na kuti ‘gbegberẽ atoro rogo agu arago du ngbangbaturũ yo.’ Na gu mokedi nangia Petero azahe ya aboro banda tiyo mbiko Bakitingbanga ‘nagbata boro ka rita ni,’ sidu, gu “boro” ko agbata ni re rengbe ka du nga guni sa dagbarani. Padu ani na gu berã nga apai dunduko nandu andu wenengai kubara rani yo rengbe ka du nga ngbatunga gu mamu ko agbataha.—AEfeso 6:11, 12; 1 Petero 5:8.

15. Gini aũbandatise nga ga toro du berani, na wai rengbe ani ka ngera fuoho?

¹⁵ Sidu, gini ũbandatise du berani? Afugo gu mokedi nangia Pauro natingida rani niyaa: ‘Oni dí ga Mbori aũvura dunduko, ka nyaka anyaka rogo gbegberẽ uru, fuo nyasa vura dunduko, oni ki ru aru ngutete.’ (AEfeso 6:13) Pa nyaka gu ũvura nga ga toro re arunga kina riipa ngbanya wai si adu nivovoho te, ono si naruriipa wai dedede oni angera fuoho. Si naida gupai nga, ngbatunga agu aũvura nabaha ani adiaha be Mbori re, si kodi vovo inohe tipa Fugo Mbori. Gipai re nayugo nyakapa kakuti gaani vovo giarogo rengo yo a wa Yekova ayugoho rogo Fugoko na rogo gu gene nga ga ruru kangara moyambu. Wisigo Ziazia Kekeapai nisase dedede gbiati wisigo agu abuku du mburuhe rii Ziazia Kekeapai nga nyanyakipa gene ka mbakada gu gaani ũbandatise nga ga toro.—Matayo 24:45-47; AEfeso 6:14, 15.

16. Ginipai rengbe ani ka mangaha ka rugatirani na gupai nga, gaani “[bakere] vurakube nga idapase” niwenehe tipa sunge?

¹⁶ Pauro anyakasipa “[bakere] vurakube nga idapase,” ya si nga gaani nyanyakipa ũbandatise. Na ani rengbe arengba a ka mangasunge na gi vurakube re ka nyaga ga Satana asiida kusayo na ki bisihe, nga agu asiida narukuba agu azire kitangbaanga rani aboro agumbaha gbiati gu yugopai nga ga abasamungu kuti ndikidi pambori. (AEfeso 6:16) Sidu tie, si ni nyanyakipa pai ani wisigi gaani vurakube nga idapase ka bihe singia nyakihe anyaka na ka bi gupai si aida ani mangihe tipa ka bandaha na ka nyakasaha. Nikpiapai, ani rengbe ka sana tirani ki ya: ‘Wai mi naambakada tire tipa gu wisigo Ziazia Kekeapai nga ga poso wa mi amangasunge na Ngbaõbambu Sinziri? Mi naawisigopai wenengai gbe tipa ka rengba ‘ka nyakasa akuare kuti nyemuse na kuti wene mangaapai’ nifu mi agu akaragapai mi niima berã kuriihe mbata wenengai? Mi naazara Ziazia Kekeapai ka geda agu averesi ke yo kina paha gbua nga gu i adianga ha ki kehe kurogo gu buku watadu magazini nga gu mi awisigoho ya? Mi nangarasa kura aboro na gu gimi akaragapai mi agumbaha zaaza ti aregbo dunguratise?’ Gu gaani riahe nga ga toro si ni unduhe, sidu, si naida ani rungburasihe tipa ka gbia undo behe.—AEbere 5:14; 10:24.

17. (a) Gini kikpa ahe Satana a’asada ka mangasunge nani ka gbarasapa rani rogo toroyo? (b) Gine nga ziga tipa gu kikpa ahe nga ga Satana?

¹⁷ Satana ima ino pai tipa gu rungbura du ti gu kpotorani naima ti, na gako abiriki nikpakarakpakaraha ka ino pai tipaha. Gene sa dagba agu agene ko agbaraga gako gbegbere ome rogoho nga ka sa sunge yugokpia kundiri aboro niguhe i agbatangaha agbata rogo terevizioni, rogo Internet, rogo vidio, na rogo abuku ya. Gu kura aKristano ambu gi kikpa ahe re si rimi kurogo gu gayo aũbandatise naima rungbura, na si ki ndu na aguyo i rogodi agu amamu sunge kusayo nadu beyo rogo dungurati watadu si andu na yo sa kura kere asangbana susi gure. (AEfeso 4:17-19) Gine nga ziga tipa gu kere kikpa ahe nga ga Satana ko agbarasapa agu apai nga ga toro nani? Si aidanga ani mbupa gaani wisigo Ziazia Kekeapai nisase dedede, na gaani adunguratise nga ga aKristano, na agu aũbandatise nabaha du be Mbori te. Si dunduko nabaha nafu gu tandu fu rani nika sa rani ani rengbe ka kpara rurupai ti gbegberepai na ka soga gupai Mbori asogaha.—Atambuahe 97:10; ARomo 12:9.

18. Wai rengbe gu “basape nga ga Toro” ka undo rani rogo gu gaani vura nga ga toro?

¹⁸ Ka ani nye kuti gu sino rani nga ga wisigo Ziazia Kekeapai dedede, anga kina gu ruru inohe du rogo Fugo Mbori, nga nyanyaki ũbandahe ka ani du nani sa te, ono ani adu a na wene ũzubo vura berani nga “basape nga ga Toro, nga sangba Mbori.” Fugo Mbori “ni títí he susi [agu] abasape dunduko du na rindihe ue, si narú boro dati kparaka mbisimo na toro, na ngbazunga na nzeme meme, si ki ipi ka ina agu aberã nga ga ngbaduse na gaha nyemuhe.” (AEfeso 6:17; AEbere 4:12) Ka ani ini wai ka mangasunge wenengai na gu “basape” re, ani arengba tie ka ino gupai nawira ka si imisinga boro te, watadu gupai nawira si niwenehe, na ki yuguhe gbaiga nigu kikpa he nga ga Satana nafu kpio. Gu gaani inohe nga ga Ziazia Kekeapai gbiati gu giarogoyo du ani nani aundo rani ani ká gupai duni gbegberehe na ki mangi wenepai. Sidu si naida ani dunduko sana tirani ki ya: ‘Ya mo gimi basape nititihe watadu si nikpurokpuroho? Si fere nikpakarakpakaraha ka tingida agu averesi nga ga Ziazia Kekeapai nga gu rengbe ka undo re rogo gimi zubo vura?’ Ani nye kuti gu wene sino rani nga ga wisigo Ziazia Kekeapai nisase, si ki ta du were, ani kini sovura kuti Bakitingbanga.—AEfeso 4:22-24.

19. Gini undo ka ani gbiaha ka ani fu tirani tipa wisigopai nisase?

¹⁹ Pauro akepai ki ya: “Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga boro, na tipa raba aboro rogo rurupai; ya ga Mbori boro du ziazia, aũ manga wene apai dunduko ki du be ni.” Ka ani di afugo Pauro ku ngbaduraniyo nga gu ko agumbaha fu Timoteo, ani rengbe arengba ka nyakasa tirani rogo toroyo na ani rengbe arengba a ka mbakada gaani sunge tungusapai. Agu abaakumba nga ga toro yo gbiati amoyambu undo rengbe ka undo dungurati bakere, na ki undo rani dunduko ani rengbe ka nye nyanyakii rogo idapase yo.—2 Timoteo 3:16, 17; Matayo 7:24-27.

[Gu rukutu kekeapai du bandu kpewaraga yo]

Oni Natingidaha?

• Gini apai nafubee sa wene wisigopai nisase?

• Gini irairapai dungu abasafugo Ziazia Kekeapai amangihe nibipa rimo Mbori?

• Gini averesi nga ga Ziazia Kekeapai rengbe oni ka mangasunge nani ka sa gu yugopai nga ga Tirinita niziree?

• Gine si aida ani mangihe ka banda tirani be ga Satana abiriki, ka ani vura du nga ndikidi aKristano tipa dungu agarã avurũ?

[Gu kpiahe du ti kpewaraga 25]

Tipa ka manga wene wisigopai nisase, si naida oni du rogo gu ba du niwenehe na adunga fudifudiapai ni ya

[Gu kpiahe du ti kpewaraga 29]

Ya mo gaoni “basape” nititihe watadu si nikpurokpuroho?