Oni Na Idapase Nirengo Kuti Wene Pangbanga?
“Ga Mbori ngbi [kindo, “NW” ] nikaye; oni sá gaoni berã, ki idi pa wene pangbanga.”—MARAKO 1:15.
1, 2. Wai rengbe oni ka sakarogo gu veresi du rogo Marako 1:14, 15?
GU GARÃ nangia 30 ti Gaani Regbo, angia gu garã Yesu Kristo atona gu gako bakere sunge nga ga tungusapai Gariraya yo. Ko anatungusa “gu wene pangbanga nga ga Mbori,” na gupai ko atungusihe fu aboro Gariraya nga: “Ragoho da, ga Mbori ngbi nikaye; oni sá gaoni berã, ki idi pa wene pangbanga,” afõngbadu dunguyo yo i ki sa gayo berã.—Marako 1:14, 15.
2 ‘Ringbisiringbisi regbo’ ada fu Yesu tipa ko tona gako sunge tungusapai na si ki da niregbo fu aboro i diberã ka manga gupai ka Mbori idi na yo mbikoho. (Ruka 12:54-56) ‘Ga Mbori Kindo aima mbeda’ bambiko Yesu aduho dagba agu aboro naagia ko, nangia gu Bakindo i asia ko ko zogorago rogo gu kindo re. Gako sunge tungusapai afõngbadu agu aboro yo nadu na ruru ngbaduyo yo i saberã. Ono ngba gini gene i ayugu gupai nga, i aidipa wene pangbanga, na ani tigaani, wai ani ayugo gupai nga, ani ima ‘idapa wene pangbanga’?
3. Ginipai aboro amangaha ka yugo gupai nani nga i na idapase kuti wene pangbanga?
3 Wa kina Yesu, gu mokedi nangia Petero azungadi aboro i saberã. Nifura Petero fu aYuda Yerusarema yo rago Pendekote rogo gu garã nangia 33 ti Gaani Regbo, ko ayaa: “Oni sá gaoni berã i ki bapatizi roni dunduko ti rimo Yesu Kristo i di gaoni ingaapai ti roni; oni ki di gu ũgume nga Ziazia Toro.” Dungu akutu aboro asaberã, i ki zi bapatiza, na i ki da ni apefuo Yesu. (Amokedi 2:38, 41; 4:4) Rogo gu garã nangia 36 ti Gaani Regbo, agu aGendiria nasaberã, i amangi kina ngbatunga gupai re teketeke. (Amokedi 10:1-48) Rogo gi gaani a’uru re, idapase kuti wene pangbanga nafõngbadu dungu akutu aboro yo i saberã ti gayo aingapai, ki kparatiyo fu Mbori na ki zi bapatiza. I ima idapa gu wene pangbanga nga ga bata, na ki duna idapase kuti gu motumo tumorii nga ga Yesu. Kurii gure, i namanga ruru apai na ki ima diaberã ka ngbe na kina ga Mbori Kindo.
4. Gine nga idapase?
4 Ono gine nga idapase? Gu mokedi nangia Pauro akepai ki ya: “Idapase nga sungudo agu apai boro amaabangirini tipaha ki zanga kapa, na si a nga gu gopai nayugopa agu arengo i abingo ho ya.” (AEbere 11:1, NW ) Gaani idapase nasa rani ani duna maabangirise tipa agu apai dunduko Mbori akidohe tipaha rogo Fugo ko yo si ki du bangirani wa si aima manga. Si wa ani na gu waraga berani duna gu kekepai rogoho nayugopa guhe boro naza beni ti ni fu rani kuti ndiko. Idapase a nga, “gu gopai nayugopa agu arengo i abingo ho ya,” watadu gu gopai nayugopa gu rengo idi boro kuti ni, nibipa agu apai i abingoho abi ya. Gu bipai nga ga berã rani na gu ngbaduraniyo hi be ngbarago nasa gupai nga ani idi kuti ngbatunga agu apai re ya si nga rengo, wa vura duhe nga ani abingoho te vurũ.—2 AKorindo 5:7; AEfeso 1:18.
Si Naida Ani Duna Idapase!
5. Tipagine du idapase ti ni na nyanyakipaha?
5 I avungu rani na zingo nga ga toro, ono i avunganga rani na idapase te. Nirengo, ‘idapase ni gupai du aboro dunduko nani te.’ (2 ATesaroniko 3:2) Wa vura duhe wo, aKristano du wa ka i duna idapase tipa wa ka i dikumbo agu ahe Mbori akidohe tipaha. (AEbere 6:12) Fuo tangara Pauro rimo dungu agu aboro nikpiapai nadu na idapase, ko akepai ki ya: “Wa bi ani he ya adezire du pati rani kirikiri ni ngenge yo wa ndurõ, ani mói rõrõi [a]he ku sa yo dunduko, na gu ingapai ninaye dedede ka manga rani, ani ki oro gu oto du fu rani ku mbata yo kindi, ningere koyo du Yesu ni [“nikparia Yesu,” NW ], nga gu ko du ni baenge gaani idapase, du ni badigisi he a.” (AEbere 12:1, 2) Gine nga gu ‘ingapai ninaaye dedede ka manga rani’? Si nga zanga idapase, watadu pa mbu boro kina boro gu idapase nadu mbata beni. Tipa ani rengbe ka kakuti nyanyaki idapase, si naida ani “kparia Yesu” na kini peke fuo gako kpiapai. Si naida ani sogo pa wasiro a, kini sovura kuti gu gbegbere mangapai nga ga borose, na kini neke nyemu aũzegino, na gu kungbo nyemu tatamana nga ga zegino, na ki he manga agu asino atitase natagbangatihe na gu yugopai nga ga Ziazia Kekeapai. (AGaratio 5:19-21; AKorosaio 2:8; 1 Timoteo 6:9, 10; Yuda 3, 4) Kurii gure, si naida ani idi kuti gupai nga, Mbori na kina rani, na ki idi kuti gupai a nga, agu arugute du rogo Fugo ko namangasunge amanga nirengo.
6, 7. Tipagine ruhe aru ti ni ani kparikpee tipa idapase?
6 Ani arengbanga ka maa idapase kurogo rani yo mbiko gaani diaberã nisarani te. Idapase nga papara zuzu ga Mbori ziazia toro watadu zaza ome. (AGaratio 5:22, 23) Sidu, ginipai si aidaha berani ka si du nga ani nakpinyemu ka nyakasa gaani idapase? Yesu ayaa: “Wa du oni ni gbegbere aboro ki ini pa gama wene ahe fu awironi, angbatika gu Baroni du ngbangbaturũ yo nga wene boro susi roni, ko susi rogo gama ziazia toro fu agu aboro nasana ko!” (Ruka 11:13, NW ) Rengo du, ani kpari fu Mbori tipa ziazia toro, mbiko si rengbe ka kusa gu idapase si aida ani du nani ka manga gupai ngbaa ti Mbori zavura ho du ani ni rogo bakere a’asada.—AEfeso 3:20.
7 Si ruaru ani kparikpee tipa bakere idapase. Ho si aduni nga Yesu nika do daimona kusayo ti tooni gude, bavungu gu gude re akpari fu Yesu ki yaa: ‘Mi na idapase! Mo únda re rogo gu bangiri ba adunga mi ni na idapase ya!’ (Marako 9:24) Ga Yesu abawiriki aya fuko wee, “Mo kíisi gaani idapase.” (Ruka 17:5) Sidu tie, ani kparikpee fu Mbori tipa idapase, ani ki duna gu kido nga Mbori nakaragapai akaraga sa ngbatunga agu kparakpee re.—1 Yoane 5:14.
Idapase Kuti Fugo Mbori na Nyanyakipaha
8. Wai rengbe idapase kuti Fugo Mbori ka undo rani?
8 Ngbutuko mbata fu Yesu kpi nimotumo, ko aya fu apefuo ko wee: “Ka oni rúngo nga kpotoroni yo ya; oni ídi pa Mbori, oni ídi pa re a.” (Yoane 14:1) Wa du ani ni aKristano, ani na idapase kuti Mbori na kuti Wiriko. Ono ginipai du tipa Fugo Mbori? Si rengbe ka fu ome fu rani ani gbia undo rogo gaani raka ka si du nga ani nawisigoho na kini mangi sangbaha ki duna gu kido nga, agu apai du rogoho nafu bawene arugute gbiati agu arugapai kisusi nga agu arugute rengbe ani ka bihe.—AEbere 4:12.
9, 10. Wai rengbe oni ka sakarogo gupai gumba yo paha rogo Yakoba 1:5-8 tipa idapase?
9 Gaani raka wa du ani nikpakpa aboro ima hi be fudifudiapai. Wa vura duhe wo, idapase kuti Fugo Mbori rengbe arengba ka undo rani nirengo. (Eyobo 14:1) Nikpiapai, ani ya ani ainonga wai rengbe ani ka sovura na diabese kuti kura ngbatunga fudifudiapai te. Fugo Mbori nafu gi rugute du re fu rani nga: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni. Ono ni sána he ni idapase, ka ni sáki nga pa ko ya; bambiko gu ni nasaka pai ni wiri gu ngiri baime, yuge nita danda ha nituka ha ku sa yo. Si du ka gu borore berẽ nga ha ya ni adia he be Gbia ya. Boro berãpai ue du, ni rungburarungbura ni rogo gani apai dunduko.”—Yakoba 1:5-8.
10 Yekova Mbori agbarasanga rimorani mbiko pa zanga ani tatamana na mbiko ani nakparakpee fuko tipaha te. Kuba gure, ko nika undo rani ani duna ruru bipai kuti gu asada ka ani du rogoho. Akuarani aidipase rengbe ka yugo bawene averesi fu rani watadu ani rengbe ka kura baraha ho ani awisigo Ziazia Kekeapai ni. Watadu ga Yekova ziazia toro rengbe ka ruga rani ngba kura gene. Gu Barani du ngbangbaturũ yo nika fu tatamana fu rani ani sovura kuti agu a’asada namanga rani ani ki dibehe, ka si du nga ani ‘nikaa sanahe ni idapase kindi, angianga ka tikö atikö ya.’ Ka singia ani wa gu ngiri baime yuge naafu nani, ani arengbanga ka berãpa bi karagapai be Mbori te. Tipagine? Bambiko si rengbe ka du nga ani adianga berã ka manga gupai ani asanahe tipaha te na ani akanga kuti kparakpee a te, watadu ani kpa rogo kura apai, watadu ani amanganga pai ringbisihe kuti gaani idapase kuti Mbori te. Sidu tie, si naida ani duna nyanyaki idapase kuti Fugo Mbori na kuti agu arugute si afuhe fu rani. Ani makianga gu bete kpiaapai si afu undo gbiati rugapai rogoho.
Idapase Gbiati gu Riahe Nasongoda Boro
11. Gini maabangirise idapase kuti Fugo Mbori afuhe fu rani nibipa agu ahe zingoho amanga rani na a’uru dunduko?
11 Ginipai ka mangi ka singia ani na zingo gu riahe ka rengbe tipa rani gbiati zingo gu ba ka ani pi rogoho watadu ani rogo rungo? Idapase kuti Fugo Mbori nafu gu maabangirise fu rani zanga kapa nga, Yekova nikaa ngera angera fuo rani na agu ahe du ani na zingoho rogo a’uru dunduko, na rogo vovo zegino, ko asa agu aboro dunduko nakpinyemu ko i duna wene ahe beyo kpaima. (Atambuahe 72:16; Ruka 11:2, 3) Ani rengbe ka bihe ni gupai nangarasa rani ka ani berẽkuriipa wai Yekova aariga gu gako nebi nangia Eriya ti regbo ngbongi. Kusa, Mbori abanda ga dee ngungo gbiati nzeme ngba iiriwo gene nga gu naundo ri, na wiiri, gbiati Eriya i niiraki. (1 Abakindo 17:2-16) Kinawo teketeke Yekova arigi gu nebi nangia Yeremaya ti gu regbo aboro Babera aru nguru pati Yerusarema. (Yeremaya 37:21) Wa si avura du nga Yeremaya gbiati Eriya aduna kina bete riahe gbua beyo kaa rihe, Yekova aangera ngera fuo yo. Ko namanga kina gu bangisapai re fu agu aboro duna idapase areme kuti fugo ko.—Matayo 6:11, 25-34.
12. Wai rengbe idapase ka fu undo fu boro tipa ni gbia gu riahe nga gu rengbe ni ka rihe?
12 Padu ani na idapase gbiati manga ani agu arugute nga ga Ziazia Kekeapai adunga ngburungburu ya asanga rani ni airakumuko na aũzegino te, ono si nika undo rani ani gbia agu ahe ani aidaha tipa si songodi rani. Ani yugunga ha na kpiapai: Ziazia Kekeapai naruga rani ani du niruru rani, ki rengbe arengba ka manga weneapai, ki du ningangara abamangisunge. (Asanza 22:29; Batungusipai 5:18, 19; 2 AKorindo 8:21) Ka ani ya basanga pakio gu wene rimo rani du ngba aboro tipa gaani wene mangasunge ya. Zavura rogo agu arago pa gbia boro gu sunge i atumo ni tipaha na kikii marã ni gupai du nikpakarakpakaraha, apai nangba wenengai kubara agu aboro yo ini ka manga gayo sunge wenengai, abirikanga akurayo ya, na angianga airanyomoro ya kisusi gu si angba kubara agu aboro yo adunga na agi asino re tiyo ya. Wa vura duhe nga, ngbatunga agu aborosunge re nidu na kina bete ahe gbua beyo, i nidu dedede na agu ahe beyo nasongoda unga nga agu ahe si aida aida si du be boro, na i nidu na ngbarago be ri ũsabeyo.—2 ATesaroniko 3:11, 12.
Idapase Naundo Rani Ani Hipai Ho Du Ani Ni Rogo Gberarago
13, 14. Wai idapase aundo rani ani hi gu nunga du ani nani tipa pakpio badiangbarani?
13 Fugo Mbori nayugo gupai fu rani nirengo nga, si nga sino aboro tipa i duna gberarago ho gu boro akpi ni i akpinyemu ni. Gu ruru iriiripa bakumba nangia Abarayama aduna gberarago tiko be pakpio diako nangia Sara ko anakpinyemuri gbe. (Bambata Pai 23:2) Rago agbere ti Davide gbe fuo gia ko pakpio wiriko nangia Abisaroma. (2 Samuere 18:33) Zavura gu rengberengbe kumba nangia Yesu, ko akpari ni aume tipa pakpio bakureako nangia Razaro. (Yoane 11:35, 36) Ho gu boro ani akpinyemuni nikpi ni, si nidu wa ome gberarago ima furii ome rani, ono padu ani na idapase kuti agu akidohe du rogo Fugo Mbori rengbe arengba ka undo rani ani hipai rogo ngbatunga gu gberarago re.
14 Pauro aya wee, ‘mi namaabangire koyo du Mbori ni, ya zingabekpio nika du adu tipa ruru aboro na iraira yo.’ (Amokedi 24:15) Si naida ani duna idapase kuti ga Mbori mbakadapai ka zingisa badungu aboro i du ni unga yo berewe. (Yoane 5:28, 29) Agu aboro nika du dagba aguyo nika zingabekpio nga Abarayama na Sara, aYisaka na Rebeka, aYakobo na Rea, nga agu aboro du awere dunduko rogo gu rame nga ga kpio, kini sungudi zingabekpio kurogo ga Mbori vovo zegino. (Bambata Pai 49:29-32) Nairiwo gu ngbarago nikangia ha ho agu aboro ani akpinyemuyo nika zinga ni be gu rame nga ga kpio ka raka herẽ auru kpotosende! (Yugoti 20:11-15) Wa du rago tie re, idapase adianga gberarago dunduko kusayo ti rani te, ono si nambedisa rani koyo du Mbori ni, nga guko ninaaundo rani ani hi gu nunga du ani nani be pakpio abadiangbarani.—Atambuahe 121:1-3; 2 AKorindo 1:3.
Idapase Nanyakasa agu Aboro Duna Bakere Gberarago
15, 16. (a) Tipagine rengbe ani ka ya ti ni wee gberarago ni gupai naima digo nimangi dagba agu aboro nadu na idapase mbata? (b) Ginipai rengbe ani ka mangaha ka diabe bakere gberarago?
15 Fugo Mbori nayugo gupai fu rani a nga, zavura agu aboro idi kuti fugo Mbori, i rengbe arengba ka rungo be gberarago. Ho Eyobo aduni rogo kere asada, ko aberẽ gupai tigako nga Mbori ima mbu ko. (Eyobo 29:2-5) Padu Yerusarema na gaha angapa ni gburuwagburuwaha afu kina gberarago fu Nemaya. (Nemaya 2:1-3) Mbiko wa rago agbere ti Petero gbe, mbikopa ora ko rimo Yesu, si du ko “[a]kpari akpara [ti ni] ni aume gbe.” (Ruka 22:62) Na Pauro azungadi agu aidipase nadu rogo gu dungurati nadu Tesaronike yo i ‘nyakasi agu aboro nadu na gberarago tiyo.’ (1 ATesaroniko 5:14) Sidu tie, gu gberarago namanga agu aboro duna idapase areme ni gupai du kia te. Ginipai tie rengbe ani ka mangaha ka sovura kuti gberarago ki dibehe?
16 Rago rengbe ka gbera tirani mbiko ani nagbia tirani na dungu kere fudifudiapai. Kuba gupai nga ani nibihe nibangisa bakerepai sa fuu ome he rii ome rani, si naida ani tona ka gbata aziga tipaha nibasasa na ti aregbo a nibasasa nimanga ani agu arugute nga ga Ziazia Kekeapai adunga ngburungburu ya. Si rengbe ka undo rani rogo dia bete gaani gberarago kusayo. Mangasunge rengbe arengba na kini ongodi wa rengbehe, rengbe ka fu undo fu rani. Pai ho sa nga rengo, nga: Pa ida ani kuti gupai nga Mbori kina ti ni na ka ida kuti Fugo ko, nasonosa rani rogo toroyo mbiko si nanyakasa rani kuti gu gaani kido nga ko nangera angera fuo rani.
17. Waigu ani aino gupai nga Yekova nangera angera fuo rani?
17 Fugo Petero nafu wasa niyaa: “Oni úmbasi tironi . . . tii gu nyanyaki be yo nga ga Mbori ya ko tumba roni ho ragoho ka rengba ni. Oni bá agu apai nafuda roni ku auru ko yo; mbiko ko naberã pa roni [aberã].” (1 Petero 5:6, 7) Bake Atambuahe abibia ki yaa: “Yekova nasongoda agu yo nati dunduko, ki nitumba agu yo nanugadi dunduko a.” (Atambuahe 145:14) Si naida ani idi kuti agi akidohe re, bambiko si rogo Fugo Mbori. Wa vura duhe nga, bakere gberarago nikaa manga aboro kindi, nairiwo wai pa ino ani gupai nga, ani rengbe arengba ka ba gaani abakabangirise dunduko koyo du gu Barani ni du ngbangbaturũ yo anyakasa gaani idapase!
Idapase Gbiati Kura A’asada
18, 19. Wai idapase aundo rani ani sovura na diabese kuti akaza na ka fu wasa fu akuarani aidipase?
18 Ani rengbe ka gbia tirani na gu asada nga ga gaani idapase ho ani awoka ni watadu ho badiangbarani awoka ni be kere kaza. Wa vura duhe nga Ziazia Kekeapai atingidanga pa husa agu aboro nangia Epafuradita, na Timoteo gbiati Turofimo ngba iiriwo gene te, zanga kapa, Yekova aima undo yo i hipai rogo gayo akaza. (AFiripoio 2:25-30; 1 Timoteo 5:23; 2 Timoteo 4:20) Kurii gure, nibipa gu boro “naberã pa rurungbura boro,” bake Atambuahe abibia ki yaa: “Yekova angarãsa ni auru gani barame rago rungbura ni; [ko] nambakada gani ba rago gani kaza.” (Atambuahe 41:1-3) Wai rengbe ga bake Atambuahe fugo ka undo rani tipa ani fu wasa fu agu akuarani aidipase nawoka?
19 Gu kura gene sa dagba agu akuraha tipa fu undo rogo toroyo fu agu aboro nawoka nga ka kparakpee na yo fu Mbori na ka kparakpee tipa yo. Wa vura duhe nga, ani asananga Mbori tipa ko husi yo ngba iiriwo gene areme te, ani rengbe ka sana ko tipa ko fu gu ome fuyo nga ga berã nga gu rengbe ka undoyo i hi gayo arungo na tipa ko fu gu ome fuyo nga ga toro tipa i rengbe ka hipai ti gu regbo du yo rurungburaa. Yekova abanda yo abanda na gayo idapase ki nyaki be maa yo berã yo kumbatayo tipa gu regbo ‘borokporo sa nika yanga ni wee, “Mi nawoka” ya.’ (Yesaya 33:24) Nga gu pa wasa ngaha ka ino gupai nga, rogo gu Yesu Kristo i azingisiko bekpio na vurube ga Mbori Kindo, i azaka agu aboro nga agisangbaa be gu zio nga ga ingaapai, na ga kaza gbiati ga kpio! Ani nafu tambuahe fu Yekova tipa gu bakere maabangirise re, ‘nga guko nika husa gaani akaza dunduko.’—Atambuahe 103:1-3; Yugoti 21:1-5.
20. Tipagine rengbe ani ka ya ti ni wee, idapase rengbe ka undo rani rogo gu ‘gbegbere aregbo” nga ga gbinza?
20 Idapase rengbe arengba a ka undo rani ani hipai rogo gu ‘gbegbere aregbo’ nga ga gbinza, ho kpoto boro adopota ni na ka ome adunga tini ya. (Batungusipai 12:1-7) Sidu, gu sosono boro du dagba rani rengbe ka kparakpee wa ga gu sosono bakumba nangia bake Atambuahe nga guko nabibia ki ya: “Mo nga gi maabangirise, Ako Yekova . . . Ka mo bá nga re ku sa yo ti rago gbinza mi ya; ka mo mbú nga re ho omere ka nyasa ni ya.” (Atambuahe 71:5, 9) Gu bake Atambuahe re aberẽpa gu zingo ko adu nani kini idi Yekova undo ko, kinawo a agu akuarani nga aKristano aidaha nga aguyo gbinza kutingba ga Mbori sunge. Mbiko gayo idapase, i rengbe ka duna gu kido nga Yekova nikaa undo yo aundo kindi.—Pa Fu Rugute ni Ue he 33:27.
Oni Kakuti Idapase Kuti Fugo Mbori
21, 22. Ka singia ani na idapase, ginipai si amangaha na gaani ngbanya dagbarani na Mbori?
21 Idapase kuti wene pangbanga na kuti Fugo Mbori nabaha dunduko, naundo rani ani mbedi koyo du Yekova ni gbe. (Yakoba 4:8) Rengo ngaha, ko nga gaani Bakere Bakindo, ono ki du a ni Bakusirani na ni Barani. (Yesaya 64:8; Matayo 6:9; Amokedi 4:24) Bake Atambuahe abibia ki yaa: “ ‘Mo nga Buba, nga gi Mbori, nga gu Mbia nga ga gi bata.’ ” (Atambuahe 89:26) Ka singia ani na idapase kuti Yekova na kuti Fugo ko nga gu gako toro adu kugiipa kehe, ani rengbe arengba a ka biko nigu ‘mbia nga ga gaani bata.’ Nangbaa wai gupai re afu ngbarago ku ngbaduraniyo!
22 Yekova nga Ba agu aKristano i avungu yo be toro na kingia Ba agu abadiangbayo duna maabangirise tipa ka raka auru kpotosende. (ARomo 8:15) Idapase kuti gu Barani du ngbangbaturũ yo andunga na boro sa gberarago te. Davide ayaa: ‘Ka si du nga buba mbu re na nina, Yekova adia re adia.’ (Atambuahe 27:10) Kurii gure, ani na gi kidohe re berani nga gu nayaa: ‘Yekova ambúnga gako aboro te, kango gu rimoko duna bakere paha.’—1 Samuere 12:22.
23. Gine si aidaha berani tipa ani duna nyenye pagume dagbarani na Yekova?
23 Rengo ngaha nga, ka ani aida ka duna nyenye pagume dagbarani na Yekova, si naida ani duna idapase kuti wene pangbanga na ki idi kuti Ziazia Kekeapai ni Fugo Mbori a wa duhe nirengo. (1 ATesaroniko 2:13) Si naida ani duna ndikidi idapase kuti Yekova na ani ki mbu Fugo ko si hasirago ngba gaani gene. (Atambuahe 119:105; Asanza 3:5, 6) Gaani idapase nikaa sona wa ani kaa kpara fuko ki duna kido ya ko adu adu na nunga rani tiko, ki ini pai fu rani na ki undo rani.
24. Gini afugo wasa du rogo ARomo 14:8?
24 Idapase nafõngbaduraniyo ani kpara tirani fu Mbori nyeanye kindi. Nidu ani na nyanyaki idapase, ka si vura du nga ani nika kpi akpi, ani nga gako kparakpara amoyambu duna maabangirise tipa zingabekpio. Ii, ‘singia ani ni ungarani watadu ani nikpikpi rani, ani niga Gbia aboro.’ (ARomo 14:8) Ani kanga kuti agu afugo wasa re ku kpotorani yo baraho ani aka ni kuti kido kuti Fugo Mbori na kini ndu kumbatayo kindi na idapase kuti wene pangbanga.
Gaoni Karagapai Nga Gine?
• Gine nga idapase, na tipagine si aida ani du ti ni nani?
• Tipagine duhe ti ni ninyanyakipa pai ani duna idapase kuti wene pangbanga na kuti Fugo Mbori nabaha dunduko?
• Wai idapase aundo rani ani dibe dungu fudifudiapai nibakiakia?
• Ginipai nika undo rani ani kakuti idapase?
[Gu kpiahe du ti kpewaraga 8]
Yekova asongodi aYeremaya na Eriya mbiko i aduna idapase
[Gu kpiahe du ti kpewaraga 9]
AEyobo na Petero gbiati Nemaya aduna nyanyaki idapase
[Gu kpiahe du ti kpewaraga 11]
Tipa ani rengbe ka gbia ngbarago be nyenye pagume dagbarani na Yekova, si naida ani duna idapase kuti wene pangbanga