Wai Nyaki Gaoni Idapase?
“Oni naru mbiko gaoni idapase.”—2 AKORINDO 1:24.
1, 2. Tipagine si aida ani duna idapase ti ni, na wai rengbe ani ka nyakasaha?
GA Yekova amoyambu ima ino gupai nga, si naida i duna idapase. Nirengo, “zanga idapase ga boro pai arengba nga ka ngba bangiri Mbori te.” (AEbere 11:6) Sidu, ani nakpara fu Mbori tipa ziazia toro na tipa idapase, nga wene papara zuzuhe. (Ruka 11:13; AGaratio 5:22, 23) Pa wirika ani gu idapase nga ga akuarani aidipase rengbe arengba ka nyakasa gaani idapase a.—2 Timoteo 1:5; AEbere 13:7.
2 Gaani idapase nika du ninyanyakihe ka ani zi tirani kuti peka fuo gupai du rogo Fugo Mbori tipa aKristano dunduko. Gaani idapase rengbe ka kio ka ani ageda Ziazia Kekeapai na auru dunduko na kini wisigihe zanga nyomoro na gu undo du rogo agu abuku naye be ‘ruru kangara buruku.’ (Ruka 12:42-44; Yosua 1:7, 8) Gu idapase nga ga akuarani nangarasa rani ti agu aregbo ani adu pati agu adunguratise nga ga aKristano, na pati kikindigi adunguratise. (ARomo 1:11, 12; AEbere 10:24, 25) Na gaani idapase nanyaka ho ani naafura ni fu kura aboro gene tungusapai yo.—Atambuahe 145:10-13; ARomo 10:11-15.
3. Nibi gupai du tipa idapase, gini aundo ani agbiaha be agu aKristano nga abaakumba duna nyemuse?
3 Nifu agu aKristano nga abaakumba agu arugute fu rani nga ga Ziazia Kekeapai, i naundo rani na kini ngarasi rani rogo nyemuse ani sonosi gaani idapase. I na gu berãpai nadu ti gu mokedi nangia Pauro, nga guko naya fu aKorindo wee: “Ani nga amounda gaoni ngbarago, bambiko oni naru mbiko gaoni idapase.” (2 AKorindo 1:23, 24) Gu kura sasa-fugo gi veresi re naya wee: “Ani namangasunge na oni ka sa roni oni duna ngbarago, bambiko gaoni idapase ninyanyakihe.” (Contemporary English Version) Ruru aboro naraka mbiko gayo idapase. Rengo ngaha, anga kura boro ho rengbe ka duna idapase kubarani watadu ka sa rani ani du nindikidi akakuti ruru mangapai te. Rogo gi gene re, ‘si naida gupai nga, wa du aboro nibasasa, boro tindi kina gani tindiro.’—AGaratio 3:11; 6:5.
4. Wai rengbe pangbanga gu ga Mbori ruru amoyambu du payo rogo Ziazia Kekeapai ka undo rani ani nyakasi gaani idapase?
4 Ziazia Kekeapai na dungu apangbanga agu aboro nadu na idapase. Si rengbe ka du nga ani ima ino dungu gayo bangua mangaapai, ono ya mo ani ini pa gu gayo idapase a i anayugoho rogo gayo mangaapai yo na a’uru dunduko, isoke singia rogo gayo raka nabaha dunduko? Niberã ani awere kuriipa wai i anayugo gi sino nga ga idapase re rogo agu apai nanamanga yo nga gu nadu wa kina gaani, si rengbe ka undo rani ani nyakasi gaani idapase.
Idapase Nangarasa Rani
5. Gini gopai duho rogo Ziazia Kekeapai nayugo gupai nga, idapase nanyakasa rani ani tungusi fugo Mbori zanga gunde?
5 Idapase nanyakasa rani ani takipande Fugo Mbori na wingbaduse. Enoka atakipande pa ye ga Mbori sapangbanga kumbatayo zanga gunde. Ko ayaa: “Oni ngére, . . . [Yekova] aye na gako aboro ni dungu kutu yo, ka sapa ngbanga aboro dunduko, ka yugo gayo gbegberẽ mangapai dũ fu azangasinombori dunduko, nga gu azangasinombori anamanga ni gayo zangasinombori na gu nyanyaki afugo dunduko agu aboro ingapai zanga sino Mbori nagumba kuti ko.” (Yuda 14, 15) Agu azangasinombori nangia akare kuti Enoka, fuo gia yo ngbatunga agu afugo re, si nirengo nga i aida aida ka imo ko. Wa si avura du wo, ko anatungusapai zanga gunde, na Mbori ‘ki di Enoka’ kusayo rogo kpio yo, nidigiso gako raka ho ko aarasa gu mosumo ni ka du nisangbanebi, nga gu du ziazia nga, ko aimanga be egetere kpio te. (Bambata Pai 5:24; AEbere 11:5) Ani abinga ngbatunga gu iiriwo apai re areme te, ono Yekova nakaragapai akaraga kuti gaani akparakpee tipa ani rengbe ka tungusa fugo ko rogo idapase na ngara.—Amokedi 4:24-31.
6. Wai gu idapase gbiati ngara Noa agbiaha be Mbori aundo ko?
6 Mbiko idapase Noa “[a]mbakadi kurungba ki batasi kpuko.” (AEbere 11:7; Bambata Pai 6:13-22) Noa ‘angia batungusi rurupai’ a, nga gu kumba nanatakapande pa ga Mbori zahe zanga gunde fu agu aboro nanaraka ti gako regbo. (2 Petero 2:5) I avura nisawia ko tipa gu gako pangbanga nga ga Ngirimo Akangbii, wa kinagu gu kura aboro naasawia rani ho ani naayugo gu goapai ni nga ga Ziazia Kekeapai fuyo nga Mbori nika gbarasa gi zegino re mbembedii. (2 Petero 3:3-12) Ono tie, wa kina aEnoka na Noa, ani natakapande gu pangbanga re mbiko gu idapase gbiati ngara gbia ani he be Mbori.
Idapase Nasa Rani Ani Duna Zerangbaduse
7. Wai Abarayama gbiati gu kura aboro ayugu idapase na zerangbaduse?
7 Si naida ani duna idapase gbiati zerangbaduse, gbe, wa ani asungudo digido gi zegino re. Gu boro du dagba agu aboro yo nika ‘dia kumbo agu akidohe nga ga Mbori, mbiko idapase na zerangbaduse,’ ni nga Abarayama, nangia gu iriiripa bakumba nanagunde ti Mbori. (AEbere 6:11, 12) Mbiko idapase ko ambu gu gbata nangia Ura, na gu weneapai nadu rogoho dunduko, ki sa tiko nikungbo boro rogo kungbo ringara nga gu Mbori akido paha fuko. AYisaka na Yakobo angia adikumbo kina boro gu bangisa kidohe re. Ono tie, ‘i dunduko akpiki rogo idapase yo, wa i avuranga bi digisidigisi gu kidohe re ya.’ Mbiko idapase i ‘agbata gu ba nangba ti gu nadu beyo, nga gu ba nga ga ngbangbaturũ.’ Mbiko agi apai re, Mbori ‘aima mbakada bakporo tipa yo.’ (AEbere 11:8-16) Ii, Abarayama, Yisaka na Yakobo gbiati adia yo nangia agu adee nanagunde ti Mbori, aapido ga Mbori Kindo nga ga ngbangbaturũ na zerangbaduse, nga gu kindo i ka zingisa yo bekpio i raka tii gaha zogarago auru kpotosende.
8. Gini apai navura nimangi Abarayama, Yisaka na Yakobo i ki du kindi na zerangbaduse gbiati idapase?
8 Abarayama na Yisaka gbiati Yakobo ambunga idapase te. Ringara Mokido ayenga kutii beyo na kutii gayo arugute te, na i abinga ngbatunga aboro dunduko i nafu maku fu tiyo mbiko tunga Abarayama te. (Bambata Pai 15:5-7; 22:15-18) Wa si avura du nga gu ‘bakporo kina Mbori nitiko nika duaha’ pa duaha adu kindi kina kumbatayo fuo dungu akama agarã, agi aboro re aandu kumbatayo kindi na idapase gbiati zerangbaduse rogo gayo raka nabaha dunduko. Nirengo, si naida ani du awere wa kina yo, mbiko gu Kindo nga ga Masiya nga ndikidi zogarago awere ngbangbaturũ yo.—Atambuahe 42:5, 11; 43:5.
Idapase Namaa agu Asásá fu Rani Du Nibawenehe Gbe
9. Gini ome du idapase nani kurii ga boro asásá watadu agu apai boro aida ka mangaha?
9 Gu ruru iriiripa abaakumba nangia Abarayama na Yisaka gbiati Yakobo aduna agu asásá nadu nibatumbatumbaha kuari gbe, si du i aameranga ti ni fuo gu wasiwasi sino raka nangia ga aboro Kanana ya. Idapase nafu agu asásá fu rani nga ga toro nga gu naundo rani ani sovura kuti rimiso ani tirani kurogo gu zegino du tiibe Satana Bakitingbanga, nga gbegbere sino boro.—1 Yoane 2:15-17; 5:19.
10. Waigu ani aino gupai nga Yosefa amoi gu sásá nadu niba tumbatumbaha kuari kisusi agu apai nga ga zegino rimo aboro awo mbikoho?
10 Mbiko gupai Mbori ambakadihe, gu wiri Yakobo nangia Yosefa amangisunge nibakparaka riahe Ezipeta yo, ono gako sásá angianga ka du nibakerepa boro rogo gi zegino re te. Yosefa aduna idapase kuti digisidigisi ga Yekova akidohe na ho garãko aduni nga 110, ko aya fu awiribako wee: “Mi nikakpi; ono Mbori ayé ka bi roni, ki kusi roni rogo gi ringara re, oni ki ndu ku rogo gu ringara ko azunga he tipa ha fu aAbarayama, na fu Yisaka na fu Yakoba a.” Yosefa aidi gupai nga, i ndu ka kpisido ko kina rogo gu ringara nangia ga mokido. Ho ko akpi ni, i augusi kangba ko ki moihe kurogo sanduki-kangba Ezipeta yo. Ti gu regbo i akusi aYisaraere be ga aEzipeto sunge akanga, gu nebi nangia Mose arogodi ameme Yosefa i ndu nani wa sa na yo ka kpisidoho rogo Ringara Mokido. (Bambata Pai 50:22-26; Gate 13:19) Si naida ngbatunga gu idapase nangia ga Yosefa fõngbaduraniyo ani moi agu asásá du niba tumbatumbaha kuari gbe kisusi agu apai nga ga zegino rimo aboro awo mbikoho.—1 AKorindo 7:29-31.
11. Rogo gini gene Mose ayugu gu gopai nga, ko aduna agu asásá nga ga toro?
11 Mose ‘asia gupai nga i mangi ko gbegberẽ na ga Mbori aboro, kuba gupai nga ka duna gu ngbarago nga ga ingaapai tipa regbo ngbutuko,’ niwene bawirikipai dagba ga bakindo Ezipeta aborokporo. (AEbere 11:23-26; Amokedi 7:20-22) Ko ambu gu iriiripa sunge nadu yo gbiati gu bawene kendegekendege sanduki-kangba ka i akpisidi ko nani ngba iriiri gene rogo gu ba i anakpisido agu aEzipeto nangia abaworimo rogoho. Ono agu apai ko ambuhe re, nyakapaha adu wa gine ka i ringbisihe kuti gu mamu nga ka du ni “ga Mbori kumba,” ni azarõ rogo gu Ndiko nangia ga mokido, na kingia ga Yekova nebi na nibake Ziazia Kekeapai? (Ezara 3:2) Gu sunge zegino rimo roni awo mbikoho, si nga gu sunge oni akpinyemuhe, watadu agu asásá nga ga toro du paha kuari gbe idapase nafuhe fu roni si oni akpinyemuhe?
Sangbana Idapase Naye na Bawene Raka
12. Gine idapase amangihe na ga Raba raka?
12 Idapase afunga kina agu asásá fu aboro du paha kuari sa te, ono si naye na bawene raka a fu aboro. Si nawira gupai nga, gu nakodiba tipa marã nangia Raba nadu Yereo yo avura bi gupai nga, gari raka adunga niwenehe nidu ri nidebäri te. Ono tie, fuo du ri na idapase, gari raka asatihe nibawenehe! Mbori ‘atakipande ri ya ri angia ruru dee mbiko gu gari mangaapai nangia ga idapase, fuo dia ri agu amokedi nangia ga aYisaraere yo kugume, na ki kusi yo ku zegiyo ngba kura gene kia,’ tipa i birikpo be agu avurayo nangia aboro Kanana naagbata yo. (Yakoba 2:24-26) Ni ida Raba kuti Yekova nindikidi Mbori, ri ayugu gari idapase a, rogo mbu ri gu gari sino raka nagia ga kodaba na akumba tipa marã. (Yosua 2:9-11; AEbere 11:30, 31) Ri aidi ga Yekova moyambu di ri nidiako, nga gu kumba naangianga guni sa dagba agu azanga idapase nangia aboro Kanana ya. (Pa Fu Rugute ni Ue he 7:3, 4; 1 AKorindo 7:39) Raba aduna gu iriiri mamu nga ka du nitita Masiya. (1 Pekapai 2:3-15; Ruta 4:20-22; Matayo 1:5, 6) Wa kina gu kura aboro, nga aguyo beteyo aima mbu gu wasiwasi gene raka i adu rogoho, i nika fu kura mosoro berewe furi kumbatayo, nga ka zingisa ri bekpio tipa ri raki rogo paradiso nga ga kpotosende.
13. Wai Davide amangi ingapai na Bataseba, ono gini sino berã ko ayuguhe tingbafuoho?
13 Fuo Raba mbu gu gari sino raka nangia ga ingapai, si ziazia nga ri akakuti ruru gene raka. Wa vura duhe wo, bete agu aboro naima kparatiyo fu Mbori tipa gbanga regbo, amangi kere ingapai. Bakindo Davide amangi bäri na Bataseba, ki kedi kumbari ko kpi tingba vura, na tingbafuo gupai re, ko ki di ri nidiako. (2 Samuere 11:1-27) Rogo bakere gberarago na fuo sa Davide gako berã, ko akpari fu Yekova ki ya: “Ka mo . . . di[nga] ga Ziazia Toro ti re ya.” Ga Mbori toro aguaringa ti Davide te. Ko aduna gu idapase nga, Yekova apayasinga ‘gu kpoto yo naima be rungo ingapai te.’ (Atambuahe 51:11, 17; 103:10-14) Mbiko gayo idapase, i afu gu mosoro fu Davide gbiati Bataseba nga ga du ni atita Masiya.—1 Pekapai 3:5; Matayo 1:6, 16; Ruka 3:23, 31.
Gayo Idapase Anyaki be ga Mbori Undohe
14. Gini akidohe Mbori afuhe fu Gidona, na wai rengbe gipai re ka mangapai na gaani idapase?
14 Wa vura duhe nga ani nata rogo idapase, si naida Mbori kido rani ti kura aregbo na pa undo rani. Wogu si adu tipa gu basapungbanga nangia Gidona, nangia guni sa dagba agu aboro “naso vura na angbi mbiko idapase.” (AEbere 11:32, 33) Ho aMidiano gbiati agu aboro i akodi tiyo na yo arimi ni ku Yisaraere yo na vura, ga Mbori toro aye kurii Gidona. Nidu ko na nyemu ka ruga tiko na gupai nga Yekova adu na kina ko, ko aidi ka manga a’asada ue na gu mange-nyaa du wa zau-remu ko ambuhe zegiyo sende bataka zende ahe yo yuru. Rogo gu bambata asada, ndomo azi kina gu mange-nyaa re, ka si azionga sende ya. Rogo gu ue asada, sende naziri be ndomo ka gu mange-nyaa re azirongo ya. Fuo Gidona gbia ngara be agi akidohe re, ko amangipai rogo idapase ki dibe agu akare naye na vura sa aYisaraere. (Abasapungbanga 6:33-40; 7:19-25) Ka si du nga ani nakpinyemu ka rugatirani na pai ho ani agbia tirani ni na gupai si aida ani diberã ka mangaha, gure ayugonga gupai nga, ani zanga idapase te. Ani nayugo idapase nirengo nigeda ani Ziazia Kekeapai na agu abuku nga ga aKristano na rogo kparakpee tipa agu arugute nga ga ziazia toro ho ani adiaberã ni tipa ka mangapai.—ARomo 8:26, 27.
15. Wai rengbe ani ka gbia undo mbiko berã ani kuriipa gu idapase nangia ga Baraka?
15 Gu idapase nagia ga gu basapungbanga nangia Baraka anyaki mbiko gu ngarasa ko i angarasi ko nani naye fuko mbiko gu kidohe i afuhe fuko. Gu denebi nagia Debora angarasiko ko guari na pa kusa aYisaraere kusayo tiibee gu Bakindo aKanana nangia Yabina naarungosi yo. Rogo idapase gbiati kido kuti Mbori tipa songoda ko, Baraka angbembatayo fu 10,000 akumba naadunga na nyanyaki aũvura beyo ya ku ba vura yo, i ki di be ga Yabina badungu aborovura nadu tiibe gu barutiriivura nangia Sisera. I amangi pumbo gu diabese re na gu bawene bia nangia ga Debora na ga Baraka. (Abasapungbanga 4:1–5:31) Debora angarasi Baraka ko mangisunge nigu barumbatayo Mbori nasia ko ko ngbembatayo fu aYisaraere, na ko angia guni sa dagba gu ga Yekova amoyambu ‘nadandi agu ariivura nangia ga kungbo aboro.’ (AEbere 11:34) Pa berã ani kuriipa wai Mbori afu mosoro fu Baraka mbiko gako mangapai rogo idapase, rengbe ka fõngbaduraniyo sa mangaapai ka singia ani na bete ndundu rogo manga gu ga Yekova sunge fu yo ho fu rani du nikpakarakpakaraha.
Idapase Nakiiso Zereda
16. Gini wene kpiapai Abarayama amoihe rogo gbáta pazereda dagba ko na Roto?
16 A wa idapase aundo rani ani mangi gu ga Mbori asunge du nikpakarakpakaraha, kinawo a si aundo rani ani kiisi pazereda gbiati wene pagume dagbarani na akuarani. Gu sosono bakumba nangia Abarayama ambu wiri unvurako nangia Roto ko sia gu sende nangba gbe nadu na nvuo rogoho tipa anyaa ho gayo ababanda anyaa arimi ni kurogo papaya dagbayo si ki idi i kparaka. (Bambata Pai 13:7-12) Abarayama avura fu kpee fu Mbori rogo idapase tipa Mbori fu undo rogo mbakada gipai re. Kuba gupai nga ko mai kina gupai nangba tiko nibambatapai, ko ambakadi apai rogo pazereda. Kangia ani bi tirani rogo kango na gu wirinarani nga aKristano, si naida ani kparikpee rogo idapase na ki “gbáta zereda,” kini mai gu kpiapai ku berã rani yo nangia ga Abarayama tipa gu berãpa akurase du rogo nyemuse.—1 Petero 3:10-12.
17. Tipagine rengbe ani ka ya ti ni wee gu pagume nagbere dagba aPauro na Barunaba gbiati Marako, i aima mbakadaha rogo pazereda?
17 Oni makianga pa manga ani agu arugute nga ga aKristano adunga ngburungburu ya rogo idapase aundo rani ani kiisi pazereda. Ho Pauro ambedi ni ka tona gako ue nunguro nga ga amokedi, Barunaba aidi kuti gu mbakadapai ko amangi tipa nduge ka biko agu adungurati berewe nadu Kupurio yo na Asia yo. Ono tie, Barunaba aidi gupai nga i ndu na gu wiri undurubako nangia Marako. Pauro aidanga ha te bambiko Marako agindigo yo Pumburia yo mbata. I “[a]dari kangu gbe,” si ki sa gupai nga i kparaka dagbayo. Barunaba adi Marako i ki ndu ku Kupurio yo, Pauro ki di Sira tigako nigako badiata i ki ndu ku ‘Suria yo na ku Kirikia yo, na ki nyakasi akanisa yo.’ (Amokedi 15:36-41) Fuo bete regbo kusa, i ambakadi gu pagume nagbere dagbayo, bambiko Pauro adu na Marako Roma yo na gu mokedi nangia Pauro re atambua rimoko. (AKorosaio 4:10; Firemona 23, 24) Ho Pauro aduni nizizi ko Roma yo rogo gu garã nangia 65 ti Gaani Regbo, ko aya fu Timoteo wee: “Mo di Marako ki ye na ko, bambiko ko rengbe na unda re na gi sunge.” (2 Timoteo 4:11) Si nawira Pauro aima maa gu pagume nadu dagbayo na Barunaba gbiati Marako ni gupai ko aafu kpee tipaha rogo idapase dedede, sangbanaha angia mbakada pagume dagbayo nga gu nakodatihe kuti “gu zereda nga ga Mbori.”—AFiripoio 4:6, 7.
18. Ginipai nawiri manga tipa gupai nadu dagba Euodia na Sunduke?
18 Rengo du ngaha nga, wa du ani nga kpakpa aboro, ‘ani dunduko nakota akota rogo dungu apai yo dedede.’ (Yakoba 3:2) Kpakarakpakarapai akuru dagba agu aKristano ue nangia adee nga aguyo Pauro akepai tipayo ki ya: “Mi nazungadi Eudia, mi nazungadi Sunduke, i dú na berã sa rogo Gbia. . . . Mo unda agi ade re, bambiko ani amangi sunge na yo rogo wene pangbanga.” (AFiripoio 4:1-3) Si nawiraha nga, agi adee nangia ga Mbori aboro re aima mbakada gu kpakarakpakarapai nadu dagbayo rogo pazereda nimanga yo sunge na gu rugute du nikekehe rogo Matayo 5:23, 24. Pa manga ani sunge na agu arugute nga ga Ziazia Kekeapai adunga ngburungburu ya rengbe ka fu undo areme tipa kiiso pazereda.
Idapase Naundo Rani Ani Duna Hipai
19. Gini asada aYisaka na Rebeka adu rogoho nga gu naarengbanga ka gbarasapa gayo idapase ya?
19 Idapase rengbe ka sa rani ani hi rungosiro. Isoke si rengbe ka du nga ani na gberarago tirani mbiko boro sa dagba gaani aborokporo nga guni naima zio bapatiza basa fugo Mbori ki mangi rogatise na gu boro angianga idipase ya. (1 AKorindo 7:39) AYisaka na Rebeka aduna rungo be gu rogatise nangia ga gu wiriyo nangia Esau narogodi agu adee nangianga aboro Mbori ya. ‘Rago agbere ti aYisaka na Rebeka gbegberee’ mbiko agu apai adia Esau nangia aEto, si ki sa Rebeka ri yaa: ‘Omere bati be agu apai nga ga agu adee nga awiri aEto. Ka Yakobo di dee dagba awiri aEto, nga boro gi ringara re, rago wiripa ngba waĩ tire?’ (Bambata Pai 26:34, 35; 27:46) Wa gi asada re avura du, si agbarasanga pa gu idapase nangia ga aYisaka na Rebeka te. Ani kakuti nyanyaki idapase ka si du nga apai fu rani nikpakarakpakaraha tipa ani raki rogoho.
20. Gini kpiaapai nga ga idapase bi ani he be aNaomi na Ruta?
20 Gu gbinza dekurugbo nangia Naomi angia boro Yuda, na ri aima ino gupai nga, kura adee ni aYuda arengbe arengba ka vunga akumbagude nga aguyo ka duni atita Masiya. Na wa si adu nga awiiri aima kpiko zanga i vungu agude na garãri ki ima susa ba vunga agude, gu berã nga gari aborokporo arengbe ka du rogo gu gene ngbatunga nga ga Masiya, adu ni gupai ka ri arasanga kina kandara mosumoho ya. Wa si avura du wo, gu dekurugbo wiiri nangia Ruta ada nidia gu sosono bakumba nangia Boaza, fuo gure ri ki vungu kumbagude fuko, na ri ki da ni guni sa dagba atita Yesu nga Masiya! (Bambata Pai 49:10, 33; Ruta 1:3-5; 4:13-22; Matayo 1:1, 5) Gu idapase nangia ga Naomi na ga Ruta adibe arungosiro na si ki ye na ngbarago fuyo. Ani aduna bakere ngbarago a ka ani kakuti idapase rogo arungosi.
21. Ginipai idapase amangaha fu rani, na ginipai si aida ani kakuti mangaha nyanyakii?
21 Wa ani avuranga ino gupai nika manga gba tipa rani nibasasa ya, ono mbiko idapase, ani rengbe arengba ka sovura na diabese kuti ngbatunga a’asada dunduko. Idapase nasa rani ani duna ngara na ki duna hipai. Na si nasa rani ani moi agu asásá kiipaha gbe na kini sa rani ani raki wene raka. Idapase nasa rani ani duna wene bipai kuti gaani pagume dagbarani na akuarani na ani nanye kindi kuti ni fuo susa arungosi. Sidu tie, ani dunga “dagba agu yo yo du na idapase ti yo tipa batasa mbisimo.” (AEbere 10:39) Mbiko gu ome nga ga gu gaani Mbori nga Yekova duna nyemu rani tiko, ani ndunga kumbatayo na gaani idapase ni nyanyakihe kindi tipa si fu taarimo fuko.
Gaoni Karagapai Nga Gine?
• Gini gopai duho rogo Ziazia Kekeapai nayugo gupai nga, idapase rengbe arengba ka ngarasa rani?
• Tipagine rengbe ani ka ya ti ni wee idapase nafu wene gene raka fu rani?
• Wai idapase akiiso pazereda?
• Gini gopai duho nayugo gupai nga, idapase naundo rani ani hipai rogo arungosi?
[Gu kpiahe du ti kpewaraga 12]
Idapase angarasi Noa na Enoka i takipande ga Yekova apangbanga
[Gu kpiahe du ti kpewaraga 13]
Gu idapase du wa gu nangia ga Mose nafõngbaduraniyo ani moi agu asásá nga ga toro
[Gu kpiahe du ti kpewaraga 14]
Gu ga Mbori kidohe aBaraka na Debora gbiati Gidona adu nani tipa undo anyakasi gayo idapase