‘Mo Dú Nyanyaki Ki Du Na Bakere Erã!’
‘Oni duna wingbaduse, mi ima diabe zegino.’—YOANE 16:33, NW.
1. Nibipa gupai naapido aYisaraere ringara Kanana yo, gini ngarasahe i afuhe fuyo?
BARAHO aYisaraere aida ni ka si gu Di nga Yaradene kurogo Ringara Mokido, Mose aya fuyo wee: “Oni dú nyanyaki ki du na bakere erã, ka oni gúnde nga be yo ya, ka gbudagbuda zí nga roni a ya, bambiko Yekova gaoni Mbori . . . nandu na oni.” Fuo gure, Mose ayambu Yosua, nga guko si adu nga ko nika ngbembatayo fu aYisaraere ku ringara Kanana yo, na ki fugu gu rugute re kina boro ku ngbako nga si aida ko duna wingbaduse. (Pa Fu Rugute ni Ue he 31:6, 7) Kusa, kina boro Yekova nitiko angarasi Yosua ki yaa: “Mo dú nyanyaki ki du na bakere erã . . . Ono mo dú nyanyaki ki du na bakere erã.” (Yosua 1:6, 7, 9) Ngbatunga agu afugo re aye ti wene regboho. Si aidi aYisaraere duna wingbaduse tipa ka sovura kuti agu avurayo nadu na bakere ome mbiti Yaradene yo.
2. Gini apai ani abi tirani areme rogoho, na gine si aida ani du nani?
2 Areme a, ndikidi aKristano nika rimo barambeda kurogo gu vovo zegino i akido yo tipaha, na wa kina Yosua, si naida i duna wingbaduse. (2 Petero 3:13; Yugoti 7:14) Ono tie, agu apai du tipa rani, si kia ti gu nadu tipa Yosua. Yosua anasovura na abasape gbiati abaso. Ani tigaani naso gu vura nga ga toro na ani adianga ndikidi aũvura kube rani wagusa te. (Yesaya 2:2-4; AEfeso 6:11-17) Kurii gure, Yosua aso kere avura zavura tingbafuo rimo ko Ringara Mokido. Ono tipa rani tigaani, ani naso gaani kere avura kisusi awere ti gi regbo re, mbata fu rimo ani kurogo vovo zegino. Ani makianga bete agu apai naida ani duna wingbaduse.
Tipagine Si Aida Ani Sota ti Ni?
3. Ginipai Ziazia Kekeapai ayugoho tipa gu boro nga bangbasia basogo rani?
3 Gu mokedi nangia Yoane akepai ki ya: “Ani ini ya ani nga ga Mbori rani, zegino dunduko du ni zogozogo ho be gbegberẽ ko.” (1 Yoane 5:19) Agu afugo re nayugo gu bambata ndupai si aida aKristano sota ti ni ka banda gayo idapase. Ho Kristano aka ni kuti gani ruru mangapai, si nayugo gupai nibetehe nga, ni ima diabe Satana Bakitingbanga. Si du Satana amangaapai ti ni wa gu “bahu nata ki nipoi” kini asadi ka gundesi ruru aKristano na ka rita yo. (1 Petero 5:8) Nirengo, ko nasovura nyanyakii kuti mbedimbedi aKristano na kuti abadiangbayo. (Yugoti 12:17) Rogo gi gako vura re, ko namangasunge na aboro nga aguyo nata inoaino kini mangi gupai ko akpinyemuhe, watadu ainonga nga i namangasunge fuko ya. Si naida boro duna wingbaduse tipa ni rengbe ka ru ngutete ka sovura kuti Satana na kuti agu aboro namangasunge fuko.
4. Gini zahe Yesu afuhe, ono gini sino ndikidi aKristano ayuguhe?
4 Wa duhe nga Yesu aima ino gupai nga Satana gbiati agu aboro namangasunge fuko nika sovura aso nyanyakii kuti wene pangbanga, Ko aza apefuo ko i banda tiyo ki yaa: “[Aboro asoga roni asoga] ki fuku roni sa gberãngbi; ki iimi roni. Rika aboro asóga roni asoga dunduko tipa rimore.” (Matayo 24:9) Agu afugo re aima da nirengo rogo bambata sa kama agarã, na si ima da nirengo areme a. Nirengo, gu sogote gu ga Yekova aDezire du awere naarungo behe nidu nigbegberehe wa kina gu naima digo nimangi aguyo nadu mbata. Wa vura duhe wo, ndikidi aKristano na wingbaduse barabangiri gu kereapai re. I ima ino gupai nga, “gunde ti boro nare gbina,” sidu, i aidanga ka zio ti gbina te.—Asanza 29:25.
5, 6. (a) Gini apai namanga naida ani duna wingbaduse? (b) Waigu ruru aKristano amangapai ho i agbia tiyo ni na asada nga gu naye sa yo ka bihe singia i na wingbaduse?
5 Gu kura fudifudiapai kinaho ku pati rungosi rani naida gupai berani nga ani duna wingbaduse. Tipa kura aboro, pa fura yo na agu aboro i abinga yo mbata ya tipa wene pangbanga nga kpakarakpakarapai. Gu kura agude sukuru nagbia tiyo ti asada nga gu naye sa yo ka bi yo singia i na wingbaduse ho i ayamba yo ni i gumba gu kidohe nasambuo pa ringara watadu ka bi gu bia nataasapa gu beere nga ga ringara. Wa duhe nga ngbatunga gu nyanyaki kidohe re si nirengo nga gu fugo nga ga irisombori, agu agude nga aKristano aima diaberã niwingbaduse ka manga gupai nafu ngbarago fu Mbori, na gu keke keke apangbanga du tipa gi gayo ruru mangaapai re nafu ngbarago ku ngbaduraniyo.
6 Si naida ani du a na wingbaduse ho asogo rani amangasunge ni na aũgbandaka apangbanga ka gbandaka gbegbere apangbanga tipa ga Mbori amoyambu watadu ho i a’asada tiyo ni ka kandasi ndikidi irisombori niberã yo pa tona ‘fudifudipai nirũ yo ndiko.’ (Atambuahe 94:20, NW ) Nikpiapai, ginipai si aida ani berẽhe ho waraga pangbanga, radio, watadu terevizioni ape iraira apangbanga ni tipa aDezire Yekova watadu ka pe kina boro ku ziree tipa yo? Si naida ani mbu iriwoho si zi rani? Oó. Ani namaabangirani amaa tipa ngbatunga agu apai re. (Atambuahe 109:2) Na kurii gure, ngbarani azeranga ka bi gupai nga, kura aboro naida aida kuti ngbatunga agu aziree i atakapandehe re te, mbiko gu boro nga “zangainahe naida pa apai aida dũ.” (Asanza 14:15) Wa vura duhe wo, ruru aKristano tigayo naka ka ida agu apai aboro agumbaha tipa awirinayo, na nirengo, i ambunga du pati agu adunguratise nga ga aKristano, ka nyomoro rogo sunge tungusapai, watadu ka rungbura rogo gayo idapase mbiko gu gbegbere apangbanga aboro agumbaha bara yo te. Kuba gure, i ‘nambakada rimoyo niga Mbori abamangisunge, rogo taarimo na rogo wasiro, rogo gbegbere takapande yo na rogo wene takapande yo: wa i ni airabiriki [wa gu asogo yo apehe], ono i nga aperengo.’—2 AKorindo 6:4, 8.
7. Gini ngbatunga asanahe nga ga makiatise rengbe ani ka sana tirani nani?
7 Nike Pauro waraga fu Timoteo, ko ayaa: “Mbori afu nga toro gunde fu rani te. . . . Were ka zee mángi nga ro mbiko . . . [manga dezirepai tipa] gaani Gbia ya.” (2 Timoteo 1:7, 8; Marako 8:38) Fuo geda ani agu afugo re, ani rengbe ka sana tirani ki ya: ‘Zee naamanga re amanga tipa gimi idapase, watadu mi naafura zanga gunde? Ba gimi sunge yo (watadu kangia mi nga gude sukuru), mi naasa agu aboro du pati re i ini gupai nga, mi nga guni sa dagba aDezire Yekova, watadu mi naa’asada tire ka oka gi rengo re aoka, kina zee ninaamanga re ka mi mangi tire kia ti kura aboro? Watadu mi nidu na ngbarago ka du kia ti kura aboro mbiko gu gimi pagume du dagba re na Yekova?’ Kangia boro ho na gbegbere aberã tipa tungusa wene pangbanga watadu tipa ka songoda gupai angbanga ti kura aboro ya, ni tingidi ga Yekova rugute fu Yosua, nga gu ko agumbaha ki ya: “Mo dú nyanyaki ki du na bakere erã.” Ka bangironi gonga ya, anga gupai nyakipaha gbe si nga gu berã nga ga gaani badiasunge watadu ga gu kuarani du ani na ni sukuru yo te, ono gupai nyakipaha gbe nga gu bipai nga ga Yekova na ga Yesu Kristo.—AGaratio 1:10.
Gu Gene Rengbe Ani ka Kiiso Wingbaduse Rogoho
8, 9. (a) Ti kura regbo sa, wai asada aye sa bambata aKristano ka bihe singia i aduna wingbaduse ke? (b) Waigu aPetero na Yoane amangipai ho i aserekpo yo ni, na ginipai namangi tipa yo na tipa awirinayo?
8 Wai rengbe ani ka kiiso ngbatunga gu wingbaduse rengbe ka undo rani ani kakuti gaani ruru mangapai rogo gi kpakarakpakara aregbo re? Wai bambata aKristano akiisi gayo wingbaduse? Oni wisiginga gupai namangi ho agbiamotumo gbiati abaakumba Yerusarema yo aya ni fu aPetero na Yoane wee i mbu tungusapai nirimo Yesu. Agu abawiriki re aka aká, si ki ta du were, agu aboromotumo re ki sere yo, fuo gure i ki kusi yo. Ngbutuko fuo gure, i akodi tiyo kuti awirinayo, na i ki mongo kparikpee sa niyaa: “Gbia, mo bí gayo serãhe, ki idi fu gamo amoyambu i . . . [naa]peka ga pai apeka zukazuka gbe.” (Amokedi 4:13-29) Nikaraga Yekova pai kuti gayo kpee, ko anyakasi yo nigako ziazia toro, a wa agu abarumbatayo nangia ga aYuda yo aidi paha kusa ki ya “[aKristano] hihisi Yerusarema” na gayo yugopai.—Amokedi 5:28.
9 Ani wisiginga gupai namangi ti gu regbo re. Ho agu abarumbatayo nangia ga aYuda yo arungosi abawiriki ni, abawiriki aberãnga pa mbu manga rurupai mbiko gu sosodapai i asosodihe kuti yo te. Kuba gure, agu abawiriki re akparikpee tipa wingbaduse tipa i naatungusapai kindi zanga gunde. Fuo gure i amangipai ringbisihe kuti gayo kparakpee, na Yekova ki nyakasi yo nigako toro. Gipai namangi tipa yo re nayugo gupai nga, gupai Pauro akehe tipa kurapai kia fuo susa bete agarã, si nga kina rengo tipa aKristano ho aboro arungosi yo ni. Pauro ayaa: “Mi rengbe na manga apai dunduko rogo gu ko nanyakasa re.”—AFiripoio 4:13.
10. Wai du gu pangbanga du tipa Yeremaya angarasa agu aboro nga airazee watadu agu aboro du sino yo nga ga gugunde?
10 Ani ya boro ho i avungu ni ni borozee watadu ni iragunde, ginipai du tipa ni tigani? Ya mo ni rengbe arengba a ka mangasunge fu Yekova zanga gunde, aboro ki vura nisogo ni vurũ? Ii nirengo, ni rengbe arengba! Oni tingidinga pa Yeremaya ho Yekova asia ko ni ko du ninebi. Gi paranga kumba re ayaa: “Mi nga kina paranga [gbua].” Kuti gi gako karagapai re, ani nabi gupai ziazia nga, ko abi tiko wa ko arẽnga te. Wa si avura du wo, Yekova angarasi ko kindi na agi afugo naye re: “Ka mo yá nga, ‘Mi nga kina paranga [gbua]’, ya; bambiko mo andú koyo du agu yo ni dunduko ka mi kedi ro koyo du yo ni, gu pai mi ka ruga ro na ni mo agúmba kina ha. Ka mo gúnde nga be yo ya, bambiko mi du na mo ka batasa ro.” (Yeremaya 1:6-10) Fuo gure, Yeremaya adu na kido kuti Yekova, na nisangbanaha, ko adibe gako ndundu mbiko gu ome Yekova afuhe fuko na ki da nigu dezire ringara aYisaraere yo pande ko adu ti ni mbiko gako wingbaduse.
11. Gine naundo aKristano areme i du wa Yeremaya?
11 Gu sunge fu yo ho fu mbedimbedi aKristano areme wa kina gu i afuhe fu Yeremaya, nga gu sunge “bakere rimbasa aboro” nga “kura avusende” asongoda yo nani. Gu sunge re nga sunge takapande ga Yekova ringbisapai, nga gu i andu kumbatayo kindi nani wa avuranga du aboro na nyemuhe vurũ ya, aboro ki vura nisawia yo na kini rungosi yo vurũ. (Yugoti 7:9; Yoane 10:16) I nagbia ngara be gu ga Yekova afugo ko agumbaha fu Yeremaya ki ya: “Ka mo gúnde nga be yo ya.” Bangiriyo agonga ti gupai nga, Mbori du fu sunge fuyo na gako pangbanga du i atungusaha te.—2 AKorindo 2:17.
Gu Kpiaapai Nga ga Wingbaduse Rẽ Tipa Ani Wirikihe
12. Gini wene kpiapai nga ga wingbaduse Yesu amoihe, na waigu ko angarasi apefuo ko i duna wingbaduse?
12 Ka ani berẽkurii gu kpiaapai nga ga kura aboro, nga aguyo namangi apai na wingbaduse wa Yeremaya, ani rengbe arengba ka gbia undo rogo gaani asadatise ka kiiso gaani wingbaduse. (Atambuahe 77:12) Nikpiapai, wa ani awisigo ga Yesu sunge tungusapai, si nafu wasa fu rani ka bi wai ko afura zanga gunde ho Satana a’asadi ko ni na ho ko agbiatiko ni na agu abarumbatayo nangia ga aYuda yo nga agu aboro naima diaberã ka soga ko. (Ruka 4:1-13; 20:19-47) Mbiko ga Yekova ome, Yesu awonga te, na mbata fu kpioko na bete regbo, ko aya fu gako abawiriki wee: “Oni narungo arungo zegino; ono oni wása awasa [“oni duna wingbaduse,” NW ]; mi di be zegino.” (Yoane 16:33; 17:16) Si adu nga, ka ga Yesu abawiriki pefuo gako kpiapai, i du adu a ni abadibe zegino. (1 Yoane 2:6; Yugoti 2:7, 11, 17, 26) Ono si aidi i “duna wingbaduse.”
13. Gini ngarasahe Pauro afuhe fu AFiripoio?
13 Fuo susa bete agarã tingbafuo kpio Yesu, i abafu aPauro na Sira ku bambukiso yo Firipoi yo. Kusa, Pauro angarasi gu dungurati nadu Firipoi yo i “ru nyanyaki na toro sa, na berã sa, nimongo ru tipa gu idapase du ti wene pangbanga. A nga he sa ka gundesi [yo] be avura[yo] te.” Tipa ka ngarasa yo rogo gipai re, Pauro ayaa: “Gere adu fu yo [nga pa rungosi aKristano] ni yuguyugu he ya i [agu aboro narungosi aKristano] nandu sa kpio, na fu roni ya oni nandu sa bata, gu bata naye be Mbori. Bambiko i aidi he fu roni tipa Kristo kina ida pa ko sa te, ono hi pai a tipa ko.”—AFiripoio 1:27-29.
14. Ginipai namangi Roma yo nisangbana ga Pauro afugo zanga gunde?
14 Ho Pauro akepai ni fu gu dungurati nadu Firipoi yo, ko adu bambukiso yo berewe, ono Roma yo ti gi regbo re. Wa si avura du wo, ko aatungusapai fu kura aboro kindi zanga gunde. Sangbanaha angia gine? Ko akepai ki ya: “Gimi azogbo ni yuguyugu he ti ni rogo Kristo fu ababanda bambu bazogo yo, na fu akura yo dunduko. Agu awirina du rogo Gbia yo i nagumba pa Mbori zukazuka gbe ni dungu yo zanga gunde, ki du zaza mbiko gimi azogbo.”—AFiripoio 1:13, 14.
15. Wari rengbe ani ka gbia wene kpiaapai ni nga ga idapase nga gu rengbe ka ngarasa rani kuti gaani diaberã ka duna wingbaduse?
15 Ga Pauro kpiapai nangarasa rani. Na kinawo a gu kpiaapai agu aKristano du rogo gi gaani regbo re nayuguhe nga aguyo hi arungosi tiibe agu azogarago nazoga aboro ngbaome watadu tiibe gu nga ga abarumbatayo rogo pambori. I aima gumba apangbanga agi apai namangi yo re rogo agu amagazini nga Ngbaõbambu Sinziri na Awake! na rogo agu abuku nga Yearbooks of Jehovah’s Witnesses. Wa oni ageda agu apangbanga re, oni tingidi gupai nga, agu aboro i afura tipa yo re angia kina kungbo aboro wa kina rani; ono ho i aduni rogo kereapai, Yekova afu gu ome fuyo susi ga aboro si ki sa yo i hipai. Ani rengbe ka duna gu kido a nga ko rengbe arengba ka manga kina gu bangisapai re tipa rani ka agu apai du tipa rani aida gupai nga ko mangihe wo.
Gaani Wingbaduse Nafu Ngbarago Gbiati Irisa fu Yekova
16, 17. Wai rengbe ani areme ka kiiso gaani wingbaduse?
16 Ka boro ru ngutete kugii rengo na kugii ruru mangapai, gure nayugo gupai nga, ni nga gu boro wi ngbaduni awi. Ono tie, ka boro mangihe wo gunde ki vura du ku kpotoniyo vurũ, gure nayugo gupai a nga ngbaduni ima wi kisusi. Nirengo, aKristano dunduko rengbe arengba ka duna wingbaduse ka i aida nirengo ka manga gupai Yekova akpinyemuhe, ka i diberã ka nye niruru yo, ka si du nga i nakido kina kuti Mbori ti aregbo dunduko, na ka si du nga i natingida gupai nga, Yekova aima nyakasa dungu aboro mbata nga aguyo nadu wa kina yo. Na kurii gure, ho ani abi gupai ni nga, padu ani na wingbaduse nafu ngbarago gbiati irisa fu Yekova, si nasa rani a ani diberã ka zanga rungbura. Si kini sa rani ani diberã ka hi sawia rani watadu gupai gbere kisusi gure mbiko ani nakpinyemu ko gbe.—1 Yoane 2:5; 4:18.
17 Ka bangironi gonga ti gupai nga, ho i arungosi rani ni mbiko gaani idapase, anga si nayugo gupai nga, ani mangi irairapai te. (1 Petero 3:17) I narungosi rani tipa pa songoda ani ga Yekova bakere pagbia, tipa manga wenepai, na tipa zanga du ani nipapara zegino. Nibi gipai re, gu mokedi nangia Petero ayaa: “Ka oni mangi wenepai, ki nihi apai mbiko ho, oni ki idi pa ha ni zera, si du ni wenepai ku bangiri Mbori.” Petero agumba gu kurapai berewe nga: “[Agu aboro] nahi apai mbiko sangba Mbori, i ta manga wene pai ki nifu mbisimoyo ku be wene ruru Bafuahe dunduko.” (1 Petero 2:20; 4:19) Ii, gaani idapase nafu ngbarago gbiati irisa fu gaani Mbori nga Yekova duna nyemu rani tiko. Si nga gu nyanyaki ndupai nangarasa rani ani duna wingbaduse!
Fura na Abazogo
18, 19. Ho ani afura ni na wingbaduse barabangiri basapungbanga, gini pangbanga nzunzu ani agumbaha funi?
18 Ho Yesu aya ni fu apefuo ko wee i arungosi yo arungosi, ko agbia gupai kuti ni a nga: “Aboro . . . afu roni ku be abororondo, i atáka roni abambutiria yo; ii, i andú na oni ku barangba agbia na abakindo mbiko re, si yugu pai fu yo na aGendiria a.” (Matayo 10:17, 18) Tipa boro kuru ku barabangiri basapungbanga watadu ku barabangiri bazogo mbiko zire kitangbaanga ni, si naida gupai beni nga ni duna wingbaduse. Berewe a, ho ani amangasunge ni na gu regbo re ka manga dezirepai fu agu aboro re zanga gunde, ani nasa gupai duni kpakarakpakaraha si fu mamu fu rani ani mangi nyanyakipa pai. Nisangbana gipai re, ani nape afugo Yekova fu agu aboro nasapangbanga rani re, nga agu afugo ko du nikekehe rogo gu ue Atambuahe nga gu nayaa: “Ako abakindo, awere oni dú ni tatamana tatamana aboro; Ako abasapungbanga rogo kpotosende, oni wiriki pai. Oni tá manga pa Yekova ni gunde, ki du pusiapusia ni kio.” (Atambuahe 2:10, 11) Dedede, ho i naakitangbaanga aDezire Yekova ni ngbanga yo, agbiangbanga naasarangbanga fu rani kini fu gene ranirii nga ga irisombori fu rani, na ani nidu na tambuahe tipaha. Ono tie, kura abasapungbanga ambu agu aberã nga ga asogo rani si moipai kuriyo. Tipa ngbatunga agu aboro re, Ziazia Kekeapai naya fuyo wee: “Oni wiriki pai.”
19 Si naida abasapungbanga ini gupai nga, gu ndiko kiipaha kisusi si nga ga Yekova Mbori. Si naida i ini gupai a nga, aboro dunduko, kodihe na abasapungbanga akaragapai akaraga fu Yekova Mbori na fu Yesu Kristo tipa gayo mangaapai. (ARomo 14:10) Ono tipa rani tigaani, singia agu abasapungbanga nga aboro nasarangbanga fu rani niruruhe watadu i asaranga ha wo te, ani na nduapai dunduko berani ka duna wingbaduse mbiko Yekova nasongoda rani asongoda. Ziazia Kekeapai nayaa: “Aboro maku nga agu yo dunduko nafu tiyo ku be ko.”—Atambuahe 2:12.
20. Tipagine rengbe ani ti ni ka duna ngbarago ka si du nga ani nika hi arungosi na zire kitangbaangase?
20 Rogo gu Tungusapai nadu rii Bagangara yo, Yesu ayaa: “Maku fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re. Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe: bambiko kina wo i amangi [agu] anebi nadu mbata fu roni.” (Matayo 5:11, 12) Rengo ngaha nga, anga rungosi nga wenepai te, ono pa ru ani ngutete i ki vura nirungosi rani, kodihe kuti peka azire ti rimo rani rogo aũgbandaka apangbanga, ni gupai nasa rani ani duna ngbarago. Si nayugo gupai nga ani nafu ngbarago fu Yekova na ki du ngba gene ka dia mosoro. Padu ani na wingbaduse nayugo gupai nga, ani na ndikidi idapase berani na si kini kido rani ya, Mbori ima ida na gaani apai. Nirengo, si nayugo gupai nga, ani nakido kina kuti Yekova dunduko. Ngbatunga gu kido re na nyanyakipaha tipa Kristano a wa gu papara kekepai naye re nika yugoho.
Ginipai Wiriki Oni He?
• Gini apai namanga areme naida ani duna wingbaduse?
• Wai rengbe ani ka kiiso gu sino nga ga duna wingbaduse?
• Ada nga wene kpiaapai rogo gayo wingbaduse?
• Tipagine ani aida ti ni ka mangapai na wingbaduse?
[Gu kpiahe du ti kpewaraga 22]
Simone Arnold (du rimori awere nga Liebster) Germani yo, Widdas Madona Malawi yo, na Lydia gbiati Oleksii Kurdas Ukraine yo aduna wingbaduse na ki sovura kuti gbegbere ko
[Gu kpiahe du ti kpewaraga 23]
Zee amanganga rani na wene pangbanga te
[Gu kpiahe du ti kpewaraga 24]
Ga Pauro wingbaduse ho ko aduni bambukiso yo amangi bakere sunge rogo gbaraga wene pangbanga
[Gu kpiahe du ti kpewaraga 25]
Niwingbaduse, ka ani sakirogo ndu gaani mangaapai kuti sangba Ziazia Kekeapai fu basapungbanga, gure nga ani nape nyanyakipa pangbanga funi