“Ka Oni Gúnde Nga Ya, Ka Oni Yúngura Nga Ya”

“Ka oni gúnde nga ya, ka oni yúngura nga ya; . . . bambiko Yekova adú [adu] na oni.”—2 PEKAPAI 20:17.

1. Sangbana ga abamoi vura nga gine kurii aboro, na tipagine ruhe aru ti ni fu aboro i naagunde?

GU VURA nga ga abamoi! Kina gigi gu fugo re gbua naba gunde ku ngbadu aboro yo, kini sa aboro i bi gupai nga, ngbakinga bayo te na he ho nabanda yo a te. Si nazingisa agu aberã nga ga gunde, rungo, na zinga ti bangisa regbo sa. Na si nga gu fugo naringbisapa gupai aboro agunde behe ya si nikaa fuda ngbatunga aboro kindi tipa dungu agarã. Gu rengo nga kura aringara aima digo nisovura kuti gu kere mangaapai nga ga abamoi rogo angbatungaha nibakiakia tipa dungu agarã, na ki duna kina bete diabese gbua, nga gupai nasa aboro i naagunde.

2. Waigu aDezire Yekova amangapai sa agu avura nga ga abamoi, na gupai re naye na gini sanahe?

² Wa vura duhe wo, ndikidi ndupai kinaho tipa ani duna maabangirise. ADezire Yekova, nga agu aboro natungusapai zaaza rogo aringara gbiati arago 234 auru kpotosende, namaabangiriyo ya apai angba angba kumbatayo. Kuba gupai nga i naagunde ya aboro arengbanga ka diabe agu avura nga ga abamoi te, i na kido ya si nika go ago bambeda kumbatayo. Ya mo ruhe aru aboro du ti gi maabangirise tipa wene apai kumbatayo re na yo? Gini boro tigani rengbe ka giriso zegino be gi kerepai re, na wai rengbe ni ka mangaha? Wa duhe nga ani dunduko aboro aima manga rani na ngbatunga zuũ dagba agu akuraha, si adu niwenepai ka ani wisigi gu mburupai duho tipa gu ngbatunga maabangirise re.

3. Gini nduapai duho nasa aboro i naagunde, na wai i aima gumba agi apai re nisangbanebi kumbatayo tipa gi gaani regbo re?

³ Rogo agi a’uru re, aboro nagunde agunde be dungu anduhe. Oni berẽnga pa gu ndurumo aboro arengbanga ka ngera fuo tiyo berewe ya mbiko i gbinza, agu aboro narungo be agu akaza adunga bahusaha ti ni ya, na agu aborokporo nasota na gu zingo mosoro du yo rogoho tipa ka ye na agu ahe si aida si songodi yo rogo gayo raka. Nirengo, oni berẽnga pa raka nitihe niguhe adunga nisigirasigiraha ya! Tunguotunguo kpio be béno watadu be gu gberango naye nisangbana gu mangaapai nga ga gu ome nga ga zegino rengbe ka yugo gupai nga turunga kpio pati rani te, na si ima rengba ka gbarasapa agu ahe dunduko kiipaha bangirani. Ngbatunga gu gunde gbiati abakabangirise re kodihe na gu dungu apai nafuda boro rogo gani berã gbiati agu apai nafu gberarago funi, ima sa gi gaani regbo re si du nzunzu a wa Pauro aringbisipaha ki ya: “Mo ini gere a, ya rogo kusa rago gbegberẽ rago ayé. Bambiko aboro akpi kina nyemu tiyo, ki du ni . . . airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya.”—2 Timoteo 3:1-3.

4. Gini wenepai du kido tipaha nibipa gu gbegbereapai gumba yo paha tipa zegino rogo 2 Timoteo 3:1-3?

⁴ Wa vura duhe nga gi veresi re nafura tipa gbegberepai, si a kindi nafura afura tipa maabangirise. Oni kparia gupai nga, gu gbegbereapai gumba yo paha re, si adu nga, si adu rogo ‘yangara arame’ nga ga gi gbegbere zegino nga ga Satana re. Si nayugo gupai nga, undo ima mbeda ka ye, na gi gbegbere zegino re ima mbeda ka go gu ziazia zogarago nga ga ga Mbori Kindo dibaha, nga gu Kindo Yesu ayugupai fu apefuo ko i kpari tipaha. (Matayo 6:9, 10) Gu Kindo re nga ga Mbori zogarago nga ga ngbangbaturũ, nga gu Kindo, i ‘ka gbarasanga ha wa sa ya’ a wa gu nebi nangia Daniere afura tipaha, ono ‘si akúadi agi angbi [agu akindo nga ga aboro] re rukutu ki digisi he dunduko, si ki nye anye kindi.’—Daniere 2:44.

Gu Kparatise Nga ga AKristano Kusayo ti agu Apai Nga ga Birĩ Zogarago, Si Kia ti gu Mangaapai Nga ga Abamoi

5. Ginipai rikaaboro amangi bambeda kusayo nikaragapai sa ga abamoi vura?

⁵ Tipa dungu agarã, abamoi aimi dungu kutu aboro rogo gayo avura. Aboro arugutiyo na pa gi kerepai re bakere gbe rogo zegino dunduko fuo gu vura abamoi ati nani kurii aboro New York City yo na Washington, D.C. yo, rogo Mbirinvuo ti rameru 11, rogo gu garã nangia 2001. Nibipa kio ga abamoi vura na pa wai rengbehe rogo arago dunduko rogo zegino, arikaaboro rogo zegino dunduko akpamia tiyo ka sovura kuti ni. Nikpiapai, rogo Banduru ti rameru 4, rogo gu garã nangia 2001, kuti gu pangbanga i agumbaha rogo aũgbandaka apangbanga, “gu kikindigipa aboro nga ga irangbii yo rogo aringara 55 Putu yo, na rogo gu papara Amerika du ku Nodiyo gbiati gu papara Asia du bebere rago yo akoditiyo sa” tipa ka koda omeyo ka mangapai wa aboro sa. Bakerepa boro rogo gu zogarago nga ga Amerika atambuapa gi mangaapai re ya si angia “gu nyanyaki vovo ome” nika sovura kuti gu mangaapai nga ga abamoi. Wa kina ikpirogumba, dungu kama amirioni aboro abi tiyo rogo gupai gu waraga pangbanga nga The New York Times Magazine ayambuhe nga “tonatona bakere vura kisusi.” Ani nasungo ka bi wai i ka duna diabese rogo gi vura re. Ono tie, dungu aboro ima tona ka gunde be sangbana ngbatunga gu vura ka i soho kuti abamoi re, ono agu aboro nakido kuti Yekova agundenga tigayo te.

6. (a) Tipagine rengbe he ka du ti ni ti kura aregbo nikpakarakpakaraha fu aboro i idi gu ga aDezire Yekova bipai du tipa gu kparatise kusayo nga ga aKristano ti agu apai nga ga birĩ zogarago? (b) Nibipa gu mangaapai nga ga birĩ zogarago, gini kpiapai Yesu amoihe fu apefuo ko?

⁶ Aboro aima ino aDezire Yekova wenengai ni agu aboro naima kparatiyo kusayo ti agu apai nga ga birĩ zogarago. Wa vura duhe nga, ti regbo zereda dungu aboro rengbe ka ida kuti gi gayo bipai re, ono tie, i ahinga pai fuyo ho vura arikito ni rogo gayo dagbarago te. Dedede, gu gunde aboro nidu nani mbiko vura, nasa yo i duna bakere nyemu kiisopa gayo ringara. Fuo du apai wa gere nga dungu aboro naakiisopa gayo ringara, si nikpakarakpakaraha fu boro ka ino ndu gupai gu kura aboro aka ti ni ka songoda gi mangaapai aboro ringara dunduko amangaha re. Ono tie, ndikidi aKristano ini gupai nga, si naida i irisi sangba Yesu ki ‘zanga duni aboro zegino.’ (Yoane 15:19; 17:14-16; 18:36; Yakoba 4:4) Gipai re naida i kparatiyo kusayo ti agu apai nga ga birĩ zogarago na ti gu dunguratise nga ga dungu aboro adunga ku sangba Ziazia Kekeapai ya. Yesu nitiko amoi wene kpiapai. Nibipa gu rengberengbe tatamana ko adu nani gbiati gu tandu ko adu nani naadunga be kura aboro ya, ka ko amangi wene apai amanga dagba aboro ti rago ko. Wa si avura du wo, ko aka ka rimiso tiko kurogo agu apai nabipa birĩ zogarago. Ti tonatona gako sunge tungusapai, ko aka gu gamahe Satana agumbapa fuhe fuko nga ga zogarago ni bakindo kurii agu akindo dunduko nga ga zegino. Kusa, ho aboro aidi ni ka maa ko ni bakindo, ko akaha aka.—Matayo 4:8-10; Yoane 6:14, 15.

7, 8. (a) Gine pa kpara aDezire Yekova tiyo kusayo ti agu apai nga ga birĩ zogarago ayugonga ha ya, na tipagine? (b) Waigu ARomo 13:1, 2 azahe ti rimisi boro tini kurogo gu mangaapai nga ga zuũ kuti abazogo?

⁷ Si aidanga aboro girogo pa gu kparatise kusayo ti agu apai nga ga birĩ zogarago nga ga aDezire Yekova wa i nasongoda gu mangaapai asongoda nga ga zuũ watadu i nambugene ambu fuhe te. Ka i mangihe wo, si du kia ti gupai i agumbaha ya i nga agu amoyambu nga ga ‘gu Mbori nga ga nyemuse ko na nga ga zereda ko a.’ (2 AKorindo 13:11) I aima wirikapai tipa wai Yekova aberã tipa zuũ. Bake Atambuahe akepai ki ya: “Yekova ninawisiga ruru boro na gbegberẽ boro, ono mbisimoko nasoga airazuu.” (Atambuahe 11:5) I ima rugatise a na gupai Yesu agumbaha fu gu mokedi nangia Petero ki ya: “Mo mói ga basape ku sirikpa ha yo. Bambiko agu yo dunduko naroga basape i akpi kina be basape.”—Matayo 26:52.

⁸ Wa kuru apangbanga avura niyugu gupai ziazia nga, agu aboro ningia aKristano ti kina rimo gbua aima digo nisoavura na “basape,” anga si wo nirengo tipa aDezire Yekova tigayo te. I naka ka manga ngbatunga agu apai re dunduko. Niruru mangapai, aDezire nairisa agu arugute du rogo ARomo 13:1, 2 nga gu nayaa: “Aboro rá ara dũ fu abaira tandu [abazogo], bambiko tandu gbua te kina be Mbori; agu abaira tandu du ho kina Mbori namoi yo. Gu ni ka ka fu baira tandu, si du ka ni ka aka ti ni fu ga Mbori ndika. Agu yo naka, i adía sapangbanga adia kuti yo.”

9. Rogo gini agene ue aDezire Yekova asovura kuti gu mangaapai nga ga abamoi?

⁹ Ono tie, wa duhe nga ga abamoi vura nigbegberepai, ya mo si aidanga aDezire Yekova sovura kuti ni tee? Ii, si naida aida i mangipai tipaha na i naamangaha amanga. Bambatapai nga, i nitiyo naka ka rimiso tiyo kurogo gu ngbatunga mangimangiapai re. Uepai nga, i nayugo agu arugute adunga ngburungburu ya nga ga aKristano nga gu ka aboro pefuo ho, zuũ rogo angbatungaha dunduko dunga ho berewe te.a ADezire adi asaa nga 1,202,381,302 gugorö kaa undo aboro i wiriki gi gene raka nga ga aKristano re. I agbarasanga gi regbo re agbarasa te, mbiko nisangbana gi gayo mangaapai re, aboro 265,469 azi bapatiza ki sa tiyo ni aDezire Yekova, kini yugu gupai nani gbaiga ya i aidanga na gu mangaapai nga ga zuũ te.

10. Gini maabangirise duho tipa dia zuũ kusayo rogo gu zegino du areme?

¹⁰ Kurii gure, aDezire Yekova ini gupai nga, i nitiyo arengbanga ka dia gu gbegbereapai kusayo du rogo zegino te. Gure nga ndu gupai i amaa gayo kido ti ni dunduko kina kuti gu boro rengbe ka mangaha, nga Yekova Mbori. (Atambuahe 83:18) Ka aboro vura du adu nirengo na nyemu ka digiso gu mangaapai nga ga zuũ, i arengbanga ka digisoho te. Gu bake Ziazia Kekeapai ga Mbori toro adu kugii ko ko kehe, afura kumbatayo nizahe tipa gi gaani regbo re, nga ‘yangara areme’ ki ya: “Gbegberẽ aboro agbérã ki susi na airanangahe a, ki ninangi aboro, aboro ki ninangi yo a.” (2 Timoteo 3:1, 13) Ka ani bihe ngba gi gene re, wiri maabangirise ho ya aboro nisayo rengbe ka diabe gbegbereapai rogo gi gayo vura re te. Ngba kura gene, ani rengbe arengba ka kido kuti Yekova tipa ko di zuũ kusayo naabaha na nyeanye kindi.—Atambuahe 37:1, 2, 9-11; Asanza 24:19, 20; Yesaya 60:18.

Du Zanga Gunde be gu Vura Ima Du Nga Si Nika Manga

11. Gini apai Yekova naima tona ka mangaha tipa ka dia zuũ kusayo?

¹¹ Wa duhe nga gu Mbori nga ga nyemuse ko nasoga zuũ asoga, ani rengbe tie ka ruga tirani na ndu gupai ko aguari ti ni ka gbarasa Satana Bakitingbanga nga batona gbegbereapai. Nirengo, Mbori aima sa gu gako vovo Bakindo ko namoi ko, nga Mikaere, nga Kristo Yesu, duni bakumba maraika, ko dibe Satana rogo vura. Ziazia Kekeapai naringbisapa gu vura re na agi afugo re: “Vura ki du ngbangbaturũ yo, Mikaere na gako amaraika ki so vura na daragona; daragona ki niso vura na gako amaraika a; ka daragona adia nga be he ya. Ka i aida nga fu daragona na gako amaraika i bi ba berewe ngbangbaturũ yo ya. Were i ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a.”—Yugoti 12:7-9.

12, 13. (a) Gini nyanyakipa pai du tipa gu garã nangia 1914? (b) Gine Yezekere agumbapaha kumbatayo ya si nika manga agu aboro nasongoda ga Mbori Kindo?

¹² Gu tangarapai ti genehe kuti aregbo nga ga Ziazia Kekeapai gbiati agu apai ninaamanga rogo zegino naida kuti pai sa nga, gu garã nangia 1914, angia gu regbo gu vura re arikito ti ni ngbangbaturũ yo. Natona rogo gu garã re kaa ndu kumbatayo, agu apai du rogo zegino nagberã kina kumbatayo kindi. Yugoti 12:12 nasakarogo ndu gupai duhe ti ni wo kini yaa: “Ako angbangbaturũ, si du ka oni ngi angi ti ni, na agu roni naraka rogo ho. Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.”

¹³ A wa si nidu tipa aboro a, Bakitingbanga a’aria gako zinga nibambatapai kurii agu airisimbori du nimbedimbediyo na kurii agu abadiangbayo nga “kura akandoro.” (Yoane 10:16; Yugoti 12:17) Gi sogote re nika da ti digido bakio gaha ome bambeda, ho Bakitingbanga nika zubo agu aboro ni dunduko nasongoda ga Mbori Kindo na kini kido kina kuti ni. I nafura tipa gi zubo vura re rogo Yezekere kapita 38 nigu zubohe nga ga ‘Gogo nga boro gu ringara nga Magogo.’

14. Gini a’asadatise ninaabanda aDezire Yekova, ya mo si nikaa manga wo kindi?

¹⁴ Natona ti gu regbo i aba Satana kusayo ngbangbaturũ yo, agu ariigbu nga ga birĩ zogarago ninaabanda ga Mbori aboro ti kura aregbo be gu zubohe nga ga Satana nga gu bandahe ringbisi yo paha ni afugo sanza rogo Yugoti 12:15, 16. Ono tie, Ziazia Kekeapai nayugo gupai nika manga kia ti gure, ya ho Satana nika zubo ga Mbori aboro ni niyangaraha, anga riigbu ho nga ga aboro nika ye ka banda agu aboro nakido kuti Yekova te. Ya mo si naida gipai re sa aKristano i naagunde watadu kpotoyo yo naayungura? Wagusa te!

15, 16. (a) Gu ga Yekova afugo ko agumbaha ka kido gako aboro nani ti rago Yosafata nafu gini maabangirise areme fu aKristano nga apai angba angba kubarayo yo? (b) Gini kpiapai Yosafata gbiati avuruko amoihe nikpiapai tipa ga Mbori amoyambu areme?

¹⁵ Mbori abanda gako aboro abanda nirengo teketeke wa ko amangihe mbata tipa gako siasia rikaaboro ti rago Bakindo Yosafata. Ani nagedaha wa gere: “Oni dége turoni, oni nga aYudo dunduko na agu roni naraka Yerusarema yo, na mo a nga Bakindo Yosafata: Ya Yekova fu roni wẽ, ‘Ka oni gúnde nga ya, ka oni yúngura nga be gi bakere rimbasa re a ya; bambiko gu vura re gaoni nga ha te ono ga Mbori du. . . . Oni asó nga gi vura te re; oni ríngbisi ti roni, oni ki ru aru zaa, ka bi gu diabese nga ga Yekova du tipa roni.’ Ka oni gúnde nga ya, ka oni yúngura nga ya; oni ndú gba sa yo, bambiko Yekova adú adu na oni.”—2 Pekapai 20:15-17.

¹⁶ I akido aYuda ya si aidanga i sovura te. Teketeke a, ho Gogo nga boro Magogo nika zubo ga Mbori aboro ni, i adianga aũvura kubeyo ka sovura nani tipa ka banda tiyo te. Kuba gure, i nika ‘ru zaa ka bi wai Yekova nika batasa yo.’ Rengo ngaha nga, anga pa ru boro zaa nayugo gupai nga, ni nika sungo ki he mangapai te, a wa gu ga Mbori aboro nadu rago Yosafata asungongo asungo gbua ya. Ani nageda pa gupai i amangihe yaa: “Yosafata ki zogo riko na kpakpuko ku sende, aYudo dunduko na agu aboro nanaraka Yerusarema yo ki tiwi ku sande bara bangiri Yekova, ki niirisi Yekova. . . . Ho [Yosafata] arugu pai ni na aboro, ko ki ringbisi agu yo i bi bia fu Yekova, ka tambua ko na wene ziazia aroko ti kpotoyo, wa i ka ngbe ku mbata yo fu rikavura, ki ya, ‘Oni fú atambuahe fu Yekova, bambiko gako weneringise nye anye kindi.’ ” (2 Pekapai 20:18-21) Ii, zavura ho avurayo aima mbakada tiyo ni ka zubo yo, i aasambuo Yekova kindi zaaza. Gipai i amangihe re namaa gu kpiapai si aida aDezire Yekova pefuoho ho Gogo nika zubo yo ni.

17, 18. (a) Gini wene berã du aDezire Yekova nani areme tipa gu zubo vura nga ga Gogo? (b) Gini tingidapai i afuhe fu agu aKristano nga aparanga?

¹⁷ Daa kuti gi regbo re, na fuo zubo Gogo aDezire Yekova, na zavura fuo gu regbo re, i nikaa songoda ga Mbori Kindo kindi. I nikaa gbia ome kindi gbiati bandahe rogo gu kodatise du yo nani rogo adungurati bangehe nasusi 94,600 rogo zegino dunduko. (Yesaya 26:20) Nga gu wene regbo ka sambuo Yekova zanga gunde! Nirengo, pa sungo yo nipidi gu zubohe nga ga Gogo ima mbeda ka manga, abanga gunde tiyo te. Kuba gure, si nasa yo i kiisi gayo motumo nga ga sambuohe kuti gu bakioho rengbe na omeyo.—Atambuahe 146:2.

¹⁸ Gi ngangara berã re niyuguyuguhe wenengai be dungu akutu aparanga rogo zegino dunduko, nga aguyo tona gu sunge nga ga tungusapai ti aregbo dunduko. Tipa ka nyakasapa kiopa sia boro ngbatunga gu raka re, i akusi gu keke kpewaraga nga Youths—What Will You Do With Your Life? ti regbo gu kikindigi adunguratise nga ga a’uru biata namangi rogo 2002. AKristano tibarayo dunduko, nga aparanga na sosono aboro, na tambuahe tipa agu atingidapai du rogo gu kpewaraga naye ti wene regboho re.—Atambuahe 119:14, 24, 99, 119, 129, 146.

19, 20. (a) Tipagine adunga aKristano ti ni na ndupai ka gunde watadu kpotoyo yo naayungura ya? (b) Gine gu papara kekepai naye fuo gere nika mangaha?

¹⁹ Ka kina gini apai avura nimangi rogo zegino, si aidanga aKristano gunde watadu kpotoyo yo naayungura te. I ima ino gupai nga, bambeda kumbatayo, ga Yekova Kindo nika dia zuũ adia kusayo rogo angbatungaha dunduko bara sa na nyeanye kindi. I nagbia wasa a be ino gupai nga, zingabekpio akaraga gu dungu aboro akaraga berewe kurogo unga nakpiki rogo zuũ. Baraho zingabekpio nika fu bambata mamu ni fu kura aboro i wirikipai tipa Yekova, si asa kura aboro tigayo i naandu kindi kumbatayo rogo gayo sunge i akpara tiyo tipa mangaha fuko.—Amokedi 24:15.

²⁰ Nindikidi aKristano, ani na tambuahe tipa ka nye kuti gaani kparatise nga ga aKristano kusayo ti agu apai nga ga birĩ zogarago na ki diberã ka nye wo kindi. Ani naida ka zio tirani kuti gu maabangirise nga ga ‘ru zaa ka bi wai Yekova nika batasa rani.’ Gu papara kekepai naye fuo gere re nika nyakasa gaani idapase wa si ka sa rani ani rugutirani na pa agu apai namanga areme tooni tooni nga gu nafu kura rugatinapai kuti gu digisidigisi sangbaanebi nga ga Ziazia Kekeapai.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Tipagine du dungu aboro ti ni areme na maabangirise tipa kina gbegbereapai?

• Tipagine du aDezire Yekova ti ni na maabangirise tipa weneapai kumbatayo?

• Ginipai Yekova naima mangaha tipa tarã gupai naye na zuũ?

• Tipagine adunga ndupai ti ni ho tipa ani gunde be ga Gogo zubohe ya?

[Gu kpiahe du ti kpewaraga 22 aye be]

UN PHOTO 186226/M. Grafman

[Gu kpiahe du ti kpewaraga 23]

Yesu amoi wene kpiapai nga ga gu kparatise nga ga aKristano kusayo ti agu apai nga ga birĩ zogarago

[Gu kpiahe du ti kpewaraga 26]

Dungu kutu aparanga nga aDezire ima dia gu sunge kubeyo na ngbarago nga ga tungusapai ti aregbo dunduko