Oni Ruaru Zaa Ka Bi Wai Yekova Nika Batasa Roni!
“Oni ríngbisi ti roni, oni ki ru aru zaa, ka bi gu diabese nga ga Yekova du tipa roni.”—2 PEKAPAI 20:17.
1, 2. Tipagine du gu zubohe ti ni nga ga ‘Gogo nga boro gu ringara nga Magogo,’ na bakere sangbanaha susi gu zubohe rengbe abamoi ka mangaha rogo dungu aringara rogo zegino?
GU KURA aboro naringbisapa ga abamoi vura ya si nga zubo agu abadona nga ga aboro du rogo zegino dunduko, watadu gbarasapa kina boro sona kumbatayo rogo raka nitihe. A wa rengbe oni ka ruga tironi nani, si naida i bipa ngbatunga gu gundesi aboro re ninyanyakipa pai. Ngba kura gene, gu kura zubo aboro kinaho nga gu gbere sangbanaha kisusi nga gu aboro zegino amaabangiriyo fuoho gbua tooni watadu i aberãnga paha ya. Gine du ngaha?
2 Si nga gu zubohe nga ga ‘Gogo nga boro gu ringara nga Magogo,’ nga gu Ziazia Kekeapai afura tipaha rogo Yezekere kapita 38. Ya mo durugopai du ngaha ka ya, gi zubohe re si kii kisusi gu zubohe nga ga abamoi rogo dungu aringara rogo zegino? Wagusa te, mbiko ga Gogo zubohe adiganga kina kuti zubo gu zogarago nga ga aboro sa te. Ko nati na vura a kina boro kurii gu zogarago nga ga Mbori du ngbangbaturũ yo! Ono tie, nizanga du Bakusiahe wa aboro, nga aguyo rengbe ka du gbua na kina wiri tooni diabese ho i azubo yo ni, ko tigako na ome tiko ka sovura wenengai kuti ga Gogo kere zubohe.
Zubo ga Mbori Zogarago
3. Gine i ayambu agu abazogo nga ga zegino yo i mangihe natona rogo 1914, na wai i akaragapai sani?
3 Gu vura du dagba gu ga Mbori Bakindo nazogarago awere na ga Satana gbegbere zegino aima digo nimangi natona kinaho i asigira ga Mbori Kindo ni ngbangbaturũ yo rogo gu garã nangia 1914. Ti gu regbo re, i atingidi abazogo na gupai nga i ra fu gu Bazogo Mbori nasia ko. Ono i aka aka ka mangaha wo, a wa nebi aima gumbaha kumbatayo ya wo si ka manga: “Abakindo zegino natangara tiyo, abazogo aboro ki ta bura dagba yo, kuti Yekova na gako mbedimbedi boro niya, ‘Ani káfu gayo gire akafa kpa, ki bafu gayo ũrugapai ti rani ku sa yo.’ ” (Atambuahe 2:1-3) Si tie nga, gu sogote du aboro nani kuti gu zogarago nga ga Kindo ada ziazia ti digidoho ho Gogo nga boro gu ringara nga Magogo nika zubo gu Kindo ni re.
4, 5. Waigu rengbe aboro ka sovura kuti ga Mbori zogarago du ngbangbaturũ yo ka i abinga ha nibangirise ya?
4 Si rengbe ka iriwo bangirani wai rengbe aboro ka sovura kuti gu zogarago nga ga ngbangbaturũ i abinga ha nibangirise ya. Ziazia Kekeapai nafura tipa gi zogarago re ya agu abazogo du rogoho bangeyo nga “144,000 . . . nga agu yo i atumo yo rogo kpotosende” kodihe kuti “Wiri Kandoro,” nga Yesu Kristo. (Yugoti 14:1, 3; Yoane 1:29) Mbiko wa du gi vovo zogarago re ngbangbaturũ yo, si du i ayambaha ti ni nga “vovo ngbangbaturũ,” na ruhe aru a wa i ayamba gaha azogo auru kpotosende ni “vovo kpotosende.” (Yesaya 65:17; 2 Petero 3:13) Bakere bange agu aboro nika zogarago na Kristo du bangeyo nga 144,000 aima nyasa gu gayo asunge nga ga kpotosende ngba ruru gene. Nimanga yo ho were, i ayugu gupai nani nga, i ima rẽ tipa ka manga gu vovo sunge fu yo ho fuyo ngbangbaturũ yo.
5 Ono tie, tooni yangara yo dagba gu bangeyo nga 144,000, naraka kindi auru kpotosende. Dagba agu aboro nadu pati Ga Gbia Riahe Nga ga Nyemu rogo 2002 bangeyo asusi 15,000,000, kina 8,760 aboro gbua nayugu gupai nga i na maabangirise ka ndu tipa gi sunge re ku ngbangbaturũ yo. Gu boro ngbaduni nika wi ni kini idi ka zubo gi yangara aboro namaabangiriyo ka duni abazogo rogo gu Kindo re, gure nirengo nga, ni nati na vura kurii ga Mbori Kindo.—Yugoti 12:17.
Bakindo Nanyasa na Gako Vura Nga ga Diabese
6. Waigu Yekova gbiati Kristo abi gu sogote aboro asogote gayo aboro nani?
6 I aima fura tipa ga Yekova mangapai kuti gu sogote aboro asogote gako Kindo nani ki ya: “Gu ko sungu ngbangbaturũ yo ko amóma amoma; Yekova amáa yo i du adu bamongo. Ko ki gumba pai fu yo ni kina gako zinga, ki nifudi yo ni gako bakere erã, niya, ‘Mi moi gi bakindo ku ri gi kparakpara ziazia bagangara nga Siona.’ ” (Atambuahe 2:4-6) Regbo ima da awere fu Kristo, ko di arugute be Yekova, ‘ka nyasa na gako vura nga ga diabese.’ (Yugoti 6:2) Waigu Yekova abi gu sogote aboro asogote gako aboro nani ti gi regbo nga ga yangara vura nga ga diabese re? Ko nabihe wa kina boro ko i asoga ko kodihe na gu gako Bakindo nazogarago. Yekova nayaa: ‘Gu boro nazada roni, ni nazada zende bangire.’ (Zekaraya 2:8) Na Yesu anyakasi gupai a nga, agu apai aboro amangaha watadu i akpa ti mangaha fu agu awirinako du nimbedimbediyo, si wa i namangaha watadu i kpa ti mangaha fu kina boro ko.—Matayo 25:40, 45.
7. Tipagine Gogo asoga gu “bakere rimbasa aboro” ti ni gumba yo payo rogo Yugoti 7:9?
7 Rengo ngaha nga, agu aboro nasongoda yangara mbedimbedi aKristano agbia tiyo agbia a na gu zinga nga ga Gogo. Agi aboro namaabangiriyo ka duni ga Mbori “vovo kpotosende” re, i nga “bakere rimbasa aboro” nga aguyo i ka yambu yo “dagba rika aboro dunduko, na angbatunga yo, na aboro, na angbatunga afugo dunduko.” (Yugoti 7:9) I nafura tipa yo ya i ‘rundu barangba mbatabakindo, na barangba Wiri Kandoro, ni ukadiukadi yo nipusi remu.’ Padu yo were nayugo gupai nga, i gigirii barabangiri Mbori na barabangiri Kristo. Pa zada yo ‘akpe mbiro beyo’ nayugo gupai nga, i nataasarimo Yekova nigu Bakerepa Bakindo rẽ ka zoga zegino dunduko, nga guko du gako zogarago niyuguyuguhe tiibe gu gako Bakindo ko asia ko nga “ga Mbori Wiri kandoro” nga Yesu Kristo.—Yoane 1:29, 36.
8. Gine gu zubohe nga ga Gogo nika sa Kristo ko mangihe, na si aduna gini sangbanaha?
8 Gu zubohe Gogo ka guari nani nika sa gu Bakindo sia Mbori ko, ko guari ka so gu vura nga ga Aramegido. (Yugoti 16:14, 16) Agu aboro ká, ka ida na pa ga Yekova bakere pagbia, i nga agu aboro i ka gbarasa yo. Ngba kura gene, agu aboro hi agberangbii tipa zio yo tiyo kuti ga Mbori Kindo nika gbia nyenye zereda tigayo. Gu mokedi nangia Pauro akepai tipa gipai re ki ya: “Si nga dezire ga Mbori ruru sapangbanga; ya i bi roni oni re na ga Mbori ngbi, nga gu oni nahi pai tipa ha a. Bambiko Mbori amanga kina rurupai, ko afú gberãngbi ni mosoro fu agu yo namanga roni, na ongoda fu agu roni i namanga roni na ani, rago yugo Gbia Yesu ngbangbaturũ yo na amaraika gako tandu ni mirã we. Ko aíra bape fu agu yo aina nga Mbori ya, na agu yo agia nga sangba wene pangbanga nga ga gaani Gbia Yesu ya.”—2 ATesaroniko 1:5-8.
9, 10. (a) Waigu Yekova asa aYuda i dibe agu avurayo nadu na bakere ome badia beyo adunga ti ni ya? (b) Ginipai si aida aKristano areme nye kuti mangaha?
9 Ti regbo gu bakere gberangbii naye, nga gu nika digo rogo Aramegido, Kristo nika sovura kuti ngbatunga gbegbereapai dunduko. Ono si aidanga apefuo ko sovura te, a wa si aidanga ha fu agu aboro nadu rogo gu Kindo nangia ga angbatunga ue rogo ringara aYuda mbata fu agarã 2,900 bakuru kusayo so vura ya. Gu vura re angia ga Yekova, sidu ko ki sa aYuda i dibe avurayo. Ani nageda keke pangbanga gu vura re wa gere: “Yekova . . . [a]ringbisi pa runguru kuti aAmono, na kuti aMoabo na kuti aboro Bagangara Seira a, nga agu yo naye kuti aYudo, i ki du ni mangimangi yo. Bambiko aAmono na aMoabo azingi kuti agu aboro ninaraka Bagangara Seira yo, ka gbarasa yo kpakaya. Ho i adigisi pa nyasa agu aboro ni nanaraka Seira yo, aboro ni ba sa sa ki niimi kina akura yo. Ho aYudo abiti ni ku ngbaho ga ababandarago bambu yo naadu ngbakungba yo, i ki ngere koyo du rimbasa ni; i ki bi yo, i dunduko ki du ni kina kangba aboro napiki sande; a nga gu ni sa nabati te.”—2 Pekapai 20:22-24.
10 Si amangi teketeke a wa Yekova agumbaha ya si amanga: “Oni asó nga gi vura te re.” (2 Pekapai 20:17) Gipai namangi re, nga kpiapai fu aKristano i mangihe a wo ho Yesu Kristo nika guari ni ‘ka nyasa na gako vura nga ga diabese.’ Vuru gi regbo tie re, aKristano nandu kindi kumbatayo kaa sovura kuti gbegbereapai, angianga na ndikidi aũvura ya, ono na agu aũvura nga ga toro. Nimanga yo ho were, i kini ‘dibe gbegberẽpai na wenepai.’—ARomo 6:13; 12:17-21; 13:12; 2 AKorindo 10:3-5.
Da Nika Ngbembatayo Tipa gu Zubohe Nga ga Gogo?
11. (a) Gini aboro Gogo nika mangasunge rogo yo yo ka zubo aboro? (b) Ginipai rogo gu fugo yo ayugoho nga, kaa ngera angera kindi rogo toroyo?
11 Gogo nga boro Magogo, nga gu rimo i afuhe fu Satana Bakitingbanga fuo payasi yo pako tona rogo gu garã nangia 1914. Mbiko wa du ko nga toro, ko arengbanga ka zubo aboro ngburungburu te, ono ko nika mangasunge na gako aboro i mangi agu apai ko akpinyemuhe. Ada nikangia gi gako aboro ko ka mangasunge na yo re? Ziazia Kekeapai afunga futufutuapai tipa yo te, ono si nafu gu kura mboimboi apai afu nga gu naundo rani ani ini ada nikangia yo. Wa agu apai du rogo zegino amanga ku sangba agu anebi yo nga ga Ziazia Kekeapai yo, ani nikaa bi gipai re abi tooni tooni ziazia si nizaki. Ga Yekova aboro nane gumba kungbo aberã ono i nanye kindi kaa ngera angera rogo toroyo, kini kparia agu apai nga ga birĩ zogarago nga gu namanga na gu nga ga pambori wa si adigo ku sangba agu anebi yo nga ga Ziazia Kekeapai yo.
12, 13. Wai gu nebi nangia Daniere afura kumbatayo tipa yangara zubohe kuti ga Mbori aboro?
12 Fugo gu nebi nangia Daniere nakusa gu kura apai tipa gu yangara zubohe i ka zubo ga Mbori aboro nani kini ya: “Ko [nga gu Bakindo nga ga nodiyo] akúra na bakere ngariangaria zinga ka nyasa dungu aboro ki gbarasi yo kpakaya. Ko ki dua gako iiriwo bamburoko dagba baime na wene kparakpara ziazia bagangara.”—Daniere 11:44, 45.
13 Kuti gu giarogopai nga ga Ziazia Kekeapai, gu “baime” re nga Mediterena, na gu “ziazia bagangara” re, angia Siona, nga gu Yekova aya tipaha wee: “Mi moi gi bakindo ku ri gi kparakpara ziazia bagangara nga Siona.” (Atambuahe 2:6; Yosua 1:4) Si ki ta du were, rogo gu bipai nga ga toro, gu rago du dagba “baime na wene kparakpara ziazia bagangara,” narukuba gu wene mangaapai nga ga toro nga gu mbedimbedi aKristano agbaragaha rogo zegino. I aima mbu gu mangaapai nga ga agu aboro nyaga tiyo kusayo ti Mbori nga aguyo baime arukuba yo, ono i namaabangiriyo kumbatayo tipa ka zogarago na Kristo Yesu rogo gu Kindo nga ga ngbangbaturũ. Si tie ziazia nga, gu bakindo nga ga nodiyo, ho ko ka guari ni na gako vura nidigisidigisi sangba gu nebi nangia Daniere, agu aboro ko ka zubo yo rogo gu gako vura re, angia ga Mbori mbedimbedi amoyambu, kodihe na agu abadiangbayo nga bakere rimbasa aboro nga agu aboro nazitiyo kutiyo.—Yesaya 57:20; AEbere 12:22; Yugoti 14:1.
Ginipai ga Mbori Amoyambu Nika Mangaha?
14. Gini apai biata ga Mbori aboro nika mangaha ho i ka zubo yo ni?
14 Ginipai i aberã ya si ga Mbori aboro nika mangaha nibasa fuo zubo Gogo yo? Berewe, kina gupai ga Mbori aboro amangihe rogo agu a’uru nangia ga Yosafata nga kpiapai fuyo. Oni kparia gupai nga, i azinahe fu agu aboro re i mangi apai biata: (1) i rundu rogo gayo aba, (2) ki ru zaa na (3) ki bi wai Yekova nika batasa yo. Wai ga Mbori aboro nika mangapai areme ringbisihe kuti gipai re?—2 Pekapai 20:17.
15. Gupai nga, si naida ga Yekova aboro rundu rogo abayo, rogoyo nga gine?
15 I rundu rogo gayo aba: Zanga wo kubani na kubani, ga Mbori aboro nika nye kindi kina kuti gu gayo ba nga ga songoda ga Mbori Kindo. I nika nye kindi kuti gu gayo sino nga ga aKristano nga kparatise kusayo ti agu apai nga ga birĩ zogarago. I nika ‘ru nyanyakii, zanga wo’ rogo gayo sunge fu Yekova na i nikaa ndu kumbatayo kindi kaa taasarimo Yekova tipa gako weneringise nga ga nyemuse. (1 AKorindo 15:58; Atambuahe 118:28, 29) Anga agu apai nasosoda yo awere watadu gu nika sosoda yo kumbatayo awo tiyo rogo gi bayo Mbori naima ida paha i ru rogoho re te.
16. Rogo gini agene ga Yekova amoyambu nika ru zaa?
16 Ki ru zaa: Ga Yekova amoyambu a’asadanga ka batasa tiyo be gi vura re te, ono i amaa gayo kido naabaha dunduko kina kuti Yekova. Kina ko sa rengbe ka batasa gako amoyambu be gu vunduvunduapai du rogo gi zegino re, na ko aima kidohe ya ko nika mangaha amanga wo. (Yesaya 43:10, 11; 54:15; Abia Kpenunga 3:26) Pa kido ani kuti Yekova akoda pa kido ani kuti gu riigbu du awere i abihe abi nga gu riigbu ko aima digo nimangisunge nani ziazia tipa dungu agarã si naamanga gako ringbisapai. Susi gu nidu mbata, si aida ndikidi aKristano moi gayo kido kuti agu akurayo airisimbori, Yekova gbiati gako Bakindo na’asia yo i ngbembatayo rogo apai. Gi ruru akumba re nika yugo gene fu ga Mbori aboro. Pa basa boro gayo arugute rengbe ka ndu na boro sa gberango.—Matayo 24:45-47; AEbere 13:7, 17.
17. Tipagine Mbori nika batasa gako ruru amoyambu ti ni?
17 Ki bi wai Yekova nika batasa yo: Gu mosoro Yekova nika fuhe fu agu aboro dunduko nye kuti gu gayo ba nga ga kakuti gu ruru mangapai nga ga aKristano na nakido kubeko tipa undo, si nga ka batasa yo. Niyangaraha, na kuti gu giarogopai nika du beyo ti gu regbo re, i nika takapande pa da ga Yekova uru sapangbangaa. Si aida aboro ini gupai rogo zegino dunduko nga, Yekova nga ndikidi Mbori na gupai a nga, ko na ruru amoyambu beko herẽ auru kpotosende. Ndupai adunga ho berewe tipa gbangagbanga akango riipa du Yekova na rengo beko ka duna bakere pagbia te.—Yezekere 33:33; 36:23.
18, 19. (a) Waigu gu bia diabese du rogo Gate kapita 15 ayugo gu berã nika du ti agu aboro nika bata be ga Gogo zubohe? (b) Gine daada fu ga Mbori aboro i mangihe awere?
18 Fuo i gbia vovo ome berewe, ga Mbori aboro arimo kurogo vovo zegino, ki duna kakaka nyemu ka bi gu bia nga ga diabese, a wa agu aYisaraere nadu bakuru kusayo amangihe fuo batasa Mbori yo bangiri Zamba Baime. Fuo du yo na nyenye tambuahe tipa ga Yekova bandahe, aboro nibasasa na wa badona, agumba agu afugo i agumbaha bakuru kusayo nga gu nayaa: “Mi abí bia fu Yekova, bambiko ko nadi be pai ni taasitaasi rimoko; . . . Yekova nga boro sovura; rimoko nga Yekova. . . . Ako Yekova, kumbabero du ni taasitaasi he rogo tandu, Ako Yekova, kumbabero nakuadi avurarani rukutu. Mo nadia be agu yo nasa mungu kuti ro ni gu babakere he nga ga taarimoro; mo nakeda ga nzengerenzengere zinga, si ki riti yo arita wa nzinga. . . . Mo angbe ku mbata yo fu agu aboro nga agu yo mo atumo yo ni ga inapai, mo agasi yo ku rogo ga kparakpara ziazia baraka ni ga ome. . . . Mo ayé na yo, ki rũ yo ri gamo bagangara. Ako Yekova, si nga gu rago, mo ambakadi tipa ro tigamo ka raka rogo ho, Ako Yekova, si nga gu kparakpara ba, mo anyakasi he ni bero. Yekova azóga rago nye anye kindi.”—Gate 15:1-19.
19 Fuo du ani awere tie nga ga Mbori aboro na maabangirise ziazia tipa nyenye unga susi gu ani adu nani mbata, nangbaa ino gupai nga, ani na mamu berani ka kakuti Yekova na ki zambuasi gaani diaberã ka zio tirani kuti mangasunge fuko na kini bi ko ni gaani nyenye Bakindo!—1 Pekapai 29:11-13.
Oni Rengbe ka Sakarogoyo?
• Tipagine Gogo nika zubo mbedimbedi aKristano gbiati kura avusende ti ni?
• Waigu ga Mbori aboro nika runda rogo gayo aba?
• Pa ru ga Mbori aboro zaa nayugo ginipai?
• Waigu ga Yekova aboro nika bi wai Yekova nika batasa yo?
[Gu kpiahe du ti kpewaraga 28]
Yekova afu diabese fu Yosafata na avuruko, ka si aidanga i sovura ya
[Gu kpiahe du ti kpewaraga 30]
Mbedimbedi aKristano gbiati kura avusende nakoda beyo ka songoda ga Yekova bakere pagbia
[Gu kpiahe du ti kpewaraga 31]
Wa kina agu aYisaraere nadu bakuru kusayo, ga Mbori aboro nika bi bia diabese bambeda kumbatayo