“Si Ahiisi gu Kungbo Ba Nadu Ngbadureyo”
“MI NAFU tambuahe fu roni na ngbadureyo dunduko tipa gu bawene gamahe nga gu buku nga, ‘Draw Close to Jehovah.’ Si ahiisi gu kungbo ba nadu ngbadureyo, nga gu zingo mi adu nani ka ino gupai nga Yekova nakpinyemu re akpi na kini ngere fuo re. Mi nabi tire nga mi ima mbeda na Yekova gbiati kikiipa Wiriko kisusi awere. Mi naida ka fura tipa gi buku re fu aboro dunduko na ka fuka awirinaha fu abadiangbare dunduko.” Wogu Dezire Yekova sa afura tipa gu vovo buku duna akpewaraga rogoho 320 nga gu i akusihe ti regbo gu Kikindigi ADunguratise Nga ga A’uru Biata riihe angia “Ngangara Atakipande Kindo” namangi rogo 2002 na rogo 2003. Ani wisiginga bete apapara gi buku re na ka bi ndu gupai i akusihe ti ni.
Bete Apapara gu Vovo Buku Re
Gine du rogo gi vovo buku re? Si na agu apai rogoho du rogo agi apapara kekeapai ue du tipa wisigoho rogo gi magazini re, gbiati gu dungu akuraha a! Gu buku re na akapita rogoho 31, du bagizoho nibasasa wa kina agu apapara Ngbaõbambu Sinziri du tipa wisigoho. Fuo gu tonatona fugo du rogo gu buku re, na gu bambata akapita du biata, i kparaka gu buku re kurogo apaparaha biama, gu sa tipa bangua sino Yekova sa. Agu apaparaha re nibasasa natona na gurisigurisipai tipa gu sino re. Gu bete akapita naye fuoho nasakapai tipa wai Yekova ayugo gu sino re. Agu apaparaha re nibasasa na kapita rogoho sa nafura tipa Yesu. Tipagine mangi yo ho ti ni wo? Oni gi nduhe, Yesu ayaa: “Gu ni bi re ni bi Buba.” (Yoane 14:9) Wa duhe nga Yesu anayugo asino Yekova nirengberengbehe, ko nga gu boro rengbe ani ka bi asino Yekova ti vuroko zukazuka tingba sunge. Agu apaparaha nibasasa re nadigo na gu kapita nayugopai fu rani tipa wai ka wirika Yekova niyugo ani gu sino si asakapai tipaha re. Wa gi vovo buku re asakapai riipa asino Yekova, si nayugobaraapai kurogo agu abuku dunduko nga ga Ziazia Kekeapai.
Gi buku nga Draw Close to Jehovah re na kura kparakparaapai a rogoho. Tona ti kapita 2, akapita nibasasa duna asanduki rogoho du riihe nga, “Asanahe Tipa Berãkuriihe.” I afunga agu averesi du rogoho gbiati agu asanahe du pati ni re nifugöpai nga ga gu kapita re te. Kuba gure, i ambakadihe tipa si undo rani ani mangisunge na Ziazia Kekeapai ka berã dudunguroo kurii gupai saki yo ho re. Gu rugute fu yo ho tipaha nga si naida ani gedi agu averesi nibasasa fu yo ho re wenengai. Fuo gure, oni berẽkurii gu sanahe re na ki mangi nyanyaki asadatise ka manga sangbaha rogo gaoni raka. Ngbatunga gu berãkuriipai re rengbe ka fõngbaduroniyo, kini undo roni oni mbedi koyo du Yekova ni susi gu nidu mbata.—Atambuahe 19:14.
I aima wetekapai wenengai tipa gu kpiaahe du rogo gi buku nga Draw Close to Jehovah re tipa si yugupai fu roni na ka fõngbaduroniyo. Akapita ho 17 duna kpiaahe rogoho nahiiso kpewaraga naabaha nga gu nayugo agu arago du paha rogo Ziazia Kekeapai.
Ndu Kusaha Nangia Gine?
Ndu kusa gu buku nga Draw Close to Jehovah re nangia gine? Gu bambata ndupai i akusi gu buku ti ni re angia ka undo rani ani ye ka ino Yekova wenengai gbe tipa wa ka ani, wa du ani nibasasa, rengbe ka sonosa nyanyaki pagume dagbarani na ko nga gaani Mbori.
Ya mo boro ho rengbe oni ka berã pani rengbe ka gbia undo be gi buku nga Draw Close to Jehovah re, isoke gu boro oni awisigo Ziazia Kekeapai na ni watadu gu wirina nga Kristano naima mbu sunge tungusapai? Ginipai tipa roni, oni ima tona ka geda gi vovo buku re? Ka si adunga wo ya, tipagine ka oni aringbisanga regbo ti ni ka tonaha niipo ya? Oni di regbo ka berãkurii gupai oni agedaha. Gi vovo buku re undongo roni oni mbedi na Yekova Mbori susi gu nidu mbata, tipa wa ka oni aatakapande gu wene pangbangaa nga ga gako Kindo na bakere ngbarago na kini mangihe zaaza!