Oni Sa Yekova Nigu Boro Oni Akido Kuti Ko

“Mo nga gi maabangirise, Ako Yekova, mo nga gu ko mi atona kida kuti ro mi du ni parangare”—ATAMBUAHE 71:5.

1. Gini fudifudiapai gu paranga babanda avusende nangia Davide agbiatiko ti ni?

GORIATA aru bagizoko ki susi ametere biata. Si airiwonga te, si du agu abanzengere dunduko nadu ti agu atenge nga ga vura aagunde agunde ti ni ka zubo ko! Gu ngburunga Fereseto re anasawia aYisaraere rogo awiso dunduko na rogo anyemu dunduko, na rogo aposo dunduko ya i kedi gayo bangbasia basovura fuo ko, ko sovura na ni. Niyangaraha tie, boro aidi ka ndu ka sovura na ko, gi boro re angianga banzengere te, ono ko angia kungbo tooni gude gbua. Rimo gi gude re angia Davide, nibabanda avusende kingia wiri tooni gude gbua ringbisihe kuti gi gbuguzu kumba ko andu ka sovura na ko re. Oni ngere, barõa gu gude re avura du kusende ti barõa ga Goriata vurakube gbiati gako aũvura! Wa si avura du wo, gi gude re andu ka sovura na gi ngburunga kumba re na ki da nigu boro i aino ko kindi tipa gako wingbaduse.—1 Samuere 17:1-51.

2, 3. (a) Tipagine Davide arengbe ti ni ka zubo Goriata ki duna nyanyaki kido wa gure? (b) Gini apai ue ani ka sakapai tipaha tipa ka sa Yekova nigu boro ani akido kuti ni?

² Gine nafu ngbatunga gu wingbaduse re fu Davide? Oni wisiginga bete agu afugo duhe ziazia nga Davide nakekehe kusa rogo gako raka: “Mo nga gi maabangirise, Ako Yekova, mo nga gu ko mi atona kida kuti ro mi du ni parangare.” (Atambuahe 71:5) Ii, niparanga, Davide aima digo nikido kuti Yekova zanga kapa. Ho ko aadusia Goriata ni na vura, ko ayaa: “Mo naye sa re na basape na baso na bagbiagene; ono mi tigimi naye sa ro ni rimo Yekova nga ga arimbasa ko, gu Mbori nga ga agu arimbasa aborovura nga ga aYisaraere yo, nga gu ko mo napayasi pa ko.” (1 Samuere 17:45) Baraho Goriata aakido ni kuti gako bakere ome na kuti gako aũvura, Davide akido tigako kuti Yekova. Fuo du Bakerepa Bakindo zegino nigu boro naasongoda Davide, tipagine tigu ka ko agunde ti ni be kungbo boro, ka ni vura kio na ki vura duna wene aũvura beni vurũ?

³ Wa oni naagedapai tipa Davide, oni niberãnga ku kpotoroniyo nga, akoo so ka gaoni kido kuti Yekova ninyakinga wa ga Davide? Si nawira wo dungu rani aberã nirengo. Sidu tie, ani wisiginga apai ue nga gu si aida ani mangihe tipa ka sa Yekova nigu boro ani ka kido kuti ni. Bambatapai nga, si naida ani dibe gupai ninaakiso gene be aboro tipa i zanga duna ngbatunga gu kido re na fuo gbia ani gu kido re, si naida ani nye kuti ni. Uepai nga, si naida ani wiriki kina boro gupai nzunzu nakodapa kido boro kuti Yekova.

Diabe Gupai Ninaakiso Gene Dedede be Aboro Tipa I Zanga Duna Kido Kuti Yekova

4, 5. Tipagine dungu aboro abihe ti ni nimbumbupai ka duna kido kuti Mbori?

⁴ Gine ninaakiso gene be aboro tipa ka i kidonga kuti Mbori ya? Dedede, rii bete aboro yo navundo ka i aruganga tiyo na ndu gupai gbegbereapai amanga ti ni ya. Dungu aboro i ayugu gupai fuyo nga Mbori du nasa gbegbereapai si naamanga. Ho gberango ati ni kurii aboro, abarumbatayo rogo pambori rengbe ka ya Mbori du “rogo” agu aboro kpiki re tipa i du na ko ngbangbaturũ yo. Kurii gure, dungu abarumbatayo rogo pambori nayugopai ya Mbori aima ringbisapa agu apai nika manga kumbatayo bakuru kusayo, kodihe na agu agberango dunduko namanga aboro gbiati gu gbegbereapai dunduko namanga rogo gi zegino re. Fuo du aboro na ngbatunga agi aberã re tipa Mbori, si fuyo nikpakarakpakarapai tipa i duna kido kuti ngbatunga gu sakparakpa Mbori namanga agu apai re. Satana du nga gu boro navurasi bangiri agu aboro angianga aidipase ya, na duna kakaka nyemu ka urugo ngbatunga “gu yugopai nga ga adaimona” re.—1 Timoteo 4:1; 2 AKorindo 4:4.

⁵ Satana naida ka sa aboro ka i dunga na kido kuti Yekova ya. Gu vura Mbori re aidanga ani ini boro ndikidi gu nduapai naye na arungo fu aboro te. Na ka si du nga ani aima ino gu nduapai rogo Ziazia Kekeapai aboro arungo ti ni, gupai Satana aidaha nga ka sa rani bangirani go ti ni. Sidu tie, si niwenepai fu rani ti kura aregbo ani fugu gu bambata nduapai biata du rungo ti ni rogo zegino. Nimanga ani he wo, ani rengbe ka ida gupai nga, anga Yekova nga gu boro fudifudiapai aye beko ka fuda rani rogo zegino te.—AFiripoio 1:9, 10.

6. Wai 1 Petero 5:8 ayugo ndupai sa aboro arungo ti ni?

⁶ Bambata ndupai dagba agu akuraha aboro arungo ti ni nga, Satana naida ka sa ga Yekova ruru aboro i mbu kakuti gayo ruru mangapai. Ko a’asadi ka sa Eyobo ko mbu kakuti gako ruru mangaapai. Satana adunga na diabese kuti Eyobo te, ono ko ambunga asada tiko ka nanga aboro te. Nidu Satana nibazogo gi zegino re, ko nagbata gene ka “rita” ga Yekova ruru amoyambu. (1 Petero 5:8) Ani dunduko ko agbata rani wa du ani nibasasa! Satana naida ka sa rani ani mbu mangasunge fu Yekova. Si du ko akusa arungosi ti ni dedede. Wa vura duhe nga agu arungosi re ni iimihe, ani na wene ndupai berani ka hihe. Nimanga ani he wo, ani nasa Satana ni iraziree, si ki ta du were, ani kini fu ngbarago fu Yekova. (Eyobo 2:4; Asanza 27:11) Wa Yekova anyakasa rani ani hi arungosi, gaani kido kuti ko nakio.—Atambuahe 9:9, 10.

7. Gine AGaratio 6:7 aundo rani ani inihe ni ndu gupai aboro arungo ti ni?

⁷ Ani nabi ue ndupai du rungo ti ni dagba aboro rogo gi rugute adunga ngburungburu re ya: “Gu he rũ boro kina ha ke ni a.” (AGaratio 6:7) Ti kura aregbo, aboro narũ ahe nisia yo gbegbereapai ka mangaha na kini ke rungo nisangbana gi gbegbere mangimangiapai re. I rengbe ka sia gupai nga ka kama tarambiri ninzangaa, sangbanaha kingia béno. Dungu aboro nasia gupai nga ka vugundö, nga gu nandu na yo sa agu akaza nga ga bagunda watadu ga pusa. Agu aboro tigayo nasia wasiwasi kodaba narungo be gbegbere ramukporo nga gu naye mbiko gi gayo wasiro re, be zanga irisa boro tini, be agu akaza aboro adiaha be kodaba, na agu amobara airaha aidanga nani ya. Fuo agi arungosi re kuru sa aboro, i rengbe ka bira Mbori ti ni, ono si nzunzu nga, i narungo mbiko gayo gbegbere mangimangiapai.—Asanza 19:3.

8. Kuti Batungusipai 9:11, gine aboro arungo ti ni?

⁸ I gumbapa gu biata ndupai tipa gu rungo namanga aboro rogo Batungusipai 9:11: “Mi abi kura pai tii uru no berewe, nga mosoro ho fu gu ni naora ni ipo te, watadu susa na vura fu nyanyaki boro a te, riahe ho fu iratatamana a te, akumuko fu aboro rugatinapai a te, irisa fu tatamana[tatamana] aboro a te; ono rago gbia kuti mamu namanga fu yo dũ.” Ti kura aregbo, gupai ninaamanga gbua nga aboro nidu rogo gu ba angbanga ya na ti gu regbo angbanga a ya. Zanga bipa agu apai du ome mangaha tirani watadu agu apai rungbura ani rogoho, ima kpotose gbiati kpio rengbe ka tunguo rani dunduko ti aregbo dunduko. Nikpiapai, ti rago Yesu, ngbaõbambu ati kurii aboro 18 Yerusarema yo na ki imi yo. Yesu aya wee anga si angia mbusa be Mbori tipa ingaapai i amangihe mbata te. (Ruka 13:4) Oó, si aidanga i bira Yekova tipa ngbatunga agu arungo re te.

9. Gine dungu aboro agianga rogoyo ya nibipa gu rungo namanga aboro?

⁹ Pa gia ani rogo ndu agu apai aboro arungo ti ni na nyanyakipaha. Ono tie, gu kura papara gipai re kina ti ni du nikpakarakpakaraha fu dungu aboro i girogoyo. Si nga wee: Tipagine Yekova Mbori ambugene ti ni fu rungo si nimangi aboro?

Tipagine Yekova Ambugene ti ni fu Rungo Si Nimangi Aboro?

10, 11. (a) Kuti ARomo 8:19-22, gine namangi “ũzegino dũ”? (b) Wai rengbe ani ka ino gu boro namoi ũzegino kurogo kungboapai?

¹⁰ Papara gu waraga gu mokedi nangia Pauro akehe fu aRomo nasakarogo gi nyanyakipa pai re. Pauro akepai ki yaa: “Ũzegino nangera kakaka nisungudi yugo awiri Mbori Bambiko ũzegino adu tii kungba pai, si akpi nga nyemu he te, kina mbiko gu ko nafu he ku tii he, nimoi bangirise ya i batasi ũzegino tigaha a be du ni ga zirã kanga sa kura gu taarimo nga ga [duni] awiri Mbori. Bambiko ani ini aina ya ũzegino dũ mongo niukaga omehe nimbu be ima kina ku awere.”—ARomo 8:19-22.

¹¹ Tipa ani rengbe ka giarogo agi averesi re, si naida ani girogo kura bangua asanahe mbata. Nikpiapai, Da namoi ũzegino kurogo kungboapai? Bete aboro aya Satana du, gu kurayo ki ya tigayo Adamu du. Ono wa du yo tibarayo ue re, anga guni ho narengbe ka maa ũzegino kurogo kungboapai te. Tipagine adunga ha ti ni wo ya? Bambiko gu boro namoi ũzegino kurogo kungboapai, amangihe wo ki sa gi ũzegino re si ‘duna maabangirise.’ Ii, ko asa ruru aboro i duna maabangirise, nga, i ‘azaka yo azaka be gu kanga nga ga zira’ niyangaraha. Adamu na Satana arengbanga ka sa aboro i duna gu ngbatunga maabangirise re te. Kina Yekova sa narengbe ka sa aboro i du nani. Si tie ziazia nga, ko du nga gu boro namoi ũzegino kurogo kungboapai.

12. Gini vunduvunduapai nakuru nibipa giarogo gu fugo yo nga “ũzegino dũ” na wai rengbe ani ka karagapai sa gu sanahe re?

¹² Ono, gine tie nga gu “ũzegino dũ” fura yo tipaha rogo gi veresi re? Gu kura aboro naya wee gu “ũzegino dũ” re nga agu ahe dunduko du rogo zegino, kodi anyaa na kurukuru ahe. Ono ya mo anyaa gbiati kurukuru ahe na maabangirise ka gbia “gu taarimo nga ga [duni] awiri Mbori”? Oó. (2 Petero 2:12) Sidu, gi “ũzegino dũ” re, rengbe ka du sa nga kina ngbatunga aboro. Gi ũzegino re du ingapai gbiati kpio amere fuo yo mbiko gu samungu namangi Edene yo na ki sa aboro i du rogo bakere zingo tipa maabangirise ka bata.—ARomo 5:12.

13. Gine gu samungu namangi Edene yo amangihe tipa ngbatunga aboro?

¹³ Ginipai nzunzu gu samungu re amangihe tipa ngbatunga aboro? Pauro aringbisipa sangbanaha rogo bangisa fugo sa nga: kungboapai.a Kuti sangba kura buku sa, ya gi fugo re naringbisapa “gu kungboapai nga ga gu ũsunge amanganga sunge wa gu i ambakadihe tipa si mangihe ya.” I ambakadi aboro i raki nyeanye kindi, kini kodi beyo ka mangasunge wa boro sa nirengberengbe kpamiakpamia aborokporo kaa ngera fuo paradiso kpotosende. Kuba gure, i naraka gbua nikina guruhe, nigu raka hi be aima na ki duna fudifudiapai dedede. A wa Eyobo agumbaha tigako, “gu boro de avungu ni gani arame ni kina guru he gbua, ki hi ahi be fudifudipai.” (Eyobo 14:1) Si nirengo nga kungboapai!

14, 15. (a) Gini gopai nga ga ruru sarangbangaa ani abihe rogo ga Yekova sarangbangaa kuti ngbatunga aboro? (b) Tipagine Pauro aya ti ni wee i amoi ngbatunga aboro kurogo gu kungboapai i “akpi nga nyemu he” akpi ya?

¹⁴ Awere tie, ani wisiginga gu bangua sanahe nga: Tipagine “Basapungbanga zegino dunduko” amoi ngbatunga aboro ti ni kurogo gi iimi raka hi be fudifudiapai re? (Bambata Pai 18:25) Ya mo si aru aru fuko ko mangihe wo? Wenepai, ani tingidinga gupai bambata avungurani amangihe. Rogo gayo samungu kuti Mbori, i ayugu gupai nga, i angbe na Satana, nga guko nakusi bakere kango tipa ga Yekova bakere pagbia. Nigayo mangaapai, i asongodi gu kango nga, aboro rengbe arengba ka raka wenengai zanga Yekova, kini zogo tiyo na agu arugute naye be gu maraika nga basamungu. Ho Yekova aasarangbangaa ni kuti agu abasamungu re, gupai nzunzu ko amangihe nga ka fu guhe fuyo i asanahe tipaha. Ko ambu aboro i zogo tiyo nisayo tii agu arugute nga ga Satana. Fuo du apai wa ngbatunga gure tipa ngbatunga aboro, gini kura rurupai ka ngba kisusi gu nga ka maa yo kurogo kungboapai ono ki sa yo i duna maabangirise?

¹⁵ Rengo ngaha nga, anga ngbatunga aboro ‘nakpinyemuhe wo te.’ I nabatika rani ni akanga kutii ingapai na kurogo gu zira nga ga borose zanga ani duna siapai berani. Ono, mbiko ga Yekova inapai, ko ambu Adamu na Eva i raki gayo yangara raka na ki batika agude. Wa vura duhe nga, i amoi rani nga atita Adamu na Eva kurogo gu kungboapai nga ga ingapai gbiati kpio, mamu kina berani ka manga gupai i akpa ti mangaha. Ani rengbe arengba ka degaturani kuti Yekova na ki wiriki gupai nga, gako bakere pagbia niruruhe na nirengberengbehe, baraho du gu zogarago nga ga aboro zanga ko tigaha aye ni na kina ima, gberarago gbiati kungboapai fu ngbatunga aboro. (Yeremaya 10:23; Yugoti 4:11) Na kurii gure, gu maapai kurii kura aboro Satana amangaha, nagbarasa apai fuyo kisusi. Gu kuru pangbangaa namangi, nayugo rengo pa gipai re.—Batungusipai 8:9.

16. (a) Tipagine rengbe ani ti ni ka rugatirani nirengo na gupai nga, anga Yekova nga gu boro gu rungo ani abihe rogo zegino aye beko te? (b) Gini maabangirise Yekova afuhe rogo nyemuse tipa ruru aboro?

¹⁶ Si tie ziazia nga, Yekova aduna wene nduapai beko ka maa ngbatunga aboro kurogo kungboapai. Ono tie, ya mo rogo gupai yo re nga wee, Yekova du nga baenge gu kungboapai namanga rani na agu arungo nafuda rani areme wa du ani nibasasa? Oni berẽnga pa gu basapungbangaa nasarangbangaa niruruhe kuti gu boro nga bakuodi andiko. Gu zizi boro re rengbe ka mbu nikerehe wa ni amanga gu sunge-mbusa i afuhe funi, ono ya mo ruhe aru funi ni bira basapungbangaa tipa ndu gupai ni arungo ti ni? Wagusa te! Kurii gure, Yekova naangianga gu boro gbegbereapai naaenga tini te. Yakoba 1:13 nayaa: “Ka i asadi nga Mbori na gbegberẽpai te, ko aasada nga boro tigako wa sa te.” Ani tingidi gupai a nga, Yekova asari gi ngbangaa kuti aboro re ono ki sa yo i duna ‘maabangirise.’ Ko ambakadipai rogo nyemuse tipa agu atita Adamu na Eva du niruru yo bi digido kungboapai na ki gbia ngbarago be “gu taarimo nga ga [duni] awiri Mbori.” Nyeanye kumbatayo kindi, gu ngbatunga aboro du niruru yo abakanga bangiriyo berewe ya, pai awira manga amanga gizo kumbatayo i ki karaga aboro berewe kurogo gu ima nga ga kungboapai te. Ga Yekova mangaapai ngba ruru gene aima sigira gako bakere pagbia nigu pagbia ruaru nyeanye kindi.—Yesaya 25:8.

17. Fuo wisigo ani gu nduapai Yekova ambugene ti ni fu rungo si nirungosi aboro rogo zegino, ginipai rengbe ka manga rani nisangbanaha?

¹⁷ Wa ani awisigo gu nduapai aboro arungo ti ni, ani nabi gu ndupai rengbe ani mbikoho ka bira Yekova tipa gbegbereapai watadu ka bi gu ndupai nika sa rani ani mbu kido kuti ko? Kuba gure, si naida ngbatunga gu wisigopai re fu gu ndupai fu rani nasa rani ani idi na agu afugo Mose nga: “Ko nga Mbia, gako manga sunge du ziazia; bambiko gako apai dunduko du ni ruru sarangbanga. [Ko nga gu] Mbori nga irayososopai zanga irairapai, nga irarengo ni ruru ko.” (Pa Fu Rugute ni Ue he 32:4) Niberã ani kurii agi apai re, ani nizambuasinga gaani giarogopai ti kura aregbo. Si ki ta du were, ho ani agbia tirani ni na asada, si nika undo rani ani sovura kuti ga Satana asadatise ka maa kapa ku rirani yo. Ono tie, ginipai tipa gu uepai ani nigumbaha ti tonatona gi kekepai re? Pa kido boro kuti Yekova nakoda gine?

Gupai Pa Kido Boro Kuti Yekova Ayugoho

18, 19. Gini afugo Ziazia Kekeapai amangasunge nani ka ngarasa rani ani kido kuti Yekova, ono tie, nibipa gupai re, gini iraira aberã du kura aboro nani?

¹⁸ Fugo Mbori nangarasa rani niyaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” (Asanza 3:5, 6) Agu afugo re, nga wene afugo kidohe nirengo. Nirengo, anga boro ho rogo haurago naabaha dunduko rengbe ani ka kido kuti ni susi gu Barani du ngbangbaturũ yo du nyemu ko tirani te. Wa vura duhe wo, si taata fu boro ni gedi agu afugo re rogo Asanza susi gu nga ni mangihe.

¹⁹ Dungu aboro na kina iraira aberã tipa gupai pa kido kuti Yekova ayugoho. Gu kura aboro naberãpa ngbatunga gu kido re ya si gbua nga gu wenepai boro aberãha ku kpotoniyo, ni gupai nga ga ngbarago nafõngbadu boro yo nisaha. Si nawira, gu kura aboro tigayo naida kuti gupai nga, pa kido ani kuti Mbori nasa rani ani moibangirani tipa ko banda rani be ngbatunga fudifudiapai dunduko, kini mbakadi agu apai dunduko gasi rani, na ko kini mbakadi gu kpakarakpakaraapai dunduko nibasa ani agbia tirani nani rogo a’uru nibasasa na kini mangihe a wa ani aidaha ti kina gu regbo a ani aidaha! Ono tie, pai ho nasongoda agu aberã re te. Pa kido boro kuti Mbori nga gu kungboapai ni aberãha ku kpotoniyo te, na anga si a nga agu apai duni ziree te. Tipa sosono aboro, pa kido yo kuti akurayo nakoda gu diaberã i taino aino kini mangihe i naima berã mbata kuriihe wenengai.

20, 21. Pa kido ani kuti Yekova nakoda ginipai? Oni yugungo ho na kpiapai.

²⁰ Oni kparianga gupai berewe Asanza 3:5 agumbaha. Si nayugo gu kparakparapai duho dagba kido kuti Yekova na kido kuti gaani giarogopaiyo, kini fu gu berã nga, ani arengbanga ka mangaha tibaraha ue dunduko te. Ya mo gupai re nayugo gupai nga, si aidanga ani mangisunge na gaani ome giarogopai tee? Oó, mbiko Yekova, nga gu boro nafu agu atandu re fu rani, naida ani mangisunge nani wa ani amangasunge fuko. (ARomo 12:1) Ono da ani naakido kuti ni, watadu ani naakido ku beni ho ani naamanga diaberã ni? Kangia gaani berã kia ti ga Yekova, ani nadia gako tatamana kugume mbiko si kiipaha kisusi gaani? (Yesaya 55:8, 9) Pa kido ani kuti Yekova nayugo gupai nga, ani nambu gako aberã si yugu gene fu rani.

²¹ Ani yugungo ho na kpiapai: Oni berẽnga pa tooni gude sungu rogo tarambiri rogo gu basungo du sayo, avunguko ki sungu tigayo mbatayo. Bako nakama gu tarambiri re. Ho kpakarakpakaraapai akura ni ti regbo gu nunguro re, singia sanahe tipa gu gene i ka ndu ngbaha wa da yo ngboso gene, isoke singia si nga sakapai tipa faarago watadu zerarago, watadu sakapai tipa gene singia ngbaha angba watadu ngbanga ha te, ginipai gu gude nga boro giasangbaa nika mangaha ho du apai ni wa gure? Ya mo ko atakangbako fu bako na pa gu gene si aida i ndu ngbaha, kini yugu wai fu bako si aida ko kama tarambiri? Ya mo ko nakapa kuti gu diaberã avunguko amangaha watadu ka zinga kuti yo ho i aya ni fuko ko vo tiko kuti gako basungo na gaha giree? Oó, a wa duhe ni sino agude, ko nakido kuti avunguko nga i nika manga agu apai re amanga wenengai wa vura du yo nga kpakpa aboro vurũ. Ono tie, gu Barani nga Yekova tigako nga rengberengbe boro. Ya mo si aidanga ani kido kuti ko zanga wiri kapa tee, gbe, ho ani agbia tirani ni na kpakarakpakaraapai?—Yesaya 30:21.

22, 23. (a) Tipagine si aida ti ni ani kido kuti Yekova ho du ani ni rogo kpakarakpakaraapai, na wai rengbe ani ka mangaha wo? (b) Ginipai ani ka sakapai tipaha rogo gu papara kekepai naye fuo gere?

²² Ono tie, Asanza 3:6 naya fu rani wee ani ‘ra fu Yekova rogo gaani apai dunduko,’ angianga kinaho sa ani agbia tirani ni na kpakarakpakaraapai ya. Sidu, si naida ani yugu gupai nga ani nakido kuti Yekova rogo agu apai dunduko ani adiaberã tipaha rogo a’uruhe. Ho kpakarakpakaraapai akura ni, si aidanga ani mangi mbangirimbangiri ki he duna maabangirise, watadu ka ká ga Yekova arugute nga gu ko afuhe fu rani tipa ani mangipai ngba wene gene kisusi te. Si naida ani bi a’asada ni amamu tipa ka songoda ga Yekova bakere pagbia, ka sa Satana ni iraziree, na ka duna giasangbaa na ka sonosa gu kura asino nga gu nafu ngbarago fu Yekova.—AEbere 5:7, 8.

²³ Ani rengbe arengba ka kido kuti Yekova ka kina gini apai vura ru gene fu rani vurũ. Ani namangaha wo rogo gaani akpee na rogo gu gene ani angera kube Fugo Yekova gbiati gako riigbu tipa arugute rogoho. Ono tie, wai gbe rengbe ani ka yugo gupai nga, ani nakido kuti Yekova ho du ani ni rogo kpakarakpakaraapai nga gu nakura rogo gi zegino du areme re? Gu papara gaani kekepai naye fuo gere nika sakapai tipa gu riipai re.

[Gu rukutu kekeapai du bandu kpewaraga yo]

Gaoni Karagapai Nga Gine?

• Wai Davide ayugu gupai nga, ko anakido kuti Yekova?

• Gine nga gu nduapai biata naye na rungo fu ngbatunga aboro areme, na tipagine ngbaha ti ni ani naawisigoho ti kura aregbo?

• Gini sarangbangaa Yekova asarihe kuti ngbatunga aboro, na tipagine si aruaru ti ni?

• Pa kido ani kuti Yekova nakoda gine?

[Gu kpiahe du ti kpewaraga 23]

Davide asa Yekova nigu boro ko anakido kuti ni