Ndu Gupai Mbori Nika Digiso Arungo Dunduko Ti Ni Bambeda
“Ko nga Mbia, gako manga sunge du ziazia.”—PA FU RUGUTE NI UE HE 32:4.
1, 2. (a) Tipagine oni abi gu maabangirise ti ni nga ga raka nyeanye kindi na nyanyakipaha? (b) Tipagine kpakaraha ti ni fu kura aboro i idi kuti gu Mbori kido rani naapa iiriwo raka kumbatayo?
YA MO oni naakpinyemu ka maakpia raka Paradizo yo ku berã roni yo? Ti kura aregbo, si rengbe kadu nga oni naaberã kuriipa wai oni kaa ta rogo gi baiiriwo kpotosende re na kini wirikipai tipa ngbatunga rakiraki ahe dunduko. Watadu oni namakiapa gu ngbarago oni kadu nani ho oni ka mangasunge ni sa na akuaroni tipa ka aria kpotosende naabaha dunduko kurogo bawene ati. Watadu oni rengbe ka berãkuriipa gu birĩ oni kadu nani tipa mbakada ahe, gbaka kpia abambu, taka amanzigo, na kura apai aboro aorafuoho nga gu oni agbianga regbo tipa ka mangaha areme rogo gaoni raka ya. Ka si vura du kina wai, oni nabi gu maabangirise du tipa raka na nyanyakipaha, nga gu raka Ziazia Kekeapai ayambaha nga “ndikidi unga,” nga gu raka Yekova aida ani rakihe na gu maabangirise nga ka raka nyeanye kindi.—1 Timoteo. 6:19.
2 Si nipa ngbarago na nibawene mamu tipa ka tungusapa gu maabangirise du mburuhe rii Ziazia Kekeapai re fu kura aboro, ya mo wo tee? Ono tie, dungu aboro naká gu ngbatunga maabangirise re aká. I nabihe wakina kungbo mosumo gbua, nigupai kaa manganga ya. I kini yawee, agu aboro idi kutini, nyakingo berãyo te. Si fuyó nikina kpakarapai tipa ka ida kuti gu Mbori kidopa nyenye unga ku Paradizo yo. Tipagine duhe ti ni wo? Tipa kura aboro, gupai nakpakara fuyó dedede nga gupai i naayambaha nga gbegberẽ mangimangi apai. I naberãha nga, ka si du nga Mbori kinaho naraka araka kidu na tanduapai dũ na kidu na nyemuse, gu gbegberẽpai gbiati arungo namanga rogo zegino, ka si dunga te. I bihe nga anga Mbori ho rengbe ka hi gbegberẽ apai te, na kini berẽ gupai a nga, ka si du nga ko kinaho ti ni naraka araka nirengo, ko tie na tanduapai dũ te watadu ko angeranga fuo rani te. Tipa kura aboro, i nabihe nga ru gupai aru agu aboro re agumbaha. Satana nirengo na abirĩ beko ko akiso berã aboro nani.—2 AKorindo 4:4.
3. Gini kpakarakpakara sanahe si aida ani undo aboro i gbia karagapai sani, na tipagine rẽ ani ti ni rogo gi bangiriba re?
3 Nidu ani ni aDezire Yekova, ani nikparakpara rani tipa ka undo agu aboro Satana gbiati gu tatamana nga ga gi zegino re nanangi yó. (1 AKorindo 1:20; 3:19) Ani ima rugatirani na ndu gupai dungu aboro aidanga ti ni kuti agu akidohe nga ga Ziazia Kekeapai ya. Ka pepai niguruhe, i ainongo rimo ndikidi Mbori nga Yekova te. Si rengbe kadu nga i ainongo rogo gu rimo re nga gine te, na kandara wiripai ho iniyo ho tipa asinoko watadu gu pangbangaa du tipa ka ko kuti gako akidohe a te. Ani ngbaa apai kubara rani yo, si du du ani ti ni na ngbatunga gi inohe du tipa Yekova re. Ti kura aregbo, si niwenepai tipa ani tingidi wai rengbe ani ka undo agu aboro duna “bitimo ti gayo rugatise na pai” tipa i gbia karagapai kuti gu nyanyakipa sanahe aboro asanaha nga, “tipagine Mbori ambu gbegberẽ apai na arungo ti ni si niimangi aboro?” (AEfeso 4:18) Mbata fu apai dũ, ani makianga wai rengbe ani ka tona fugo na aboro na ki fu gu karagapai daada fuyó kuti gu sanahe re. Fuo gure, ani ki sakipai tipa wai du asino Yekova niyuguyuguhe rogo gako mangapai kuti gbegberẽ apai.
Ruru Karagapai Sa ga Aboro Asanahe
4, 5. Ginipai si aida ani mangihe nibambataha ho boro asanahe ni ka ino ndu gupai Mbori ambu gbegberẽ apai na arungo ti ni si niimangi aboro? Oni sakingo rogoyo.
4 Ho boro asanahe ni ka ino ndu gupai Mbori ambu gbegberẽ apai na arungo ti ni si niimangi aboro, gaani karagapai ningia gine? Si rengbe kadu nga ani na nyemu ka tona sakapai nibasa na kini gumba apai fuyó na afutufutuhe, tona ti kina gu regbo aboro asamungu ati Edene yo. Daha ada ani mangihe wo ti kura regbo. Ono tie si naida ani duna rugatise. Si naida ani sí mburupai mbata. (Asanza 25:11; AKorosaio 4:6) Ani makianga abanguapai biata rogo Ziazia Kekeapai nga gu rengbe ani ka mangasunge nani ka undo boro mbata fu tona ani karagapai sa gu sanahe fu ní he.
5 Bambatapai nga, ka sidu nga gu boro re nifudifudi ní gbe be gu gbegberẽ apai moipai rogo zegino, si tie ziazia nga gbegberẽpai aima manga ní, watadu badiangbani. Sidu tie, si nipatatamana ani tonaha niyugo ani nunga koyo du ní ni. Gu mokedi nangia Pauro arugu aKristano ki yaa: “Oni kpari na agu yo nakpara.” (ARomo 12:15) Pa yugo ani ‘nunga’ koyo du gu kuarani ni re nika sa ní ní bi gupai nga ani naberã pani aberã. (1 Petero 3:8) Na ka ní ini gupai nga ani naberã pani aberã, si ki rengbe ka fõngbadu ní yo tipa ní idi ka gia gupai ani agumbaha.
6, 7. Tipagine daha ada ti ni ani tambua boro ho ní afu gu sanahe ni nafuda ní tipa ga Mbori pai?
6 Uepai nga, si naida ani tambua gu boro re tipa gu sanahe ní nasanaha re. Gu kura aboro nape gupai nga pa baka yó bangiriyo na ngbatunga gu sanahe re nayugo gupai nga i na idapase kuti Mbori te watadu i na zanga irisa koyo du ko ni. Si rengbe kadu a nga kina gu bangisapai re abarumbatayo rogo gayó pambori naapehe fuyó. Ono tie, anga sana ngbatunga gi sanahe re nayugo gupai nga boro zanga idapase te. Nirengo, gu ruru amoyambu nadu ti regbo ke Ziazia Kekeapai, i aima sana ngbatunga asanahe wakina gure. Nikpiapai, gu bake apapara Atambuahe nangia Davide asanahe ki yaa: “Ako Yekova, tipagine mo narunda ti ni tuturũ? Tipagine mo naoka tiro ti ni ti arago fudifudipai?” (Atambuahe 10:1) Teketeke a, gu nebi nangia Abakuku asanahe ki yaa: “Ako Yekova, mi ka akpara ni gbangaha waĩ tipa undahe, ka mo agia ngaha ya? Watadu kpara foro mbiko pa zuu; ka mo abatasa nga re ya? Tipagine mangi mo re ti ni mi bi irairapai ki ningere ku ri fudifudipai? Gbarasahe du bara bangire na zuu; kpata nakura na kangu.”—Abakuka 1:2, 3.
7 Agi akumba re adu nigu ruru aboro nadu na bakere irisa koyo du Mbori ni. Ya mo Mbori azayo ti sana yó ngbatunga asanahe wa gure? Oó, ko aazanga yó te. Ono ko abihe nga rẽ gayó asanahe arẽ na ko ki idi i kehe rogo Fugoko nga Ziazia Kekeapai. Areme, gu boro nabaka bangirini naapa gu gbegberẽ apai du rogo zegino, si rengbe kadu nga ní nigu boro gomoro amanga ní rogo toroyo, kini idi ka gbia gu karagapai kina Ziazia Kekeapai narengbe ka fuhe funi. Oni tingidi gupai nga, Yesu atambua agu aboro nakpinyemu agu apai nga ga toro, watadu agu aboro “inipa gu gayó azingo nga ga toro.” (Matayo 5:3, NW) Nairiwo gu mamu ngaha ka undo ngbatunga agu aboro re i gbia gu ngbarago Yesu nakido paha furani!
8. Gini iraira yugopai nasa dungu aboro i idi kuti gupai nga Mbori nga tarã agu arungo namanga, na wai rengbe ani ka undoyo?
8 Biatapai nga, si naida ani undo gu boro re tipa ní ini gupai nga, anga Mbori du nasa gu gbegberẽ apai kpatafura areme rogo zegino te. Dungu aboro i ayugo gupai fuyó nga Mbori du nazoga gi zegino ani araka rogoho re, na kini pe gupai fuyó nga tona kina bakuru kusayo, ko aima sigira agu apai dunduko namanga rani, na ndu gupai ko aye na arungo ti ni kurii ngbatunga aboro, si nga misiterio. Gere nga iraira yugopai. I nafu gberarago fu Mbori na kini bira ko nga gu gbegberẽ apai na arungo namanga aboro, ko du nasaha si niimangi. Sidu si naida ani mangisunge na Fugo Mbori tipa ka rugusa ngbatunga apai wa gure tu aboro yo. (2 Timoteo 3:16) Anga Yekova nga bazogo gi gbegberẽ zegino re te, ono Satana du nga bazogoho. (1 Yoane 5:19) Anga Yekova niima ringbisapai tipa boro mbata fu i vunguni te, ono ko nafu ranirii gbiati mamu fu boro tipa kina ní sia guhe ngbaa tiní, singia wenepai watadu gbegberẽpai, rurupai watadu irairapai. (Pa Fu Rugute ni Ue he 30:19) Anga Yekova nga tarã gu gbegberẽ apai namanga te; ko nasoga gbegberẽpai asoga na kini ngerefuo agu aboro akurayo arungosi yó.—Eyobo 34:10; Asanza 6:16-19; 1 Petero 5:7.
9. Gine nga agu aũsunge ‘ruru kangara moyambu’ nakusihe tipa ani undo aboro nani i rugutiyo na ndu gupai Mbori ambu arungo ti ni si niimangi aboro?
9 Fuo sí oni mburupai wa gure, oni rengbe ka bi gupai nga, gu boro oni afura na ní re, ní ima mbeda ka ino ndu gupai Mbori ambu gene ti ni fu arungo si niindu kina kumbatayo. Tipa ka undo roni ti gipai re, ‘ruru kangara moyambu’ ima mbakada dungu aũsunge tipa oni mangisunge nani. (Matayo 24:45-47) Nikpiapai, ti regbo gu Bakere Dunguratise Nga ga Aʹuru Biata nadu rogo 2005 na 2006, riihe adu nga “Giasangba Mbori,” i akusi keke kpewaraga rimoho adu rogo pa-Ngirisi nga All Suffering Soon to End! (Arungo Dunduko Ima Mbeda ka Digo!). Ka si du nga gu keke kpewaraga re ho rogo gu fugo ini oni he, tipagine ka oni aʹasadanga ka rugatironi ti ni na agu apai du rogoho ya? Teketeke a, gu buku nga What Does the Bible Really Teach?, nga gu i nakusihe awere rogo afugo wa 157, si na gu kapita rogoho nakaragapai sa gi nyanyakipa sanahe re. Oni mangisunge wenengai na agu aũsunge re. Si nasakapai ziazia nibi gupai du rogo Ziazia Kekeapai tipa wai soapai atona tipa gu bakere pagbia nga ga haurago ati Edene yo na wai Yekova amangipai sani. Oni moi gupai ku berã roni yo a nga, wa oni kaa sakapai riipa gipai re, gure nga oni nayugopai fu gu boro oni afura na ní re tipa ní ini nyanyakipa pai. Si nga ka inopai tipa Yekova na iiriwo asinoko.
Oni Naaberã Kuriipa Asino Yekova
10. Ginipai kpakaraha ti ni fu dungu aboro tipa i rugutiyo na ndu gupai Mbori ambugene ti ni fu arungo, na gini inohe rengbe ka undoyo?
10 Wa oni kaa undo aboro i rugutiyo na ndu gupai Yekova ambu gene ti ni fu aboro i zogo tiyó tiibe ga Satana ome, oni asadi ka gbeberãyo kuti asino Yekova du ni iiriwoho. Dungu aboro ima ino gupai nga Mbori nga ira-ome; wo i naagiaha dedede i niyambu ko nigu Mbori Duna Tanduapai Dũ. Ono tie, si nakpakara akpakara fuyó i rugutiyo na ndu gupai ko amanganga sunge ti ni na gu gako ome re ka nyasa riipa iraira mangaapai na arungo kina awere ya. I aruganga tiyó na kura asino Yekova te, wa ngbatunga agu nga padu ko niziazia ko, gako ruru sarangbangaa, tatamana, na nyemuse. Yekova nayugo agi asino re ngba rengberengbe gene ki zanga naga kina kubani kisusi. Rogo gi gene re, Ziazia Kekeapai nayaa: “Gako manga sunge du ziazia.” (Pa Fu Rugute ni Ue he 32:4) Wai rengbe oni ka kusa memeapai tipa agi asinoko re ho oni kaa karagapai ni sa agu asasanahe aboro naasanaha dedede nibi gipai re? Ani makianga bete akpiapai.
11, 12. (a) Tipagine mbupai arengbenga kadu ti ni nigupai si aaidaha ho aAdamu na Eva aingi ni ya? (b) Tipagine Yekova nikaa hinga ingapai ti ni nyeanye kindi ya?
11 Ya mo si aaida Yekova mbupai ambu gbua fu aAdamu na Eva? Anga mbupai nangia gupai si aaidaha rogo gi bangiriba re te. Nidu Adamu na Eva nirengberengbe aboro, i ataino aino kini zingi kuti ga Yekova bakere pagbia niwia na ki idi kadu tii ga Satana arugute kuba ga Yekova. Anga iiriwopai ngaha te, ka bi gupai nga agu aboromungu nangia aAdamu na Eva re, i aasanga berãyó te. Ono tie, ho aboro naasanahe ni nga tipagine Mbori aambunga pai ti ni fuyó ya, gupai i aberãha nzunzu nga tipagine Mbori azogosanga bete gako andiko ti ni kusende na ki idi aida na ingapai gbiati samungu si niimangi ya. Karagapai nabipa kura sino Yekova sa nga gu ko amanga gako apai dunduko kuti ni. Si nga padu ko ziazia.—Gate 28:36; 39:30.
12 Ziazia Kekeapai nanyakasa gupai ti aregbo dũ nga Yekova niziazia ko. Si nafu kina gberarago nga, kina bete aboro gbua rugutiyo naapa gi sinoko re rogo gi gbegberẽ zegino re. Yekova ziazia, na kidu giangiri, na nikparakpara ko kusayo ti gi gbegberẽ mangaapai re. (Yesaya 6:3; 59:2) Nibipa ingapai, ko aima mbakada gene tipa aboro kuru tiihe, na ki dihe kusayo, ono ko ambunga gene fu ingapai nyeanye kindi te. Ka si du nga Yekova nambugene fu ingapai si niindu kindi ku mbatayo zanga digidoho, ka ani dunga na maabangirise wagu wagu tooni te. (Asanza 14:12) Ti gu regbo da bangiriko, ko nika sa gu gako aboro ko amangi yó i du ziazia. Zanga kapa, si nga gupai Yekova akpinyemuhe nga Ziazia boro.
13, 14. Tipagine Yekova aaidanga ka imo agu aboromungu nadu ati Edene yo ti ni ya?
13 Ya mo ka Yekova aimi agu aboromungu re ati Edene yo ki kusi kina kura aboro berewe kubayo? Ko aima duna ome beko nirengo tipa ka mangaha wo; ono barambeda, ko nika mangasunge amanga na gu ome re tipa ka nyasa riipa gbegberẽ apai dunduko kusayo. Si rengbe ka iriwo ti kura aboro nga, ‘Tipagine ko aamanganga ha ti ni kinaho agu aboromungu re aduni biata ya? Ya mo ka si abandanga aboro ti kpatafura ingapai na gu gbegberẽ apai dunduko ani abihe rogo zegino tee?’ Tipagine Yekova amanganga ha ti ni wa gure ya? Pa Fu Rugute ni Ue he 32:4 nayaa: “Gako apai dunduko du ni ruru sarangbanga.” Yekova naberãpa ruru sarangbangaa ninyanyakipa pai. Nirengo, “Yekova nakpi nyemu ruru sarangbanga.” (Atambuahe 37:28) Mbiko gu nyemu ruru sarangbangaa du ti Yekova, si du ko aaimongo agu aboromungu nadu Edene yo re ti ni ya. Tipagine ko amangihe ti ni wo?
14 Ga Satana samungu akusi sakapai nibipa ru ga Mbori bakere pagbia. Nibipa ga Yekova ruru sarangbangaa, si aaida i fu ruru karagapai fu Satana kuti gu sakapai ko akusihe. Wa si avura du nga pa imo agu aboromungu re nibasa arengbe kadu nigupai nadaada tipa yó, ono ka si afunga ruru karagapai te. Ka si ayugu pa ga Yekova bakere ome, ono anga gu sakapai nakuru re adu tipa gako ome te. Kurigure, Yekova aima sia gako ringbisapai tipa aAdamu na Eva. Si adu nga i batika agude na ki hiisi kpotosende, kini zogoho, na kini kindo kurii agu ahe dunduko du auru kpotosende. (Bambata Pai 1:28) Ka Yekova aimi aAdamu na Eva, gu gako ringbisapai ko atakipandehe fuyó, ka si angia kina kungbopai gbua. Ga Yekova ruru sarangbangaa arengbanga ka ye na ngbatunga gupai duwa gure te, mbiko agu apai dunduko ko naaringbisaha, ko naamangaha amanga.
15, 16. Ho kura aboro agumba ‘agu apai ni ka i amangihe’ sa gu samungu namangi Edene yo, wai rengbe ani ka undoyo?
15 Ya mo boro ho rogo zegino narengbe ka sara gu ngbangaa re nitatamana susi Yekova? Kura aboro rengbe ka gumba “agu apai ka i amangihe” sa gi samungu namangi Edene yo re wa ka i angia Yekova. Ono tie, nimanga yó ho wa gure, ya mo i aberãnga gupai nga i narengbe ka sara gi ngbangaa re ngba ruru gene ki susi gu Mbori asarihe tee? I rengbe ka manga gipai re na wene ndu mangaha, ono si gbua nga i aruganga tiyó na Yekova gbiati gako iriwo tatamana te. Wa gu mokedi nangia Pauro aake waraga fu agu aKristano nadu Roma yo, ko aweteke gu tatamana nga ga Mbori, kodihe na gu ‘gbugbupai’ i aokoho nibipa ga Mbori ringbisapai tipa mangasunge na gu Kindo nga ga Masiya tipa ka batasa ruru aboro na tipa ka ziasi rimo Mbori du niziaziaha. Wai Pauro aberẽ tipa ga Mbori tatamana nga gu Ko aringbisi gako mangapai nani? Ko adigisi gako waraga na agu afugo nga: “Taarimo du fu kina bangisa tatamana[tatamana] Mbori, mbiko Yesu Kristo, nye anye kindi. Amina.”—ARomo 11:25; 16:25-27.
16 Pauro aima rugatiko na gupai nga kina Yekova ‘sa duni iratatamana’ kisusi rogo haurago dunduko. Da duho dagba kpakpa aboro ka berẽhe nga ní rengbe ka nyasa na apai dunduko ngba wene gene, ani henga gu kpakarakpakara sakapai ahe tigaha nakuru nibipa ga Mbori tatamana? Si naida ani undo aboro i rugutiyo naapa gu bakere irisa si aida ani fuhe fu gu Mbori du ni “iratatamana kpotoko yo.” (Eyobo 9:4) A wa ani ka rugatirani naapa ga Yekova tatamana wenengai, kinawo a ani ka kido kuti agu agene ko amanga apai ngbaha tipa si undo rani.—Asanza 3:5, 6.
Ida na Bangua Asino Yekova
17. Wai rugatise naapa ga Yekova nyemuse narengbe ka undo agu aboro nambu be wai Mbori ambugene fu arungo?
17 “Mbori nga nyemuse.” (1 Yoane 4:8) Agu afugo Ziazia Kekeapai nagbeberã aboro re, si nayugo bangua sino Yekova, nga gu bawene sinoko ngbaa gbe dagba asinoko, na si nafu wasa fu agu aboro nambu be gi totorotototoroto gbegberẽ apai moipai rogo zegino areme re. Yekova aima yugo nyemuse rogo dungu agene nibi wai ko amangipai na gu kere ingapai nagberesipa gako aboro ko akusi yó. Nyemuse nasa Yekova ko fu maabangirise fu ingiingi awiri aAdamu na Eva. (Bambata Pai 3:15) Mbori afu mamu fuyó tipa i niifura naako na kidu na wene ngbanyaa naako. Nyemuse nafõngbadu Yekova yo ko fu motumo tumorii si zaki gene tipa mbupai ti ingapai na ki karaga aboro berewe kurogo rengba gbiati nyenye unga. (Yoane 3:16) Na nyemuse nasako ko hipai fu ngbatunga aboro, na kini fu mamu fu dungu yó tipa i ká fu Satana ki sia gako bakere pagbia.—2 Petero 3:9.
18. Gini dudunguro giarogopaiyo du ani nani berani, na ginipai ani ka wirikaha rogo gu papara kekepai naye fuo gere?
18 Ho pasita sa aatungusapai ni fu agu aboro nadunguratiyo ka tingidapa gu kere gbarasa rago abamoi amangihe, ko ayaa: “Ani ainongo ndu gupai Mbori ambugene fu gbegberẽ apai na arungo ti ni si niindu kumbatayo te.” Nagberẽ gipai re! Ya mo maku ngaha furani ani du na dudunguro giarogopaiyo tipa gipai re tee? (Pa Fu Rugute ni Ue he 29:29) Wa duhe nga Yekova nga iratatamana, kidu niruruko, na kidu na nyemuse, ani ima ino gupai nga barambeda kumbatayo, ko nika nyasa anyasa riipa arungo dunduko. Nirengo, ko ima kidohe tipa ka mangaha wo. (Yugoti 21:3, 4) Na ginipai tigaha du tipa agu aboro dunduko naima kpiko vuru agu akama agarã susi kusayo? Ya mo ga Yekova gene mangapai na gu sakapai nadu Edene yo ambuyo zanga maabangirise? Oó. Nyemuse ima fõngbadu Yekova yo ko mbakadipai ka zingisa yó bekpio tipa i gbia nyenye unga a. Gere nga gu memepai ani ka wirikaha rogo gu papara kekepai naye fuo gere.
Gaoni Karagapai Nga Gine?
• Ginipai rengbe ani ka gumbaha fu gu boro nasanahe ka ino ndu gupai Mbori ambugene ti ni fu arungo si niimangi aboro?
• Wai Yekova ayugu padu ko ziazia na niruruko rogo gu gene ko amangipai ngbaha na agu aboromungu nadu Edene yo?
• Tipagine si aida ti ni ani undo aboro i rugutiyo naapa ga Yekova bakere nyemuse?
[Gu kpiahe du ti kpewaraga 15]
Oni gbata gene ka undo agu aboro narungo be gi totorotototoroto zegino re
[Gu kpiahe du ti kpewaraga 17]
Gu ruru amoyambu nangia aDavide na Abakuku, i asana Mbori na ruru asanahe