Oni Kido Kuti Yekova Na Ngbaduroniyo Dunduko Ti regbo Fudifudiapai
‘Mbori nga gaani bagbuko nga gaani ome a, duni moundo mbembedii ti regbo fudifudipai.’—ATAMBUAHE 46:1.
1, 2. (a) Gini kpiapai nayugo gupai nga, pa gumba ani kina gu kungbo fugo gbua nga ani nakido kuti Mbori arengbanga kuho te? (b) Tipagine si aida gupai ti ni nga ani mangi kura apai susi gu gbua nga ka ya ani nakido kuti Yekova?
SI TAATA ani ya ani nakido kuti Mbori tigu nga ka yugoho rogo gaani mangaapai. Nikpiapai, gu gumbagumbapai nga, “Ani Nakido Kuti Mbori” aima du tipa gbanga regbo kpakpu agu akpekasa yo na kpakpu gu zau-marã yo nga ga Amerikani.a Rogo gu garã nangia 1956, gu Rondo nga ga zogarago nga ga Amerika arũndiko ya si naida gu fugo re du nigu rugute nikaa ruga aboro gu ringara nga Amerika. Ono tie, ni gupai du kia ti gure, dungu aboro, angianga kina aguyo du rogo gu ringara re sa ya, ono agu aboro du rogo zegino dunduko, i nakido kuti marã na kuti aũkumuko angianga kuti Mbori ya.—Ruka 12:16-21.
2 Nindikidi aKristano, si naida ani mangi apai susi gu gbua nga ka ya ani nakido kuti Yekova. A wa duhe nga “idapase zanga mangaapai si . . . ni kpikpi he,” sidu kinawo a duhe tipa gu kungbo afugo rengbe ani ka gumbaha ya ani nakido kuti Mbori, kinagu ka ani songodi agu afugo re na mangaapai. (Yakoba 2:26) Rogo gu papara kekepai ye mbata fu gere, ani awiriki gupai yo nga, ani nayugo gaani kido kuti Yekova rogo gaani akpee fuko, ho ani agbata arugute ni rogo Fugo ko, na ho ani angera ni kube gako riigbu tipa arugute. Ani wisiginga wai awere rengbe ani ka manga agi apai biata re ti regbo fudifudiapai.
Ho I Ambu Boro Ni ti Sunge Watadu Ho Du Marã Ni Nikina Toonihe
3. Gini fudifudiapai nga ga zingo mosoro ga Yekova amoyambu agbia tiyo nani rogo gi ‘gbegbere aregbo’ re, na wai ini ani gupai nga, Mbori na nyemu ka undo rani rogo gipai re?
3 Rogo gi ‘gbegbere aregbo’ re, ani nga aKristano nagbia tirani na kina gu bangisapai nga ga zingo marã namanga kura aboro. (2 Timoteo 3:1) Sidu, i rengbe ka mbu rani ti sunge nitunguotunguoho. Watadu gu kurapai ho ka ani mangihe te, fuo kina gu nga ka nye kuti gu sunge ani amangaha tipa gbanga regbo ka gbia kina wiri tooni marã gbua ti ni. Ho apai wa ngbatunga gure amanga rani ni, si rengbe ka du nikpakarakpakaraha ani ‘ye na ahe tipa gaani aborokporo.’ (1 Timoteo 5:8) Ya mo gu Mbori nga Bahe Kisusi na nyemu ka undo rani ti ngbatunga agu aregbo re? Ii nirengo! Rengo ngaha nga, Yekova abandanga rani be gu fudifudiapai dunduko nga ga raka du rogo gi zegino re te. Ono tie, ka ani kido kuti ko, ani bi gupai abi nga, agu afugo du rogo Atambuahe 46:1 ima manga nirengo tipa rani, nga gu nayaa: ‘Mbori nga gaani bagbuko nga gaani ome a, duni moundo mbembedii ti regbo fudifudipai.’ Ono tie, wai rengbe ani ka yugo gupai nga, ani nakido kuti Yekova na ngbaduraniyo dunduko ti regbo zingo mosoro?
4. Ho du ani ni rogo zingo mosoro, gine rengbe ani ka kparakpee tipaha, na wai Yekova akaragapai sa ngbatunga agu akpee re?
4 Gu kura gene sa dagba agu akuraha ani ayugo gupai rogoho nga ani nakido kuti Yekova nga, nikpara ani kpee fuko. Ono ginipai rengbe ani ka kparakpee tipaha? Ho du ani ni rogo zingo mosoro, si rengbe ka du nga ani naida tatamana awere susi gu nidu mbata. Ka si ta du tie were, si naida ani kparikpee tipaha! Fugo Yekova nakido rani niyaa: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni.” (Yakoba 1:5) Ii, oni sana Yekova tipa tatamana, nga gu tandu nga ga koda inohe, giarogopaiyo, na rugatinapai ka mangasunge nani wenengai, rogo manga wene diaberã na tipa ka sia rurupai. Gu Barani du ngbangbaturũ yo nga boro nyemuse nakido rani ya ko adegatuko adega kuti ngbatunga agu akpee re. Ko niima du ti aregbo dunduko na nyemu ka ruga agu agene nga ga agu aboro nakido kuti ko na ngbaduyo yo dunduko.—Atambuahe 65:2; Asanza 3:5, 6.
5, 6. (a) Tipagine rengbe ani ti ni ka ngera kurogo Fugo Mbori yo tipa undo tipa ka diabe gu fudifudiapai nga ga zingo mosoro? (b) Ginipai rengbe ani ka mangaha ka umbasi gu bakabangirise du ani nani ho i nambu rani ni ti sunge?
5 Pa ngera ani kurogo Fugo Mbori tipa arugute nga gu kura gene ani ayugo gupai nani nga ani nakido kuti Yekova. Gu gako atingidapai nga ga tatamana du rogo Ziazia Kekeapai aima yugotihe ni “bererengo.” (Atambuahe 93:5) Wa i avura nyasa ke Ziazia Kekeapai mbata fu agarã 1,900 bakuru kusayo, gu buku ga Mbori toro adu kugiipa kehe re na agu arugute rogoho rengbe ani ka kido kuti ni na si na wene dudungurobipai rogoho nga gu rengbe ka undo rani ani dibe gu fudifudiapai nga ga zingo mosoro. Ani wisiginga bete gu kpiaapai nga ga gu tatamana nga ga Ziazia Kekeapai.
6 Gu tatamanatatamana Bakindo nangia Soromo abi gupai bakuru kusayo nga: ‘Gu rame nga ga gu boro namangasunge, si nidodoromaha, ka gu riahe ni arihe vura du nitooni riahe watadu nibakerehe vurũ, ono gu dungu ahe du be irakumuko, si ambunga ni ni ra te.’ (Batungusipai 5:12, NW) Si naida regbo na marã ki duho berani tipa ani rengbe ka mbakada agu ahe nani du berani, ka girisoho, na ka bandaha. Sidu, fuo mbu yo rani ti sunge, si naida ani bihe nimamu ka wisigo gaani sino raka berewe, kini asadi ka kpara agu ahe kusayo ani aidaha aida gbua ti gu du ani na zingoho. Ka ani aida ka umbasi gu bakabangirise du ani nani, si rengbe ka du nipatatamana ani mangi a’ariapai rogo gaani raka. Nikpiapai, ya mo si daada ani sa gaani raka si du taata, isoke ka ga kurogo gu kporo du nitoonihe watadu ka babaga agu ahe kusayo adunga sunge tirani nani ya?—Matayo 6:22.
7, 8. (a) Wai Yesu ayugu gupai nga, ko ima ino gupai nga, kpakpa aboro na nyemu kaa bakabangiriyo susi tipa aũzegino? (Oni bi gu rukutu kekepai a du kuari re.) (b) Gini arugute nga ga tatamana Yesu afuhe tipa ani he gu bakabangirise adunga nduhe ti ni ya?
7 Rogo gu Tungusapai nadu rii Bagangara yo, Yesu afu rugute ki yaa: “Ka oni wisigi nga pai tipa kpotoroni ya, gine oni ka ukadi he ya.”b (Matayo 6:25) Yesu aima ino gupai nga, kpakpa aboro, kuti sino raka, nabakabangiriyo dedede tipa gbia agu ahe du tipa songoda gayo raka. Ono wai tie, rengbe ani ka he ‘duna bakabangirise’ tipa ngbatunga agu ahe re? Yesu ayaa: “Oni [ni]gbáta gako ngbi mbata.” Ka ani vura kaa gbia tirani ti kina gini kpakarakpakaraapai, si naida ani naaperesa kina pa iriso Yekova kumbatayo rogo gaani raka. Ka ani mangihe tie wo, gu Barani du ngbangbaturũ yo “[a]kpamia agi ahe re [akpamia] dunduko fu [rani] kuti ni.” Ngba gu gene ani ainongo ho ya, ko ambakada apai fu rani tipa ani naaraka kumbatayo kindi.—Matayo 6:33.
8 Yesu afu gi kura rugute re: “Ka oni wisigi nga pai tie tipa gu pai nikadu gba ya; bambiko kina gba nikawisiga pai tipa ha ni saha.” (Matayo 6:34) Anga si nipatatamana boro naabakabangirini susi tipa gupai rengbe gba ka ye nani te. Wene bawirikipai nga ga Ziazia Kekeapai ko ayaa: “Agu apai ani naabakabangirani tipaha kumbatayo ya si nirengo, si nadunga dedede wa gu ani naaberãha te.” Ka ani mangi agu arugute nga ga Ziazia Kekeapai niumbasitise nga agu arugute nafura tipa pa peresa ani pa agu apai kumbatayo nyakipaha na ki dungura berã rani kina kuti agu apai du rogo a’uru nibasasa, si ka sa rani ani rengbe ka he gu bakabangirise adunga nduhe ti ni ya.—1 Petero 5:6, 7.
9. Ho ani agbia tirani ni na gu fudifudiapai nga ga zingo mosoro, gini undo rengbe ani ka gbiaha rogo agu abuku nga ga ‘ruru kangara moyambu’?
9 Ho ani agbia tirani ni ti fudifudiapai, ani rengbe arengba a ka yugo gupai nga ani nakido kuti Yekova ningera ani tipa undo kurogo agu abuku ‘ruru kangara moyambu’ afukaha. (Matayo 24:45) Ti kura aregbo, gu magazini nga Awake! naafura tipa agu apai nafu undo na kini fu agu aberã rengbe boro ka mangaha ho du ni ni rogo zingo mosoro. Gu papara kekepai du riihe nga, “Out of a Job—What Are the Solutions?” nga gu nakuru rogo gu Awake! nangia ga Buza ti rameru 8, rogo 1991, afura tipa wene arugute muambe nga gu rengbe ka undo dungu aboro i ru nyanyakii ti regbo zingo mosoro ho adunga yo ni tingba sunge-marã ya.c Rengo ngaha nga, si naida boro duna ruru bipai tipa agu arugute re na tipa marã a. I aima sakapai tipa gipai re rogo gu papara kekepai du riihe nga, “Something More Vital Than Money,” nga gu nakuru kina rogo gu bangisa magazini re.—Batungusipai 7:12.
Ho Du Boro Ni Nifudifudi Ni be Akaza
10. Wai du gu kpiapai nga ga Davide ni ruru berã tipa boro kido kuti Yekova ho ni awoka ni nyanyakii?
10 Ya mo ruhe aru boro kido kuti Yekova ho kere kaza nazi ni ni? Ii nirengo, wo si aidaha! Nunga agu aborokaza du dagba ga Yekova aboro namanga ko amanga. Na kurii gure, ko na nyemu ka fu undo fuyo. Nikpiapai, ani makianga gupai nadu tipa Bakindo Davide. Ko nitiko avura kaa woka nikerehe ho ko akepa ga Mbori mangaapai ni na gu ruru boro nawoka. Ko ayaa: “Yekova angarasa ni auru gani barame rago rungbura ni; mo nambakada gani ba rago gani kaza.” (Atambuahe 41:1, 3, 7, 8) Ga Davide kido kuti Mbori anye kindi ninyanyakihe, na niyangaraha gu bakindo re ahu be gako kaza. Ono wai tie, rengbe ani ka yugo gupai nga, ani nakido kuti Mbori ho du ani ni nifudifudi rani be akaza?
11. Ho kaza azio rani ni, gine rengbe ani ka sana gu Barani du ngbangbaturũ yo tipaha?
11 Ho kaza azio rani ni, gene sa dagba agu akuraha ani ayugo gupai rogoho nga ani nakido kuti Yekova nga rogo kpee fuko tipa undo ka hi gu kaza re. Ani rengbe ka sana ko ko undo rani ani mangisunge na “ndikidi tatamana” tipa wa ka ani gbata gu sunge husa kaza rengbe ani ka tumo tipaha. (Asanza 3:21) Ani rengbe ka sana ko a ko undo rani ani duna zerangbaduse gbiati hipai tipa ani ki rengbe ka hi gu kaza re. Kurii agu apai re dunduko, ani rengbe ka sana Yekova ko songodi rani, ko fu ome fu rani ani nye niruru rani fuko ki zanga ti, ka kina ginipai vura manga vurũ. (AFiripoio 4:13) Pa ka ani kuti gaani ruru mangapai nyakipaha kisusi pa banda ani gu gaani raka du awere. Ka ani ka kuti gaani ruru mangaapai, Bakere Bafu mosoro afu nyenye unga afu fu rani ani naaraka na wene kpotorani.—AEbere 11:6.
12. Gini arugute adunga ngburungburu ya nga ga Ziazia Kekeapai rengbe ka undo rani ani mangi agu adiaberã nga ga tatamana ho daha ni tipa sia gu sunge-husa kaza ani aidaha?
12 Gaani kido kuti Yekova nasa rani ani ngere kurogo Fugo ko, nga Ziazia Kekeapai, tipa wene arugute. Agu arugute adunga ngburungburu ya du rogo Ziazia Kekeapai rengbe ka undo rani ani mangi gu diaberã nga ga tatamana nibipa gu sunge husa kaza nga ga amunganga ani aidaha. Nikpiapai, fuo ino ani gupai nga, Ziazia Kekeapai nasoga “soroka,” ani ane gu sunge wisigo kaza watadu gu sunge husa kaza nga ga sangbaatoro. (AGaratio 5:19-21; Pa Fu Rugute ni Ue he 18:10-12) Gu kura kpiapai gere nga ga gu tatamana nga ga Ziazia Kekeapai nga gu rengbe ani ka kido kuti ni: “Zangainahe naida pa apai aida dũ, ono bangbasia nawisiga pa gani nduge wenengaĩ.” (Asanza 14:15) Sidu, ho ani aberãpa dia ngua kaza ni, si angia patatamana ka ani gbata gu tingidapai rengbe ani ka kido kuti ni kuba gupai nga ka ‘ida kuti apai dunduko.’ Ngbatunga gu ‘ruru berã’ re rengbe ka undo rani ani wisigi gu sia apai du berani wenengai mbata ani mo ka manga gu diaberã ani naima rugatirani na paha.—Tito 2:12.
13, 14. (a) Gini weneapai i akekehe tipa kaza kpotose du rogo agu amagazini nga Ngbaõbambu Sinziri na Awake!? (Oni bi gu sanduki du ti kpewaraga 31.) (b) Gini arugute du tipa mangapai sa gu bangabanga kaza du ti boro i akusi paha rogo gu Awake! nangia ga Ngi ti rameru 22, rogo 2001?
13 Ani rengbe ka yugo gaani kido kuti Yekova a niweteka ani agu abuku nga ga ruru kangara moyambu. Agu amagazini nga Ngbaõbambu Sinziri na Awake! naakusa dungu wene kekeapai nibakiakia nafura tipa agu apai nafuda kpoto aboro gbiati gu kura kparakpara akaza.d Ti kura aregbo, agi amagazini re aima kusa kekeapai tipa aboro nibasasa nga aguyo nahi dungu akaza, agbara na gu kura apai nibakiakia nanafuda yo. Kurii gure, gu kura apapara kekepai afu aberã du mburuhe rii Ziazia Kekeapai gbiati wene arugute tipa wai rengbe boro ka raka na bangabanga kaza.
14 Nikpiapai, gu Awake! nangia ga Ngi ti rameru 22, rogo 2001 aduna gupai ti kpotoho nga, “Comfort for the Sick (Afugo Wasa fu Aborokaza).” Gu papara kekepai re afu agu arugute nga ga Ziazia Kekeapai adunga ngburungburu ya kodihe kuti agu apangbangaa i agihe ngba kina boro agu aboro agu akaza re amangi yo tipa dungu agarã. Gu papara kekepai riihe adu nga, “Living Successfully With Your Ailment—How?” afu gi rugute naye re: Oni wiriki agu apai dunduko rengbe oni ka wirikaha tipa gaoni kaza. (Asanza 24:5) Oni moi agu asásá daada, kodihe kuti gu sásá nga ga undo kura aboro, ono tie, oni tingidi gupai nga, oni arengbanga ka da ti gu bangisa asásá gu kura aboro ada ti ni te. (Amokedi 20:35; AGaratio 6:4) Ka oni kparanga tironi kusayo ti kura aboro ya. (Asanza 18:1) Oni sa ngbarago ti agu aboro naye ka bi roni. (Asanza 17:22) Kurii apai dunduko, oni nye kuti wene ngbanya dagbaroni na Yekova na dagbaroni na agu aboro du rogo dungurati. (Nauma 1:7; ARomo 1:11, 12) Anga ani na tambuahe tipa agu arugute rengbe ani ka kido kuti ni Yekova afuhe rogo gako riigbu tee?
Ho gu Rungbura Nga ga Kpotose Aidanga Ni ka Mbu Boro Ya
15. Wai gu mokedi nangia Pauro arengbe ka diabe gu vura ko aasoho kuti agu apai ko arungbura rogoho nangia ga kpakpa borose, na gini kido rengbe ani ka du nani?
15 Gu mokedi nangia Pauro akepai ki yaa: “Rogo re yo nga borose ka wene he nye nga yo te.” (ARomo 7:18) Pauro aima ino pa wai duhe nikpakarakpakaraha fu boro ka sota na gu nyemu ahe gbiati agu arungbura nga ga gu borose du nikpakpaha ti kina boro gupai namangi ko. Wa si avura du wo, Pauro adu adu a na kido ya ko arengbe arengba ka duna diabese rogo gi vura re. (1 AKorindo 9:26, 27) Rogo gini gene? Nikido ko kina kuti Yekova naabaha. Si du Pauro arengbe ti ni ka yaa: “Ako, rungorungo boro nga mi! Da ka batasi re ti gi boro kpio re? Mi natambua Mbori mbiko Yesu Kristo gaani Gbia.” (ARomo 7:24, 25) Ginipai tipa rani tigaani? Ani a nasovura aso kuti agu arungbura nga ga borose. Wa ani asota ka diabe ngbatunga agu arungbura re, si taata fu rani ani zanga duna kido, si ki sa rani ani idi kuti pai zanga kapa nga, ani arengbanga ka duna diabese te. Ono tie, Yekova aundo rani aundo, ka ani kido nirengo kuti Ko a wa Pauro amangihe, angianga ka kido kuti ome rani ya.
16. Ho gu rungbura nga ga borose aidanga ka mbu rani ni ya, ginipai si aida ani kpari tipaha, na ginipai si aida ani mangihe ka ani karaga tirani berewe sa gupai ani aima mbuhe re?
16 Ho gu rungbura nga ga borose aidanga ka mbu rani ni ya, ani rengbe ka yugo gupai nga ani nakido kuti Yekova ni aria ani tirani koyo du ko ni rogo kparakpee yo. Si naida ani sana Yekova tipa gako ziazia toro watadu ka hõ ho beko. (Ruka 11:9-13) Ani rengbe ka sanahe ngburungburu tipa rugatise, nga papara zuzu ga Mbori toro. (AGaratio 5:22, 23) Ginipai ka ani mangi, ka ani karaga tirani berewe sa gupai ani aima mbuhe re? Nirengo, ka ome rani batinga ti sanahe tipa undo ya. Ka ome rani batinga ti kparakpee rogo umbasitise fu gaani Mbori nga boro inapai ya, kini sana ko tipa ko mbupai fu rani na tipa undo. Yekova akanga fu gu boro ‘kpotoniyo arungo’ be gani gbegbere sangbakpotoyo te watadu ka do ni kusayo te. (Atambuahe 51:17) Ka ani kpari ndikidi kpee fu Yekova kini rungo ngbaduraniyo, ko undo rani aundo ani sovura kuti a’asada.—AFiripoio 4:6, 7.
17. (a) Tipagine duhe ti ni ni gupai nafu undo ani berẽkurii wai Yekova aberã tipa gu kparakparapai rungbura ani rogoho ani avura digo nisovura kuti ni? (b) Gini averesi rengbe ani ka maaha ku berã rani yo kangia ani nasota ka diabe imisiringbaduse? ka banda mira rani? ka banda tirani ti ngi gu mbaro angbanga ya?
17 Ani rengbe arengba ka yugo gupai a nga ani nakido kuti Yekova niweteka ani Fugo ko tipa undo. Nimanga ani sunge na gu buku nayugobaraapai kurogo Ziazia Kekeapai watadu Watch Tower Publications Index, ani rengbe arengba ka gbata akaragapai kuti gu sanahe nga, ‘Ginipai Yekova aberãha tipa gu kparakparapai rungbura mi rogoho mi asovura kuti ni re?’ Pa berã ani kuriipa gupai Yekova aberahã tipa gupai re rengbe ka nyakasa rani ani duna nyemu ka fu ngbarago fuko. Si ki ta du were, ani kini tona ka berã wa ko na kini sogo gupai ko asogaha. (Atambuahe 97:10) Gu kura aboro abihe nipa undo ka maa kura averesi nga ga Ziazia Kekeapai ku berãyo yo, nga agu averesi nafura tipa gu kparakparapai rungbura yo rogoho i asovura kuti ni re. Ani nasota ka diabe imisiringbaduse? Fuo duhe tie wo, si adu niwenepai ka ani tingidi agu averesi du wa Asanza 14:17 na AEfeso 4:31. Ani nabihe nikpakarakpakarapai ka banda mira rani? Si adu niwenepai ka ani wiriki agu averesi ngba rirani du wa Asanza 12:18 na AEfeso 4:29. Ani na nyemu ka nge agu ambaro angbanga ya? Si adu niwenepai ka ani tingidi ngbatunga agu averesi du wa AEfeso 5:3 na AKorosaio 3:5.
18. Tipagine si aidanga ti ni ani mbu zee si ka na ani ti sana abaakumba tipa undo ka diabe agu apai rungbura ani rogoho ya?
18 Pa gbata ani undo be agu abaakumba du rogo dungurati ziazia toro asia yo nga gu kura gene ani ayugo gupai rogoho nga ani nakido kuti Yekova. (Amokedi 20:28) Nirengo, agi “agamahe rogo aboro yo” re nga mbakadapai be Yekova rogo Kristo yo ka ngera fuo avusende na ka banda ra. (AEfeso 4:7, 8, 11-14, NW) Nirengo, si rengbe ka du nga si taata fu rani ani sanahe tipa undo be abaakumba tipa ka sovura kuti gupai rungbura ani rogoho re te. Kina zee rengbe ka zio rani, ani kini berẽ ya abaakumba nika bi parani gbua kusende fuo gia yo gipai re. Ono tie, zanga kapa, agi akumba ima nyaka rogo toro re nika fu irisa afu fu rani mbiko gu wingbaduse du ani nani ka yee ka sana yo tipa undo re. Kurii gure, abaakumba namanga nyanyaki asadatise ka yugo ga Yekova asino ho i amangapai ni na rimbasa avusende. Gu wene arugute nga gu nafu wasa i afuhe du rogo Fugo Mbori rengbe ka du nga kina boro guhe nzunzu ani aidaha tipa si nyakasi rani kuti gaani diaberã ka diabe agu apai rungbura ani rogoho.—Yakoba 5:14-16.
19. (a) Rogo gini apai Satana agbata gene ka sa aboro i naamangasunge na gu kungboapai du rogo gi zegino re? (b) Pa kido ani kuti Mbori nakoda gine, na gine si aida ani diberã ka mangaha?
19 Ka bangirani ya gonga ti gupai nga, Satana ima ino gupai nga, gako regbo ima guro ya. (Yugoti 12:12) Ko naida ani mangisunge na gu kungboapai nga ga raka du rogo gi zegino re ka zeresa kpotoraniyo na ki sa rani ani mbu sovura kuti agu apai rungbura ani rogoho. Ani dunga na kido naabaha rogo gupai gumba yo ho rogo ARomo 8:35-39 ki yaa: “Da ka kpara rani ti ga Kristo nyemuse? Rungo, nunga, rungosi, gberãngbi, du kundiri, du ngbapai, na basape? . . . Ono ani nadia adia be agi apai dũ re susi mbiko gu ko nakpi nyemu rani. Mi ini aina ni rengo ya kpio, na unga, na amaraika, na angbi, na agu apai du awere, na agu apai nikaye, na atandu, na ari yo, na dudungura rago, na kura aũzegino, ka si kpara nga rani ti ga Mbori nyemuse du rogo Kristo Yesu yo nga gaani Gbia te.” Nga gu wene afugo nga ga kido kuti Yekova! Ono tie, ngbatunga gu kido kuti Yekova re, anga si nga gupai ani aberãha aberã gbua te. Kuba gure, si nga gu diaberã ani amangaha na a’uru dunduko fuo saka ani pai tipaha mbata. Fuo duhe tie were, ani dinga berã ka kido kina kuti Yekova dunduko ti regbo fudifudiapai.
[Gu rukutu kekeapai du bandu kpewaraga yo]
a Gu Babanda Mosoro nangia ga Amerika ko rimoko angia Salmon P. Chase ake waraga rogo Ngbangba ti rameru 20 rogo gu garã nangia 1861 kurogo gu basunge namanga marã ki yaa: “Anga rikaaboro ho rengbe ka du ninyanyaki yo zanga ome be Mbori te, na bayo ki ngba angba ka ko abandanga yo ya te. Gu kido du ani nani kuti Mbori, si naida i takipandehe kpakpu gu zau-marã yo nga ga gaani ringara.” Nisangbana gipai re, gu rugute du tipa ruru mangaapai nga, “Ani Nakido Kuti Mbori” kini mo ka kura kpakpu gu zau-marã yo nga ga Amerikani rogo gu garã nangia 1864 ti bambata regbo.
b Gu bakabangirise ringbisi yo paha herẽ, si nga gu “bakabangirise nga ga gunde, nga gu nagbandaka ngbarago naabaha dunduko kusayo ti boro.” Gu kura sasa gi fugo re nga, “ka oni bakinga bangironi ya watadu “ka oni sakinga pai berã roni ya.” Ono tie, ngbatunga gu sasafugo re nayugo gupai nga, si aidanga ani tona kaa bakabangirani te. Ono buku sa naya wee: “Gu fugo Giriki re, si nga fugo zinahe, naza boro ni mbu gupai ni aima tona nimangihe.”
c Gu bangiriapai muambe gumba ani paha re gere: (1) Ka oni gundenga ya; (2) oni duna gu berã nga, apai angba angba kumbatayo; (3) oni asadi ka manga gu ngbatunga vovo asunge nga gu ka kuru fu roni; (4) oni raki ringbisihe kina kuti agu ahe du beroni, angianga ka asada ka raka wa gu kura aboro araka ya; (5) oni banda tironi ti dia bape susi ome roni; (6) oni banda gaoni aborokporo i du nikpamiakpamiayo; (7) oni duna irisa tipa tironi; na (8) oni kparaka marã tipa agu ahe oni kaa ngbekaha.
d Agi amagazini du mburuhe rii Ziazia Kekeapai re atambuanga kina pa kura sunge husa kaza sa ti agu akuraha te, mbiko boro nisani nadiaberã tipa gipai re. Gupai i aida ka gumbaha rogo gu keke keke apai nga gu nafura tipa gu kparakpara akaza re, nga ka tingida agu aboro nageda agi amagazini re na agu apai namanga, a wa ini aboro ho ti gu regbo re.
Oni Natingidaha?
• Ho du ani ni rogo zingo mosoro, rogo gini agene rengbe ani ka yugo gupai nga, ani nakido kuti Yekova?
• Wai rengbe ani ka yugo gupai nga, ani nakido kuti Mbori ho kaza afuda rani ni?
• Ho gupai rungbura ani rogoho aidanga ni ka mbu rani ya, wai rengbe ani ka yugo gupai nga, ani nakido nirengo kuti Yekova?
[Sanduki ti kpewaraga 31]
Oni Natingidapa gi Papara Kekeapai Re?
Ho du ani ni na gberarago mbiko gu wokote du ani nani, pa geda ani agu apangbangaa du tipa agu aboro nasota na akaza, agbara, watadu arungo na ki hihe na diabese nangarasa rani. Agu apai du kusende re nga tangaratangarapa gu kekeapai i akusihe rogo aNgbaõbambu Sinziri na Awake! (rogo pa-Ngirisi).
“Coping With My Weaknesses” nga gu nafura gbe tipa gu gbegbere aberã du boro nani gbiati gberarago.—Gu Ngbaõbambu Sinziri nangia ga Merekoko ti rameru 1, rogo 1990.
“Not Even an Iron Lung Could Stop Her Preaching.”—Gu Awake! nangia ga Ngi ti rameru 22, rogo 1993.
“A Bullet Changed My Life” nga gu nafura tipa gu kaza kpoto boro aotora aotora behe.—Gu Awake! nangia ga Tanvuo ti rameru 22, rogo 1995.
“You Do Not Know What Your Life Will Be Tomorrow” discussed coping with bipolar disorder.—Gu Ngbaõbambu Sinziri nangia ga Banduru ti rameru 1, rogo 2000.
“Loida’s Journey out of Silence” nga gu nafura tipa gu kaza nagbarasa berã boro ka agu andikita du tii kpotoniyo amanganga sunge wenengai ya na ka ni afuranga wenengai a ya.—Gu Awake! nangia ga Merekoko ti rameru 8, rogo 2000.
“My Struggle With Endometriosis.”—Gu Awake! nangia ga Bamburu ti rameru 22, rogo 2000.
“My Fight With Scleroderma.”—Gu Awake! nangia ga Buza ti rameru 8, rogo 2001.
“I Won My Battle With Postpartum Depression.”—Gu Awake! nangia ga Bamburu ti rameru 22, rogo 2002.
[Gu kpiahe du ti kpewaraga 29]
Si adu nipatatamana ani wisigi gaani gene raka ho mbu yo rani ni ti sunge
[Gu kpiahe du ti kpewaraga 30]
Gu pangbangaa du tipa Loida nayugo wai pa kido ani kuti Yekova aundo rani. (Oni bi gu sanduki du ti kpewaraga 31)
[Gu kpiahe du ti kpewaraga 32]
Si aidanga ani duna zee ka sanahe tipa undo ka diabe agu apai rungbura ani rogoho te