Oni Kido Kuti Yekova Wa Digido Rago Ambeda

“Oni kída kuti Yekova nye anye kindi.”​—YES. 26:4.

1. Gini kparakparapai du dagba ga Mbori amoyambu na aboro zegino?

DUNGU Aboro rogo gi zegino ani araka rogoho re ainongo gu boro berewe watadu guhe ka i kido kutini ya, isoke gipai re wo mbiko gu imisiri gbiayo tiyo nani watadu agu aboro i akido kutiyo ima nanga yó bara dunguhe. Nairiwo gu kparakparapai du dagbayó na ga Yekova amoyambu! Mbiko gu tatamana naye ariyo, ga Yekova amoyambu ima ino gupai wenengai nga si aidanga i kido kuti gi zegino re watadu gaha “abarumbatayo” te. (Tam. 146:3) Kuba gure, i nambu gu gayó raka du awere na gu du kumbatayo kube Yekova, ki ini gupai nga ko ima kpinyemuyo na ko duwa ka ko digisi gupai ko agumbaha.​—Rom. 3:4; 8:38, 39.

2. Ginipai Yosua agumbaha tipa kido kuti Mbori?

² Yosua naraki bakuru kusayo aima ida kuti gupai nga si rẽarẽ aboro kido kuti Mbori. Ho Yosua aambeda ni ka kpi, ko aya fu awiri aYisaraere wee: “Oni dunduko ini he kpotoroni yo na mbisimoroni, ya a nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.”​—Yos. 23:14.

3. Ginipai rimo Mbori ayugoho tipa ko?

³ Yekova adigisonga gako amokido gbua mbiko gupai nga ko nakpinyemu rani te, ono gbe mbiko pa rimoko. (Gate 3:14; 1 Sam. 12:22) Nibipa gu rimo Mbori re, gu tonatona afugo du rogo gu Ziazia Kekeapai Joseph B. Rotherham asaha nayaa: “[Rimo Mbori nga Yekova] nafu bakere kido furani; Si nayugo gupai nga Mbori nasaka tiko asaka tipa ka manga gupai du zingoho ho, . . . [Gu rimoko re nga] mokido, . . . yugoti, tingidapai, na mozunga. Mbori ahenga mangapai ringbisihe kuti gu rimoko re te; na si ayengo na pazee fuko te.”

4. (a) Ginipai Yesaya 26:4 angarasa rani ani mangihe? (b) Gini apai ani ka makiaha rogo gi kekeapai re?

⁴ Oni sananga tironi nga: ‘Ya mo mi ini Yekova wenengai tipa ka kido kutiko na kpotore yo dunduko? Ya mo mi nangera kumbatayo zanga gunde mbiko ino mi gupai nga Mbori du apai dunduko kutii beko?’ Yesaya 26:4 nayaa: “Oni kída kuti Yekova nye anye kindi, mbiko Yekova Mbori du ni nyenye mbia.” Nirengo, Mbori amanganga apai fu aboro awere ngba iiriwo gene wa gu nadu ti agu aregbo i aake Ziazia Kekeapai te. Wa vura duhe wo, wa du Yekova ni gu Mbori du ni “nyenye mbia,” ani rengbe arengba ka kido kutiko “nye anye kindi.” Wai gu Mbori aundo ruru airisiko areme? Ani makianga agene biata: Ko nanyakasa rani ho ani agbata ome ni tipa ka diabe asada, ko nasongoda rani ho ani agbiatirani ni na agu aboro aidanga na gaani wene pangbanga ya watadu agu aboro nasoga rani, na ko nafu ome furani ho du ani ni na bakere bakabangirise. Wa ani kaa makiapai tipa agi agene re, ani berẽkuriipa wai rengbe ani ka nyakasa gaani kido kuti Yekova.

Oni Kido Kuti Mbori Ho Oni Agbiatironi ni na Asada ka Manga Ingapai

5. Nibipa gu kido du ani nani kuti Mbori, gini regbo rengbehe kadu nikpakarakpakaraha?

⁵ Si rengbe kadu taata fu boro ní kido kuti Yekova nibipa gu gako kidohe du tipa Paradizo gbiati zingabekpio, nga agu ahe ani amaabangirani tipaha. Ono si rengbe kadu nikpakarapai ka kido kuti Yekova ya mangapai ringbisihe kuti gako agene gbiati arugute nika ye na ndikidi ngbarago furani. Bakindo Soromo afu rugute ki yaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” (Snz. 3:5, 6) Oni kparia gupai ko apehe nga rogo gaani “apai” dunduko. Nirengo, si naida ani kido kuti Yekova rogo gaani apai naabaha, angianga kadu naa kido sa tipa kina agu amokido ko namangihe ya. Wai gu rengbe ani ka yugu gu kido re ka ani gbiatirani na asada?

6. Wai gu rengbe boro ka nyakasa gani diaberã ka ne gbegberẽ aberã?

⁶ Boro natona ne gbegberẽpai berãni yo. (Oni gedi ARomo 8:5; AEfeso 2:3.) Wai gu tie rengbe boro ka nyakasa gani diaberã ka ne gbegberẽ aberã? Ani makianga agi agene du bisue re: 1. Oni gbata ga Mbori undo rogo kparakpee. (Mt. 6:9, 13) 2. Oni berẽkurii agu akpiapai du rogo Ziazia Kekeapai tipa agu aboro nadegetuyo fu Yekova na aguyo naadeganga tuyo ya. Na oni wisigi agu apai namangi fuyó nibasasa dunduko.a (1 Kor. 10:8-11) 3. Oni berẽkuriipa gu gberarago gbiati rungo ka oni ye nani kuti roni na agu aboro nakpinyemu roni. 4. Oni berẽpa gu gberarago ka Mbori du nani ka gako moyambu mangi bakere ingapai. (Oni gedi Atambuahe 78:40, 41.) 5. Oni makiapa gu ngbarago Yekova adu nani ho gako ruru moyambu ane gbegberẽpai ni ki mangi rurupai, singia dagba aboro watadu ho du ní ni nisani. (Tam. 15:1, 2; Snz. 27:11) Oni rengbe arengba ka yugo gupai nga oni nakido kuti Yekova.

Oni Kido Kuti Mbori Ho Aboro Asoga Roni ni Watadu Ho I Asoga Wene Pangbanga Ni

7. Gini aasada Yeremaya agbiatiko nani, na wai gu ko aniidu ti kura aregbo?

⁷ Dungu awirinarani natungusapai rogo gu dagbarago du nikpakarakpakaraha gbe. Gu nebi nangia Yeremaya namangisunge rogo ngbatunga gu dagbarago re, ko atakipande ga Mbori sapangbanga rogo gu Kindo nangia ga Yuda ti gu regbo digidoho aambeda. Aʹuru dunduko i anaaʹasada gako kido kuti Mbori mbiko ko atakipande ga Mbori sapangbanga kina wai Yekova aruguko. Ti kura regbo sa, gako ruru bakeapai a nangia Baruka atona ka kpakanahe be mbugo. (Yere. 45:2, 3) Ya mo Yeremaya ambu gu sunge re mbiko zerakpotoseyo? Nirengo, kura aregbo kinaho ko anidu adu na bakere gberarago. Regbo kinaho ko ayaa: “I tíwa gu uru i avungu re ti ni.” Ko aya berewe wee: “Tipagine mi akuru ti ni rukumbu yo ka bi mbugo na rungo, ka nyasa gimi arame rogo zee?”​—Yere. 20:14, 15, 18.

8, 9. Ringbisihe kuti Yeremaya 17:7, 8 na Atambuahe 1:1-3, ginipai si aida ani nimangihe amanga kindi tipa kadu na diabese?

⁸ Wa apai avura manga Yeremaya wai vurũ, ko ambunga mangasunge fu Yekova te. Ko aakido kuti Yekova kindi. Nisangbana gipai re, gu ruru nebi re abi digisidigisi gu fugo Yekova du rogo Yeremaya 17:7, 8 nga gu nayaa: “Boro maku nga gu boro nakida kuti Yekova, du gani maabangirise nga Yekova. Ni wa ngua rũ yo ho pangba ime, nga gu nakparaka tarãha ku ime yo, ka si agunde nga ho faarago nida ni ya, bambiko akpehe ninye ni kina iwo ho, ka ngbaduhe akua nga garã ugure ya, bambiko si aongoda nga ti zu te.”

⁹ Wakina gu ngua nakusa zuzuhe nga gu i arũhe “pangba ime,” Yeremaya “aongoda nga ti zu te.” Ko ambunga gu gbegberẽ airasawia nadu patiko kirikiri i dibeko te. Kuba gure, ko akakuti Ziazia Kekeapai nga mburu gu ‘ime’ nafu unga na ki banda agu apai dunduko Yekova agumbaha fuko. (Oni gedi Atambuahe 1:1-3; Yere. 20:9) Nairiwo gu wene kpiapai Yeremaya amoihe furani re, gbe fu agurani natungusapai rogo gu dagbarago du nikpakarakpakaraha! Ka si du nga wo duhe tipa roni, oni nikido kina kuti Yekova tipa ko undo roni oni du na hipai wa ‘gu zuzuhe nga ga ngbaroni nikaa kusa pa rimoko.’​—Eb. 13:15.

10. Gini amaku Yekova nafuhe furani, na gini sanahe si aida ani sana tirani nani?

¹⁰ Tipa ka undo rani ani du na diabese rogo raka ti gi yangara arame re, Yekova ima fu dungu agu ahe nga ga toro furani. Dagba gu dungu ahe fuko ho furani, ko fu Fugoko nga Ziazia Kekeapai furani nga gu i asaha zukazuka kurogo dungu afugo. Ko fu gu riahe furani nga ga toro kpaima vurube gu riko nga ga ruru kangara moyambu. Na ko fu gu bandahe furani a nga ga akuarani aidipase nga aguyo ani agbia yó ba adunguratise yo na ba kikindigi adunguratise yo. Ya mo oni namangasunge na agi amomu re ngba wene gene? Agu aboro namangaha wo, i “abí bia mbiko ngbarago kpotoyo yo.” Ono tie, agu aboro adeganga tuyo fu Mbori ya, i “akpára kpe mbiko rungo kpotoyo yo . . . i ayóra wawa mbiko gu fudifudipai nga ga toro.”​—Yes. 65:13, 14.

Oni Kido Kuti Mbori Ho Du Oni ni na Bakabangirise

11, 12. Nibipa gu fudifudiapai nga ga zegino, gini patatamana si aida ani mangihe?

¹¹ A wa i aima gumbaha bakuru kusayo, ngbatunga aboro dunduko nagbiatiyo na fudifudiapai. (Mt. 24:6-8; Yugo. 12:12) Ho ikiʹiki ime mai afu ni kurogo ba, gupai dungu aboro naamangaha nga ka dakpa kurogo gu ba du nitumbatumbaha kuari gbe. Wakina gure a, wa fudifudiapai asona kumbatayo wakina gu ime nafu naʹarago dũ, dungu amirioni aboro nagbata bagbuko rogo gu kikindigi ariigbu nga ga pambori, ga birĩ-zogarago, gbiati gu nga ga birĩ-ino-mangaahe. Ono agi ahe re afunga ndikidi bagbuko fuyó te. (Yere. 17:5, 6) Ono tipa ga Mbori amoyambu tigayo, ndikidi bagbuko kina beyo, nga gu Mbori “du ni nyenye mbia.” (Yes. 26:4) Bake apapara Atambuahe ayaa: “[Yekova] nga gi mbia nga gi bata, nga gi sosono kirikiri gbata.” (Oni gedi Atambuahe 62:6-9.) Wai gu ani asa gi Mbia re nigaani bagbuko?

¹² Ani nakakuti Yekova ho ani airisa agu apai ni du rogo Fugoko yo, nga gu angarasanga aboro i merefuo gu tatamana nga ga aboro ya. (Tam. 73:23, 24) Nikpiapai, agu aboro namangapai kuti gu tatamana nga ga zegino rengbe ka yaa: ‘Rakaro gbua sa; mo mangisunge amanga nani wenengai.’ ‘Mo wiriki wene sunge tipa ka mangaha.’ ‘Mo mangi marã amanga wenengai.’ ‘Mo ngbe gere, ki ngbe gure.’ ‘Mo ta rogo zegino; ki ngba be zegino.’ Ono tipa gu tatamana naye ariyo tigaha, si naruga aboro ringbisihe kuti rugute nga gu nayaa: ‘Agu yo namanga pai na gi zegino re, ka i kanga kutini ya; bambiko pa gi zegino re nago ago.’ (1 Kor. 7:31) Wakina gure a, Yesu angarasi rani ki ya ani moi agu apai nga ga Kindo mbatayo na ki ‘dúngura ũkumuko ni gaani ku ngbangbaturũ yo,’ yo si nikadu ni nibanda bandaha.​—Mt. 6:19, 20.

13. Na gu veresi du rogo 1 Yoane 2:15-17 berãrani yo, gini apai si aida ani sana tirani nani?

¹³ Ya mo gu bipai du oni nani tipa “zegino” gbiati “agu ahe du zegino” nayugo gupai nga oni nakido kuti Yekova rogo apai yo dunduko? (1 Yo. 2:15-17) Ya mo agu asunge nga ga Kindo na nyanyakipaha bangironi kisusi agu ahe nga ga zegino? (Frp. 3:8) Ya mo oni naasada tironi tipa ka banda ‘bangironi niruruhe’? (Mt. 6:22) Rengo ngaha nga, anga gupai Yekova aidaha nga oni mbu pa tironi ambu zanga ngerafuo tironi na gaoni aborokporo te. (1 Tim. 5:8) Gupai Yekova aidaha nga gako amoyambu kido kutiko rogo apai yo dunduko angianga kuti gi ga Satana zegino napaya apaya re ya.​—Eb. 13:5.

14-16. Wai gu kura awirina agbia amaku mbiko banda yó ‘bangiriyo niruruhe’ na mbiko maa yó agu apai nga ga Kindo rogo bambata ba?

¹⁴ Oni makianga gu kpiapai nga ga Richard na Ruth nga agu avunguagude du na rukutu agude beyo biata. Richard agumba gupai nga: “Kpotore yo anaagumba gupai fere nga, mi rengbe arengba ka kiiso gi sunge fu Yekova.” “Mi aaraka wene raka ono mi abi gupai nga mi anaafu kina umba regbo gbua fu Yekova. Fuo manga mi kparakpee tipa gupai re na ki wisigi bakio gu marã ani arengbe arengba ka bata mbikoho, ani adakuti gupai na Ruth nga, mi sana gi bangerekuriisunge tipa kaa mangasunge gbua tipa aʹuru biama rogo poso sa, wa si avura du vurũ nga zingo marã adu ti gu regbo re nikerehe rogo gi ringara. Gimi bangerekuriisunge aidi na gupai mi agumbaha re mi ki tona kaa mangasunge tipa aʹuru biama rogo poso tifuo diwi sa.” Wai gu Richard abi gu diaberã ko amangihe re awere?

¹⁵ Ko agumba gupai nga: “I ade gi marã sunge na 20 rii kama ti gu mi anaazioho mbata, ono mi awere na gu kura aʹuru 50 vuru garã yo tipa kadu na gimi aborokporo na ka raba awire. Mi kiisi gu regbo mi adiaha ku gene tungusapai yo, namba agu aboro mi awisigo Ziazia Kekeapai naayó ima gbisa kuari bara biata ti gu naanidu mbata, na mi nangbe kumbatayo rogo dungurati rogo dungu apai yo. Wa duhe nga regbo kina bere tipa ka sungo na agude kporo, diare ninaagbia momu agbia dedede tipa kaa tungusapai nimoundo abazakigene. Mi naida ka manga gipai re wo tipa gbanga regbo.”

¹⁶ Wirina du rimoko nga Roy gbiati diako nga Petina nga aguyo du na wiriyo nidegude kindi kporo amangi gupai nga ka zogosa bete sunge marã tipa kaa mangasunge tungusapai ti aregbo dũ. Roy ape gupai nga: “Mi namangasunge tipa aʹuru biata rogo poso sa na Petina kini mangihe tipa aʹuru ue. Ani aguari rogo gu bakiki bambu ani adu rogoho ki ga kurogo gu umbaha nga gu du taata tipa ka ngera fuoho. Mbata fu ani vungu, ani anaatungusapai ni abazakigene, zavura fuo vunga ani, nyemu sunge abazakigene aagonga tirani te. Sidu, fuo awirani sosono, ani akaraga tirani berewe kuti sunge abazakigene. Bakio marã ho ka susi agu amaku gbia ani he te.”

Gu “Zereda Nga ga Mbori” Banda Kpotoroni Yo

17. Wa duhe nga boro ho rengbe ka ino gupai nika manga funi kumbatayo te, gini wasa Ziazia Kekeapai afuhe?

¹⁷ Boro ho dagbarani ini gupai nika manga gba te, mbiko ‘rago gbia kuti mamu namanga furani dũ.’ (Batu. 9:11) Wa vura duhe nga boro ho rengbe ka ino gupai nika manga gba te, si aidanga ani mbuhe si di gaani ngbarago areme kusayo wa si naadia gu ngbarago nga ga agu aboro adunga Yekova ni gayó bagbuko ya te. (Mt. 6:34) Gu mokedi nangia Pauro akepai ki yaa: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã.”​—Frp. 4:6, 7.

18, 19. Yekova nafu wasa furani ngba gini agene? Oni funga kpiapai tipa ka yugo gipai re.

¹⁸ Badungu awirina ninaagbia tiyo na fudifudiapai ono kini gbia zereda agbia kpotoyo yo be Yekova. Wirina sa nidee agumba gupai nga: “Gu munganga nadu tipa gba gimi kaza aamanga ome ti aregbo dunduko ka gundesi re tipa mi idi i fu kure kutii kpotore yo. Gu bambatapai ko anaagumbaha fere ho ko aniye ni nga: ‘Ginipai mi ambu ti ni bero naapa ka kure?’ Ti kura aregbo mi anikpari fu Yekova rogo patapata, ko ki ukadi re na gako zereda. Gu zereda re anaanyakasa re wakina mbia. Wa omere avura nyasa mbiko kure adu tii kpotore yo gbua tooni, mi aima rengba ka fu ndu gupai mi aidanga kure ti ni ya ringbisihe kuti gupai du rogo Ziazia Kekeapai.”

¹⁹ Mbori rengbe ka songoda rani ti kura aregbo vurube gu wirina nga guni ka ye ka fu wasa furani watadu vurube gu riahe nga ga toro kina boro ti gu regbo ani aidaha ti ni. Isoke, oni aima gia gupai ngba wirina nga: “Gi kekeapai re ye nzunzu ti kina regbo ho. Boro i akehe nzunzu tipa kina re!” Nirengo, ka kina boro ginipai vura kaa manga rani wai vurũ, Yekova nika yugo gako nyemuse ayugo furani ka ani kido kutiko. Gu garakaha agaraka berewe nga, ani nga gako “akandoro” na rimoko du kurirani.​—Tam. 100:3; Yo. 10:16; Amo. 15:14, 17.

20. Tipagine ga Yekova amoyambu nikadu ti ni nibandabanda yó ho digido ga Satana zegino nika da ni?

²⁰ Ti rago gu “dingidingi ngbaduse nga ga Yekova” nga gu naima mbeda ka da, i nika gbarasa agu ahe dunduko gu zegino nga ga Satana akido kutini. Dahabu, feda, gbiati gu kura kikindigi pa ahe arengbanga ka banda aboro ti gu regbo re te. (Zef. 1:18; Snz. 11:4) Gu yangara bagbuko nika duho gbua nga kina Yekova nga gu Mbori “du ni nyenye mbia.” (Yes. 26:4) Sidu, ani yugu gaani kido kuti Yekova nimanga ani apai kina ngba gu gene ko aida nani, nitungusa ani pa Kindo wa vura duhe nga ani nagbia tirani na agu aboro aidanga na gupai ani atungusaha ya vurũ, na niuka ani gaani abakabangirise dunduko ku auru Yekova. Ka ani mangi agi apai re dunduko, ani ‘araka ni bandabanda rani, kidu zezeredi zanga gunde be gbigbitapai.’​—Snz. 1:33.

[Gu rukutu kekeapai du bandu kpewaraga yo]

Oni Rengbe ka Sakarogoyo?

Wai rengbe ani ka kido kuti Mbori

• ho ani agbiatirani ni na asada ka manga ingapai?

• ho ani agbiatirani ni na agu aboro aidanga na gupai ani atungusaha ya gbiati aguyo nasoga rani?

• ho du ani ni na bakabangirise?

[Gu sura du ti kpewaraga 15]

Kakuti ga Mbori arugute naye na ngbarago

[Gu sura du ti kpewaraga 17]

“Yekova Mbori du ni nyenye mbia”