Ziazia Kekeapai

Rengbe Arengba ka Undo Roni Rogo Gaoni Rogatise

GU FUGO nga rogatise, si naye na wene aberã kurii bete aboro yo. Tipa kura aboro, si naye na kina kazarii fuyo. Dee afura ninunga ki yaa: “Mi naabi tire wa kumba aima mbu re, . . . na ki ima gindigo re, mbiko mi nasungo nisare ti aregbo dunduko.”

Gine nasa agu aboro naima manga mozunga ka kpinyemu tiyo dagbayo na ka ngera fuo tiyo, i zanga duna nyemuse dagbayo wa ngbatunga gure? Ndupai sa dagba agu akuraha nga, zingo wirika aboro pai mbata tipa ka ino rogo agu apai yo du tipa rogatise. Bakeke agu apangbangaa nga ga akaza ayaa: “Ani naamanga rogatise zanga i yugupai fu rani tipaha mbata kandara tooni.”

Gupai nayugo gu rengo nga, kina bete bange aboro areme gbua ini rogo agu apai yo du tipa rogatise, si niyuguyuguhe be gu wisigopai gu rondo nga, The National Marriage Project (Gu Rondo Du Tipa Saka agu Apai Du Tipa Rogatise) amangihe, nga gu sunge wisigopai i atonaha rogo gu bakere bawirikapai nga Rutgers University du New Jersey yo Amerika yo. Barugupasunge rogo gu basunge re akepai ki yaa: “Dungu agu aboro ani abiyo ti regbo gu wisigopai re angia agu aboro nasono tiibe agu avunguyo naadunga na ngbarago rogo gayo rogatise ya watadu nangia agu avunguagude naima mbu tiyo. . . . Agi aboro ani abi yo re ima ino wai nzunzu du guhe nga gbegbere ramukporo dagba kumba na diani, ono i aruganga tiyo na pa wai du gu wene ramukporo nga ga rogatise dagba kumba na diani te. Beteyo rengbe ka ringbisipa wene rogatise ya ‘si nga gu rogatise du kia ti ga avungure.’”

Ya mo aKristano tigayo ni agu aboro duna ziga beyo tipa zanga du kpakarakpakaraapai rogo gayo rogatise? Oó. Nirengo, si aidi i fu nyanyaki arugute fu bete agu aKristano nadu rogo bambata sa kama agarã tipa ka i “gbata nga [gene] kparaka na . . . [adiayo] ya.” (1 AKorindo 7:27) Si tie ziazia nga, agu arogatise dunduko nga ga kpakpa aboro nika duadu na fudifudiapai rogoho, ono undo kinaho berani. Akumba gbiati adiayo rengbe arengba ka mbakada gayo pagume dagbayo nimanga yo agu arugute nga ga Ziazia Kekeapai adunga ngburungburu ya.

Rengo ngaha nga, anga Ziazia Kekeapai nga gu buku nafu kina agu arugute du tipa gu ramukporo nga ga rogatise sa te. Ono wa duhe nga gu buku re Mbori nasa gupai nga i kehe na kingia gu Boro naenge pa gu mbakadapai nga ga rogatise, sidu, ani rengbe ka maabangirani ya, gu gaha arugute adunga ngburungburu ya rengbe arengba ka fu undo. Rogo gu nebi yo nangia Yesaya, Yekova Mbori ayaa: “Mi nga Yekova ga Mbori, nayugo pai foro sa u, nga gu ko nangbe ku mbata yo foro ngba gu gene mo ka ndu ngba ha. Akõ! ka mo adege turo sa gimi arugute! Si du ka ga zereda adu ti ni wa di, na ga rurupai wa ngiri baime”—Yesaya 48:17, 18.

Gu nyemuse oni adu nani mbata dagbaroni na gaoni badiarogatise ima tona kaa gbandaka kusayo? Oni nabi tironi wa oni nizizi roni kurogo gu rogatise adunga na nyemuse rogoho ya? Dee sa nga guri namangi agarã 26 ku kumbaari yo ayaa: “Si nikpakarakpakaraha fu boro ni ringbisipa gu ima naye be gi ngbatunga rogatise re. Si nigu ima aidanga ka guari kusayo ti boro ya ono si nanyeanye kuti ni kindi.” Kuba gupai nga gaoni rogatise du nidingisoro zanga ngbarago, tipagine ka oni adianga berã ti ni ka guari ka mbakadaha ya? Gu papara kekepai naye fuo gere nika yugo gupai fu akumba na dereakumba, wai agu arugute nga ga Ziazia Kekeapai adunga ngburungburu ya narengbe ka undo yo rogo gayo rogatise rogo pai sa, nga gu ngbaanga nga ga rogatise i amangihe tipa ka kpinyemu tiyo dagbayo.